Panangibangon iti Masanguananyo a Kadua ti Organisasion ni Jehova
“Adda koma laeng ti panagbuteng ken ni Jehova iti agmalmalem. Ta di bumurong nga addanto gunggona, ket ti inanamam saanto a matungday.”—PROVERBIO 23:17, 18.
1, 2. Malaksid kadagiti dadduma pay a bambanag, ania ti nakita ni apostol Juan idi ngangnganin agpatingga ti umuna a siglo K.P.?
IPALGAK ni Jehova dagiti bambanag iti masanguanan tapno makapagtignayda a buyogen iti kinasirib. (Isaias 42:9) Kas pangarigan, idi pagnguduan iti umuna a siglo K.P., impaay ti Dios iti lakayen a ni apostol Juan ti maysa a sirmata iti makatignay-namnama a masanguanan. Anian a ragsaktayo ta pinaneknekan ni Juan dagiti “amin a bambanag a nakitana” ket nailanadda iti libro ti Biblia nga Apocalipsis!—Apocalipsis 1:1, 2.
2 Mairaman kadagiti dadduma pay a bambanag, nakita ni Juan dagiti “uppat nga anghel” a mangtengtengngel kadagiti “angin” a mangpataud iti “dakkel a rigat.” Kasano ti kabayag a masapul a tenglen dagiti anghel dagidiay a makadadael nga ang-angin? Ti sabali nga anghel ti nangibaga kadakuada: “Dikay ranggasan ti daga ken kasta met ti baybay wenno dagiti kaykayo, agingga a dikam maselioan dagiti adipen ti Diostayo kadagiti mugingda.”—Apocalipsis 7:1-3, 14; Mateo 24:21, 22.
3. Sakbay ti nagdakkelan a panangdadael dagiti napalubosan nga “angin” iti organisasion ni Satanas, anianto ti naibanagen ken babaen iti ania a pamay-an?
3 Dagiti naibulos nga “angin” mangipaayda iti nagdakkelan a pannakadadael iti naindagaan nga organisasion ni Satanas a Diablo, a naan-anay a mangdadael iti dayta. (Idiligyo iti Jeremias 25:32, 33.) Ngem sakbay ti pannakapasamak dayta dagiti natda iti napulotan a makipagturay ken Jesu-Kristo idiay langit ti masapul a naselioan. Ti pannakaselio dagitoy nga “ad-adipen iti Diostayo kadagiti mugmugingda, ti maaramid babaen iti nasantuan nga espiritu ti Dios, wenno ti aktibo a puersa, isu nga ikutan dagiti napulotan a Kristiano a kas pakailasinan iti nailangitan a tawidda. (2 Corinto 1:21, 22; Efeso 1:12-14) Ti pannakaikasaba ti naimbag a damag ti Pagarian ti Dios iti “maudi nga al-aldaw” ti mangibanag iti pannakakompleto ti pannakaurnong dagitoy a “napili.”—Mikias 4:1; Mateo 24:14, 31.
4. Mano nga “ad-adipen ti Dios” ti maselioan iti agnanayon, ket kasano a mapaneknekanyo ti sungbatyo iti Kasuratan?
4 Mano nga “ad-adipen iti Diostayo” ti agnanayonto a maselioan? Ni Juan, isu a maysa kadakuada, ti simamatalek a nangipakaammo: “Ket nangngegko ti bilang dagiti namarkaan, sangagasut uppat a pulo ket uppat a ribo.” Dagitoy ti mangbukel “ti Israel iti Dios,” ti naespirituan nga Israel, a buklen dagiti 12 a tribo a 12,000 ti tunggal maysa. (Apocalipsis 7:4-8; Galacia 6:16) Anian nga organisasion! Iti sidong ti Ari a ni Jesu-Kristo, ti 144,000 ti agbalinto a “maysa a pagarian dagiti papadi iti Diostayo, ket agarida iti rabaw ti daga.”—Apocalipsis 5:10; 14:1-4.
5. (a) Siasinoda dagiti nainaigen kadagiti natda iti naespirituan nga Israel? (b) Amin dagiti managbuteng ken ni Jehova buklenda ti ania, ket sigun iti Proverbio 23:17, 18, ania ti adda a maipaay kadakuada?
5 Kalpasan ti pannakakita ni apostol Juan iti naespirituan nga Israel, nakitana iti maysa a “dakkel a bunggoy” ket nasdaaw no siasino dagitoy. Naibaga kenkuana: “Dagitoy isuda dagiti naggapu iti dakkel a rigat, ket binugguanda dagiti pagan-anayda, ket pinapudawda ida iti dara ti Kordero.” Dagidiay a mangbukel iti “dakkel a bunggoy” isuda dagiti naindagaan nga iturayan iti Pagarian, ket naipadto a “ti Kordero,” ni Jesu-Kristo, ti “mangidalanto kadakuada kadagiti ub-ubbog ti danum ti biag”—wen, iti biag nga agnanayon iti maysa a paraiso a daga. (Apocalipsis 7:9, 14, 17; Lucas 23:43) Itan dagitoy a “sabsabali a karnero” buklenda ti “maymaysa nga arban” a kadua ti natda iti agtawid iti Pagarian, ket amin dagiti kakasta a managbuteng ken ni Jehova buklenda ti naindagaan nga organisasion ni Jehova. (Juan 10:16) Babaen iti panagtalinaed a matalek kenkuana, maaddaandanto iti nabendisionan a masanguanan, ta mabasatayo: “Adda koma laeng ti panagbuteng ken ni Jehova iti agmalmalem. Ta di bumurong nga addanto gunggona, ket ti inanamam saanto a matungday.”—Proverbio 23:17, 18.
Awan ti Masanguanan Daytoy Daan a Sistema!
6. Sadino ti pakasarakantayo kadagiti bagbagitayo iti panaglabas ti tiempo?
6 Nakaadayotayon iti “maudi nga al-aldaw” daytoy dakes a sistema dagiti bambanag. (2 Timoteo 3:1-5) Dagiti paspasamak iti lubong maitunosda iti kronolohia ti Biblia iti naipasdeken a kinapudno a ni Jesu-Kristo nangrugin a nagturay idiay langlangit idi otonio iti 1914. (Salmo 110:1, 2) Inaldaw, dagiti maipadamag a damdamag ipakitada a ti napagkaykaysa a “pagilasinan” iti “kaadda” ni Jesus ken ti panungpalan daytoy a sistema mapampaneknekanen. (Mateo, kapitulo 24, 25) Pudno, ti “kaputotan” a kapatad ti pannakaipasdek iti Pagarian idi 1914 lumaklakaydan. Ngem dagiti sasao ni Jesus ipakitada a daytoy “dinto pay lumabas” sakbay a ti “dakkel a rigat” maipatinggananton daytoy a lubong dagiti saan a nalinteg a natauan a sosiedad “nga adda iti pannakabalin ti dakes,” ni Satanas a Diablo. Kasano kabiiten ti pannakapasamakto dayta? Sigurado a saanen a mabayag, ta daytoyen ti maika-70 a tawen iti panagturay ti Pagarian!—Mateo 24:21, 34; 1 Juan 5:19.
7. (a) Anianto ti mapasamak bayat ti umuna a paset ti “dakkel a rigat”? (b) Anianto ti mapasamak kalpasan la unay ti pannakadadael ti ulbod a relihion?
7 Ti “dakkel a rigat” mangruginto a kellaat unay. (Mateo 24:36-44) Iti damo a pasetna, dumtengto ti pannakadadael ti “Babilonia a Dakkel,” ti sangalubongan nga imperio ti ulbod a relihion. Ti pannakadadael daytoy a kangrunaan a paset iti sistema ni Satanas apektarannanto dagiti napolitikaan ken nakomersialan nga elemento. Maipapan iti daytoy, impalgak ni apostol Juan a “dagiti ar-ari ti daga” agsennaaydanto: “Asipay daydi dakkel a siudad, ti Babilonia a nabileg a siudad, ta iti maymaysa nga oras isu napukaw!” Ket dagiti ngay nakomersialan nga elemento? “Ket,” kuna pay ni Juan, “dagiti agtagtagilako ditoy daga isu ti sangsangitan ken dungdung-awanda, ta awan ti gumatangen iti tagtagilakoda.” (Apocalipsis 18:1-19) Di nagbayag kalpasan ti pannakadadael ti ulbod a relihion, usarenton ni Jesu-Kristo ti nailangitan a buyotna a mangdadael iti natda pay iti daytoy dakes a sistema dagiti bambanag. Mapukawton iti napardas ti iyaadanina a “gubat ti dakkel nga aldaw ti Dios a Mannakabalin-amin” idiay Har-Magedon.—Apocalipsis 16:14-16; 19:11-21.
8. Ania nga organisasion ti kakaisuna nga addaan iti agnanayon a masanguanan, ket apay a kastoy ti kaso?
8 Ania ti kaipapanan daytoy kadagidiay nga addaan iti nasayaat a panagbuteng ken Jehova? Siempre, dayta kaipapananna a daytoy a lubong iti sidong ti panangtengngel ni Satanas awanan ti masanguanan! Naibusen ti tiempona! Gapuna, ti organisasion ni Jehova isu laeng ti kakaisuna a pangibangonan iti agnanayon a masanguanan.
9. (a) Gapu iti adda iti masanguanan, aniada a salsaludsod ti nasayaat nga imtuoden? (b) Ania a naintiempuan a balakad ti masarakan idiay 1 Timoteo 6:17-19?
9 Gapu iti adda iti masanguanan, ngarud, panangipakita kadi iti pammati, wenno uray pay ti nasayaat a kapanunotan, ti panangpadas a mangibangon iti natalged a masanguanan iti dadduma a paset daytoy naikeddengen a madadael a sistema? Kas pangarigan, iti ania a nailubongan a korporasion wenno negosio ti sitatalged a pakaibangonanyo iti agnanayon a masanguanan? Awan! Gapuna saan kadi a nainsiriban ti agbalin a kontenton iti pannakataraon ken ti pannakakawes bayat ti panangiyununatayo iti intereses iti Pagarian iti biagtayo? (Mateo 6:33; 1 Timoteo 6:7-12; 2 Timoteo 2:4) Nangnangruna a naintiempuan itan ti balakad ni apostol Pablo: “Kadagiti nabaknang itoy a lubong ibilinmo kadakuada a dida agtangtangsit, ket dida met imaldit ti inanamada kadagiti kinabaknang a pagduaduaan, no di ket iti Dios, isu a mangted kadatayo iti nawadwad kadagiti isuamin a pagnam-ayantayo; nga agaramidda koma iti naimbag, a nabaknangda koma kadagiti naimbag nga aramid, a managparanudda, a nalakada a makipagrikna, nga agurnongda iti maipaay kadakuada ti maysa a nasayaat a pamunganayan a maisagana iti aldaw a mapasungad, tapno magun-odanda ti biag a pudno.”—1 Timoteo 6:17-19.
Ibangonyo a Nainsiriban ti Masanguananyo
10. Babaen iti pannakakitan iti “dakkel a rigat” iti sanguanantayo, ania koma ti kangrunaan a pakaseknantayo?
10 Ania a naespirituan a kinatimbeng ti nalawag a makita kadagidiay a sasao iti apostol! Kadakuada makita dagiti tattao ni Jehova ti tulbek iti pannakailasat. Isu daytoy: Taginayonenyo dagiti namaterialan a bambanag iti umiso a lugarda, a bigbigenyo a saan koma nga ipangpangruna dagiti “mapagduaduaan a kinabaknang” no di ket ti panagbalin a “nabaknang kadagiti nasayaat nga ar-aramid.” Dayta ti pudno a mangiraman iti kinaregta, kanayon a pannakiraman iti Nakristianuan a ministerio. Babaen iti ulep ti bagyo iti “dakkel a rigat” isu a maporporman iti danonen ti panagkita, daytoy saanen a tiempo iti panagplano a maipaay iti nawadwad a masanguanan iti nailubongan a negosio wenno ti pannakaitan-ok iti saad iti korporasion. Daytoy ti tiempo iti panangikasaba iti naimbag a damag iti Pagarian ti Dios, tapno pakdaaran dagiti saan a mangipagpagarup iti umad-adanin a peggad. Kasta met, tinudingannatayo ni Jesu-Kristo a mangasaba ken mangaramid adalan. Gapuna, dayta koma ti kangrunaan a pakaseknantayo kas Saksi ni Jehova.—Mateo 24:14; 28:19, 20; Isaias 43:10-12.
11. Aniadanto dagiti dadduma nga agnanayon a gunggona iti Nakristianuan a ministerio?
11 Adu a pagsapulan nga itultuloy nga ar-aramiden dagiti tattao iti lubong ti agpatingganton iti agnanayon bayat ti “dakkel a rigat.” Pudno, dadduma a kita iti trabaho ti mapasublinto iti naikari a baro a sistema dagiti bambanag ti Dios. Ngem adda kadi ammoyo nga aniaman nga agdama-aldaw a trabaho nga addaan iti nakaad-adu a pakagunggonaan a kas ti Nakristianuan a ministerio? Dagiti naespirituan nga irarang-ay ken idadakkel a dumteng a maikuyog iti daytoy inted-Dios a trabaho ti makagunggona unay iti Baro nga Urnos. Ti nabileg a pannakilangen ken ni Jehova a mapataud iti ministerio maitultuloyto iti dayta a sistema dagiti bambanag. Ket ti napasayaat a paglaingan a mangisuro ti mabalin a makatulong iti panangisuro kadagiti minilion a mapagungarto.—Isaias 54:13; Juan 5:28, 29; Apocalipsis 20:12.
12. Kas ad-adipen ni Jehova, aniada a naindaklan a namnama ti adda kadatayo, ngem ania ti masapul nga aramidentayo?
12 No ti kangrunaan a pakaseknantayo itan isu ti panangay-ayo iti Dios ken ti panagaramid iti pagayatanna, pudno a maaddaantayo iti naindaklan a namnama. (Salmo 40:8; Roma 12:1, 2) Kinapudnona, no adda ‘panagbutengtayo ken Jehova, adda masanguanan a maipaay kadatayo ket saanto a matungday ti inanamatayo.’ (Proverbio 23:17, 18) Ti biag nga agnanayon ikutantayonto no itultuloytayo ti magna “iti dalan ti biag” a buyogen iti panagbuteng iti Dios. (Salmo 16:11) Iti isuamin a dalantayo, nupay kasta, masapul ti panangipaaytayo ken pananggun-odtayo kadagiti nainkalintegan a kalat.
Dadduma a Nainkalintegan a Kalat
13. (a) Maibatay iti Kasuratan, apay a makunatayo a nagtultuloy a naitan-ok ti panagdayaw ken ni Jehova? (b) Iti panangipapan, ania ti dadduma a kalat a nagun-odanen dagiti ginasut a ribo?
13 Dadduma ti karugrugida pay laeng iti maikuna a ti iyuulida “iti bantay iti balay ni Jehova.” Nanipud idi tawtawen ti gubat idi 1914-18 ti panagdayaw ken ni Jehova, a ti templona wenno “balayna” ti adda idi iti tuktok ti maysa a bantay idiay Jerusalem, ti naitultuloy a naitan-ok. Dayta ti “naipasdeken iti ngatuen dagiti bambantay” isu a nakaibangonan dagiti templo dagiti ulbod a didios. Gapuna ti panagdayaw ken ni Jehova ti “naipangato iti ngatuen dagiti turturod.” Iti naitan-oken a panagdayaw ken Jehova, dagiti umariwekwek agayusda iti dayta. (Mikias 4:1-4; Isaias 2:2-4) Kalpasan iti pannakagun-odda iti umiso a pannakaammo iti Kasuratan, agbabawida, agsublida, mangaramidda iti dedikasion iti Dios a buyogen iti kararag ken isimboloda daytoy babaen iti pannakaitaneb iti danum. (Juan 17:3; Aramid 2:38; 3:19) Dayta kayatna a sawen, dagitoy dagiti kalat a nagun-odanen dagiti ginasut a ribo a tattao manipud kadagiti amin a nasnasion, isu a kalpasan dayta agserbidan a simamatalek kas paset iti naindagaan nga organisasionna. Anian a ragsakda a mangaramid iti naitan-ok a panagdayaw iti maymaysa a pudno a Dios! Ngem dakayo met ngay? Innalayo kadin daytoy nga addang?
14. Uray pay kalpasanen ti panangrugitayo nga agdayaw ken ni Jenova, masapul nga itultuloytayo ti ania, ken kasano a maaramid daytoy?
14 Uray pay kalpasan ti panangrugitayo a mangdayaw ken Jehova a kadua dagiti tattaona, masapul ti panangparang-aytayo ken panangtaginayontayo iti nasayaat a naespirituan a ganatayo a mangan kadagiti naespirituan a bambanag. Gaput’ pannakaammotayon kadagiti “pagdadammuan a sursuro maipapan ken Kristo,” masapul “ti panagtultuloytayo iti kinamataengan” babaen iti pananggun-odtayo kadagiti amin a naespirituan a probision nga ipapaay ni Jehova babaen “ti matalek ken naannad nga adipen.” (Hebreo 6:1-3; Mateo 24:45-47) Gapuna mabalin nga imtuodenyo ti bagiyo met laeng: Kankanayon kadi a basbasaek ti Sao ti Dios? Maysaak kadi a nasayaat nga estudiante dagiti publikasion a maipapaay babaen iti klase “adipen”?—Hebreo 5:11-14.
15. (a) Ania a balakad ti inted ni Pablo idiay Hebreo 10:24, 25, ngem ania ti ar-aramiden dagiti dadduma? (b) No adda pay personal a pagrang-ayan iti panagatender kadagiti gimgimong wenno iti Nakristianuan a ministerio, ania ti naisingasing?
15 Kasta met, masapul nga ipangagtayo ti balakad ni Pablo: “Maseknantayo koma iti maysa ken maysa, a matignaytayo iti panagayat ken kadagiti nasayaat nga ar-aramid. Dikay baybay-an dagiti pannakigimong iti komunidad, kas ti aramiden dagiti dadduma, no di ket paregtaenyo ti maysa ken maysa a makigimong; nangnangruna ta makitayo nga asidegen ti Aldaw.” (Hebreo 10:24, 25, The Jerusalem Bible) Ti kankanayon a panagatender kadagiti Nakristianuan a gimgimong ket paset iti “sagrado a panagserbi[tayo].” Ngem dadduma ti agatender laeng iti miting publiko iti linawas, a kanayon a pumanawda iti Kingdom Hall sakbay a mangrugi ti panagadal iti Ti Pagwanawanan. Dadduma ti masansan a saan a makaatender iti Gimong iti Panagserbi. Nagbalinen aya a saan a napateg dayta kadakuada ta saanda nga aktibo iti panangasaba iti balaybalay’ a trabaho ken kadagiti dadduma pay a paset iti Nakristianuan a ministerio? No masarakanyo nga adda pay ti mabalin a rang-ayan a personal iti aniaman kadagitoy a bambanag, apay a dikay agkararag ken ni Jehova maipapan kadagita a bambanag, a dawatenyo a tulongannakayo nga agbalin a regular ken mapagulidanan iti amin a paspaset iti “sagrado a panagserbi”?—Hebreo 12:25-29.
16. (a) Aniada a nainkalintegan a teokratiko a kalkalat ti nadakamat ditoy? (b) Uray pay no ti Nainkasuratan nga obligasion ti manglapped ti maysa iti pananggun-od kadagiti kakasta a kalat, kaskasdi ania ti posible?
16 Aniada dagiti dadduma pay a nainkalintegan a teokratiko a kalat? Bueno, addada ti kankanayon nga umad-adu a bilang dagiti indibidual a mangar-aramid iti amin-tiempo a ministerio a kas ti regular ken auxiliary a payunir. Mabalinyo kadi a palawaen ti ministerioyo kadagiti kakasta a pamay-an? Siempre, uray pay no dagiti Nainkasuratan nga obligasionyo ti manglapped kadakayo a manggun-od kadagiti kakasta a kalat, mabalinyo ti mangipaay iti moral a panangsuportar kadagiti amin tiempo a manangaskasaba bayat a mangar-aramidkayo met iti ingganat’ kabaelanyo iti panagserbi iti Dios sigun iti ipalubos dagiti kasasaadyo. Babaen iti simamatalek a panagdayaw ken panagserbi iti pakaidayawan ni Jehova, datayo amin mabalin nga ipakitatayo nga ‘ibataytayo ti namnamatayo saan a kadagiti mapagduaduaan a kinabaknang no di ket iti Dios.’ Ket kadagidiay a makapagpayunir, sigurado a daytoy ti kasasayaatan a pamay-an iti “pananggun-odda ti biag a pudno.”—1 Timoteo 6:17-19.
17. (a) Dagiti agtutubo nangnangruna mabalin a panunotenda ti ania a pribilehio iti panagserbi? (b) Ania a pannakapnek ti adda kadagiti miembro ti pamilia ti Bethel?
17 Ti panagserbi iti maysa kadagiti pagtaengan iti Bethel iti agliklikmut ti lubong ket maysa met a nagsayaatan a pribilehio, maysa a nangnangruna a panunoten dagiti agtutubo a buyogen iti panagkararag. Ti panagserbi iti Bethel ti mangipaay iti nagsayaatan a pannakasanay iti pannakilangen kadagiti tao, ta dagiti agtartrabaho iti Bethel ti agtitinnulong a naimbag a mangparang-ay kadagiti intereses iti Pagarian. Dagiti dadduma a paglaingan a maparang-ay idiay Bethel ti mabalin a makatulong iti nagdakkelan a trabaho a panangisuro a maaramidto idiay Baro nga Urnos. Siempre, agsipud ta adu dagiti sumrek iti Bethel bayat nga ubbingda pay, awan ti adu a namaterialan a sanikuada. Ngem mapnekdan iti pannakataraon ken ti pannakakawes ket mapnekda a naimbag iti pannakaammo a ti trabahoda ti makagunggona kadagiti adu a sabsabali iti naespirituan.—Eclesiastes 3:12, 13.
18. Ti pannakiraman iti amin-tiempo a panagserbi ti mabalin a makaisuro iti maysa a tao iti ania, ket kasano a mapaneknekan daytoy iti Kasuratan?
18 Ti pannakiraman kadagiti nadumaduma a tay-ak iti amin-tiempo a panagserbi mabalin a makaisuro iti maysa a tao iti ad-adda a panagpannuray ken ni Jehova a Dios. Dagiti nailubongan a tattao a mangikabil iti panagtalekda kadagiti “mapagduaduaan a kinabaknang” ti masansan nga addaan iti kapanunotan a ti maysa a tao ti mangaywan iti bagina met laeng. Ngem nangnangruna a ti amin-tiempo a ministro masursurona a ni Jehova ti mangipaay iti umdas a kasapulan kadagidiay a “mangsapul nga umuna iti Pagarian ken ti kinalintegna.” (Mateo 6:25-34) Rinibribo a nakapagserbin a payunir kadagiti adu a tawtawen ti mangpaneknek iti kinapudno a saanda a pulos a nagkurang kadagiti kasapulan iti biag. Makisaritakayo kadakuada ket masarakanyonto nga umanamongda a naimpusoan iti salmista a ni David, isu a nagkuna: “Nagubingak, ket ita lakayakon, diak pay nakakita iti sililinteg a nabaybay-an ken kadagiti putputotna a nakipalpalama iti kanen.”—Salmo 37:25.
Mangibangonkayo iti Natalged a Masanguanan
19, 20. (a) Agsipud ta ababa unayen ti tiempo a maipaay itoy a sistema dagiti bambanag, ania koma ti ar-aramidentayo? (b) Gapuna kasano ti panagtignaytayo a nainsiriban no maipapan iti masanguanan?
19 No datayo nasungdotayo a saksi ni Jehova, mabigbigtayo nga ababa unayen ti tiempo a maipaay itoy a sistema dagiti bambanag. Gapuna ania koma ti ar-aramidentayo? Agtigtignaytayo koma a nainsiriban a maitunos kadagitoy a sasao ni apostol Pedro: “Idinto a kasta a dagitoy a bambanag marunawdanto iti kastoy, ania a kita dagiti tattao ti pagbalinanyo koma, iti amin a kita ti nasantuan a panagbiag ken kinasingpet, nga ur-urayenyo ket tartarigagayanyo ti yaay daydiay aldaw ni Jehova, a dagiti langlangit, idinto a sumsumgedda, maburakburakdanto, ket dagiti elemento matunawdanto iti sumsumged a pudot!”—2 Pedro 3:11, 12.
20 Ni apostol Juan, met, ti nangilawlawag a daytoy a lubong lumabas. (1 Juan 2:15-17) Din agbayag, mapukawton daytoy daan a sistema. Gapuna, amin dagiti agbuteng iti Dios ti masapul a makiramanen kadagiti ‘nasantuan nga ar-aramid iti nadiosan a debosion, bayat nga ur-urayentayo ken tartarigagayantayo ti yaay daydiay aldaw ni Jehova.’ Dikay liplipatan a ti laeng organisasion ti Dios ti makalasatto iti panungpalan daytoy matmatayen a sistema. Agtignay a nainsiriban, ngarud, ket agplano a maipaay iti biag nga agnanayon babaen iti panangibangon iti masanguananyo a kadua ti organisasion ni Jehova.
Pamay-an iti Repaso
◻ Amin dagiti managbuteng ken Jehova buklenda ti ania, ket ti Proverbio 23:17, 18 ti mangipaay kadakuada iti ania a panangipanamnama?
◻ Ania laeng nga organisasion ti addaan iti masanguanan, ket apay a kasta ti sungbatyo?
◻ Agsipud ta ti “dakkel a rigat” asideg unayen, ania koma ti kangrunaan a pakaseknan dagiti Saksi ni Jehova?
◻ Aniada dagiti dadduma a teokratiko a kalat a mabalin a gun-oden dagiti adu?
[Blurb iti panid 17]
Ita, dagiti amin a pudno nga agbuteng iti Dios adda kadakuada ni Jesus a Pastorda ken agserbida a sangsangkamaysa kas ti naindagaan nga organisasion ni Jehova
[Blurb iti panid 19]
Ibangbangonyo kadi ti masanguananyo a kadua ti organisasion ni Jehova? Ti panagpayunir ken ti panagserbi idiay Bethel ti dadduma kadagiti nagsayaatan a teokratiko a kalat a nagun-odanen dagiti adu
[Ladawan iti panid 18]
Gapu iti nadiosan a bendision iti trabaho a panangasaba, umariwekwek ti agturturong iti natan-ok a panagdayaw ken ni Jehova