ZEBEDEO

[mabalin a nagtaud iti Heb. a sao a kaipapananna ti “mamarabur”]. Ama dagiti apostol ni Jesus a da Santiago ken Juan. (Mt 4:21, 22; 10:2; 26:37; Mr 3:17; 10:35; Lu 5:10; Jn 21:2) Patien ti kaaduan a ni Salome ket asawa ni Zebedeo ken kabsat ti ina ni Jesus a ni Maria. Daytoy kaipapananna a ni Zebedeo ket uliteg ni Jesus gapu ta asawa ti ikitna, ket da Santiago ken Juan, kakasinsin ni Jesus.​—Mt 27:56; Mr 15:40; Jn 19:25; kitaenyo ti SALOME Num. 1.

Panagkalap ti negosio ni Zebedeo iti Baybay ti Galilea ket nabatad a rimmang-ay iti dayta, ta adda patangtangdanan a lallaki nga agtartrabaho kenkuana. (Mr 1:16, 19, 20) Ti asawana a ni Salome ket nakapagserbi ken Jesus babaen kadagiti namaterialan a bambanag. (Mr 15:40, 41) Gapuna, nupay awan mangipasimudaag a ni Zebedeo a mismo simmurot ken Kristo, nawaya ti pamiliana a nangaramid iti kasta.​—Mt 20:20.