Apay Masapul a Saantayo a Paset Daytoy a Lubong
“Saanda a paset ti lubong, a kas kaniak a saanak a paset ti lubong.”—JUAN 17:16.
1. Ania a panangtrato ti kuna ni Jesus a namnamaen dagiti paspaaurotna?
DAYTOY a lubong ti nangilaksid, nanggura ken nangidadanes pay ken Jesu-Kristo. Gapuna aniat’ namnamaen dagiti pasurotna? Bueno, kinunana kadakuada: “No ti lubong guraennakayo, ammoyo a ginuranak nga immun-una ngem dakayo. No taga lubongkay koma, ti lubong ayatenna koma ti kukuana. Ngem gapu ta saankay a taga lubong, no di ket pinilikayo iti lubong, gapuna guraennakay ti lubong. Laglagipenyo ti sao nga imbagak kadakayo, Saan a dakdakkel ti adipen ngem ti apona. No inrurumendak, irurumendakayto met; no sinalimetmetanda ti saok, salimetmetandanto met ti saoyo.”—Juan 15:18-20.
2. (a) Ania ti “lubong” a nakaigiddiatan unay ti paspasurot ni Jesus? (b) Imbes nga iruarna dagiti adalan ni Jesus iti lubong, aniat’ aramiden ni Jehova a maipaay kadakuada?
2 Wen, dagiti pudno a paspasurot ni Jesus dakkel nakaigiddiatanda manipud itoy lubong—ti managbasol a natauan a sosiedad a naisi- na iti Dios. Kasta ti kangrunaan iti daytoy a kaso a dagiti adalan ni Jesus ti magurgura ken maidaddadanes iti daytoy a lubong. Ngem gapu iti saanda a kinanainlubongan, dagiti pasurot ni Jesus ti mangan-annurot iti superlatibo nga ulidanna, ket bambantayan ni Jehova a Dios ida kas panangsalimetmet iti kararag ni Jesus: “Diak dawaten nga ikkatem ida ditoy lubong, no di ket igagagam koma ida iti dakes. Saanda a taga lubong, a kas kaniak a saanak a taga lubong. Pagsantuem ida iti kinapudno; ti saom isu ti pudno.”—Juan 17:15-17.
3. Maipapan itoy a lubong, ania a salsaludsod ti makasapul kadagiti sungbat?
3 Aniat’ kayat a sawen ti “saan a paset ti lubong”? Ipamatmat kadi aya dayta a dagiti pasurot ni Jesus masapul a liklikanda amin a pannakikadua kadagiti di-Kristiano?
Dagiti Kristiano Saanda nga Agiputputong
4. Intuding ni Jesus ti ania a trabaho kadagiti pasurotna, a mamagbalin nga imposible ti panangiputputongda ti bagbagida?
4 Pudno unay, saan a ninamnama ni Jesus a dagiti paspasurotna iputputongda ti bagbagida kadagiti naisinsina a narelihiusuan a komunidad. Imbes ketdi, inikkanna ida ti aramiden a trabaho a mangsaklaw ti intero a globo, a kunkunana: “Ngem umawatkayto ti pannakabalin inton umay kadakayo ti nasantuan nga espiritu, ket dakayto ti saksik sadi Jerusalem ken iti isuamin a Judea ken Samaria ken agingga iti ungto ti daga.” (Aramid 1:8) Imbilinna met kadakuada: “Inkayo ngarud ket pagbalinenyo nga ad-adalan dagiti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isursuroyo kadakuada nga aywananda dagiti isuamin a banag nga imbilinko kadakayo. Ket, adtoy! addaak kadakayo nga agnanayon agingga iti panungpalan ti sistema dagiti bambanag.” (Mateo 28:19, 20) Siempre, nupay “dagiti tattao ti amin a nasion” agbalinda nga ad-adalan, di namnamaen a dagiti intero a nasion mismo awatendanto ti sursuro ni JesuKristo.
5. Babaen iti ania a Nainkasuratan nga autorisado a pamay-an ti pakakumbertian ti tattao iti Kinakristiano?
5 Ngem mabalin adda agkuna: ‘Saan kadi a nakumbertin dagiti intero a nasion iti Kinakristiano? Ket saanda aya a buklen ti makunkuna a Kakristianuan?’ Bueno, dadduma kadagiti agturay ti nangikeddeng ti relihion dagiti iturayanda ket saanda a nagalikaka iti panangipapilit iti dayta a pangngeddeng babaen kadagiti nadamsak ken barbariko a metodo. Mainayon pay, ti panagbuteng iti panangparigat ti sarsarita laeng nga impierno ti nagpigsa a banag iti makunkuna a panangkumberte iti makunkuna a Kinakristiano. (Idiligyo iti Eclesiastes 9:5, 10.) Ngem anian a nagadayo daytoy manipud ti kakaisuna a Nainkasuratan nga autorisado a pamay-an a panangisaknap ti pudno a Nakristianuan a pammati! Dayta natakneng a trabaho ti maaramid laeng babaen iti aktibo a panangasaba, panangisuro ken panangaramid-adalan. Dagiti ermitaño wenno dagiti agkulkulong a monghe ken mongha pulos dida maaramid dayta a trabaho wenno masurot ti bilin ni Kristo a ‘paglawagen ti silawyo iti sanguanan dagiti tao.’ (Mateo 5:14-16) Ket ti pilit a “panangkumberte” awan aniaman a pakaipadaanna iti panangted-pammaneknek, panangasaba ken panangisuro a mangtulong kadagiti nasingpet panagpuspusona a tattao ti amin a nasnasion a mangaramid iti intelihente a nainpusuan a dedikasion ken Jehova a Dios.
Apay “Saan a Paset ti Lubong”
6. Kas nailanad idiay Juan 13:35, apay a maikuna a dagiti Saksi ni Jehova maibagayda iti panangiladawan ni Jesus kadagiti pasurotna?
6 Masansan ti nagan a “Kristiano” ti napaneknekan a palso a marka. Aniaman nga ar-aramid ti kinaagum, panangkonkista, panangpapatay iti gubat ken panangirurumen iti sangatauan ti maipabpabasol iti makunkuna a Nakristianuan a tattao ken nasnasion! Ngem anian a nagpaiduma dagiti pudno a pasurot ni Kristo! “Gapu itoy mailasindanto a dakayo ti adalak,” kuna ni Jesus, “no adda ayatyo iti maysa ken maysa.” (Juan 13:35) Pudno, nga adda dagiti tattao ita a nakaragpat iti dayta a deskripsion—dagiti Saksi ni Jehova. Ti kayat iti maysa ken maysa kadakuada kaipapananna ti awan narungsot a kinnumpetensia, awan panangsulsulbog, awan panangala ti inaagum a pananggundaway iti maysa ken maysa. Imbes ketdi, kaipapanan dayta ti panagsaoda a sangsangkatunos, awan panaglalasinlasin, ‘nagtitimpuyogda iti maymaysa a panunot ken maymaysa a panagrikna.’ (1 Corinto 1:10; 13:4-8) Naadalen dagiti Saksi ni Jehova ti panagpampanunot ti Dios ken ni Kristo ket paiwanwanwanda iti dayta. (Roma 12:1, 2; 1 Corinto 2:16) Iti nagpateg a paset dayta a panagpampanunot a dagiti Kristiano masapul a “saanda a paset ti hibong.”—Idiligyo iti Santiago 1:27.
7. Kasano a dagiti sasao ni Pablo idiay Aramid 17:30, 31 ipamatmatna a di maiyanatup kadagiti Kristiano nga agbalin a paset daytoy a lubong?
7 Addada naimbag a rason a dagiti pasurot ni Jesus ‘saanda a paset daytoy a lubong.’ Iti agangay 4,000 a tawtawenen, ti kadakkelan a paset ti sangatauan ‘awan ti inanamada ket addada ditoy lubong nga awanan ti Dios.* (Efeso 2:12) Ngem ti nagbayagen a pannakaisinada ken Jehova gapu iti natauan a basol ket saan nga agtultuloy nga awan inggana. Sangapulo ket siam a siglo ti napalabasen kuna ni apostol Pablo a ti Dios “imbilinna kadagiti amin a tao kadagiti isuamin a disso nga agbabawida,” ta ‘intudingna ti maysa nga aldaw a panangukomnanto a sililinteg iti mapagnaedan a daga gapu iti daydiay lalaki a tinudinganna,’ ni Jesu-Kristo. Innayon pay ni Pablo a ti Dios “pinaneknekanna kadagiti isuamin a pinagungarna [ni Jesus] iti tengnga dagiti natay.” (Aramid 17:30, 31) Daytoy “aldaw” iti Milenial a Turayna asideg unayen. Masapul a madadael ti dakes a lubong. Dayta ti maukom, makondenar ken mapukaw iti agnanayonen. Ngarud, anian a di maiparbeng, para kadagiti agkunkuna a Kristiano nga agbalin a paset daytoy a lubong!
8. Ania a trabaho ti mangipamatmat a “ti panungpalan” ket asidegen, a mangted kanayonan a rason iti panagbalin dagiti Saksi ni Jehova a “saan a paset ti lubong”?
8 Nasurok a 1,900 a tawtawen ti naglabasen manipud panagungar ni Jesus, ket awan duadua ti pannakaitungpal ti nadiosan a pannakaukom iti apostata a Kakristianuan ken iti dadduma a paset ti lubong ni Satanas ket asidegen. (2 Pedro 3:10; 1 Juan 5:19) Kabayatanna, iwarwaragawag dagiti Saksi ni Jehova ti mensahe ti Dios iti intero a daga ken “dagiti aldaw ti bang-ar” ti tagtagiragsakenen dagiti managbabawi, manangapresiar iti sangatauan. (Aramid 3:19-21) Iti panangsalimetmet kadagiti naimpadtuan a sasao ni Jesus iti al-aldawtayo, addan nasurok a 2,650,000 a saksi ni Jehova a mangikaskasaban iti “daytoy naimbag a damag ti pagarian” iti 205 a dagdaga. Inton dayta a trabaho ti nakaibungan iti “pammaneknek iti isuamin a nasion” agingga iti pagayatan ti Dios, “iti kasta umayton ti panungpalan.” (Mateo 24:14) Ngarud, sigurado, a gapu ta asideg unayen ti panungpalan daytoy dakes a sistema, adda amin a naimbag a rason iti ili ni Jehova nga agbalin a “saan a paset ti lubong.”
9. (a) Yantangay dandanin agpatingga ti lubong ni Satanas, kasanot’ panangmatmattayo kadagiti intereses ken pagalagadan ti Pagarian? (b) Ania a salsaludsod ti maikkan iti intay panangusig ita?
9 Yantangay ti lubong ni Satanas dandanin agpatingga, anian a nagpateg ti panangisiguro a talaga a birbirokentayo nga umuna ti Pagarian ti Dios. (Mateo 6:33) Aniaman ti edadtayo, edukasion wenno kasasaad iti biag, “agparangtayto amin iti saklang ti pangukoman ti Dios.” (Roma 14:10) Gapuna ar-aramidentayo aya dagiti pagalagadan ti Pagarian iti biagtayo? Wenno kaskasdi a pagreggetantayo pay laeng ti makitunos iti daytoy a lubong a manggurgura kadagiti pudno a Kristiano? Addaantay aya kadagiti nainlubongan nga ambision ken namnama? Tultuladentayo aya dagiti di nainkasuratan nga uso ti lubong? Ken pagraraemantayo aya dagiti idolona? Laglagipenyo a ti “agtarigagayto a gayyem ti lubong agbalin a kabusor ti Dios.” (Santiago 4:4) Gapuna, tapno malapdan ti panagbalintayo a kabusor ti Dios, kasanotayo a malisian ti nainlubongan a pannakakontaminar? Aniada dagiti bambanag iti lubong a masapul a lisiantayo?
Adaywan Panagayat iti Lubong
10. Dakdakawaten ti Umuna a Juan 2:15, 16 ti ania a tallo a bambanag iti daytoy a lubong a di ayaten ti ili ni Jehova?
10 Nagsurat ni apostol Juan: “Dikay ayaten ti lubong uray dagiti bambanag nga adda ditoy lubong. No ti siasinoman a tao agayat iti lubong, ti ayat ti Ama awan kenkuana; ta isuamin nga adda ditoy lubong—ti derrep ti lasag ken ti derrep dagiti mata ken ti kinapalangguad ti panagbiag—saanda nga aggapu iti Ama, no di iti lubong.” (1 Juan 2:15, 16) Ditoy insitar ni Juan dagiti tallo a kangrunaan a bambanag iti daytoy a lubong a masapul a di ayaten ti ili ni Jehova.
11. Apay a dagiti Kristiano saanda koma a pasiluan “iti derrep ti lasag”?
11 “Ti derrep ti lasag” ti mabalin a mangiturong kadatayo kadagiti adu a makaranggas ken makapapatay nga ar-aramid nga isudat’ gagangayen iti daytoy dakes a lubong iti sidong ti panangkontrol ni Satanas. Nairaman kadagitoy isuda dagiti “ar-aramid” ti managbasol a lasag—“pannakikamalala, kinarugit, derrep, panagrukbab kadagiti didiosen, panaganito, guranggura, ringringgor, im-imon, panagpungpungtot, panagsususik, panagsisina, panangilkillo ti pammati, ap-apal, panagbarbartek, panagragragsak nga aglablabes ken bambanag nga umas-asping kadagitoy.” Saantay a mabalin a di ikaskaso ti pammakdaar ni Pablo a malisian ti aniaman a dusa a “dagiti agaramid kadagitoy saandanto a tawiden ti pagarian ti Dios.” (Galacia 5:19-21) Wen, dagidiay awan panagbabbabawida a mangan-annurot “kadagiti ar-aramid ti lasag” ket pasetda iti daytoy a lubong ket didanto makiraman iti naikari a Pagarian a mangalangon ti nagan ni Jehova ken mamagbalin a paraiso iti daga. (Lucas 23:43) Nalawag, ngarud, saan koma a matmatnag dagiti Kristiano iti “derrep ti lasag.”
12. (a) Ania “ti derrep dagiti mata,” ket kasano nga apektaran dayta ti sasaaden ti maysa iti naespirituan? (d) Maipapan iti “derrep dagiti mata,” aniat’ nasayaat nga isaluasodtay ti bagbagitayo?
12 “Ti derrep dagiti mata” ket sabali pay a kababalin dagidiay paset daytoy a lubong. Bayat ti panagur-urnongda iti kinabaknang ken sansanikua, kasla pulos saanda a mapmapnek. Ta, uray pay adu kadagidiay nangted ti sumagmamano nga atension iti kinapudno ti Biblia nga isaksaknap dagiti Saksi ni Jehova iti agangay tumulokda “ti derrep dagiti mata” ket, gapu itoy, awan naespirituan nga irarang-ayda. Ti panagtarigagayda kadagiti baro a kawes, kotse, balay, aplayanses ken adu pay a dadduma a bambanag a makaay-ayo iti mata ti nagbalin a nakapigpigsa unay a, kas kuna ni Jesus, “ti panangulbod dagiti kinabaknang ken dagiti tartarigagay nga aglablabes kadagiti sabsabali a banag no sumrekda lemmesenda ti sao, ket agbalin nga awan bungada.” (Marcos 4:18, 19) Makapainteres, ni Satanas sinulisogna ni Eva babaen ti pananggargari kenkuana nga agtarigagay iti banag a naiparit a makitana kadagiti matmatana, nupay kasta, isut’ saan a nagballigi iti panagreggetna a mangallukoy ken Jesus nga agbasol babaen iti pananggaw-atna kadagiti bambanag a makita ti matmata. (Genesis 3:1-6; Lucas 4:5-8) Ngem dakayo ngay? Tultuladenyo aya ti kangatuan nga ulidan ni Jesus? Wenno ti kadi panangpennek “ti derrep ti mata” ti mangukopar unay ti tiempoyo, atension ken pigsayo a maliwliwayanen dagiti intereses ti Pagarian? No dagiti naespirituan a pakaseknan ti maipalpalikoddan, agtignay nga insigida tapno maremediuan dayta a situasion!
13. Kas impakita ni Pablo ken kadagiti dadduma a proverbio, aniat’ mabalin a pagturongan ti naagum a “derrep dagiti mata”?
13 Ti naagum a “derrep dagiti mata” ti makaiturong iti kinasuitik, apal, imon ken dadduma pay a basbasol a maikari ti di pananganamong ti Dios. Kas kuna ni Pablo, “dagiti naagum” ket mairaman kadagidiay saandanto a “tawiden ti pagarian ti Dios.” (1 Corinto 6:9, 10) Maiyanatup met, ti pakdaar ti nainsiriban a proverbio: “Ti matalek a tao aglaplapusananto kadagiti bendision, ngem ti sigaganat a bumaknang saanto a di madusa. Ti dakes ti matana gumanat iti panagbaknang, ket dina ammo a ti pannakakurang dumtengto kenkuana.” (Proverbio 28:20, 22) Uray pay no ti kinapanglaw saan a dagdagus nga umapay kadagiti naagum, naapal a tattao, mabalin a mataydanto iti ruar ti pabor ti Dios wenno dumtengdanto iti nakalkaldaang a panagpatinggada inton panungpalan daytoy sistema dagiti bambanag.—Mateo 24:3; Lucas 12:13-21.
14. (a) Kasano a maiparangarang “ti kinapalangguad ti panagbiag” ti bagbagina? (b) Aniat’ adda iti ramut iti kasta a “kinapalangguad,” ti kinaparammag ken panagsapsapul ti saad? (c) Apay a resisteran ti pannulisog ti panangipangpangta kaaagiti sansanikuatayo ken dagiti maipagpagarup a nagun-odantayo nga adal?
14 “Ti kinapalangguad ti panagbiag” ti masapul met a liklikan ti ad-adipen ni Jehova. Anian a makasulisog iti panangipangpangta kadagiti nangingina a sanikua! Ti kasta a dakes a tarigagay masansan mangiturong saan laeng a ti panangpadpadas a makilaslaslasan kadagiti dadduma no di ket kasta met iti panangun-una pay kadagiti dadduma iti material. Maipadis met iti daytoy iti panangiparparammag ti kunaen ti maysa a tao a nagun-odanna. Iti panangnamnamana a maragpatna iti posision wenno sasaaden, mabalin a sukayanna pay ti pannakigayyem ken panangsuporta dagiti prominente a tattao. Ngem dagidiay mangipalubos ti bagbagida a pausar iti daytoy a pamay-an maagda, ket ti sobra ti kinagaramugamna a tao ti agangay agbalinto kas kadagiti “nadangkes a tattao” idi kaaldawan ni Judas a ‘ti ngiwatda sawenna dagiti sao a naparammag nga iparparangda ti pammasablogda kadagiti tattao gapu iti magunggonada.’ (Judas 4, 16) Ti adda iti ramut amin daytoy panagsapsapul ti posision ken naparammag a panangipabuya ti ik-ikutanda isut’ kinatangsit. (Proverbio 8:13; 16:18; 21:4) Ngarud, nalawag, masapul a resisterantayo ti sulisog a mangipangpangta kadagiti sansanikuatayo ken dagiti maipagarup nga ad-adaltayo. Maiyanatup ditoy ti proverbio: “Saan a nasayaat ti pannangan iti adu a diro; kasta met iti tao ti panagbirokda iti dayawda met laeng, dayaw kadi dayta?” (Proverbio 25:27) Ket yantangay kaaduan a tattao magmagnada iti nalawa a dalan nga agturong iti pakadadaelan, anian a naintiempuan ti sasao ni Jesus, “Asikay pay, inton amin dagiti tattao idaydayawdakayo”!—Lucas 6:26.
“Ti Lubong Aglabas”
15. (a) Ni apostol Juan nangted ti ania a pamunganayan pay a rason nga agbalin a “saan a paset ti lubong”? (b) Iti ania ti rebbeng a pangiturongan dagiti nasungdo a Kristiano kadagiti panagreggetda?
15 Inikkannatay pay ni Juan ti pamunganayan a rason nga agbalin a “saan a paset ti lubong” idi innayonna: “Ket ti lubong aglabas ken ti dakes a tarigagayna, ngem ti agaramid iti pagayatan ti Dios mataginayon.” (1 Juan 2:17) “Ti lubong,” ti di nalinteg a natauan a sosiedad, asidegen ti panungpalanna iti dayta napartak ti iyaadaninan a “dakkel a rigat.” (Mateo 24:21) Iti dayta a tiempo isuamin a paset daytoy napolitikaan, nakomersialan, ken palso a narelihiusuan nga elemento daytoy a lubong madadaelto. Gapuna kasano nga asinoman kadagiti pudno a Saksi ni Jehova ti mangipaay ti amin a tiempoda, pigsa ken kinabaknangda kadagitoy nga elemento a ti mabiiten ket agpukawda? Imbes ketdi, dagiti nasungdo a Kristiano iturongda ti kangrunaan a panagreggetda iti panangiyadelantar kadagiti intereses ti Pagarian ken kadagiti bambanag nga agtalinaed, agnanayon. Mainayon pay, iti kasta a kinasungdo ken pammati ti ili ni Jehova ‘maparmekdanto ti lubong’ ti nakillo a natauan a sosiedad, kas inaramid ni Jesu-Kristo. (Juan 16:33) Wen, ket makalasatdanto inton aglabas daytoy a lubong babaen iti nadiosan a panangdadael, kas ken ni Noe ken ti pamiliana nailasatda iti Layus.—2 Pedro 2:5.
16. Ania a salsaludsod ti agtalinaed nga usigentayo?
16 Idinto a daytoy a lubong ket aglabas, ngarud, kasano a matmatan dagiti Kristiano ti pannakiramanda kadagiti sosial a bambanag? Aniat’ kababalinda koma iti edukasion, ti panagnegosio ken panaglinglingay? Dagiti saludsod kas kadagitoy ti agtalinaed pay a maipaay ti naannad a panangusigtayo.
Aniat’ Maikunayo?
◻ Ania ti lubong a saan a nakaipasetan dagiti pudno a pasurot ni Jesus?
◻ Saan a mabalin nga agiputputong dagiti adalan ni Jesus gapu iti ania a trabaho a naituding kadakuada?
◻ Aniat’ sumagmamano a rason no apay a dagiti Saksi ni Jehova “saanda a paset ti lubong”?
◻ Tapno masurot ti balakad ti 1 Juan 2:15-17, ania a tallo a kangrunaan a banag iti lubong ti saan nga ayaten ti ili ni Jehova?
[Ladawan iti panid 10]
Nupay dagiti Saksi ni Jehova “saanda a paset ti lubong,” okupadoda a mangtultulong a naespirituan kadagiti tattao ti amin a nasion
[Ladawan iti panid 12]
No datayo ket “saan a paset ti lubong,” saantayo a pasiluan iti derrep ti lasag ken ti mata wenno iti kinapalangguad ti panagbiag