KANTA
Maysa a putar a buklen ti musika ken sasao; maysa a naindaniwan a putar. (Kitaenyo ti MUSIKA.) Agarup apagkapullo ti intero a Biblia ket kanta, a dagiti kangrunaan a pagarigan ket ti Salmo, Ti Kanta ni Solomon, ken Un-unnoy. Nupay ti Kasuratan mangtukoy iti sekular a kankanta, kas iti kankanta ti panangumsi ken ti panangsulisog, kaaduan kadagiti agarup 300 a panangtukoy ti Biblia iti daytoy a suheto ket nainaig iti panagdaydayaw ken Jehova a Dios. Kaaduanna, ti panagkanta ket nainaig iti rag-o, kas ipakita ti insurat ti adalan a ni Santiago: “Adda aya asinoman a maragragsakan? Agkanta koma kadagiti salmo [kankanta ti panangidaydayaw iti Dios].” (San 5:13) Ti kankanta a mangyebkas iti ladingit mabalin nga ad-adda nga umiso nga awagan iti dungdung-aw.—Am 8:10; kitaenyo ti DUNG-AW.
Ti damo a kanta a nailanad iti Biblia isu daydiay kinanta ni Moises ken ti lallaki iti Israel, a sinungbatan ni Miriam ken ti babbai, apaman a naispalda idiay Nalabaga a Baybay. (Ex 15:1-21) Karaman iti dadduma pay isu ti pammakada a kanta ni Moises, kanta-ti-balligi da Debora ken Barak, ken ti dung-aw ni David a nangyun-unnoy iti ipapatay ni Saul ken ti patpatgen ni David a gayyemna a ni Jonatan. (De 31:30; 32:1-43; Uk 5:1-31; 2Sm 1:17-27) Dagiti kanayonan a putar ni David ramanenda ti di kumurang a 73 iti Salmo. Tukoyen met ti Biblia “ti kanta ni Jehova,” a nadakamat mainaig iti panangisubli ni Ezekias iti nasin-aw a panagdaydayaw, kasta met ti ‘kanta ni Moises ken ti Kordero.’—2Cr 29:27; Apo 15:3, 4.
Saan laeng nga iti Salmo ti pagparangan dagiti panangtukoy iti “baro a kanta” no di ket uray met iti sursurat ni Isaias ken ti apostol a ni Juan. (Sal 33:3; 40:3; 96:1; 98:1; 144:9; 149:1; Isa 42:10; Apo 5:9; 14:3) Ti panangsukimat iti konteksto iti aglawlaw ti kaaduan a nagparangan ti sasao a “baro a kanta” ipalgakna a nakanta ti kasta gapu iti baro a pasamak iti panangwatwat ni Jehova iti sapasap a kinasoberanona. Kas sirarag-o a naiwaragawag iti Salmo 96:10: “Ni met laeng Jehova nagbalinen nga ari.” Agparang a ti suheto daytoy “baro a kanta” isu ti baro a paspasamak iti panangpalawa ni Jehova iti kinaarina, kasta met ti kaipapanan dagitoy agpaay iti langit ken daga.—Sal 96:11-13; 98:9; Isa 42:10, 13.