ESPANIA

Maysa a pagilian a masarakan iti Peninsula ti Iberia iti makin-abagatan a laud a Europa. Kalpasan ti panangsarungkar ni apostol Pablo kadagiti Kristiano a taga Roma, ninamnamana nga itulod isuna dagiti kapammatianna idiay Roma iti sumagmamano a distansia iti dalanna nga agturong idiay Espania. (Ro 15:23, 24, 28) Saan a masigurado no nakagteng ti apostol idiay Espania. Nupay kasta, dinakamat ni Clemente ti Roma (a. 95 K.P.) a nakagteng ni Pablo “iti kaadaywan a paset ti Laud,” a nalabit karaman iti dayta ti Espania. (The Ante-Nicene Fathers, Tomo I, p. 6, “The First Epistle of Clement to the Corinthians,” kap. V) No nakagteng iti dayta a daga, ti isasarungkar ni Pablo nalabit napasamak iti nagbaetan ti pannakaluk-atna iti umuna a pannakaibaludna idiay Roma (a. 61 K.P.) ken ti pannakaibaludna manen sadiay idi agarup 65 K.P. Iti daydi a tiempo, ti Espania ket iturturayan ti Roma. Kunaen ti sumagmamano a ti Tarsis isu ti makin-abagatan a paset ti Espania.​—Kitaenyo ti TARSIS Num. 4.