ZEBA

[Sakripisio].

Ari ti Midian a karaman kadagiti nangirurumen iti Israel. Mabalin a nagturay da Zeba ken Zalmunna bayat ti pito a tawen a panangrubrubbuot ti Midian a nagbanag iti pannakadadael ti talon dagiti Israelita kasta met a nagresulta iti kinapanglaw. (Uk 6:1-6) Iti maysa a di masinunuo a tiempo, pinapatayda met dagiti kameng ti sangakabbalayan ni Gideon.​—Uk 8:18, 19.

Idi inabak ni Gideon ti buyotda a buklen ti 135,000, nakatalaw da Zeba, Zalmunna, ken ti 15,000 ket nakadanonda idiay Carcor nupay kinamkamatda ida. Nupay pangadaywen daytoy a lugar, nakamakamda idi agangay ket naabakda manen ken nakautiboda. Bayat ti panangisubli ni Gideon kada Zeba ken Zalmunna idiay Succot kas naibabain a kautibo, naipalagip la ketdi kadakuada ti napasindayag a sasaoda (wenno ti imparangarangda a kababalinda) a nataginayon iti salmo: “Tagikuaentayo dagiti disso a pagyanan ti Dios maipaay iti bagbagitayo.” (Sal 83:11, 12) Kalpasan nga inannugotda a pinapatayda ti kakabsat ni Gideon, mismo a pinapatay ni Gideon ti dua a Midianita nga ar-ari.​—Uk 8:4-21.