UZ

1. Anak ni Aram ken apoko ni Noe iti tumeng babaen ken Sem.​—Ge 10:22, 23; 1Cr 1:17.

2. Inauna nga anak da Nacor ken Milca; kaanakan ni Abraham.​—Ge 22:20, 21.

3. Anak ni Disan ken kaputotan ni Seir a Horeo.​—Ge 36:20, 21, 28.

4. Ti daga a nakayanakan ni Job (Job 1:1), ken sadiay a nagnaed ni Uz, ngem saan a masigurado no daytoy nga Uz ket anak ni Aram wenno anak ni Nacor. (Ge 10:22, 23; 22:20, 21) Saan nga ammo ti eksakto nga ayanna. Mabalin a ti Uz ket asideg iti Edom, gapuna a nabalinan ti Edom idi agangay a palawaen ti sakupna agingga iti Uz, wenno nagnaed ti sumagmamano nga Edomita idi agangay iti “daga ti Uz,” kas kunaen ti Un-unnoy 4:21. Naibilin ken Jeremias nga ipasana ti kopa ti pungtot ti Dios iti “amin nga ar-ari ti daga ti Uz,” ket ti asideg a konteksto karaman a natukoy ti Filistia, Edom, Moab, ken Ammon. (Jer 25:15, 17, 20, 21) Ti daga a nakayanakan ni Job ket nalaka laeng a rauten dagiti Sabeo manipud abagatan ken dagiti Caldeo manipud daya. (Job 1:15, 17) No ikabilangan amin dagitoy a punto, ipasimudaagda nga adda ti Uz iti maysa a lugar iti daya ti Naikari a Daga iti asideg ti Edom, iti makin-amianan nga Arabia.