Ammoyo Aya ti Dios a Pagdaydayawanyo?

“NATAY TI DIOS.” Dagita a sasao, nga pinutar ti maysa nga Aleman a pilosopo a ni Friedrich Nietzsche maysa a siglon ti napalabas, ti pinasubli dagiti sumagmamano a teologo idi 1960’s. Ngarud impato dagiti adu nga edukado a tattao a ti purpuro a nainlubongan a natauan a kagimongan ti makasolber kadagiti parparikut ti sangatauan ken makaipasiguro iti kinaragsak.

Kalpasanna immay iti pannakapaay, ket kadagidi 1970’s nakita iti pagannasayan nga agturong iti “desecularization.” Nadiskobre dagiti sosiologo a, tapno agbalin a naragsak, kasapulan dagiti tattao ti rukod iti kina-naespirituan iti panagbiagda. Uray met iti sirkulo nga sientipiko nagbalin a nalaklaka nga admitaren ti pannakasapul ti panamati iti Dios. Gapuna iti librona idi 1979 a Dieu existe? Oui (Adda Kadi ti Dios? Wen), ti autor a Pranses a ni Christian Chabanis ti nabalinanna nga inraman iti panagsalsaludsodna kadagiti siam a personalidad a Pranses iti tay-ak ti siensia nga aminda ti nagkuna addaanda iti panamati iti Dios.

Nupay kasta, minilmilion a tattao ti di met napatpati iti dayta teolohia a “Natay ti Dios.” Tinaginayonda iti pammatida iti Dios. Ngem kayat kadi a sawen daytoy nga addaanda iti nalawag a pannakaawat maipapan iti Dios?

Idi 1967 ti Sinudo dagiti obispo a Katoliko a Pranses ti nangaramidda iti maysa a listaan dagiti parparikut a mangrirriribuk kadagiti Katoliko. Ti immuna nga adda iti listaanda isu “Ti Pannakaammotayo iti Dios,” ket ti maikadua isu “Ti Persona ni Kristo.” Iti librona a God for Men of Today, ni autor a Jacques Duquesne ti nangsaludsod ti maysa a lalaki a Katoliko a 58-añosna nga isut’ nangadmitar: “No maminsan agduaduaak no ni Kristo met laeng ti pudno a Dios. . . . Padpadasek a kumbinsiren ti bagik. Daytat’ dakkel a parikut kaniak.” Ni Duquesne ti nangadaw met kadagiti dua a papadi a Katoliko nga agkunkuna a kadagiti adu a Kristiano “dagiti dogma ti naisinada, nalibeg, kabukbukodan a pormula; tunggal maysa ti adda laeng bassit a kaipapananna; ti maysa a dogma ti di makaited lawag iti sabali a dogma; gapuna, narigatda ngarud nga iyebkas kadagiti dadduma nga agbibiag itatta. No maikeddeng dagiti teologo a manginayon iti maikapat a Persona iti Trinidad, agingga ngata iti ania ti pangriribukan dayta iti kaaduan a paset uray kadagiti kasasaayatan a Kristiano?”

Kinaagpaysuanna, ti doktrina a makariribuk unay saan laeng a kadagiti Katoliko no di ket kasta met kadagiti kamkameng ti Eastern Orthodox Church ken kaaduan kadagiti iglesia a Protestante isu ti Trinidad. Maipapan iti dayta ti A Catholic Dictionary kunana: “Dikam maaw-awatan no kasano a ti tallo nga indibidual a tattao ti nagdudumadumada iti maysa ken maysa ket kaskasdi nga addaanda iti parpareho a kinatao. Ti panagmaymaysa ti tallo a nadibinuan a persona ti interamente a naidumduma. No sawentayo ida a kas maymaysa a Dios, kayatda a sawen a saan laeng a tunggal maysa iti Dios, no di ket tunggal maysa ti maysa ken ti isu met la a Dios, ket ditoy ti ayan ti misterio, di maawatan iti aniaman a naparsua a kinasaririt.” Saan ngarud a pagsidsiddaawan nga agreklamo dagiti Katoliko a ti kadadakkelan a parikutda isu ti “pannakaammo iti Dios”!

Panagdaydayaw iti Dios a Di Am-ammo

Ti ngangngani sangabilion a tattao a kameng dagiti iglesia ti Kakristianuan ti maaw-awaganda nga agdayaw iti Dios a saanda a matartarusan. Nakitada a ti kasasaadda ket umas-asping iti kasasaad dagiti Samaritano idi ugma, a nagkunaan ni Jesus iti maysa kadakuada: “Dakayo a Samaritano agdaydayawkayo iti dikay am-ammo.” (Juan 4:22, New International Version) Apay a maikuna ni Jesus dayta?

Idi maikawalo a siglo K.K.P., ti sangapulo-tribo a makin-amianan a pagarian ti Israel ken iti kabiserana a Samaria ti pinarmek dagiti taga Asiria, ket adu kadagiti Israelitas ti naidestiero idiay Asiria ken kadagiti dadduma pay a naparparmek a teritoria. Kamaudiananna, ti ari ti Asiria ti nangipatulod kadagiti nadumaduma a naparmek a tattao, nangnangruna manipud Babilonia, idiay paset ti Israel a makunkuna kas Samaria. Daytoy ti namataud iti naglalaok a populasion dagiti Israelita ken dagiti pagano. Maipapan kadagiti managannurot iti timmaud a mestiso a relihion, kuna ti Biblia: “Ket nagbutengda idi ken ni Jehova, ket nagserbida kadagiti didiosda met laeng, a siaannurot iti wagas dagiti nasnasion a nanipud kadakuada naiyallatiwda idi.”​—2 Ar-ari 17:26-33; idiligyo iti 1 Ar-ari 12:28-31.

Wen, dagiti Samaritano nagbutengda ken Jehova. Inakseptarda pay iti paset ti Saona​—ti Pentateuko, wenno dagiti umuna a lima a liblibro ti Biblia. Ngem pinaglaokda iti panagdaydayawda ken Jehova kadagiti palso a relihion ti Babilonia. Ket maipapan kadagiti kasta a Samaritano a nagkunaan ni Jesus: “Agdaydayawkayo iti dikay ammo.” Ammoda ni Jehova, ngem saanda nga inakseptar amin a Saona. Ket saanda met a nagdaydayaw iti Dios “iti espiritu ken kinapudno.”​—Juan 4:22, 23.

Saan kadi a dagiti kamkameng dagiti ig-iglesia ti Kakristianuan nakitada ti bagbagida iti kasta met laeng a situasion? Ammoda ti Dios, ngem adu kadakuada ti mangadmitar a talaga nga isut’ dida am-ammo. Dikay mabalin ti agtalinaed nga aleng-aleng maipapan iti daytoy, ta kuna ni Jesus: “Biag nga agnanayon kaipapananna ti panangammoda kenka, ti kakaisuna a pudno a Dios, ken ti panangammo ken Jesu-Kristo nga imbaonmo.”​—Juan 17:3, Today’s English Version.

Ania ti doktrina a nangnangruna a nanglapped kadagiti kamkameng dagiti ig-iglesia ti Kakristianuan manipud panangammoda ken Jehova, “ti kakaisuna a pudno a Dios”? Saan a pagduaduaan, dayta isu ti ‘di matartarusan a misterio’ ti Trinidad. Kaskasdi no basbasaen ti maysa a tao ti Biblia saanna a magun-odan ti rikna a dagiti immuna a Kristiano ket agdaydayawda iti maysa a ‘misterioso a Dios.’ Kuna ni apostol Pablo a “ti Anak ti Dios . . . inikkannatay ti pannakaawat tapno mabigbigtayo daydiay a napudno [ni Jehova a Dios]. Ket datayo agtaengtayo iti daydiay a napudno, babaen iti Anakna a ni Jesu-Kristo.”​—1 Juan 5:20.

Gapuna kasano a dagiti ig-iglesia ti Kakristianuan nga agdaydayawda iti Dios a dagiti miembroda ket saanda a matartarusan? Daytoy a banag iti masalaysay iti artikulo a sumarsaruno.

[Ladawan iti panid 19]

Ti altar a naidedikar ti awan naganna a didios a nasarakan idiay Pergamo, Asia Menor