ESTORAKE

[Heb., liv·nehʹ].

Ti nagan daytoy a kayo iti Hebreo kaipapananna ti “puraw,” ket ti nainaig nga Arabiko a sao a lubna mayaplikar iti kayo nga estorake (Styrax officinalis). Agtubo ti estorake kas bassit a kayo, a manmano a malab-awanna ti katayag nga 6 m (20 pie). Naruay dayta idiay Siria, a sadiay nga inusar ni Jacob ti rawrawis dayta (Ge 30:37), ken iti intero a Palestina, a masansan nga agtubo kadagiti namaga a bakris ken kadagiti kabatuan, a sadiay matagipateg ti linongna. (Os 4:13) Ti sukog-itlog a bulbulongna, nga agtubo kadagiti atiddog a nalap-it a babassit a sanga, ket berde ti rabawna ngem delana a puraw ti sirokna. Dagiti naparang a sabong agraman dagiti puraw a petaloda ken makaay-ayo a bangloda umasping unay iti sabsabong ti kahel.