SAREPTA

[mabalin a nagtaud iti sao a kaipapananna ti “pasudien”].

Maysa nga ili iti Fenicia a “kukua ti” Sidon wenno nalabit sakupna idi kaaldawan ni mammadto Elias. Maysa a napanglaw a balo a babai idiay Sarepta ti nangipakita iti kinamanagpadagus iti daytoy a mammadto. Namilagruan a nataginayon ti arina ken lana ti balo bayat ti dakkel a bisin, ket idi agangay pinagungar ni Elias ti anak ti babai babaen ti pannakabalin ti Dios. (1Ar 17:8-24; Lu 4:25, 26) Naipadto idi agangay a dayta a pagpatinggaan ti sigud a teritoria ti Canaan ket agbalin a sanikua dagiti naidestiero nga Israelita. (Abd 20) Daytoy a nagan ket nataginayon iti nagan ti Sarafand, agarup 13 km (8 mi) iti abagatan nga abagatan-a-laud ti Sidon, nupay ti kadaanan a disso ket mabalin a pangasidegen iti takdang ti Mediteraneo.