Agtakder a Sititibker Maibusor kadagiti Gakat ni Satanas!
“Isuotyo ti amin a kabal nga impaay ti Dios, tapno makapagtakderkayo a sititibker maibusor kadagiti gakat ti Diablo.”—EFESO 6:11, The New English Bible.
1. Ania ti lak-amen dagiti Kristiano nga agbiag maitunos kadagiti pribilehiona?
DAGITI dedikado a saksi ni Jehova nga agbibiag maitunos kadagiti pribilehioda tagtagiragsakenda ti naespirituan a paraiso. Iti panangiladawanna sigun iti padto iti agdama a kasasaadda, insurat ni Isaias a mammadto ti Dios: “Iti kasta ti kinahustisia agtaengto iti let-ang, ket ti kinalinteg agtaengto iti nabunga a talon. Ket ti aramid ti kinalinteg isunto ti talna; ket ti patauden ti kinalinteg kinaulimek ken panagtalek nga agnanayon.”—Isaias 32:16, 17.
2. Apay a masapul nga agbantaytayo a kanayon?
2 Tapno mataginayonda iti naragsak a kasasaad, masapul ti kanayon a panagbantaytayo, ta ap-apalan ni Satanas a Diablo dagiti naragsak ken narang-ay a naespirituan a kasasaadtayo. Kas Gog ti Magog rautennan iti mabiit ti ili ni Jehova. (Ezequiel 38:8-12) Ngem saanna kayat a sawen nga isu iti agpalpallailang ita. Ti kinaagpaysuanna, agsipud ta pagaammona a bassiten a tiempo ti natda a maipaay kenkuana, isut’ makapungtot kadagiti ad-adipen ni Jehova nga ad-adda pay ngem idi.—Apocalipsis 12:12, 17.
3. Apay a makapungtot unay ni Satanas kadagiti ad-adipen ni Jehova?
3 Iturturayan ni Satanas daytoy a lubong dagiti nakillo a tattao. (Efeso 2:1, 2; 1 Juan 5:19) Amin dagitoy ti adda iti dasigna ti naindaklan nga isyu ti sapasap a kinasoberano. Ipapaayda iti positibo a sungbat ti panangikabil ni Satanas iti panagduadua no adda met laeng asinoman a tao ti makasalimetmet ti kinatarnawda ken Jehova a Dios. (Proverbio 27:11) Nga uray no sumagmamano laeng a Kristiano ti mangpampaneknek iti Diablo a maysa a barengbareng a mananglastog ken kadadaksan a manangulbod isut’ makapungtot kenkuana. Gapuna us-usarenna amin a gakat, isuamin a nasikap a panangallilaw, a maiggamanna tapno parmeken dagitoy matalek nga ad-adipen ni Jehova. Gapuna, ti “pannakidangadangtayo . . . maibusor kadagiti espiritu ti kinadakes kadagiti langlangit.”—Efeso 6:12.
4. Apay a pagreggetantay unay a parmeken dagiti pagkapuyantayo?
4 Gapuna, nasayaat no maisaludsodyo iti bagiyo, ‘Kasano a makapagtakderak a sititibker a maibusor iti daytoy napigsa a Kabusor?’ Kas nakitatayon, us-usarenna dagiti kinakapuy ti managbasol a lasag a pangsilo kadagiti Kristiano. Iti personal, mabalin nga awanantayo ti pagkapuyan a kinasadut, ngem mabalin a natangsittayo. Mabalin a saantayo met nga aglablabes maipapan kadagiti pisikal a ragragsak, ngem mabalin a naagumtayo kadagiti material a gunggona. Gapuna kasapulan ti panagreggettayo a mangparmek kadagitoy a pagkapuyantayo, a busoren ti Diablo tapno isut’ pumanaw kadatayo.—Santiago 4:7.
Ti Naespirituan a Kabaltayo
5. Agpaay iti ania a rason a kasapulantayo nga ikawes ti naan-anay a kabal manipud Dios?
5 Ti Kabusortayo kanayon nga us-usarenna dagiti isu met laeng a gakat a maulit-ulit. Gapuna babaen panagadaltayo ti Sao ti Dios mapagalibtaktayo kadagiti gakat nga us-usaren ni Satanas manipud pay panawen ti Biblia, ket maadaltayo no kasanot’ panagtakder a natibker a maibusor kenkuana. Insurat ni apostol Pablo: “Ikawesyo ti amin a kabal a naggapu iti Dios tapno mabalinyo ti agtalinaed a bumusor kadagiti pangallilaw ti Diablo.” Inggunamgunamna: “Alaenyo ti naan-anay a kabal manipud Dios, tapno mabalinyo ti sumarikedked inton dakes nga aldaw ken, inton naisaganayon amin, addakayo a sititibker.” Kitaenyo ta impaganetget ni Pablo ti panangikawes “iti naan-anay a kabal manipud Dios.” Nakapegpeggad ti agkurang iti uray maysa laeng a paset daytoy nadiosan pannakaipaayna a kabal, ta daytat’ makita ni Satanas ket mabalin nga iturongna iti irarautna iti dayta nakapuy a paset. Ket daytoy agbalin a makapapatay kadatayo iti naespirituan.—Efeso 6:11, 13.
6. Aniat’ kasapulanna kadatayo ti ‘sibabarikes iti kinapudno’?
6 Rinugian ti apostol babaen ti panangigunamgunamna kadatayo: “Bumilegkayo ngarud a sibabarikeskayo iti kinapudno.” (Efeso 6:14) Ti barikes a militar idi un-unana ket maysa a lalat a maisuot iti aglawlaw ti siket wenno kadagiti patong. Masansan dayta iti natatek kadagiti babassit a metal, a mangted ti kanayonan a salaknib. Agserbi met dayta kas suportar ti kampilan wenno punial iti maysa a mannakibakal. Aniat’ kaipapananna para iti maysa a Kristiano a sibabarikes iti kinapudno? Ti mabariksan iti kinapudno ti Sao ti Dios kaipapananna a dayta koma iti nakail-ilet, tapno mabalintayo nga usaren dagiti Kasuratan a mangresolber kadagiti saludsod. No kasano a ti barikes militar ket maysa a pangsalaknib, kasta met iti kinapudno mangted panagtalektayo a mangibaklay kadagiti pakadagsenantayo ken mangsalaknib kadatayo. Ngarud, nalawag, ti panamagbalin a kupado kadagiti is-isiptayo kadagiti kinapudno ti Dios tulongannatayo a makapagtakder a sititibker maibusor ken Satanas.
7. Aniat’ kaipapanan ti maaddaan “ti kabal ti kinalinteg”?
7 Sumaruno ibaga ti apostol kadatayo a ‘sikakawestayo koma iti kabal ti kinalinteg.’ (Efeso 6:14) Idi panawen ti Biblia ti kabal iti barukong buklen dagiti kasla siksik a lalat, nagsisilpo a kadena wenno solido a metal ken agserbi a mangsalaknib nangnangruna iti puso. Ti panangikawes itoy a kabal ti kinalinteg masapul a kangrunaanna, ‘saluadantayo ti puspusotayo.’ (Proverbio 4:23) Babaen laeng iti dayta a makapagtakdertayo a sititibker maibusor ken Satanas babaen ti pannakatignaytayo nga agserbi ken Jehova ken maaddaan iti nadalus a panagbiag a manglapped iti panagbalintayo a makamulit iti moral nga impluensia iti ili ni Jehova.—1 Pedro 1:14-16.
8. Aniat’ ramanen ti “sisasapatostayo iti pannakaisagana ti naimbag a damag ti kappia”?
8 Kalpasanna dinakamat ni Pablo a dagiti “sakatayo sisasapatos koma kadagiti alikamen ti naimbag a damag ti kappia.” (Efeso 6:15) Aniat’ ipampamatmatna ditoy? Nga agtalinaedtayo nga aktibo unay iti panangikasaba ti mensahe ti Pagarian iti natalna a pamay-an, kas insuro ni Jesus kadagiti 70 a manag-ebanghelio: “Ket iti uray ania a balay a serkanyonto kunayo nga umuna, ‘Talna koma iti daytoy a balay.’” (Lucas 10:5) Ditay um-umay a makirikkiar kadagiti tattao. Imbes ketdi, immaytayo a mangiyeg kadakuada ti liwliwa, rag-o, talna ti isip ken namnama. Padpadasen ni Satanas iti mangkiwkiw ti ibubusor ken pannakilaban kadagiti dadduma a dumedengngeg tapno datayo met iti sumungbat wenno bumales iti kakikitana. Gapuna, ti panagtakder a sititibker maibusor kadagiti gakat ni Satanas, kasapulan ti panagbalintayo a nataktika ken naanus, nga agbalin nga “isuamin kadagiti amin a kita ti tattao.”—1 Corinto 9:19-23.
9. Aniat’ kaas-asping dagiti kadaanan a kalasag ken dumardarang a gayang?
9 Iti panangitultuloyna, namalakad ti apostol: “Alaenyo ti dakkel a kalasag ti pammati, isu a mabalinyonto a pangsarapa kadagiti isuamin a dumardarang a gayang ti managdakdakes.” (Efeso 6:16) Ti sao a Griego a naipaulog ditoy a “dakkel a kalasag” ipampamatmatna ti maysa a kalalainganna ti kadakkelna a mangsalaknib iti kaaduan a paset ti bagi. Maipapan kadagiti “dumardarang a gayang,” idi un-unana agar-aramid dagiti Romano kadagiti pana manipud kadagiti lungugan a runo nga addaan kadagiti babassit a pagianan a napunno iti dumardarang wenno napudot a napta. Mabalin a daytoy iti isingsingasing ni Pablo maipapan kadagiti dumardarang a gayang.
10. Us-usaren ni Satanas ti ania a kas “dumardarang a gayang”?
10 Ni Satanas ti mangipunpuntiria ti nadumaduma a kita dagiti “dumardarang a gayang” kadagiti Kristiano. Maysa kadagitoy a “gayang” isu ti pananglalais, panangumsi ken panangpardaya nga iturturong dagiti kabkabusor iti ili ti Dios. Dagitoy a “gayang” mabalin met a dagiti panagregget iti biang dagiti sumagmamano a mangupay kadagiti Kristiano a mannakidangadang gapu kadagiti makuna a nagbassit a resulta iti trabahoda iti ministerio wenno kinakurang ti irarang-ay a mangparmek kadagiti nainlasagan a pagkapuyan. Nairaman met ditoy dagiti napait a sasao, pananguyaw wenno kinaulbod. No maminsan, sugsugatan ni Satanas dagiti Kristiano babaen ti panangsulbogna iti kinausiosoda iti nailubongan a kinasirib a mainaig iti okultismo wenno panagrason maipapan ti namunganayan ken pagtungpalan ti tao. Rebbengna a siaanep a liklikanyo “dagita a bambanag a nauneg ni Satanas.” Ar-aramidenyo aya dayta?—Apocalipsis 2:24.
11. Ti kadakkel ken kinaepektibo ti naespirituan a kalasagtayo agpannuray iti ania?
11 Tapno masalaknibantay dagiti pusotayo maibusor kadagiti “dumardarang a gayang” ni Satanas, kasapulantayo ti dakkel, napigsa a kalasag ti pammati. No kasano ti kadakkel ken di pannakasalpot dayta ti agpannuray iti kadakkelanna kadatayo. Maaddaantayo iti kasapulan a salaknib sigun iti kawadwad a pananggundawaytayo iti panawen a maipaay iti personal a panagadal ti Biblia, panagmennamenna iti Sao ti Dios ken pannakitimpuyog kadagiti pada a Saksi ni Jehova. Siempre, kasapulan ti panangiyaplikartayo ti intay naadal, ta “ti pammati nga awan aramidna natay.” (Santiago 2:26) Gapuna, maysa kadagiti kasayaatan a pamay-an a panangpadakkel ken panangpabileg ti pammatitayo, ken tapno makapagtakder a sititibker, isut’ panagregget met a sipapasnek a mangiyukuok ti kasta a pammati kadagiti dadduma.
12. Ania ti naespirituan a kabal iti ulotayo, ket aniat’ pateg dayta kadatayo?
12 Intuloy a kinuna ni Pablo: “Alaenyo met, a pannakakabal ti ulo ti pannakaisalakan.” (Efeso 6:17) Idi un-unana, dadduma kadagiti kabal ti ulo ti naaramid kadagiti ruot a busneg, dadduma manipud kadagiti sinalsallapid a lienso wenno lalat ken kaskasdi a dagiti dadduma manipud kadagiti metal. (1 Samuel 17:38) Ngem aniat’ nakaaramidan ti naespirituan a kabal ti ulotayo? Imbaga ni Pablo kadagiti Kristiano a taga Tesalonica: “Managparbengtayo koma nga ikapettayo ti . . . kabal ti ulo, ti inanama ti pannakaisalakan.” (1 Tesalonica 5:8) Wen, ti inanama ti pudno a makasalaknib kadatayo manipud kadagiti panangparigat ken panangbaot ni Satanas ken dagiti ahentena. Ti napigsa a naibatay iti Biblia nga “inanama ti saan nga agturong iti pakaibabainan.” (Roma 5:5) Ti kasta a namnama ti mangsalaknib kadatayo a maibusor kadagiti materialistiko a propaganda, ta daytat’ mangtignay kadatayo a biruken nga umuna ti Pagarian ti Dios.—Mateo 6:33; Lucas 12:31.
13. Ania “ti kampilan ti espiritu,” ken aniat’ pategna?
13 Kamaudiananna, dumtengtayo iti maysa a paset pay ti pakidangadangtayo a kabal, “ti kampilan ti espiritu, nga isu ti sao ti Dios.” (Efeso 6:17) Ti sao a Griego a naipaulog ditoy a “kampilan” tuktukoyenna iti maysa nga ababa a kampilan a kaasping ti maysa a punial, a mangisingsingasing ti aginnassideg a panaglaban. Babaen iti umiso a pannakaammo ti Sao ti Dios, mabalintayo a lussoken ken gupden dagiti palso a sursuro, nga ibutaktak ti kinakurang ti lohikada, ken nangnangruna, ti pannakisuppiatda iti Nasantuan a Kasuratan. (2 Corinto 10:4) Ar-aramidentay daytoy saan a gaput’ kinatangsit no di ket gaput’ kinapakumbaba ken ayat iti Dios, kinapudno ken iti padatayo a tattao. Siraragsak, babaen iti tulong dagiti pudno a Nakristianuan a publikasion, maaddaantayo ti “nairut a panangpetpet iti sao ti biag.”—Filipos 2:16.
Dagiti Nakristianuan a Kualidad kas Tulong
14. (a) Apay awan rasontayo nga agtangsit? (b) Apay kasapulan a napakumbabatayo tapno makapagtakder a sititibker maibusor ken Satanas?
14 Mainayon pay iti naespirituan a kabaltayo, dagiti Nakristianuan a kualidad ti makatulong met kadatayo a makapagtakder a sititibker a maibusor iti Diablo. Yantangay agap-apelar ni Satanas iti kinatangsit, ti kinapakumbabatayo ken kaadda ti espiritu iti nasin-aw a panagpampanunot tulongannatayo iti pannakidangadang maibusor kenkuana. Wen, awan koma ti Kristiano nga “ipappapan iti bagina a nangatngato unay ngem iti rebbengna a panangipapan.” No naaramidantayo aminen a naituding kadatayo, rebbengna a kunaentayo: “Ad-adipen kami nga awan kapapay-anna. Ta inaramidmi laeng ti rebbengmi nga aramiden.” Malaksid pay, kasapulantayo met ti di kaikarian a kinamanangaasi ti Dios tapno makapagtakder a sititibker maibusor ken Satanas ken tapno maaddaantayo iti dayta masapul a napakumbabatayo, ta ti Dios “bumusor kadagiti natangsit, ngem mangted ti di kaikarian a kinamanangaasi kadagiti napakumbaba.”—Roma 12:3; Lucas 17:10; Santiago 4:6.
15. Iti panagtakder a sititiber, aniat’ pateg ti panagteppel?
15 Ti panagteppel ti maysa pay a Nakristianuan a kualidad a makatulong kadatayo a makapagtakder a sititibker a maibusor ken Satanas. Ti saan a pannakakontrol kadagiti emosiontayo, kas ti pungtot, wenno panaglablabes iti pannangan, panaginum wenno sekso pagbalinennatayo a silulukat iti panangraut ken panangimpluensia ti Diablo. No “magmagnatayo a maitunos kadagiti tartarigagay ti lasagtayo,” iti aktualmente magmagnatayo “kas maiyannurot iti sistema dagiti bambanag iti daytoy a lubong, a maiyannurot iti agturay [ni Satanas a Diablo] iti pannakabalin ti angin, ti espiritu nga ita agar-aramid kadagiti annak ti kinasukir.” (Efeso 2:1-3) No palubosantayo a maisublat dagiti inaagum, narugit a pampanunot ken rikrikna, agpegpeggadtayo iti pannakasilo iti Diablo a maipaay ti panagaramid ti pagayatanna. (2 Timoteo 2:26) Tapno makapagtakder a natibker maibusor kenkuana, masapul nga irutantayo ti panangkontrol ti pampanunottayo ken emosiontayo agraman ti sasao ken tigtignaytayo. Masapul a sursuruantay ti isiptayo nga agpanunot kadagiti bambanag a napudno, nadayaw, nalinteg ken makaay-ayo.—Filipos 4:8.
16. Apay a ti awan agumna nga ayat tulongannatayo a makapagtakder a sititibker?
16 Nangnangruna a ti awan agumna nga ayat tulongannatayo a makapagtakder a sititibker maibusor ken Satanas a Diablo. Isut’ nasiglat nga agapelar iti aniaman nga inaagum a kababalin a makitana kadatayo. Iti rukod a ti awan agumna nga ayat pagbalinennatayo a kupado iti serbisio ken panagdayaw ni Jehova, iti dayta met a rukod nga agbalintayo a di masalpot dagiti iraraut ni Satanas. Ania kadi ti tsansana kadatayo no inay-ayattayo ni Jehova iti isuamin a pusotayo, kararua, isip ken pigsatayo? Ti ayat pagbalinennatayo met a maseknan iti pannakaisalakan dagiti dadduma, ket daytoy ti mangtulong kadatayo a mangipasiguro ti mismo a pannakaisalakantayo. (Marcos 12:30, 31; 1 Timoteo 4:16) La ketdi no iparparangarangtay ti ayat iti nadumaduma a pannakaipanayagna, uray ni Satanas wenno dagiti aniaman kadagiti ahentena, makita wenno di makita, didanto mapakapuy ti takdertayo a maibusor kadakuada.—1 Corinto 13:4-8.
17. Apay a nasken ti kararag tapno makapagtakdertay a sititibker?
17 Tapno makapagtakdertayo a sititibker a maibusor kadagiti gakat ni Satanas, masapul nga usarentayo met a naan-anay ti kararag. Apay? Agsipud ta saantayo nga agballigi iti kabukbukodantayo a pigsa. Kasapulantayo ti tulong manipud ngato. Kalpasan ti panangisalaysayna iti naespirituan a kabal, inggunamgunam ni Pablo kadagiti kapammatian nga ‘agdawdawatda a kankanayon babaen ti espiritu, kadagiti dawdawat ken karkararag.’ Gapu iti dayta masapul nga “agsalukagkayo ti maipaay itoy a buyogan ti amin a panagtalinaed ken panangidawdawat kadagiti isuamin a sasanto,” agraman dagiti apostol.—Efeso 6:18, 19.
18, 19. (a) Kasano a ti panagdayaw ken panagyaman tulongannatayo? (b) Aniat’ pateg dagiti araraw ken dawdawat?
18 Ti “amin a panagtalinaed ken panangidawdawat” wenno kararag ramanenna ti ania? Maysa a porma ti panagkararag isut’ panangidaydayaw. Pudno unay gapu ti sasaaden ni Jehova, dagiti kalidadna ken sasaadenna iti uniberso, isut’ maikari iti panagdayawtayo. (Salmo 33:1) Ti maysa pay a porma ti panagkararag isut’ panagyaman. Ket ania dagiti rasontayo a mangted panagyaman iti Manangted ti “isuamin a sagut a nasayaat ken isuamin a sagut a naan-anay”! (Santiago 1:17) Maiyanatup unay, nabalakadantayo nga “idaydayawtay koma ni Jehova gapu ti kinamanagayatna ken gapu iti nakaskasdaaw nga ar-aramidna kadagiti annak dagiti tattao.” (Salmo 107:31) Ti kaadda kadatayo ti manangapresiar a puso ken isip pudno a tulongannatayo a makapagtakder a sititibker maibusor ken Satanas.
19 Ti araraw isut’ maysa pay a langa ti panagkararag. Mabalintayo a dawaten a siuumiso dagiti bambanag kas ti sirib (Santiago 1:5), nasantuan nga espiritu (Lucas 11:13), pammakawan ti basbasol (1 Juan 1:9; 2:1, 2) ken ti panangbendision ti Dios kadagiti ar-aramidtayo (Salmo 90:17). Sa adda met dita ti panagdawdawat. Tuktukoyen dayta ti panagpakpakaasi a sipapasnek ken Jehova a Dios, kadagiti tiempo ti naindaklan a pakariribukan wenno peggad. Gapuna idi a naibalud ni Pablo inkalikagumna a maaramid koma dagiti panagdawdawat a maipaay kenkuana. (Efeso 6:18-20) Dagitoy a porma ti panagkararag sigurado a tulongannatayo a makapagtakder a sititibker maibusor ken Satanas.
Determinadokay Koma nga Agtakder a Sititibker
20, 21. Kasanotay nga agballigi a naan-anay?
20 Ti ili ni Jehova ita kas maysa a grupo pudpudno a tagtagiragsakenda dagiti bendision ti naespirituan a paraiso. Ngem tapno bilang sinaggaysa makapagtultuloytayo a makiraman kadagitoy a bendision ditay mabalin a laglag-anen dayta. Masapul nga agbantaytayo, agtakder a sititibker maibusor iti Kabusortayo, ni Satanas a Diablo.—1 Pedro 5:8, 9.
21 Nagadu dagiti gakat ti Diablo, kas nakitatayon, ket dagiti gakatna isut’ panangtungday ti kinatarnawtayo tapno mapaglusolusnatayo iti panagserbi ken Jehova a Dios. Ngem dinatay kimmegen ni Satanas no itultuloytayo nga ikawes ti naespirituan a kabal manipud ti Dios, agtultuloy a mangsukay kadagiti bungbunga ti espirituna kas ti ayat ken panagteppel, ket agtalinaed iti panagkarkararag. Gapuna, babaen ti naayat a tulong manipud iti Diostayo, ni Jehova, makabalantayto a naan-anay a makapagtakder a sititibker maibusor kadagiti gakgakat ni Satanas.
Malagipyo Aya?
◻ Apay a makapungtot unay ni Satanas kadagitoy ad-adipen ni Jehova?
◻ Aniat’ mangbukel iti Nakristianuan a naespirituan a kabal?
◻ Ania ti sumagmamano kadagiti “dumardarang a gayang“ ni Satanas, ngem ania ti adda a pannalaknib kadatayo maibusor kadakuada?
◻ Apay a masapul nga agpakumbabatayo tapno makapagtakder a sititibker maibusor iti Diablo?
◻ Iti panagtakdertay a natibker, apay a nasken ti kararag?
[Ladawan iti pahina 16, 17]
Ti regular a panagkararag tulonganna ti pamilia a mangparmek ti iraraut ni Satanas