Kinahustisia Para iti Isuamin​—Kasanonto nga Umay?

APAY nga impalubos ni Jehova ti kinaulpit nga agbalin nga aglaplapusanan unay iti daga? Agsipud ta pinili dagiti tattao a kasta! Idi punganay, naiduma dagiti bambanag. Idi immuna a naparsuada, saan a nagsagaba da Adan ken Eva iti panangpadagsen iti kinaimperpekto. Pasetda ti sangaparsuaan nga inyebkas ti Dios mismo a “nasayaatda unay.” (Genesis 1:31; Deuteronomio 32:4) Mainayon pay, awan idi ti Satanas, ket ti tao ti direkta nga inturayan ti Dios. Gapuna, iti pangrugian awan idi ti kinaulpit.

Ngem di nagbayag dayta. Maysa a perpekto nga espiritu a parsua ti immalsa ket nagbalin a Satanas. Idi panagparangna kas maysa nga uleg, ginargarina ni Eva iti idea ti panagwaywayas. Adda laeng maymaysa a panangiparit nga inkabil ti Dios iti umuna a pagassawaan a tao. Saanda a mangmangan iti bunga ti maysa a kayo. No manganda, matayda. Ngem kuna ni Satanas ken ni Eva: “Saan a pudno a mataykayonto. Ta ti Dios ammona nga iti aldaw a pannanganyo iti dayta dagiti matayo maluktandanto, ket kaslakayton iti Dios a makaammo iti naimbag ken ti dakes.”​—Genesis 3:1-5.

Ni Eva, ken kalpasanna ni Adan, sinalungasingda ti linteg ti Dios. Kayatda ti agbalin a kas Dios, a mangaramid iti kabukbukodanda a desision no ania ti naimbag ken dakes. Gapuna, timmallikudda iti Dios ket daytat’ nanglukat ti pannakaipasdek ti natauan a panagturay, agraman amin dagiti parikutna.

Naglak-am met da Adan ken Eva iti pisikal a panagbalbaliw. Inlunod ti Dios ida ken patay, kas kinunana nga aramidenna. Nagbalinda nga imperpekto, ket daytoy ti nangiturong iti panagrupsa ti intero a natauan a rasa​—dagiti annakda. Inlawlawag ni apostol Pablo: “Gapu iti maymaysa a tao [ni Adan] simrek ti basol ditoy lubong ken ti ipapatay gapu iti basol, ket iti kasta ti ipapatay immay kadagiti isuamin a tattao, agsipud ta isuda nagbasolda amin.” (Roma 5:12) Iti daytoy a pamay-an ti ramut a namataud iti kinaulpit ti nagparang.

Nupay kasta, mabasatayo: “Ti ari gapu iti kinahustisia pabilgenna ti daga.” (Proverbio 29:4) Ti natauan a sosiedad ti nikaanoman dinto naan-anay a ‘bumileg’ wenno agbalin a naan-anay a natibker agingga a ti kinahustisia maitandudo iti intero a daga. Mapasamakto aya dayta?

Ti Pagarian ti Dios ken ti Kinahustisia

Yantangay ni Jehova a Dios ket “ayatenna ti kinalinteg,” makasiguradotayo a maaramidto dayta. (Salmo 37:28) Ngem kasano? Dagiti sasao ti Kararag ti Apo ibagana kadatayo. Iti adun a siglo inkararag dagiti napasnek a Kristiano: “Umay koma ti pagariam. Maaramid koma ti pagayatam, kas sadi langit, kasta met ditoy daga.” (Mateo 6:10) Gapuna, babaen iti Pagarian ti Dios, ti tinarigagayan ti Dios ti maaramidto met laengen ditoy daga.

Ti Pagarian ti Dios ket maysa a pudpudno a gobierno. Daytanto ti nailangitan, gapuna napigpigsanto dayta ngem iti aniaman a natauan a gobierno. Daytat’ addaanto met ti maysa nga Ari a dinutokan ti Dios, ti Ari nga isu ni Jesu-Kristo, nga isu’ maseknan unay maipapan ti kinahustisia. (Salmo 72:12-14) Inkari ni Jehova a bendisionanna daytoy a panagturay ti Pagarian iti sidong ni Kristo, “tapno bangonenna ken salimetmetanna babaen iti kinahustisia ken kinalinteg.”​—Isaias 9:7.

Dagiti nakaad-adu a padto a matungtungpal itatta paneknekanna a daytoy a Pagarian ti maysan a kinapudno. (Lucas 21:31, 32) Ni Jesus ket maysan nga Ari! Ngem kasanonanto nga iyeg ti kinahustisia iti sangatauan gapu kadagiti amin a lapped? Kitaentayo.

Pinanggep ti Dios a ti Pagarianna iti sidong ni Kristo ket maysanto a sangalubongan a gobierno. Babaen iti padto kuna ni Jehova: “Addanto met panagturayna [ni Kristo] manipud baybay agingga iti baybay ken manipud idiay Karayan inggana kadagiti pungpungto ti daga.” (Salmo 72:8) Inton matungpalen a sangalubongan daytoy, dagiti kangrunaan a gubuayan ti kinaulpit maawanton. Ti tao saannanton nga iturayan ti bagina. Ngem kasanonto a mapasamak daytoy yantangay nagadu dagiti gobierno itatta, tunggal maysa ti siiimon a bambantayanna ti kabukbukodanna a kinasoberano?

Ti kinapudnona ket, ti Dios ti nangikeddeng ti panawen inton agpatingga dagiti natauan a gobierno, ket dayta a panawen a naikeddeng dimtengen. Iti panagsaona maipapan kadagiti amin a nasionalistiko a gobierno ti kaaldawantayo, nagsurat ni mammadto a Daniel: “Ket kadagiti al-aldaw dagita nga ar-ari, ti Dios ti langit mamangonto ti maysa a pagarian a kaanoman dinto madadael. Ket ti panagturayna dinto met maited iti sabali nga ili. Ngem burakennanto ken ibusennanto amin dagitoy a pagpagarian, ket isu agtalinaedto iti panawen a di nakedngan.”​—Daniel 2:44.

Iti daytoy a pamay-an, ti maymaysa a sangalubongan a gobierno, ti Pagarian ti Dios, ti mangsandinton kadagiti agdama a nasionalistiko a gobierno ken iturayannanton ti sangatauan iti kinahustisia. Anian a nagdakkelan a panagbalbaliwto dayta! Nupay kasta, ibatinanto pay met la dayta ti parikut maipapan ken Satanas. Kasanonto ti panangtaming ti Pagarian ti Dios kenkuana?

Ti Pagarian ti Dios ken ni Satanas

Agparang a nasapa ni Satanas iti pakasarsaritaan ti sangatauan, ket isu ti immuna a nangisingasing ken Eva ti idea nga iyaalsa iti Dios. Gapuna, idi a sinentensiaanna da Adan ken Eva gaput basolda, saan a linipatan ti Dios ni Satanas. Impadtona ti iyaay ti maysa a “bin-i” nga isunto ti mangbusor ken Satanas, ken iti kamaudianan mangdadael kenkuana: “Siak pagginnuraenkayto . . . ti kaputotam ken ti kaputotanna. Daytoy sugatennanto ta ulom ket sika sugatemto ti mukodna.” (Genesis 3:15) Kas nagbanaganna, daytoy naikari a bin-i ket isu ni Jesu-Kristo. (Galacia 3:16) Dua a naisangsangayan a panagsangon ti napasamaken iti nagbaetan da Satanas ken ni Jesus kas bassit a kaitungpalan dayta kadaanan a padto.

Ti umuna nagparang a kasla panagballigi ken Satanas. Immaniobrana ti ipapatay ni Jesus iti kayo a pagtutuokan. Gapuna ‘nasugatan’ ti “mukod” ni Jesus. Ngem ti panagballigi ni Satanas di nagbayag. Napagungar ni Jesus manipud ken patay ket naitan-ok iti nangato a saad idiay langit. (Aramid 2:23, 24, 32-36) Sadiay, idi agangay isut’ binalangatan ni Jehova a Dios kas Ari ti Pagarian ti Dios. Kalpasanna sabali manen a historiko a panagsango ti napasamak.

Ti resultana isut’ naisalaysay iti Biblia: “Ket naigarangugong dayta dakkel a dragon, daydi uleg a kadaanan, nga isu ti managan ti Diablo ken Satanas, isu a mangallilaw iti isuamin a mapagnaedan a daga; naitapuak ditoy daga, ket dagidi anghelna naitapuakda a naikanunong kenkuana.” Ti resulta? Rag-o idiay langit, nga itan nadalusanen iti makaparupsa a kaadda ni Satanas. Ngem “asikayo pay daga ken baybay, ta ti Diablo immulog kadakayo nga addaan dakkel a pungtot, nga ammona a bassiten ti tiempona.” (Apocalipsis 12:9, 12) Agbibiagtayo itan iti dayta “bassiten a tiempona.” Adu kadagiti kinaulpit a makitkitatay itatta ket gapu iti “dakkel a pungtot” ni Satanas.

Ngem iti di agbayagen, umay manen ti sabali a panagsango ni Satanas ken ni Jesu-Kristo. Ilawlawag met ti Biblia daytoy: “Ket tiniliwna daydi dragon, daydi uleg a kadaanan, nga isu ti Diablo ken Satanas, ket pinarautanna iti bayat ti sangaribo a tawen. Ket isu inggarangugongna iti abut a mangliwengliweng ket inrikepanna ken sinelioanna ti rabawna, tapno dina allilawenen dagiti pagpagarian agingga a maturpos dagiti sangaribo a tawen.”​—Apocalipsis 20:2, 3.

Daytoyto ti mapasamak iti mabiiten, inton ti Pagarian ti Dios sandiannan dagiti nasionalistiko a gobierno daytoy a lubong. Iti kamaudianan iturongnanto dayta iti maudi a panagsango, inton, kas iti panangisalaysay iti Biblia babaen iti padto, “daydi Diablo . . . [maibellengto] iti danaw nga apuy ken asupre” agturong iti pakadadaelanna, nga isunto ti maudi a ‘pannakasugat ti ulona.’​—Apocalipsis 20:10.

Gapuna, ti maysa pay a lapped ti kinahustisia ti maikkatton. Ngem dayta ti mangibati pay kadatayo ti parikut iti mismo a kinaimperpekto a kasasaad ti tao. Kaaduan iti kinaulpit ditoy lubong ket agtataud iti tao a mismo. Aniat’ maaramidan ti Pagarian ti Dios iti dayta?

Ti Pagarian ti Dios ken ti Kinaimperpekto ti Tao

Ti kinaimperpekto ti tao nangrugi idi nagbasol da Adan ken Eva. (Roma 5:12) Amin dagiti kaputotan ni Adan, malaksid ti maysa, managbasolda amin. Ti nailaksid iti dayta isu ni Jesus. Isut’ naiyanak iti namilagruan a pamay-an nga awan basolna, ket iti intero a panagbiagna nagtalinaed a matalek ken awan basolna. (Hebreo 7:26) Gapuna mabalinna nga idaton ti perpekto a natauan a biagna kas maysa a subbot a maipaay iti imperpekto a sangatauan. Sinolbarna ti problema ti natauan a kinaimperpekto. “Ta kas matayda amin ken Adan, kasta met mabiagda amin ken Kristo.”​—1 Corinto 15:22.

Ti di agbayagen, dagidiay mangipapilit nga agtignay a siulpit masarakandanto nga awan lugar para kadakuada iti nadalusanen a daga iti sidong ti Pagarian ti Dios. Ngem dagidiay addaan pammati iti daton ni Jesus agapitdanto kadagiti dadakkel a bendision. “Ta ti nalinteg agtalinaedanto ditoy daga, ket ti napnuan-imbag agtaengto kenkuana. Ngem dagiti nadangkes magudasdanto ditoy daga, ket dagiti nagulib maparutdanto kenkuana.” (Proverbio 2:21, 22) Gapuna sabali manen a lapped iti kinahustisia ti maikkatton.

Ti Pagarian ti Dios ken Dakayo

Wen, ni Jesus, kas Ari ti Pagarian ti Dios, dandanin nga ikkatenna amin dagiti dadakkel a lapped iti pannakakitatayo iti kinahustisia nga agpaay iti intero a daga. Ti sangatauan makitananton ti pannakatungpal ti kari: “Datayo urayen dagiti babbaro a langlangit ken ti maysa a daga a baro . . . isuda a pagtaengan ti kinalinteg.” (2 Pedro 3:13) Iti dayta nalinteg a daga awanton ti lugar a maipaay iti kina-awan hustisia.

Siempre, dagitoy a bendision ti addada pay laeng iti masanguanan. Ngem, uray pay itatta, ti Pagarian ti Dios iti sidong ni Kristo Jesus ti aktibon, ket datayon ti adda a magunggonaan iti dayta. Ni Jesus mismo impadtona nga iti kaaldawantayo “daytoy naimbag a damag ti pagarian maikaskasabanto iti amin a mapagnaedan a daga kas pammaneknek kadagiti isuamin a nasion.” (Mateo 24:14) Dayta a padto ti matungtungpalen. Adun dagiti agtigtignay iti panangasaba ken ipaspasakopdan ti bagbagida iti dayta a Pagarian uray pay itan. Iti daytoy a pamay-an maitupagda kadagitoy a naimpadtuan a sasao:

“Ket maaramidto kadagiti maud-udi nga aldaw . . . nga adu kadagiti inilin-ili a mapanto ket agkuna: ‘Umaykayo ket sumang-attayo iti bantay ni Jehova, iti balay ti Dios ni Jacob; ket isuronatayonto kadagiti dalanna, ket magnatayonto kadagiti danana.’ Ta iti Sion ti rumuaranto ti linteg, ket iti Jerusalem ti rumuaranto ti sao ni Jehova.”​—Isaias 2:2, 3.

Dagiti minilmilion iti intero a daga a makikumporme itan iti dayta a padto agad-adaldan iti Biblia ken ad-adalendan ti agbiag iti pamay-an a kayat ti Dios a panagbiagda. Mainayon kadagiti dadduma a bambanag, padpadasendan ti agbiag maitunos kadagiti sasao ni mammadto Mikias: ‘Ti agaramid a sililinteg ken iti kinamanangngaasi ken pannagna a sipapakumbaba iti Diosda.’ (Mikias 6:8) Iti kasta ipakpakitada iti kinapasnek ti tarigagayda nga agbiag iti sidong ti gobierno ti kinahustisia. Uray pay itan tagtagiragsakendan dagiti adu a bendision manipud iti dayta a gobierno bayat a matungtungpal ti padto ni Isaias: “Adtoy! Maysa nga ari agarinto iti kinalinteg; ken dagiti panguluen agturaydanto iti kinahustisia.”​—Isaias 32:1.

Il-iliwenyo aya iti lubong a sadiay agtalinaedton ti kinahustisia? No kasta, ikabilyo ti panagtalekyo iti Pagarian ti Dios. Makitimpuyogkayo itan iti ili nga addaan iti dayta met laeng a tarigagay. Kalpasanna kumitakayo a buyogan panagtalek iti panagbiagto nga agnanayon iti sidong ti panagturay ti Dios nga “ayatenna ti kinasingpet ken kinalinteg.”​—Salmo 33:5.