DIOS A DI AM-AMMO

Paset ti kitikit iti maysa nga altar a nakita ni apostol Pablo bayat ti kaaddana idiay Atenas. Imparangarang dagiti taga Atenas ti panagbutengda kadagiti didiosen babaen ti panagibangonda iti adu a templo ken altar. Nagdaydayawanda pay ketdi uray ti saan a persona, a nagibangonda kadagiti altar agpaay iti Dayaw, Kinaemma, Enerhia, Pannakaguyugoy, ken Kaasi. Nalabit gapu ta maamakda nga amangan no malibtawanda ti maysa a dios ket iti kasta mapagrurodda dayta, ti lallaki iti Atenas nangibangonda iti altar a nakitikitan iti sasao a, “Maipaay iti Dios a Di Am-ammo.” Iti rugi ti palawagna kadagiti Estoico, Epicureo, ken dadduma pay a naguummong iti Areopago (Turod ni Mars), sitataktika nga inturong ni Pablo ti atensionda iti daytoy nga altar, nga imbagana kadakuada a maipapan iti daytoy a Dios, a saanda pay laeng nga am-ammo, ti ikaskasabana.​—Ara 17:18, 19, 22-34.

Paneknekan dagiti Griego a mannurat a da Philostratus (170?-245 K.P.) ken Pausanias (maikadua a siglo K.P.) nga adda idi ti kakastoy a kita ti altar idiay Grecia. Mangdakamat ni Pausanias kadagiti altar ti “didios a napanaganan iti Di Am-ammo.” (Description of Greece, Attica I, 4) Ni Philostratus, iti librona a The Life of Apollonius of Tyana (VI, III), isuratna: “Dakdakkel unay a pammaneknek ti kinasirib ken panagparbeng ti panagsao iti nasayaat maipapan iti amin a didios, nangnangruna idiay Atenas, a nakaipasdekan dagiti altar kas pammadayaw uray pay iti di am-ammo a didios.”