ZEBOIIM

Maysa a disso a nadakamat mainaig iti beddeng ti teritoria dagiti Canaanita. (Ge 10:19) Ti Zeboiim ket maysa kadagiti lima a siudad-estado iti Distrito a nagrebelde kalpasan ti 12 a tawen a panangituray ni Kedorlaomer. Ni Ari Semeber ti Zeboiim timmipon iti puersa dagiti agtuturay ti Sodoma, Gomorra, Adma, ken Bela (Zoar) ket nalawag a naparmekda amin iti Nababa a Tanap ti Siddim gapu ken Kedorlaomer ken ti tallo a kakapponna. Daytoy a pannakaabak ket nagbanag iti pannakakautibo ni Lot ken iti panagballigi idi agangay ni Abraham maibusor kadagiti manangraut. (Ge 14:1-16) Idi agangay, maysa ti Zeboiim kadagiti nadangkes a siudad iti Distrito a dinadael ni Jehova a pakairamanan ti Sodoma ken Gomorra. (Ge 19:24, 25; De 29:22, 23; Os 11:8) Saan nga ammo ti eksakto nga ayanna. Patien ti adu nga eskolar a ti orihinal a disso ket adda itan iti tukok ti dandanum ti Natay a Baybay. Nupay kasta, iti nabiit pay a tiempo, adda dagiti agkuna a dagiti rebba ti siudad ket isu ti maysa a disso iti igid ti maysa kadagiti ginget nga agturong iti makin-abagatan a daya a paset ti Natay a Baybay.