Dagiti Saludsod Manipud Kadagiti Managbasa

◼ Ti kadi panangaramid ni Jesus ti adu nga arak iti boda idiay Cana ipamatmatna a ginasgasut ti timmabuno iti dayta a rambak?

Pudno a simimilagro a nangipaay ni Jesus ti dakkel a kantidad ti nagsayaat nga arak, a nawadwad a maipaay iti kalalainganna a kadakkel a grupo, ngem ditay koma panunoten a nangaramid laeng iti daydiay kasapulan wenno naibus amin dayta iti rambak.

Kuna ti Juan 2:6-9 a pinapunno ni Jesus iti danum “ti innem a burnay . . . kas iti ugali a panaggugor dagiti Judio, nga aglaon ti dua wenno tallo a karamba ti danum ti tunggal maysa.” Imbilin ni Jesus: “Punnuenyo dagiti burnay iti danum.” Inaramidda a kasta, pinunnoda dayta “nga agingga iti ngarab.” Maipatpato a tunggal karamba ket maysa a “bath,” a dayta a panangrukod ket agkidar iti 22 litros, wenno 5.81 galon. No pudno daytoy dagiti innem a karamba ti danum naglaon ti agarup 260 ingganat’ 390 litros, wenno 70 ingganat’ 105 a galon.​—1 Ar-ari 7:26; Ezra 7:22; Ezequiel 45:14.

Ni Jesus ken dagiti adalanna nagtalinaedda iti dayta a rambak, gapuna a ti kinatimbeng ti nataginayon iti dayta. Mabalin a mairason a ginasgasut iti timmabuno ta no saan saan koma a nakita ni Jesus a nesesita ti panangpataud ti kasta kaadu ti arak. Nupay kasta, iti dadduma nga okasion idi nagserbi a kas maysa a namilagruan a manangipaay, saan a nangipaay laeng ni Jesus iti kabassitan a kasapulan. Idi a pinaaduna dagiti tinapay ken ti ik-ikan a mangpakan ti 4,000 a lallaki malaksid babbai ken ub-ubbing, ti sobra kalpasanna ti nangpunno ti “pito nga alat a napno,” dagiti basket a naaramid manipud runo a dadakkel unay a makalaon ti maysa a tao. (Mateo 15:32-38; Aramid 9:25) Umasping iti dayta, mabalin nga idi kalpasan ti rambak idiay Cana adda met ti nawadwad nga arak a maipaay ti masanguanan a panangusar ta ti arak isu iti gagangay nga inumen a kadua ti pannangan. Daytoy ti mangipaganetget a ni Jesus ket maysa a managparabur, kas ken ni Amana met laeng.​—Aramid 14:17; idiligyo iti Mateo 14:14-21.

Gapuna, ti boda idiay Cana ti mabalin a tinabunuan dagidiay adu a naggaput’ Cana ken iti arubayan, kaskasdi ti kaadu ti arak nga inaramid ni Jesus saan a nesesita a paneknekan a sumagmamano a ribo dagiti timmabuno.