TAPPUA

[(Kayo a) Mansanas].

1. Maysa kadagiti uppat nga annak ni Hebron ken kaputotan ni Caleb. (1Cr 2:42, 43) Adda dagiti agkuna a ti naganna ket nainaig iti Bet-tappua, maysa nga ili iti asideg ti Hebron.​—Kitaenyo ti BET-TAPPUA.

2. Maysa nga ili iti rehion ti Sefela a naituding iti tribu ni Juda. (Jos 15:20, 33, 34) Naiduma ngarud dayta iti Bet-tappua nga adda idiay Hebron. Nupay saan a sigurado, maikunkuna nga isu dayta ti Horvat Bet Natif nga adda iti las-ud ti nabaybay-an a purok ti Beit Nattif, agarup 20 km (12 mi) iti laud ti Betlehem.

3. Maysa nga ili iti beddeng ti Efraim ken Manases. (Jos 16:8) Naituding iti Manases ti lugar iti aglikmut, “ti daga ti Tappua,” ngem naituding iti Efraim ti mismo a siudad. (Jos 17:8) Ti En-Tappua (Jos 17:7) ket nabatad a tumukoy iti maysa nga ubbog iti asideg (Heb., ʽAʹyin, wenno En, kaipapananna ti “ubbog [burayok],” no mausar kas pangrugian a sao) ken mabalin nga ad-adda a kompleto a nagan ti siudad ti Tappua.

Nadakamat ti “ari ti Tappua” kas karaman kadagiti agtuturay nga inabak ni Josue idi pinarmekna ti Canaan (Jos 12:17), ket ti “Tappua” ditoy nalabit tumukoy iti siudad dagiti Efraimita. Maikunkuna a ti Tappua iti Efraim ket isu ti Tell Sheikh Abu Zarad (Tel ʽAbu Zarad), agarup 13 km (8 mi) iti abagatan nga abagatan-a-laud ti Siquem ken ab-abagatan pay ti ili ti Yasuf.