VASTI

Ti reyna ni Asuero (Xerxes I) nga ari ti Persia. Iti maikatlo a tawen ti panagturay ni Asuero, inayabanna ti amin a natatan-ok, piprinsipe, ken ad-adipen manipud kadagiti masaksakupanna a distrito. Iti ngudo ti panagtataripnongda, nangangay iti pito nga aldaw a bangkete wenno padaya. Kasta met, nangangay ni Vasti iti padaya maipaay kadagiti babbai iti naarian a balay. Iti maikapito nga aldaw, imbilin ni Asuero kadagiti opisialna iti palasio nga iyegda ni Vasti a nakasuot iti naarian a dalungdong, tapno makita ti amin ti kinapintasna. (Agparang a ti reyna ket kadawyanna a mangan iti lamisaan ti ari, ngem awan ti pammaneknek nga ipaay ti pakasaritaan no kastoy ti kasasaad iti dadakkel a bangkete. Malaksid iti dayta, iti daydi a tiempo, mangang-angay ni Vasti iti maysa a bangkete a kaduana dagiti babbai.) Gapu iti di naibaga a rason, nagkedked ni Vasti. Immuman ni Asuero kadagiti masirib a lallakina a makaammo iti linteg, ket binalakadan ni Memucan (maysa a prinsipe) a saan laeng a ti ari ti nakaaramidan ni Vasti iti dakes no di pay ket dagiti amin a prinsipe ken umili nga adda iti masaksakupanna a distrito. Kinunana a no nangngeg dagiti prinsesa ti inaramid ti reyna (maysa a damag a nagpartak nga agwaras iti kastilio), surotendanto ti tignay ni Vasti ket agbalin met a nasabrak ti kababalinda. (Est 1:1-22) Naikkat ni Vasti iti saadna, ket kalpasan ti agarup uppat a tawen, ni Ester a maysa a Judio ti napili nga agbalin nga asawa ni Asuero ken mangala iti saad ni Vasti kas reyna.​—Est 2:1-17.