Dagiti Saludsod Manipud Kadagiti Managbasa
◼ Apaman a nagbalinen ti maysa kas Saksi ni Jehova, isu aya ti agnanayonen a maibilang a kasta?
Saan, dagiti Saksi ni Jehova saanda kas kadagiti relrelihion nga agkuna, ’Oras a miembrokan, miembroka nga agnanayonen.’ Adda bassit a porsiento dagiti indibidual a pilienda nga isina ti bagbagida manipud iti Nakristianuan a kongregasion wenno isudat’ nailaksid agsipud ta managaramidda ti kinadakes nga awan ti panagbabawida.
Iti naminsan nga okasion adu kadagiti adalan ti pimmanaw ken Jesus ket “saanda a nakikuyogen kenkuana.“ (Juan 6:66) llawlawag met ti Biblia a no ti maysa a Kristiano agar-aramid ti dakes a panagbasol nga awan ti panagbabawina, ti kongregasion ti ‘mangikkat iti tao a managdakdakes manipud tengngada’ ket ‘saanda a makikadkadua kenkuana.’—1 Corinto 5:9-13.
Gapuna, ita, no matnag ti maysa a Kristiano iti panagbasol, maysa a komite dagiti kualipikado iti naespirituan a panglakayen ti makisao kenkuana. Kayatda a makita no isut’ adda panagbabawina ken mabalin pay a matulongan. (Galacia 6:1) No saanen, agtulnog dagiti panglakayen iti bilin ti Biblia nga ilaksid ti managbasol tapno ti kongregasion “agtalinaed nga awan lebadurana.”—1 Corinto 5:7.
Wenno, kas kunana idiay Juan 6:66, sagpaminsan adda met Saksi nga iti kabukbukodanna maikeddengna a panawan ti kinapudno. Mabalin nga ipakaammona ti desisionna apaman a rugian ti komite nga usigen dagiti dakes nga ar-aramidna. Mabalin a pakaammuanna ida babaen iti surat, wenno ibagana iti imatang dagiti sasaksi, a kayatna nga isinan ti bagina manipud iti kongregasion ket saanen a maammuan kas maysa kadagiti Saksi. Iti kasta saanen a nesesita nga ituloy pay dagiti panglakayen ti panagimbestigarda. Nupay kasta, mangaramid ti ababa nga anunsio dagiti panglakayen maipapan ti panangisinana ti bagina tapno maammuan ti kongregasion nga “rimmuarda kadatayo.” (1 Juan 2:19) Kalpasanna tungpalenda ti naipaltiing a bilin a ‘ditay awaten ida kadagiti balbalaytayo wenno kablaawan met ida, tapno ditay mairaman kadagiti dakes nga aramidda.’—2 Juan 10, 11.
Gapuna, saan a mapilit dagiti tattao nga agtalinaed a paset ti kongregasion. Ngem ti kaaduan kadagiti Saksi ni Jehova ti addaan iti kababalin dagiti apostol a siboboluntario a timmipon a kadua ni Jesus, nga umaw-awat ti naespirituan a tulong ken tagiragsaken ti nabara a pannakikadkadua iti kongregasion ti Dios.—Lucas 22:28.