Agannadkay iti Kabusoryo, ti Diablo!

“Agparbengkayo, agsalukagkayo. Ti Diablo, a kabusoryo, kasla leon a ngumerngernger, magmagna iti sibayyo nga agsapsapul iti alun-onenna.”​—1 PEDRO 5:8.

1. Ania a Kabusor ti adda kadagiti Saksi ni Jehova, ngem isu kadi ti mabalin a paayen?

MAYSAKAYO aya nga awan inkedkedna a dedikado a saksi ni Jehova a Dios? No wen, addaankayo iti maysa a nasikap a kabusor, maysa a dinidiablo a kabusor. Ngem, agpapan pay amin a maaramidanna, dayta nasikap a kabusor mabalin met a tungdayen. Mabalinanyo ti agmatalek iti Kangatuan Unay a Dios, a ni Jehova. Awan duadua, mabalinanyo ti makiraman iti panangalangon ti di maartapan a nagan ti nailangitan nga Amayo. Wen, mabalinyo a paragsaken ti puso ni Jehova ket makaipaaykayo ti sungbat iti Naindaklan a Manangumsi. Wen, mabalinyonto a magun-odan ti gunggona ti biag nga agnanayon iti naparaisuan a kinaragsak.​—Proverbio 27:11; Lucas 23:43; Apocalipsis 2:7.

2. Aniat’ kinuna ni apostol Pedro maipapan ti kangrunaan a kabusortayo?

² Tapno agtalinaed a matalek iti Dios, masapul nga agannadkayo iti kangrunaan a kabusoryo. Maipapan kenkuana, nagsurat ni apostol Pedro: “Agparbengkayo, agsalukagkayo. Ti Diablo a kabusoryo, kasla leon a ngumerngernger, magmagna iti sibayyo nga agsapsapul ti alun-onenna.” Kaskasdi, ti depensa a maibusor iti daytoy a kabusor ti posible, ta intuloy ti apostol: “Isu sarangtenyo ngarud babaen iti nabileg a pammati . . . Kalpasan iti panagsagabayo iti bassit nga aldaw, ti Dios iti amin a di kaikarian a kinamanangaasi . . . patibkerennakayto, papigsaennakayto.” (1 Pedro 5:8-10) Dagidiay a sasao ti mangiyeg liwliwa nangnangruna kadagiti napulotan a pasurot ni Jesu-Kristo. Kaskasdi, addaanda met ti pudno a kaipapanan kadagiti ad-adipen ni Jehova a mangin-inanama nga agbiag nga agnanayon iti naindagaan a paraiso.

3. (a) Asino ti sidadaan a tumulong kadatayo? (b) Ania a kabkabusor ti usaren ni Satanas a pangaramid kadagiti dakes a pangpanggepna?

³ Tapno makapagannadtayo iti Kabusortayo, kasapulantayo ti tulong, nangnangruna ti pannakaammo kadagiti taktikana. Ti sisasagana ken situtulok a tumulong kadatay amin tapno mataginayon ti kinatarnawtayo isu ni Jehova a Dios, ni Jesu-Kristo, dagiti nasantuan nga anghel ken ti Nakristianuan a kongregasion. Iti sabali a bangir, adda met ti imperpekto a lasagtayo, daytoy dakes a sistema dagiti bambanag ken ni Satanas a Diablo mismo a masapul a pakilabanan. Isut’ tigtignayen ti dakes a panggep ken kanayon a sisasagana a mangusar kadagiti dua a dadduma pay a kabusortayo a mangitungpal ti dakes a pangpanggepna.​—Juan 15:19; 1 Corinto 9:27.

4. (a) Babaen kadagiti ania nga uppat a designasion ti nakaammuan ni Satanas? (b) Apay a maikari ni Satanas kadagiti titulona a “Diablo,“ “uleg” ken “dragon”?

⁴ Dagiti mismo designasion nga inted ti Kasuratan iti Kabusortayo ti makatulong iti intay pannakaawat a nasaysayaat kadagiti metodona, dagiti pamusposanna. Isut’ matuktukoy kas Satanas, Diablo, uleg ken dragon. (Apocalipsis 12:4, 9, 10) Ti naganna a Satanas kaipapananna “Bumusbusor,” wenno “Kabusor.” (Job 1:6; 2:1) Ti “Diablo” kaipapananna “Manangpardaya,” “Manangakusar,” wenno “Mamadpadakes.” Ni Satanas maaw-awagan met “uleg” agsipud ta inusarna ti maysa nga uleg a mangallilaw ken Eva idiay minuyongan ti Eden. (Genesis 3:1-7) Ken isu met ti napanaganan ti “dragon” gapu iti ugalina a mangalun-on.

Dagiti Motibo ken Panggep ni Satanas

5. Ania a takder ti innala ni Satanas maipapan ken Jehova?

⁵ Ni Satanas a Diablo, a dati maysa kadagiti nailangitan nga annak ti Dios, ti nagtinnag iti ibubusor ken panangpardaya ken Jehova. Ti panggep ni Satanas isut’ panangibaw-ing ti sangatauan manipud iti Dios, tapno serbianda dagiti inaagum a panggep ni Satanas. Ti tignay ti Diablo pinagbalinna a nalawag a nagduaduaanna ti kinapudno ti Dios, agraman ti pannakasapul ti sangatauan nga agpannuray ken Jehova ken kumita kenkuana a maipaay iti agtultuloy a biag ken kinaragsak. Ti nakalawlawag iti kurso ni Satanas isut’ panangkuestionna ti kalintegan ti Dios a mangituray ken ti wagas ti panagturayna. Naikari ni Jehova iti prinsipio a panagturay iti kinalinteg ken ti panagserbi kenkuana dagiti parparsuana a situtulok gaput’ ayatda kenkuana ken iti kinalinteg. Iti sabali a bangir, innala ni Satanas ti takder a ti inaagum a gunggona ti ad-adda a matarigagayan a motibo. Iti sabali a pannao, inrupirna nga amin dagiti nasaririt a parparsua rebbengna ken isudat’ naagum a kas kenkuana.​—Job, kapitulo 1 ken 2.

6. Aniat’ ipanayag ti kurso ni Satanas maipapan kadagiti motibona?

⁶ Iti panangrugi ni Satanas iti kasta a kurso impanayagna a pinalubosanna ti aglablabes nga ambision a nagbalin a nakabarbara a tarigagay ken motibona. Nalawag met daytoy manipud pammakdaar ni apostol Pablo a maibusor iti panangdutok iti kakumkumberte a lalaki iti saad kas manangaywan, “di la ket ta agtangsit ket matnag iti pannakadusa ti Diablo.” (1 Timoteo 3:6) Wen, pudno nga imbutaktak dayta ti nagdakkelan a kinatangsit ken Satanas nga ipadis ti bagina iti Mannakabalin-amin, ti Kangatuan Unay, ti Sapasap a Soberano, ti Ari iti kinaagnanayon, a ni Jehova a Dios. (Genesis 17:1; 2 Samuel 7:28; Salmo 83:18; 1 Timoteo 1:17) A ti aglablabes unay a tarigagay ti Diablo isut’ panangitan-ok ti bagina, nga inapalanna ti panagdayaw nga ipapaay dagiti intelihente a parparsua ken Jehova a Dios, ti impanayagna met laeng idi nga intukonna ken Jesu-Kristo “dagiti isuamin a pagpagarian ti lubong” no la ketdi agdayaw ni Jesus kenkuana.​—Mateo 4:8, 9.

7. Apay a di insigida a pinapatay ti Dios dagidiay rebelde a da Satanas, Adan ken Eva?

⁷ Siempre, nabalinan koma ni Jehova a Dios a pinapatay ni Satanas ken ti immuna a natauan a paris apaman a nagbasolda. Ngem gapu kadagiti isyu a pinataud ni Satanas, ken gaput’ asina kadagiti di pay naipasngay a putot ni Adan, pinalubosan ti Dios nga agbiag ti Diablo ken tapno paneknekanna ti natangsit a karitna. Maigiddato iti dayta, inikkan met ni Jehova ti sangatauan a mayat iti dayta ti gundaway a mangpadas a mangituray iti bagbagida a naisina iti Dios ken kadagiti nalinteg a prinsipiona.

Ti Panangallilaw Maipapan ti Kaaddana

8. Kasano nga inallilaw ni Satanas ti sangatauan maipapan iti mismo a kaaddan?

⁸ Ni Satanas ti agtungpal kadagiti adu ken nadumaduma a desinio wenno gakat a mangiyadelantar ti panggepna kas Kabusor ni Jehova a Dios ken, no mabalin, iyadayona amin dagiti tattao iti nainkalintegan a panagdayaw iti Namarsuada. Daytoy ti mamagbalin kadakuada a nakalaklaka a biktimana. Gapuna, itatta, uson kadagiti nagadu a narelihiusuan a sirkulo a mamati nga awan ti persona a kas ni Satanas a Diablo. Kas pangarigan, maysa a panagsukimat nga inaramid ti Center for Policy Research idiay Siudad ti Nueva York ti nangipadamag nga idi 1974 nasurok a kagudua kadagiti Americano ti di mamati a naan-anay iti kaadda ti maysa a personal a Diablo. Uray pay adu kadagiti klero ti di mamati iti kaadda ti Diablo kas maysa a persona.

9, 10. Kasanot’ panangipasdek ti Kasuratan iti kinapudno a ti Diablo ket maysa a persona?

⁹ Ngem ti Kasuratan dinatay pagduaduaen iti kaadda ti maysa a persona a Diablo. Ipakpakitada a maysa a persona ti nagsao babaen ti maysa nga uleg, a nangallilaw ken nanggargari iti daydi umuna a babai, ni Eva. Ti libro a Job iti kanayonanna a nangipasdek ti kaadda ni Satanas kas maysa a persona, ta ibagbaga dayta ti pannakisaona ken Jehova a Dios, nga inatakarna ti kinatarnaw ti adipen ti Dios a ni Job. Mainayon pay, dagiti mannurat ti Ebanghelio kas ken ni Mateo, Marcos ken Lucas inlanadda a ni Jesu-Kristo ti sinulisog ti Diablo. A dagita a pannulisog ti dimteng ken Jesus manipud iti makinruar a gubuayan ti lawag saan laeng a manipud iti ammotayo maipapan ti kinaperpekto ken personalidad ni Jesus no di ket kasta met manipud ti kasasaad ti maikatlo a pannulisog ni Satanas. Kasano koma a ni Jesus ti agruknoy ken agdayaw iti sanguanan ti prinsipio wenno ideya ti kinadakes? Nasken pay met dagiti maulit-ulit a panangtukoy ni Jesus ken ni Satanas kas persona ken kas “ti agturay iti daytoy a lubong.”​—Juan 12:31; 14:30; 16:11; 8:44; Mateo 4:1-10; 12:26; Lucas 10:18.

¹⁰ Uray met dagiti apostoles ni Jesus binigbigda ti Diablo kas maysa a persona. Impamatmat ni Pablo a dagiti pudno a Kristiano ket saanda nga ignorante kadagiti “kinasikap” ni Satanas ket ti apostol pinakdaaranna ida a maibusor kadagiti “panangallilaw ti Diablo.” (2 Corinto 2:11; Efeso 6:11) Kas naibagan, inggunamgunam ni Pedro kadagiti kapammatianna nga agannadda iti kabusorda, ti Diablo. Ken pinaneknekan pay ni apostol Juan a “ti isuamin a lubong adda iti babaen ti pannakabalin ti managdakdakes” ken “ti Diablo mapanna ipisok iti pagbaludan dagiti dadduma [kadagiti Kristiano].”​—1 Juan 5:19; Apocalipsis 2:10; 1 Pedro 5:8.

Ti Ulbod a Relihion a Pangallilaw ni Satanas

11. Aniat’ naaramidan ni Satanag iti nakaisigudan a rikna ti tao nga agdayaw?

¹¹ Ti gakat ni Satanas a mamagtalinaed a sibubulsek kadagiti tattao ramanenna ti panangusar iti ulbod a relihion. (2 Corinto 4:4) Ti tao ti pinarsua ti Dios nga addaan rikna a makiuman iti Namarsuana babaen iti panagdayaw. Imbaw-ing ni Satanas daytoy naikasigudan a rikna babaen iti panagapelarna iti kinaagum ken ti panamataudna ti kinakuneng iti nadalus a relihion. Tapno maaramidanna ti panggepna ni Satanas “agbalin a kasla anghel ti lawag.” (2 Corinto 11:14) Kas resulta ti kasta a panangallilaw, dagiti tattao ti makiramraman kadagiti rinibo a nagduduma a kita ti ulbod a relihion.

12. Kasanotay a matmatan ti ulbod a relihion ken panaglalaok ti pammati?

¹² Amin nga ulbod a relihion ti kinapudnona ket bunga ni Satanas, ta kuna ni Pablo: “Dagiti bambanag nga idaton dagiti nasnasion idatonda ida kadagiti sairo, a saan nga iti Dios.” Kuna ni Jesus: “Ti saan a makikadua kaniak isu ti bumusor kaniak, ket ti saan a makipagurnong kaniak agiwara.” Mainayon pay, awan impalubos ni Kristo a lugar a maipaay iti panaglalaok ti pammati, no di ket kunana: “Awan ti umay ken Ama no di magna kaniak.”​—1 Corinto 10:20; Mateo 12:30; Juan 14:6.

13. Kadagiti ania a pamay-an nga inaprobetsar ni Satanas ti panagusioso ti tao kadagiti okulto?

¹³ Ap-aprobetsaren ni Satanas ti panagusioso ti tao maipapan iti okulto ken iti kasasaad dagiti natay. Babaen kadagiti naan-anay a di nainkasuratan a gakat kas iti pannakisasao kadagiti natay, wenno espiritismo, panagbuyon, astrolohia ken mahika negra, di mabilbilangen dagiti nasiluanna. Kinaagpaysuanna, itatta adda kumarkaro a panaginteres kadagita a bambanag. Daytoy iti dimmanon pay iti aglablabes a dadduma ti aktual nga agdaydayawen iti Diablo.​—Exodo 22:18; Levitico 19:26; 20:6; Deuteronomio 18:10-12.

Agapelar ni Satanas iti Kinatangsit

14, 15. (a) Ania a pamay-an ti inusar ni Satanas tapno maserbian ni Eva ken ni Cain ti panggepna? (b) Ania pay a pangarigan ti itden ti Biblia a maitunos kadagitoy?

¹⁴ Simmuko ni Satanas iti pannulisog ti kinatangsit. Gapu itoy, pinataudna met ken Eva ti maysa a natangsit, inaagum a tarigagay nga agbalin a kas iti Kangatuan a Dios, ket iti kasta nagballigi a nangibaw-ing kadagiti immuna a nagannak kadatayo manipud iti panagdayaw ken Jehova a Dios. Awan duadua inusar ni Satanas ti umas-asping nga iyaadani ken ni Cain. Idi nadlawna ti pannakapaay ni Cain gapu ta ni kabsatna nga Abel ti immawat iti nadiosan nga anamong, pinarubruban ti Diablo dayta a pannakapaay a nagbalin a makapapatay nga apal.​—Genesis 4:3-8; 1 Juan 3:11, 12.

¹⁵ Iti intero a pakasarsaritaan ti sangatauan, nabaelan nga inusar ni Satanas kas aruaten dagidiay natangsit​—dagiti tattao a kas ken Nimrod, ti Paraon ti Egipto idi kaaldawan ni Moises ken ni Ari Senakerib ti Asiria. (Genesis 10:8-12; Exodo 5:2; Isaias 36:7-10, 16-20) Itatta petpetpetan ni Satanas dagiti umariwekwek babaen iti kinatangsit: kinatangsit ti rasa, kinatangsit ti nasionalidad, kinatangsit ti edukasion, kinatangsit iti takder iti kagimongan, ken dadduma pay. Amin dagitoy ti agserserbi iti panggep ti Diablo babaen ti panamagtulengna kadagiti tattao a dumngeg iti mensahe ti Dios.

Ti Panangallukoy ti Materialistiko a Kinaagum

16. Amia a panagballigi ti nagapuanan ni Satanas iti panangusar iti materiaïistiko a kinaagum?

¹⁶ Ti sabali pay a gakat nga us-usaren ni Satanas a pangsilo kadagiti tattao isu ti materialismo, agum, ayat ti kuarta, kinapalangguad kadagiti sanikua. Gapu itoy nasiluanna dagiti klero idi kaaldawan ni Jesus a nagbalin a naagum a managayat ti kuarta. (Lucas 16:14) Babaen panangusarna ti panangallukoy iti materialistiko a kinaagum, “pinunno ni Satanas [ti puso ni Ananias] a mangulbod iti nasantuan nga espiritu.” (Aramid 5:1-11) Ket awan duadua inusar ti Diablo ti panagayat kadagiti material a bambanag ken nailubongan a ragragsak tapno ikapis ni Demas ken dagiti dadduma a Kristiano manipud serbisio ken ni Jehova.​—2 Timoteo 4:10.

17. Addaantayo iti ania a naisangsangayan a nagdakes a pangarigan ti maysa a tao a timmulok iti panangusar ni Satanas iti agum kas maysa a silo?

¹⁷ Ti nangnangruna a nakadakdakes a pangarigan ti panangusar ni Satanas iti kinaagum a mangsilo isu ni Judas Iscariote. Isut’ saan laeng a nagbalin a naagum a mannanakaw no di ket ti agum ti maysa a banag a nangliputan ni Judas iti Apona. A ti isipna ket agturong iti dayta a direksion ti ipamatmat iti isusuppiatna iti panangsapsapo ni Maria kadagiti saka ni Jesus iti nangina unay nga unguento. (Juan 12:4-6; Mateo 26:14-16) Anian ti intay panagannad ngarud a dinatay makemmeg ni Satanas babaen iti panangallukoy dagiti materialistiko a kinaagum!

Gundawayan ni Satanas dagiti Pagkapuyan ti Tao

18. (a) Ania dagiti sagana nga inaramid ti Dios a maipaay iti tao tapno maaddaan ragsak manipud panagbiag? (b) Kasano a ginundawayan ni Satanas dagitoy a nakadangranan ti tao?

¹⁸ Kadagiti nadumaduma a pagkapuyan a pagapelaran ni Satanas isu iti panagtarigagay kadagiti maiparit a dinederrep a pagraragsakan. Inranta ni Jehova a Dios ti intay panangnanam kadagiti adu a ragragsak, ket no dagitoy iti mananam iti las-ud dagiti pagbedngan ti pagayatanna kadatayo, agbanagda iti adu a pagimbagan ken pagragsakan. Ngem sulsulisogen ni Satanas dagiti tattao nga ipangpangruna dagitoy a bambanag iti biagda ken pagustuan dagiti bagbagida kadagiti immoral a pamay-an a mangsalungasing ti linteg ti Dios. Gapuna pinataud ni Satanas ti pannakatnag ti 24,000 nga Israelitas iti panangallukoy ni Baal ti Peor. (Numeros 25:1-9) Itan ti lubong agmauyongen iti panagsapsapulna kadagiti dinederrep a ragragsak. Dagiti magasin, pagiwarnakan, pelikula ken programa ti telebision ti ad-adda a sibabatad nga agap-apelar kadagiti dinederrep nga intereses. Kas dagiti Kristiano nga iwanwanwan ti espiritu ti Dios, nupay kasta, masapul nga idiantayo dagiti pakasulisogan.​—1 Corinto 14:20.

19. (a) Iti ania a silo ni Satanas ti nangnangruna a pakabikbiktimaan dagiti agtutubo a Kristiano? (b) Ania ti rebbeng a pagannadan dagiti agtutubo a Kristiano?

¹⁹ Sabali pay kadagiti gakat ni Satanas isu ti panagapelarna iti tarigagay kadagiti aglablabes a ragragsak. Dagiti agtutubo a Kristiano ti nangnangruna a nalaka a puntiria wenno biktima daytoy a silo. Masansan, ipapaayda amin a pigsada kadagiti nadumaduma a kita ti ay-ayam, agpadpada kas managbuya ken kas mannakipaset. Ngem daytoy ti mamagbalin kadakuada a “naayat iti ragragsak ngem ti panagayat ti Dios.” (2 Timoteo 3:4) Kadagiti dadduma nga agtutubo ti panagtarigagay iti aglablabes a ragragsak agturongda kadagiti langlanga ti musika ken kanta a mangparparegta ti immoralidad ken kinaranggas. Nalawag, adda dakkel a pannakasapul iti panagannad, ta dagita a bambanag mabalinda nga allukoyen dagiti agtutubo a Kristiano nga iyadayo manipud iti daná ti kinalinteg ken naimbag a kababalin.​—Salmo 16:11; 2 Pedro 2:20-22.

20. Kasano nga inusar ni Satanas ti buteng?

²⁰ Us-usaren met ni Satanas ti silo ti panagbuteng iti tao. Natural laeng ti maysa a malabegan manipud pannakauy-uyaw ken iti panangpadas a liklikan ti panagsagaba. Ti kasta a panagbuteng nakapatauden saan laeng a sumagmamano a pannakikompromiso iti panawen ti pakarigatan. (Proverbio 29:25; Hebreo 2:14, 15) Babaen tulong iti Dios ditay koma pulos ipalubos a mapasamak dayta kadatayo.

21. Apay a kasapulan a ditay koma makemmeg iti pannakaupay?

²¹ Ti maysa pay kadagiti gakat ni Satanas isut’ panangpadpadasna a mangupay kadagiti ad-adipen ti Dios tapno sumukoda. Pudno a pinadpadas ti Diablo nga aramiden daytoy ken ni Job, a namagtarigagay kenkuana nga isu komat’ natayen wenno di koma naiyan-anaken. Pinadpadas met ni Satanas daytoy ken Moises. (Job 3:1-13; 14:13; Numeros 11:10-15) Awan ti uray maysa kadagitoy a matalek a lallaki ti inalun-on ti pannakaupay. Imbes ketdi, immayonda iti nadiosan a pagayatan. Kas kadakuada, di kasapulan a maparukmatayo iti aniaman a sirkumstansia, ta mabalinnatay a sustineren ni Jehova ket nikaanoman dina ipalubos dagiti nalinteg a magaraw.​—Salmo 55:22.

Agtakder a Sititibker!

22, 23. Tapno makapagtakder a sititibker maibusor kadagiti “pangallilaw” ni Satanas ken di serbian dagiti gakatna, aniat’ masapul nga aramidentayo

²² Gaput balligi ni Satanas a nangiyadayo ti kaaduan iti sangatauan manipud ken Jehova a Dios, aniat’ masapul nga aramidentayo? Kas dagiti maingel a Saksi ni Jehova, masapul nga “agtalinaed a natibker a bumusor kadagiti pangallilaw ti Diablo,” maibusor kadagiti gakgakatna, estratehiana ken taktikana. (Efeso 6:11) Iti kasta mapaneknekantayto nga isu ti nakadakdakes, natangsit nga ulbod a pudno a kasasaadna.

²³ Nupay kasta, saantayo a makapagtakder a sititibker a maibusor ken Satanas iti kabukbukodantayo a pigsa, ta isut’ addaan dakdakkel a pannakabalin, nalawlawa a pannakaammo ken ad-adu a kapadasan ngem kadatayo. Tapno makapagtakder a sititibker a maibusor kenkuana, ngarud, kasapulan a gundawayantayo a naan-anay amin dagiti tulong nga ipapaay ni Jehova a Dios a maipaay iti ilina. Iti kasta mabalintayto a tungdayen daytoy nasikap a kabusor!

Malagipyo pay Aya?

◻ Ania a kabusor ti us-usaren ti Diablo tapno maragpatna dagiti dakes a pangpanggepna?

◻ Innala ni Satanas ti ania a posision maipapan ken Jehova?

◻ Kasano a pinaneknekan ti Biblia a ni Satanas maysa a persona?

◻ Ania dagiti sumagmamano a pamay-an nga us-usaren ti Diablo a pangsilo kadatayo, ken kasanotay a maliklikan ti pannakakemmeg kadakuada?

[Ladawan iti panid 13]

Dagiti Saksi ni Jehova saanda a tumulok iti panagbuteng iti tao