UZZAH

[mabalin a napaababa a porma ti Uzzias, a kaipapananna “Ti Pigsak Isu ni Jehova”].

1. Maysa a Merarita a Levita.​—1Cr 6:29.

2. Maysa nga anak ni Abinadab, awan duadua a maysa a Levita. Ni Uzzah ken ti kabsatna a ni Ahio ti nangiturong iti kareson a nakailuganan ti Lakasa ti tulag manipud balayda idi kayat ni David a maipan dayta idiay Jerusalem. Idi dandani napattog ti kareson a guyguyoden dagiti toro, tinengngel ni Uzzah ti lakasa tapno saan a matuang, ket gapu iti dayta insigida a pinapatay isuna ni Jehova. Pinanaganan ni David dayta a disso iti Perez-uzza agsipud ta sadiay a “bimtak ti pungtot ni Jehova maibusor ken Uzzah.”​—2Sm 6:3-8; 1Cr 13:7-11.

Agpapan pay iti maipagarup a nasayaat a panggep ni Uzzah iti pananglappedna a matnag ti Lakasa, naibilang dayta kas “awan panagraemna a tignay.” (2Sm 6:7) Karaman ngamin ditoy ti inggagara a saan a panagtulnog. Imbilin ni Jehova nga iti aniaman a kasasaad, ti Lakasa ket saan a rumbeng a sagiden ti di autorisado a tattao, maysa a pakdaar a pagaammo ti amin ken mapatawan iti dusa nga ipapatay dagiti mangsalungasing iti dayta. (Nu 4:15, 19, 20) No koma dagidiay autorisado, dagiti Cohatita a Levita, ti nangawit iti dayta kadagiti abagada babaen kadagiti assiw kas iti imbilin ti Dios, saan koma a nagpungtot ti Dios.​—Ex 25:13, 14; Nu 7:9.