TECOA

Maysa nga ili iti teritoria ti Juda a kadawyan a maikunkuna nga isu ti Khirbet ʼet-Tuquʽ, agarup 16 km (10 mi) iti abagatan ti Jerusalem ken adda iti maysa a lugar nga agarup 820 m (2,700 pie) ti kangatona. Adda ti Let-ang ti Juda iti dayaenna, a karaman iti dayta ti “let-ang ti Tecoa” (a sadiay a naabak dagiti Ammonita, Moabita, ken dagiti buyot manipud Bantay Seir bayat ti panagturay ni Jehosafat). (2Cr 20:20, 24) Ti Tecoa ket binangon manen ken sinarikedkedan ni Ari Rehoboam, apoko ni David, ket sinigsiglo kalpasan dayta, nabatad a nagserbi ti siudad kas maysa a kampo a pagdepensa ti Juda. (2Cr 11:5, 6; idiligyo ti Jer 6:1.) Daytoy a lugar ti nagnaedan idi ni Ikkes (ama ni Ira) a maysa kadagiti nabileg a lallaki ni David. (1Cr 11:26, 28) Naggapu sadiay ti masirib a babai a nagkiddaw ken Ari David (sigun iti bilin ni Joab) maipagapu ken Absalom. (2Sm 14:1-21) Ket sadiay a nagtartaraken ni mammadto Amos iti karnero idi maikasiam a siglo K.K.P.​—Am 1:1.

Mabalin nga ipapan ti dadduma a ti Tecoa a nadakamat kadagiti rekord ti kaputotan ni Juda (1Cr 2:3, 24; 4:5) ket anak ni Asur. Nupay kasta, iti 1 Cronicas 4:5-7, saan a karaman ti Tecoa kadagiti nailanad a pito nga annak ti dua nga assawa ni Asur. Iti kasta maipasimudaag a ni Asur, imbes nga ama ti maysa nga anak nga agnagan Tecoa, mabalin a binuangayna dayta nga ili wenno nagtaud kenkuana ti populasion dayta.