Kasano Kasinged ti Dios Kenka?
NI TALLO-TAWENNA a Rafael ti nangirugi ti kararagna iti daytoy nakasimsimple a pamay-an: “Kumusta ka, Jehova?” Numan pay saantay nga paboran ti kasta nga iyaadani babaen kadagiti nataengan, mabalin nga umisemtayo iti kinapasnek daytoy nga inuubingan nga ugali ti agtutubo. Ti kinapudnona ket ni Rafael nalawag a nakasingsinged ti panagrikriknana iti Dios. Kenkuana, ti Dios ket ad-adda pay ngem basta maysa a di nalawag a puersa. Isut’ maysa a pudpudno a persona. Ti kadi Dios ket kasta ti kinapudnona, kasta ti kinasingedna, kadakayo?
Anian a karkarna a nagadu a tattao nga agkuna a mamatida iti Dios dida pay pulos padpadasen nga adalen ti ad-adu maipapan kenkuana wenno agbalin a nasinged kenkuana! Para kadagiti dadduma, ti maysa a natangsit a kababalin iti manglapped iti panagbalinda a nasinged iti Dios. “Ti mata [ti Dios] ket maibusorda kadagiti natangsit,” kuna ni Ari David. (2 Samuel 22:28) Dagiti dadduma ti nakaem-emmada unay ken nakapakpakumbabada unay a mangpanunot a posible ti maaddaan iti pannakirelasion iti Dios. Ti masapul nga aramiden ti natangsit isut’ panangsukayna iti interes kas ti maysa nga ubing. Kuna ni Jesus: “Pudno kunak kadakayo a, No dikayto agsubli ken agbalin a kasla ub-ubbing, dikayto sumrek iti pagarian ti langit.” (Mateo 18:2-4) Ken nalabit dagiti nalabes iti kinaemmada, magunggonaanda met iti ad-adu pay ngem iti inuubingan a kababalin a namalubos ken ni Rafael nga immadani iti Dios nga awan panagalikakana.
Ngem numan pay ti pannakaadda iti umiso a kababalin ket isu ti nasayaat a pangrugian, tapno pudpudno a nakasingsinged iti Dios, adu pay iti kasapulan. Umuna, masapul nga adda ti pannakaammo ti kaaddana. No kumitakayo kadagiti nakaskasdaaw nga ar-aramid ti panamarsua ti Dios, matignaykay met laeng aya a mangpanunot kenkuana, nga agdayaw ken agyaman kenkuana kas ti inaramid ni salmista David? Insaludsodna: “No imutektekak dagiti langlangitmo, ti aramid dagita ramaymo, ti bulan ken dagiti bitbituen, isuda nga insaadmo, ania ti tao, tapno sipapanunotka kenkuana, ket ti anak ti tao, tapno sumarungkarka kenkuana?” (Salmo 8:3, 4) Ti panangipaay iti tiempo tapno agmennamenna nga addaan panangipateg iti sangaparsuaan ti Dios ket isut’ sigurado a panangpabileg iti singgalut iti ayat iti nagbaetanyo ken iti Dios.
“Umadanikayo iti Dios”
Ti dua a magneto, no umiso ti pannakalineada, ti addaanda iti panagatrakar iti maysa ken maysa. Kinapudnona, no paginnassidegenyo unay ida, napigpigsa met iti panaginnatrakarda. Umas-asping met iti dayta ti mapasamak iti pannakirelasiontayo iti Dios, ta ni adalan a Santiago kunana: “Umadanikayo iti Dios, ket isu umasidegto kadakayo.”—Santiago 4:8.
Ti panagadal maipapan iti Dios ket isut’ maysa a pamay-an tapno “umadani” kenkuana. (Juan 17:3) Babaen laeng iti panagadal iti Sao ti Dios, ti Biblia, a ti maysa maadalna ti naganna, a Jehova, ken ti kinapudno maipapan kadagiti pangpanggepna nga agpaay iti daga ken kadagiti galadna, kas ti ayat, kinasirib, kinahustisia ken pannakabalin. (Salmo 83:18) ‘Ngem,’ mabalin a maikunayo, ‘Ammokon a ti Dios ket mannakabalin-amin, naan-anay ti kinalintegna ken ti kinasiribna ken ti ayatna.’ Kaskasdi, dayta kadi a mismo ket panangipamatmat iti pudno ken nawadwaden a pannakaammo iti Dios? Saan met a kasta.
Iti bukbukodda, dagiti sasao maipapan iti Dios ken kadagiti kualidadna ti kasla awan mamaayda, nangnangruna no saanyo ida a maikonektar kadagiti personal a kapadasanyo. Kas pangarigan, kasano a ti maysa a tao a tuleng manipud pannakaiyanakna maawatanna no aniat’ kaipapanan ti “nalaaw” ken “naalumamay”? Kasanona a maammuan ti pagdumaan iti uni ti maysa a billit-tuleng ken ti uni iti maysa a kalapati nga awan met iti pamay-an a pamagdiliganna kadagitoy a dua? Umasping iti dayta, iti bukbukodna ti sao a ti “Dios isut’ ayat” ti nasursurok la bassit ngem maysa a nalamiis a kinapudno. (1 Juan 4:8) Ngem tapno masagrap a naan-anay ti ayat iti Dios, agpadpada iti panunot ken iti rikna, masapul nga usigen ti maysa a tao no kasano a dayta nga ayat naiyebkasen iti sangatauan. (Juan 3:16) Masapul nga ammona met nga ikonekta dayta nga ayat ti Dios iti personal a kapadasanna. “O nanamenyo ket kitaenyo ta ni Jehova naimbag,” kuna ti salmista. (Salmo 34:8) Bayat nga ar-aramiden ti maysa daytoy, saanna matngelan no di umadani iti Dios.
Bayat a tangtangadenna ni tatangna, ni bassit a Larry naminsan nagsaludsod: “Ammok a rebbeng nga ayatek ni Jehova a nangnangruna ngem iti aniaman, ngem kasano iti panagayatko kenkuana nga ad-adda ngem dakayo? Makitkitakayo, ken ay-ayatenkayo, ngem diak met makita ni Jehova.” Liniwliwa ti ama ti anakna babaen ti panangilawlawag a ti kasta a rikna ket gagangay laeng iti damona. Ket naipasigurado iti agtutubo a kalpasan ti panangammona ti kuna ti Biblia maipapan kadagiti nakaskasdaaw a kualidad ken ar-aramid ni Jehova, ken babaen iti personal a pannakapadasna ti naayat a panangaywan ti Dios, mabalinna a mapataud iti napigpigsa a kinasinged ken Jehova ngem kadagiti amin a sabsabali pay! (Mateo 22:37, 38) Kasta met iti uray siasino kadatayo a mangipaay ti tiempo a mangadal maipapan ken Jehova a Dios.
No Aniat’ Kaipapanan ti “Panangammo” iti Dios
Masansan nga us-usarentayo iti sao a “pannakaammo” a mangtukoy iti ababa laeng a panagam-ammo wenno basta panangbigbig iti maysa a tao. ‘No diak agkamkamali, isut’ am-ammok,’ mabalin a kunkunatayo iti bagitayo. Mabalin a kunaentay pay daytoy no adda iti nataldiapantayo a maysa a tao iti maysa a lugar wenno naiyam-ammotayo iti apagbiit laeng kenkuana.
Tulongannatayo ni apostol Juan a mangapresiar a ti “panangammo” iti Dios ad-adda ti kaipapananna ngem basta maaddaan iti apagbiit a pannakaammo Kenkuana. Usigenyo ti sumagmamano kadagiti naaramid a punto iti umuna a nasantuan pannakaipaltiingna a surat ni Juan. Iti ababa, kunana iti pasetna: Ti panangammo iti Dios isut’ panagayat iti Dios. Ti panangammo ken panagayat iti Dios ket isut’ panangsalimetmet kadagiti bilbilinna. Kaipapananna ti saanen a pannagna iti kinasipnget ken isut’ panangsurot iti kinapudno. Isut’ panangsurot iti panangidadaulo iti Sao ti Dios ken ti espirituna ken ti panangtalinaed iti kinapudno. No ammotayon iti Dios, siwayawayatayon a makaadani kenkuana iti kararag, nga addaan pammati a denggenntayo ken, kas sungbatna, itedna kadatayo amin dagiti bambanag a kasapulan tapno maaramidantayo ti pagayatanna.—1 Juan 1:5-7; 2:3, 4, 13, 14; 3:19-24; 4:6-8, 13; 5:3, 14, 15.
Nalawag, ngarud, a ti panangammo ti Dios ket saan a maysa a banag nga awan bibiagna. Adu a panagregget iti kasapulan tapno maam-ammo ni Jehova a Dios ken tagiragsaken iti nasinged a pannakirelasion kenkuana. Nalawag, nga ad-adu ti kasapulan ngem ti basta panaglasat laeng kadagiti narelihiusuan a seremonia. Ket iti panangammo ti Dios saan met a maysa a bigla nga emosional a panagrikna, kas ti kuna a tagtagiragsaken dagiti adu nga agkunkuna a “born again Christians.” Kuna ti salmista: “Iparangmo kaniak dagiti daldalanmo, O Jehova; isurom kaniak dagiti dandanam. Iturongnak iti kinapudnom ket isuronak, ta sika ti Dios iti pannakaisalakanko. Ta kenka agur-urayak iti agmalmalem.” (Salmo 25:4, 5) Ti “panangammo” iti Dios, ket, ngarud, isut’ interamente a wagas iti panagbiag!
Mainayon pay, kalpasan iti panangbagbagana kadatayo a “nanamenyo ket kitaenyo ta ni Jehova naimbag,” kuna ti salmista: “Pagpanawam ti dakes, ket aramidem ti imbag; birukem ti talna, ket isu ti surotem.” (Salmo 34:8, 14) Iti dadduma a kaso, ti insigida a panagtignay ti kasapulan tapno “pagpanawam ti dakes.”
Kas pangarigan, ni Mari, a maysa a hippie kabayatan dagidi 1960’s, ti naigamer unay iti panagus-usar ti droga. Daytoy ti nangiturong kenkuana iti panagtatakaw, imoralidad, aborsion—uray pay iti panagbalangkantis. Ngem, idi agangay, isut’ naiyasideg kadagiti Saksi ni Jehova ket nangrugi a makitana ti pannakasapul ti panagbalbaliw no kayatna ti agbalin a nasinged iti Dios. “Insardengkon ti dua ingganat’ tallo pakete tunggal aldaw a bisio ti panagsigarilio ken amin a droga, ket inkeddengkon iti ‘pusok a suroten ti bilin ni Jehova maipapan iti pannakiabig. Imbellengkon amin dagiti librok maipapan kadagiti panagtagtagainep, astrolohia ken espiritismo, ket inikkatko met aminen dagiti idolatroso nga ladladawan, kandila ken dagiti retretrato.” Nagangayanna, isut’ nagaramid iti dedikasionna iti Dios ket agserserbi kenkuanan agingga itoy nga aldaw.
Ngem aramidenyo aya iti amin a panagregget a kasapulan tapno maam-ammoyo ti Dios? Nupay ti estilo ti panagbiagyo ket saan a kas kadakes ti panagbiag ni Mari, nalabit a kasapulan ti panagaramidyo ti pudpudno a panagbalbaliw. Maipanamnama kadakayo, nupay kasta, a ti Dios saannanto a paayen dagidiay sipapasnek ken sipapakumbaba nga agsapsapul kenkuana kas ti panaggagar iti maysa nga ubing a makaammo ken mangaramid iti pagayatanna.
[Ladawan iti panid 4]
Ti tarigagay a mangammo iti Dios ti mangtigtignay kadagiti adu nga agaramid iti insigida a panagbalbaliw iti panagbiagda