LUMALANGOY
Tao a kabaelanna ti bumatok, tumpaw, ken lumasat iti danum babaen ti panangusarna iti taktakiag ken saksakana. Makalangoy ti kaaduan kadagiti nagkauna a tattao. (Eze 47:5; Ara 27:42, 43) Iti maysa a nagkauna nga Egipcio a teksto, dakamaten ti maysa nga ama a nagsursuro nga aglangoy dagiti annakna, ket dagiti timmambukor a kitikit ti Asiria iladawanda nga aglanglangoy dagiti mannakigubat, masansan a babaen iti tulong dagiti napabussog a lalat.
Masapul idi nga ammo dagiti mangngalap ti aglangoy. No agaramatda iti iket a pagdaklis, masansan a bumatokda iti danum ket guyodenda nga ipababa ti addaan padagsen a paset ti iket tapno maporma ti lansad ti iket. Nalawag a nalaing a lumalangoy ni Pedro agsipud ta maysa a mangngalap. (Jn 21:7, 8) Ngem idi nagna iti danum, nangrugi a lumned ket nagpaarayat ken Jesu-Kristo. Mabalin a gapu daytoy iti kasta unay a kinadawel ti danum, ken ti mismo a panagbuteng ni Pedro.—Mt 14:27-31.
Iti maysa a padto maibusor iti Moab, tinukoy ni Isaias dagiti gunay ti maysa a lumalangoy idi kinunana: “Ti ima ni Jehova agyanto iti daytoy a bantay, ket ti Moab maibaddebaddekto iti lugarna kas no ti maysa a bunton ti garami maibaddebaddek iti lugar ti ibleng. Ket ikayaw-atnanto [iti literal, iyunnatnanto] dagiti imana iti tengnga dayta kas ti panangikayaw-at kadakuada ti lumalangoy tapno aglangoy, ket ipababananto ti kinatangsit dayta babaen kadagiti mangallilaw a panaggunay dagiti imana.” (Isa 25:10, 11) Daytoy a patarus, kasta met ti patarus iti Griego a Septuagint, isingasingna nga iyunnat ni Jehova ti imana maibusor iti Moab tapno mangipagteng kadagiti makadadael a didigra. Ngem pagparangen ti sabali pay a patarus a ti Moab ti aglanglangoy. Kas pagarigan, kunaen ti American Translation: “Ti ima ti APO agsaadto iti daytoy a bantay, ngem ti Moab maibaddebaddekto iti nagsaadanna, kas ti pannakaibaddebaddek ti garami iti danum ti abut nga ayan ti ibleng; ket nupay iyukradna ti im-imana iti tengnga dayta, kas iti panangyukrad ti lumalangoy iti im-imana tapno aglangoy, ti panagpannakkelna maipababanto iti laksid ti amin a panangallilaw ti im-imana.”