MANAGWANAWAN
Maysa a mangbambantay iti posible a pannakadangran ti tattao wenno sanikua, masansan nga iti rabii, ken mangted iti pakdaar no adda sumungsungad a peggad. Iti serbisio militar, ti managwanawan ket kadawyan a maaw-awagan iti guardia wenno agbambantay.—Jer 51:12, Rbi8 ftn; Ara 12:6; 28:16; kitaenyo ti GUARDIA.
Kas salaknib maibusor kadagiti mannanakaw ken manangdadael, masansan nga adda tattao a naisaad a mangbantay iti kaubasan a dandanin maluom wenno kadagiti arban ti animal, a nalabit nakapuestoda kadagiti abong-abong wenno nangangato a pagwanawanan a nairanta a pagbantayan. (2Ar 17:9; 2Cr 20:24; Job 27:18; Isa 1:8) Dagiti manglakub a buyot a mangdarup kadagiti nasarikedkedan a lugar ket addaanda kadagiti managwanawan wenno agbantay a mangipakaammo kadagiti komandanteda iti impormasion militar. (Jer 51:12) No adda ni Ari Saul iti pakarso iti tay-ak a kaduana ti buyotna, adda met dagiti bukodna a managwanawan a ti rebbengenda ket aywananda ti pagimbagan ti ari.—1Sm 14:16; 26:15, 16.
Dagiti managwanawan ket masansan a nakapuesto kadagiti pader ken torre ti siudad tapno siputanda dagidiay sumungsungad sakbay a makaasidegda. (2Sm 18:24-27; 2Ar 9:17-20) No dadduma, agronda met dagiti managwanawan kadagiti kalsada ti siudad. (Sol 3:3; 5:7) Dagiti managbutbuteng a tattao, a siririing bayat ti napeggad nga or-oras ti rabii, mabalin a maulit-ulit nga agimtuodda kadagiti managwanawan no natalged met laeng ti amin (Isa 21:11, 12), ket gagangay laeng idi kadagiti managwanawan a padpadaananda ti bigat. (Sal 130:6) Naragsak ti siudad a malaksid pay kadagitoy a managwanawan, bambantayan met dayta ni Jehova.—Sal 127:1.
Piguratibo nga Usar. Nangibangon ni Jehova kadagiti mammadto a nagserbi kas piguratibo a managwanawan iti nasion ti Israel (Jer 6:17), ket no dadduma, dakamatenda met dagiti managwanawan iti simboliko a pamay-an. (Isa 21:6, 8; 52:8; 62:6; Os 9:8) Rebbengen dagitoy a managwanawan a mammadto a pakdaaran dagiti nadangkes maipapan iti umad-adani a pannakadadael, ket no saanda nga aramiden dayta, manungsungbatda. Siempre, no saan nga agtignay dagiti tattao ken saanda nga ipangag ti pakdaar, isudan a mismo ti manungsungbat iti darada. (Eze 3:17-21; 33:1-9) Ti maysa a di matalek a mammadto ket awan serserbina a kas iti bulsek a managwanawan wenno umel nga aso.—Isa 56:10.