TOPASIO

Ti kita ti bato a mausar kadagiti alahas, a dayta ket natangken, aganninaw, ken kasla kristal a mineral a buklen ti aluminum fluosilicate. Natangtangken dayta ngem ti quartz ken masansan a masarakan kadagiti regkang dagiti granito a bato. Mabalin a ti topasio ket awanan maris, ngem masarakan met daytoy nga addaan iti nadumaduma a maris, a pakairamanan ti puraw, duyaw, nakusnaw a kayumanggi, dumerosas a nalabaga, ken no dadduma nalusiaw a berde wenno asul. Ti kalatakan a maris ket lumabaga a duyaw. Ti nagan a topasio ket nagtaud iti Griego a sao a to·paʹzi·on, a tumukoy iti Isla ti Topasio nga adda iti Nalabaga a Baybay, a sadiay ti nagalaan dagiti Griego kadagiti topasio a pagaammo unay ni Pliny a Laklakay ken ti dadduma pay a nagkauna a mannurat. Ti libro ti Job inaigna ti topasio iti Cus, maysa a rehion a ti Nalabaga a Baybay ti beddengna.

Ti topasio ket karaman kadagiti napateg a bato nga adda iti “pektoral ti panangukom” nga inkawes ni Nangato a Padi nga Aaron. Naitampok dayta kas ti makintengnga a bato iti umuna nga intar dagiti saniata, ket naikitikit iti dayta ti nagan ti maysa kadagiti 12 a tribu ti Israel. (Ex 28:2, 15, 17, 21; 39:10) Dagiti pamuon “ti nasantuan a siudad, ti Baro a Jerusalem, a bumabbaba nga aggapu idiay langit manipud iti Dios ket . . . naarkosan iti tunggal kita ti napateg a bato,” nga iti maikasiam a pamuon ket topasio.​—Apo 21:2, 19, 20.