Organisado nga Agserbi ken Jehova
“Gapu itoy imbatika idiay Creta, tapno ituloymo nga organisaren dagiti bambanag a di pay nalpas idi.”—Tito 1:5, The Jerusalem Bible.
1. Ania ti kinuna ti umuna a presidente iti Estados Unidos maipapan iti nagdumaan iti relihiuso a kapanunotan?
ITI maysa a personal a surat idi Oktubre 20, 1792, ti umuna a presidente iti Estados Unidos, ni George Washington, nagsurat: “Kadagiti amin a panagsusuppiat iti sangatauan, dagidiay a pinataud ti panagduduma ti kapanunotan iti relihion ti agparang a kapautan ken makaparigat, ket masapul a maidian. Inanamaek a ti nalawlawagan ken mannakaawat a pagannurotan, isu a nangtanda iti agdama a panawen, ti namagtutunos koman kadagiti Kristiano iti tunggal denominasion tapno ditay koman makita ti relihiuso a panagsusuppiatda a makagteng iti punto a mangdangran iti talna ti sosiedad.”
2. Kasano ti panagtignay dagiti dadduma iti kinaadu unay ti relihion?
2 Ita, adu met ti mariribukan gapu iti kinaadu unay dagiti relihion ket indiandan ti amin a pannakikadua iti relihion. Dadduma ti miembro iti iglesia ngem saritaenda laeng ti ‘personal a pannakilangenda iti Dios.’ Ania, ngarud, dagiti kinapudno? Makilangen kadi ti Dios iti indibidual a pamay-an? Ania ti ipakita ti Biblia?
Maseknan Kadi ti Dios Kadatayo?
3. Babaen ti panangusar iti kasuratan, kasano ti panangsungbatyo iti saludsod a, Maseknan kadi ti Dios kadatayo kas indibidual?
3 Ipalgak ti Kasuratan a ni Jehova ti pudno a maseknan kadagiti tattao kas indibidual. Kas pangarigan, iti tay-ak ti panaglalangen ti tao, dagitoy ti sawen ti Sao ti Dios: “Siasinoman a mangrabrabak iti napanglaw, umsienna ti Namarsua kenkuana.” “Ti mamarigat iti napanglaw laisenna ti Namarsua kenkuana, ngem ti addaan kaasi iti makurangan padayawanna,” kayatna a sawen ni Jehova a Dios. (Proverbio 17:5; 14:31) Kinapudnona, “inay-ayat ti Dios ti lubong [iti sangatauan] ta intedna ti Anakna a bugbugtong, tapno amin a mamati kenkuana, saan a mapukaw no di ket adda biagna nga agnanayon.” (Juan 3:16, 36) Kasta met, kinuna ni apostol Pedro: “Kinapudnona a makitak a ti Dios saan a mangidumduma kadagiti tao, no di ket uray ania a nasion dagiti agbuteng ken agaramid ti kinalinteg makaay-ayoda kenkuana.” (Aramid 10:34, 35) Gapuna pudno a maseknan ni Jehova kadagiti indibidual ket anamonganna dagidiay nga agbuteng kenkuana ken agaramid iti kinalinteg.
4. Aniada a salsaludsod ti maibangon a maipaay nga usigentayo?
4 Kunaen pay met ti Biblia: “Mailasin ni Jehova dagiti tattao a kukuana.” (2 Timoteo 2:19) Ngem daytoy kadi kaipapananna a dagiti indibidual iti sadinoman iti adu a relrelihiuso nga organisasion iti lubong makaay-ayoda iti Dios? Wenno inanamaentayo kadi a dagiti kakasta a tattao ti aglalangen iti maysa ken maysa, ket maorganisarda nga agserbi ken ni Jehova?
Ni Jehova—Dios iti Organisasion
5. Kasano ti panagtrabaho dagiti nasantuan nga angheles a mainaig ken ni Jehova?
5 Ti napaltiingan a Sao ti Dios mangted kadatayo iti pannakaawat iti pamay-an ti panangaramidna kadagiti bambanag. Kas pangarigan, usigenyo dagiti di makita a langlangit. Adda kadi dagiti paspasamak a nariribuk sadiay? Kinapudnona awan! Dagiti riniwriw a naespirituan a parparsua saanda nga agtigtignay a naisina ken ni Jehova iti naiparna laeng a pamay-an. Imbes ketdi, mabasatayo: “Bendituenyo ni Jehova, dakayo nga anghelesna, a mannakabalin iti bileg, a manungtungpal iti saona, a nangtimtimud iti timek ti saona. Bendituenyo ni Jehova, dakayo amin a buyotna, dakayo amin a ministrona nga agaramid iti pagayatanna.” (Salmo 103:20, 21) Nalawag, dagiti nasantuan nga angheles ti organisado a naimbag nga agserbi ken ni Jehova.
6. Maipapan iti ania ti rinugian ti pamilia ni Noe kalpasan ti Layus?
6 Ngem ti ngay natauan a pagturayan? Bueno, ti Layus ni Noe ti nangipatingga kadagiti amin nga organisasion sakbay ti layus a mabalin a timmaud ditoy daga—malaksid ti maysa. Ni Noe ken dagiti pito a sabsabali a nakalasat iti Layus rimmuarda manipud iti daong a kas maysa nga organisasion ti pamilia. Ti banag a kangrunaan kadakuada isu ti panangipaayda iti nagkaykaysa a panagdayaw iti Dios, ta mabasatayo: “Ket nangbangon ni Noe ti maysa nga altar ken Jehova, ket nangala iti tunggal nadalus nga animal ken tunggal nadalus a tumatayab ket impaayna dagiti daton a mapuoran iti rabaw ti altar.” Dagiti nakalasat idi Layus dida dagus a nagsisina iti relihion, no di ket nagkaykaysada iti daytoy a napateg a pasamak a nagtungpal iti pannakabendision, pannakaisuro ken ti maysa a tulag a nagtaud iti Dios. (Genesis 8:18-9:17) Wen, kalpasan ti Layus, ti pamilia ni Noe nangrugida kas maysa nga organisasion a nagserbi ken ni Jehova.
7. No maipapan iti organisasion, ania ti masursurotayo manipud iti libro iti Exodo?
7 Dagiti kaputotan ni Abraham ti sibabaknang a pinaraburan ni Jehova, ket awan ti sipupudno a makailibak a nagbalinda a maysa a nasional nga organisasion kamaudiananna. Ta, ti laengen libro ti Exodo ipakitana no kasano ti pannakaisalakanda manipud iti panangadipen ti Egipto ket naorganisarda a kas maysa a teokrasia! Ti libro ilasinna ni Jehova a kas ti Dios iti teokratiko nga organisasion. No tungpalen dagiti Israelitas ti Linteg ti Dios, mabalinda ti agdayaw kenkuana a kas maysa a naurnos, natalged ken naragsak nga organisasion. Di mailibak a naorganisarda nga agserbi ken ni Jehova.a
8. Ania a pammaneknek iti nasayaat nga organisasion ti nakita a mainaig iti panagserbi iti naindagaan a santuario ni Jehova?
8 Ti pakakitaan iti nagsayaatan nga organisasion ti makita a mainaig iti panagserbi iti naindagaan a santuario ni Jehova. Kas pangarigan, no maipapan kadagiti Levitas, mabasatayo: “Ket ni David biningayna ida iti dinasigdasig a mayannurot kadagiti annak ni Levi: da Gerson, Coat, ken Merari.” Kasta met, “ti pannakadasdasig dagiti annak ni Aaron” naaramid. Babaen ti tulong ni Sadoc ken ni Ahimelec, “inorganisar ni David ida a mayalubog iti pannakadasdasigda iti panagserbida . . . biningbingayda ida a mayalubog iti pannakadasdasigda.” Iti maud-udi a tiempo, mabasatayo: “Ket ni Joiada nangdutok kadagiti bantay iti balay ti APO iti babaen ti panangidalan dagiti papadi ken Levitas isuda a ni David inwarasna idi iti balay ti APO tapno idatagda dagiti datdaton a mapuoran iti APO, a kas adda a naisurat iti linteg ni Moises, a buyogen ti panagrag-o ken panagkanta a mayannurot iti bilin ni David.” (1 Cronicas 23:2-6; 24:1-6; 2 Cronicas 23:18, Revised Standard Version) Wen, ti pannakabingbingay dagiti papadi ken Levitas naorganisar nga agserbi ken ni Jehova.
Ti Ngay Kinakristiano?
9. Ania ti adda a pammaneknek a ni Jesu-Kristo inorganisarna dagiti paspasurotna a maipaay iti panagserbi ken ni Jehova?
9 Idi adda ni Jesus ditoy daga, dina imbaga kadagiti amin a namati kenkuana a mapanda iti bukodda a dalan ket ipamaysada laeng ti ‘personal a pannakilangenda iti Dios.’ Imbes ketdi, dagiti ad-adalan napanda ken Jesus, ket manipud kadakuada isut’ nangpili kadagiti 12 a lallaki kas apostoles. Ti pannakapilida ti naaramid kalpasan ti maysa a rabii a panagkararag gapuna naaramid dayta babaen iti tulong ken pananganamong ni Jehova. (Lucas 6:12-16) Daytoy saritaenna ti organisasion nga addaan iti nadiosan a pannakasuportar. Kasta met, inorganisar ni Jesus dagiti paspasurotna a maysa a nasursuruan a naimbag a grupo dagiti manangiwaragawag iti Pagarian. Kas pangarigan, nangipaay iti kasapulan nga instruksion kadagiti 70 nga ad-adalan nga imbaonna iti organisado a pamay-an.—Lucas 10:1-24.
10. Kasano ti panangipakita ti Kasuratan a dagiti naindagaan a paspasurot ni Jesus ti naorganisar a naimbag?
10 Nalawag ti panangipakita ti Kristiano a Griego a Kasuratan a dagiti immuna a paspasurot ni Jesus ti organisado a naimbag. Saanda a nagpannuray iti personal a panagbasbasa iti Kasuratan. Imbes ketdi, naibangon dagiti kongregasion ket kanayon a nagtitiponda nga agadal iti Sao ti Dios. Dagitoy a kongregasion saanda nga agwaywayas, agbukbukod a grupo, no di ket agtitinnulongda a buyogen iti ayat. Kas pangarigan, dagiti kongregasion nangipaayda kadagiti naimpusoan a panangkablaaw, ket dagiti organisado a grupo idiay Macedonia ‘dinawatda ti gundaway a mangipaay’ ti tulong kadagiti agkasapulan a “sasanto” iti sadinoman a lugar. (1 Corinto 16:19, 20; 2 Corinto 8:1-7; Colosas 4:14-16) Wen, ti immuna a kongregasion Kristiano nagtitinnulongda iti maysa ken maysa iti sidong ti panangiwanwan ti bagi a manarawidwid a buklen dagiti apostoles ken panglakayen idiay Jerusalem.—Aramid 15:1-16:5.
11. Apay nga inanamaentayo a ti “kongregasion ti Dios” ti naorganisar a naimbag?
11 Timmulong ni apostol Pablo a nangibangon kadagiti nagsayaatan ti pannakaorganisarna a kongregasion a timmaud gapu iti bendision ti Dios iti trabaho a panangasaba. Kasta met, kinuna ni Pablo a ni Jehova “saan a Dios ti riri, no di ket ti talna.” Intudo met ti apostol a “ti Dios nangorganisar iti maysa a bagi” dagiti napulotan a paspasurot ni JesuKristo sigun iti pagayatanna. Gapuna, inanamaentayo koma a naorganisar a naimbag ti “kongregasion ti Dios” ken agandar a sitatalna, addaan iti panagtutunos.—1 Corinto 14:33; 12:24, The Riverside New Testament; 1 Timoteo 3:5.
12, 13. (a) Ania ti naibagan maipapan iti kongregasion nga inorganisar dagiti apostoles ni Jesus? (b) Maitunos iti immuna-siglo a padron, siasino ti mangaywan kadagiti bambanag maipapan iti kongregasion dagiti Saksi ni Jehova?
12 No maipapan iti organisasion dagiti paspasurot ni Jesus, ti historiador a ni J. L. von Mosheim nagsurat: “No . . . ti pagduaduaan dagiti saan a Kristiano, dagiti apostoles ni Jesu-Kristo nagtignayda babaen iti nadiosan a bilin ken panangiwanwan, ket dayta porma ti immuna nga ig-iglesia a pinataudda manipud iti iglesia ti Jerusalem, isu nga imbangon ken inorganisar dagiti apostoles met laeng, ti masapul a maibilang a nadiosan.”—Institutes of Ecclesiastical History, Ancient and Modern, Tomo I, pinanid 67-8.
13 Makumbinsir dagiti Saksi ni Jehova a dagiti immuna a kongregasion dagiti paspasurot ni Jesus ti naorganisar a naimbag a maitunos iti nadiosan a pagayatan. Maitunos iti dayta a padron, ngarud, iti ummong dagiti Saksi ni Jehova ita dagiti manangaywan ken dagiti ministerial nga ad-adipen ti matudingan babaen iti nasantuan nga espiritu a mangaywan kadagiti bambanag maipapan iti kongregasion.—Aramid 20:28; Filipos 1:1.
14. (a) Kasano ti pannakaaywan ti immuna-siglo a kongregasion Kristiano? (b) Apay nga imbati ni apostol Pablo ni Tito idiay Creta?
14 Bayat ti umuna a siglo, dagiti apostoles ken dagiti panglakayen idiay Jerusalem addaanda iti panangaywan kadagiti kongregasion, nupay no dadduma a lallaki ti addaan iti panangaywan iti partikular a lugar ken mabalin nga ipaayda ti panangaywan kadagiti dadduma. (Aramid 14:21-23; 15:1, 2) Maitunos iti dayta, ni apostol Pablo tinudinganna ti Kristiano a manangaywan a ni Tito a mangaywan kadagiti dadduma a bambanag iti Mediteraneo nga isla iti Creta. Maipapan iti daytoy imbaga ni Pablo ken ni Tito: “Gapu itoy imbatika idiay Creta, tapno ituloymo nga organisaren dagiti bambanag a di pay nalpas idi ken tapno mangisaadka kadagiti panglakayen iti tunggal ili, kas imbilinko kenka.” (Tito 1:5, JB) Masiguradotayo a dagiti instruksion a naipaay iti surat ken Tito ti nangtulong kenkuana a mangibanag iti dayta a rebbengen tapno dagiti Kristiano ti agbalin nga organisado a naimbag nga agserbi ken ni Jehova.
Apay Agbalin nga Organisado a Naimbag Ita?
15, 16. Maipaay kadagiti ania a rason a naited ditoy a mabalintayo nga ibaga a dagidiay nga anamongan ni Jehova saanda laeng a maaddaan iti ‘personal a pannaki- langen iti Dios’ ket maiwaraswarasda kadagiti isuamin a relihiuso a bagi iti isuamin a lubong?
15 No kasta, naipakitan iti Kasuratan a ti nasayaat nga organisasion ket maysa a pakabigbigan dagiti ad-adipen ni Jehova idi napalabas a tiempo. Ngarud, kasta met laeng dagiti kasasaad ita. Ket addada dagiti nagsasayaatan a rason no apay a dagiti moderno-aldaw a Saksi ni Jehova ti masapul a maorganisarda a naimbag.,
16 Dagidiay a naanamongan dida mabalin ti maaddaan laeng iti ‘personal a pannakilangen iti Dios’ ket maiwaraswarasda kadagiti isuamin a relihiuso a bagi iti lubong. Ni Jehova kalikagumanna ti pudno a panagdayaw ket ngangnganinan ipatingga ti Babilonia a Dakkel, ti sangalubongan nga imperio iti ulbod a relihion. (Juan 4:24; Santiago 1:27; Apocalipsis 18:1-8) Kasta met, kasapulan ti panagkaykaysa kadagiti pudno a Kristiano. Nangnangruna ita a masapul nga addada iti maymaysa nga organisasion tapno naan-anay a matungpalda ti balakad ni apostol Pablo: “Dawatek ngarud kadakayo kakabsat, gapu iti nagan ni Apotayo a Jesu-Kristo a sawenyo amin koma ti maymaysa a banag, ket awan koma dagiti panaglalasin kadakayo, no di ket naan-anay koma ti panagtitimpuyogyo iti maymaysa a panunot ken maymaysa a panagrikna.”—1 Corinto 1:10.
17. Kasano a dagiti sasao iti Hebreo 10:24, 25 ipakitada a dagiti ad-adipen ni Jehova a Dios ken ni Jesu-Kristo ti masapul nga agbalinda amin a paset iti maymaysa nga organisasion?
17 Kasta met, dagiti pudno a Kristiano saanda a baybay-an dagiti panagtataripnongda kadagiti kankanayon a panaggigimong. Nangnangruna a pudno dayta ita, bayat nga umadadani ti panungpalan daytoy a sistema dagiti bambanag. (Hebreo 10:24, 25) Nalawag, ti panangsurot iti dayta a napaltiingan a balakad dagiti pudno nga ad-adipen ni Jehova a Dios ken ni Jesu-Kristo ti masapul a paset iti maysa nga organisasion.
18. (a) Kasano a ti 1 Juan 1:3 ipakitana nga amin dagiti napulotan a Kristiano ti masapul nga agkaykaysa iti maymaysa nga organisasion? (b) Dagiti napulotan-espiritu a paspasurot ni Jesus ti napagkaykaysa babaen iti siasino iti daytoy a “tiempo ti panungpalan,” ket aniada dagiti kinapudno maipapan iti panagtitinnulong kadagiti amin a Saksi ni Jehova?
18 Ti Kasuratan sapulenna ti panagkakadua dagiti napulotan a paspasurot ni Jesus. Maipapan iti daytoy, nagsurat ni apostol Juan: “Ti nakitami ken nangngegmi isuda dagiti ipakaammomi kadakayo tapno dakayo adda pakaikadkadduaanyo [pannakiraman; pannakikadua] kadakami. Wen, ket pudno a ti pannakikadkaduatayo adda iti Ama ken iti anakna a Jesu-Kristo.” (1 Juan 1:3, Byington; New World Translation; Authorized Version) No dagiti napulotan a paspasurot ni Jesus ti sinaggaysa nga addaan laeng iti ‘personal a pannakilangen iti Dios’ ket saanda a nagkaykaysa iti maymaysa nga organisasion, kasano ti panangtagiragsakda iti panagkaykaysa, pannakikadkadua wenno pannakiramraman? Daytoy a kasapulan ti maibanag laeng babaen ti panagbalin nga organisado. Ita, dagiti naiyanak-espiritu a paspasurot ni Jesus ti kinaduaanen dagiti “dakkel a bunggoy” dagiti “sabsabali a karnero.” Sigun iti deskripsion ni Jesus kadagiti marakarnero a tattao, inanamaentayo a dagitoy a “sabsabali a karnero” ti naan-anay a makitinnulong kadagiti napulotan a paspasurot tapno isuda amin ti sangsangkamaysa nga agbalin a “maymaysa nga arban” iti sidong iti “maymaysa a pastor.” (Apocalipsis 7:9; Juan 10:16) Ket apag-isu a kasta ti masarakantayo iti ummong dagiti ad-adipen ni Jehova iti daytoy “panawen ti panungpalan.” (Daniel 12:4) Kas ti maysa a manglikmut iti globo a panagkakabsat, dagiti amin a Saksi ni Jehova ti organisado a naimbag nga agserbi iti Dios.—Idiligyo ti 1 Pedro 2:17.
19. Apay a ti panangtungpal iti rebbengen a panangasaba kasapulanna ti panagtitinnulong iti uneg ti maymaysa nga iturturong ti espiritu nga organisasion?
19 Ti panangtungpal iti rebbengen a mangasaba ken mangaramid adalan kasapulanna met ti panagtitinnulong iti uneg ti maysa a nagkaykaysa nga organisasion. (Mateo 28:19, 20; Aramid 1:6-8) No ti tunggal maysa nga agkunkuna a Kristiano ti addaan laeng iti ‘personal a pannakilangen iti Dios’ ket naikameng iti basta aniaman a relihiuso a grupo, kasano a mabalin a maibanag ti rebbengen a mangasaba? Ta, dagiti dadduma, ti mabalin a kunkunaenda “Shibboleth” ket dagiti dadduma “Sibboleth”! (Oc-ocom 12:4-6) Kasano nga ammo dagiti makangngeg kadagiti kakasta a mensahe ti patienda? Dagiti napulotan a Kristiano ‘sipapasnek nga ikagumaanda a tungpalen ti panagmaymaysa iti espiritu iti singgalut ti talna,’ ken kadakuada adda ti “maysa nga Apo, maysa a pammati, maysa a pammautisar; maysa a Dios ken Ama dagiti isuamin.” (Efeso 4:1-6) Adda koma ti panagtutunos kadagiti amin a pudno a Kristiano, ti maymaysa a mensahe, tapno mangngegan dagiti tattao ti umiso, maaddaanda iti pammati iti pudno a Dios ket umawagda iti nagan ni Jehova nga addaanda iti namnama a maisalakan. Kasta met, ti iturturong ti maymaysa nga espiritu nga organisasion ti masapul a mausar a mainaig iti pannakaibaon dagidiay a napudno a mangaskasaba iti “naimbag a damag.”—Roma 10:11-15.
20. Ania a maymaysa nga organisasion ti mangtungtungpalen iti Mateo 24:14, ket ania ti adda a pammaneknek nga adda ti anamong ti Dios iti kasta a naorganisar a naimbag a panagtrabaho?
20 Ngarud, iti pannakatungpal iti padto ni Jesus maipapan iti “kaaddana” ken “ti panungpalan iti sistema dagiti bambanag,” masapul nga adda ti maysa a nagkaykaysa nga organisasion a ‘mangikasaba itoy naimbag a damag iti pagarian iti isuamin a mapagnaedan a daga a maipaay a pammaneknek kadagiti amin a nasion sakbay ti iyaay ti panungpalan.’ (Mateo 24:3, 14) Ita, dagiti laeng Saksi ni Jehova ti mangiwarwaragawag iti naimbag a damag a dayta a Pagarian ti agan-andaren kadagiti langlangit nanipud pay idi 1914 a ni Jesu-Kristo ti Ari. Addada nasuroken a 2,650,000 kadagitoy nga organisado a naimbag a manangiwaragawag iti Pagarian, ket umad-adu pay ti bilangda a sipapartak gapu iti bendision ti Dios.—Isaias 43:10-12; 60:22.
21. No maipapan iti organisasion ni Jehova, ania ti usigentayo a sumaganad?
21 Kadagitoy a napeggad a “maudi nga al-aldaw,” anian a pribilehio ti kaadda iti ummong ti bunggoy a naorganisar a naimbag nga agserbi ken ni Jehova! (2 Timoteo 3:1) Adda ti nagsayaat a Nainkasuratan a pangibatayan a dagiti amin a naimpusoan ti kinapasnekna iti Dios itultuloyda ti sisusungdo a panagserbi a kadua ti organisado a tattaona. Ket kas makitatayonto, addada dagiti naimbag a rason iti panangibangon iti natalged ken naragsak a masanguanan a kadua ti organisasion ni Jehova.
[Dagiti Footnote]
a Pangngaasiyo ta kitaenyo ti The Watchtower nga Oktubre 15, 1983, pinanid 28-31.
Ania ti Makunayo?
◻ Kasano ti panagtrabaho dagiti nasantuan nga angheles a mainaig ken ni Jehova?
◻ Ania ti pammaneknek iti nasayaat a pannakaorganisar iti Israel idi ugma?
◻ Kasano ti Nainkasuratan a panangpaneknekyo a dagiti immuna a paspasurot ni Jesu-Kristo nakasaysayaat ti pannakaorganisarda?
◻ Apay a ti panangikasaba iti mensahe iti Pagarian kasapulanna ti panagtitinnulong iti uneg ti maymaysa nga organisasion?
[Ladawan iti panid 11]
Idi kaaldawan ni David, dagiti pannakabingaybingay dagiti papadi ken Levitas naorganisarda nga agserbi ken ni Jehova
[Ladawan iti panid 12]
Ti bagi a manarawidwid ti mangipaay iti panangiturong a maipaay iti naorganisar a naimbag nga immuna-siglo a kongregasion