Report dagiti Manangibunannag ti Pagarian

Ti Panangasaba idiay Brazil

Tl BRAZIL nairaman iti bilin ni Jesus kadagiti pasurotna: “Inkayo ngarud ket pagbalinenyo nga ad-adalan dagiti amin a nasion.” (Mateo 28:19) Ti pannakaikaskasaba ti naimbag a damag iti dayta a pagilian iti nasurok a 158,000 a Saksi ni Jehova ti nagbunga kadagiti makaparagsak a kapadasan.

Kas pangarigan, maysa a Saksi idiay Sobradinho tinarigagayanna a tulongan ti pamiliana a makaammo ti kinapudno ti Biblia. Natulongannan ti dua a kakabsatna a lallaki ken maysa nga ipagna idiay Brasilia a nakaammo ti kinapudno ket nabautisarandan. Kalpasanna sinarungkaranna dagiti kakabagianna idiay Teresina, Piaui, 1,100 milia (1,800 km) ti kaadayona, a napeklanda a Katoliko ket dida kayat ti mensahe ti Biblia nga iwarwaragawag dagiti Saksi ni Jehova. Nagkararag iti tulong ni Jehova, inlawlawagna ken nanangna no apay a di maiyanatup iti Biblia ti panagsida ti dara. Nagsiddaaw, insaludsod ti nanangna: “Apay a di insursuro dagiti papadi daytoy kadakami?”

Ti ina ti dimmawat ti kanayonan pay nga impormasion manipud ti Biblia, ket naiyurnos ti maysa a miting iti dayta a rabii. Inawis ni nanangna dagiti kaarrubana ken kakabagianda a dumngeg iti pannalaysay, ket nagsiddaawda amin. Bayat ti 15 nga aldaw a kaadda daytoy a kabsat a babai kadagiti kabagianna, naaddaan ti pannakisarsarita ti Biblia iti kada rabii a siimdeng dagiti 17 a tattao. Ti resulta? Sangapulo ket dua a panagadal ti Biblia ti naiyurnos nga agpaay kadagiti lokal a Saksi nga idauloda. Tallo nga estudiante ti nabautisaranen a simbolo ti dedikasionda ken Jehova, dua dagiti agpalplano a mabautisaran iti sumaganad nga asamblea sirkito ken dua pay dagiti rumangrang-ay.

Maysa a baket a kabsat idiay Rio de Janeiro ti nanggundaway ti panangaskasaba a bigbigat unay idiay Copacabana Beach ken dadduma pay nga igid ti baybay agraman kadagiti plasa. Makasarsaritana dagiti alila, dagiti agaw-awir ti ubbing, dagiti klerk ti banko ken dagiti babbai a babaknang nga agpagpagna idiay igid ti baybay, ket isut’ mangidadaulo kadagiti panagadal ti Biblia a situtugaw kadagiti bangko kadagitoy a luglugar. Sumagmamanon a tattao ti nakaammo ti kinapudno manipud kenkuana ket isuda metten ita ti Saksi ni Jehova.​—Proverbio 1:20.

Kas dagiti Saksi ni Jehova, kayattayo nga usaren amin a gundaway a mangtulong kadagiti dadduma a makaadal maipapan ti naimbag a damag. Iraman daytoy ti impormal a panangasaba, nga isut’ inaramid ti maysa a kabsat a lalaki idiay Macapa, maysa a siudad idiay deppaar ti Amazon.

Idi agaw-awiden manipud ti regular a trabahona a panangasaba, isut’ nakakita ti maysa a lalaki a situtugaw idiay ruangan ti maysa a paglakuan ti sarisari nga agbasbasa ti maysa a libro iti Biblia. Isut’ inasitgan ti kabsat ket sinaludsodna no maragragsakan iti panagbasbasana iti Biblia, ket kuna iti lalaki nga isut’ maragragsakan. “Kayatmo kadi a maaddaan ti kurso iti Biblia?” insaludsod ti kabsat kenkuana. “Wen, ngem mano iti pagbayad?” Idi maibaga kenkuana a dayta ti libre, inawat ti lalaki. Di nagbayag isu ken ti pamiliana makigimgimongdan idiay Kingdom Hall. Isut’ nangaramid ti panagbalbaliw iti panagbiagna tapno maitunos kadagiti prinsipio ti Biblia, nagpasalista iti Teokratiko nga Eskuelaan ti Panagministro ken rinugianna metten ti makipaset iti tay-ak ti serbisio. Kalpasan ti makatawen isut’ nabautisaran kas simbolo ti dedikasionna. Amin daytoy napasamak gapu ta maysa a kabsat a lalaki ginundawayanna ti di inggagara a panangasaba.

Pudno unay, ur-urnongen ni Jehova dagiti “sabsabali a karnero.” (Juan 10:16) Ket maragsakantayo no addaantayo ti pannakiraman iti daytoy a trabaho.