SOCO(H)

[mabalin a, Sanga [ti Maysa a Kayo]].

1. Maysa a siudad ti Juda iti Sefela, agparang a natukoy agpadpada kas Soco ken Socoh. (Jos 15:20, 33, 35) Inummong dagiti Filisteo ti buyotda idiay Socoh ket kalpasanna nagpakarsoda iti kabangibang nga Efes-dammim sakbay ti pannakiranget ni Goliat ken David. (1Sm 17:1) Tawtawen kalpasanna, agparang a daytoy a Soco ket karaman kadagiti siudad a pinabileg ni Rehoboam. (2Cr 11:5-7; ngem daytoy a teksto ket mabalin nga agaplikar iti Num. 2.) Nupay kasta, ti Soco, agraman dagiti agpampannuray nga ilina, ket kinautibo dagiti Filisteo kalpasan ti nasurok a 200 a tawen, bayat ti panagturay ni Ari Acaz. (2Cr 28:16-18) Maikunkuna nga isu dagiti rebba idiay Khirbet ʽAbbad (Horvat Sokho), iti Nababa a Tanap ti Elah nga agarup 4 km (2.5 mi) iti daya nga abagatan-a-daya ti Azeca. Nupay ti nagan iti Biblia ket kasla nataginayon ti Khirbet Shuweikeh, nga adda laeng iti dayaenna.

2. Ti Socoh ket maysa a siudad iti kabambantayan a rehion ti Juda. (Jos 15: 20, 48) Kadawyanna a maikunkuna nga isu ti Khirbet Shuweikeh, agarup 17 km (11 mi) iti abagatan a laud ti Hebron. Naiduma daytoy a Khirbet Shuweikeh iti daydiay nadakamat iti Num. 1.

3. Ti Socoh ket maysa a lugar nga imatmatonan ti maysa kadagiti diputado ni Solomon. (1Ar 4:7, 10) Maikunkuna nga isu dayta ti Khirbet Shuweiket er-Ras, agarup 15 km (9.5 mi) iti laud nga amianan-a-laud ti Samaria, ket kasla tumunos iti salaysay, yantangay dagiti maikunkuna a disso ti Arubot ken Hefer (nadakamat a kadua ti Socoh iti salaysay ti Ar-ari) ket adda laeng iti asidegna.

4. Iti listaan ti kapuonan ni Juda, ni Heber ket naawagan nga “ama ni Soco.” (1Cr 4:18) Mabalin a ti Soco ket personal a nagan ti kaputotan ni Heber, wenno mabalin nga ipasimudaag ti teksto a ni Heber ti namunganay iti siudad ti Soco wenno iti populasionna. No ipapan nga umiso ti naud-udi a kasasaad, saan a masinunuo no ti matuktukoy ket Soco(h) Num. 1 wenno Num. 2.