TAMAR
[Kayo a Palma].
1. Manugang-a-babai ni Juda nga anak ni Jacob. Nagbalin nga asawa ni Tamar ti inauna nga anak ni Juda a ni Er. Ngem ni Jehova pinapatayna ni Er gapu iti kinadakesna, isu a nabalo ni Tamar. Kalpasanna, naited kenkuana ni Onan, ngem pinapatay ni Jehova gapu ta saanna nga inaramid ti kaugalian a panangasawa iti nabalo nga ipag, isu a nagtalinaed latta ni Tamar kas balo nga awanan anak. Intantan ni Juda nga ited kenkuana ti maikatlo nga anakna. Inlimed ni Tamar ti kinasiasinona ket nagpammarang a balangkantis tapno maallukoyna ni Juda a makidenna kenkuana, ket sisisikap nga innalana ti pangselio a singsing, singdan, ken sarukod ni Juda kas pammatalged. Idi naammuan ni Juda a masikog ni Tamar, imbilinna a mapuoran kalpasan a maubor. (Idiligyo ti Jos 7:15, 25.) Ngem idi naammuanna nga isu ti ama gapu ta immaniobra ni Tamar ti pannakapataudna iti anak nga agtawid, inyebkas ni Juda, “Isu nalinlinteg ngem siak.” Nagbalin a nakarigrigat ti panagpasngay ni Tamar iti singin nga annakna, da Perez ken Zera. (Ge 38:6-30) Matunton ti kapuonan Mesias babaen iti anakna a ni Perez.—Ru 4:12, 18-22; 1Cr 2:4; Mt 1:3.
2. Maysa a napintas nga anak ni Ari David ken kabsat ni Absalom. (1Cr 3:9; 2Sm 13:1) Nagduyos kenkuana ti kalakayan a kabsatna iti ama a ni Amnon, ket babaen ti kinasikapna nagballigi a nangrames kenkuana, nupay nagkedkedan ni Tamar. Isu liniwliwa ni Absalom, pinagtalinaedna iti balayna, ket dua a tawen kalpasanna imbalesanna ni Tamar babaen ti panangipapatayna ken Amnon.—2Sm 13:1-33.
3. Anak a babai ni Absalom, nalabit naisurot ti naganna iti ikitna (Num. 2). (2Sm 14:27) Kas ken amana, makaatrakar unay ti langana. Nalabit nagbalin nga asawana ni Uriel, iti kasta isu ti ina ni Maaca a paborito nga asawa ni Rehoboam.—2Cr 11:20, 21; 13:1, 2.
4. Maysa kadagiti siudad nga imbangon (nalabit imbangon manen wenno sinarikedkedan) ni Ari Solomon. (1Ar 9:17-19) Nadakamat ti Tamar iti 1 Ar-ari 9:18 kas adda “iti daga,” nalawag a mangipasimudaag a masarakan dayta iti teritoria dagiti Israelita. Kuna ni Yohanan Aharoni a ti Tamar isu ti ʽAin Husb (ʽEn Hazeva), agarup 30 km (20 mi) iti abagatan nga abagatan-a-laud ti Natay a Baybay. Naibatay daytoy iti panamagdiligna kadagiti pannakailadawan ti beddeng ti Canaan a masarakan iti Numeros 34:3-6; Josue 15:1-4; ken Ezequiel 47:19; 48:28.
Nupay “Tadmor” ti mabasa iti kapadpadana a teksto iti 2 Cronicas 8:4, nalawag a tumukoy dayta iti sabali a siudad, a gagangay a maikunkuna nga isu ti Palmyra.—Kitaenyo ti TADMOR.