Ti Sao ti Dios Nabiag
Ti Dua a Panagungar
AWAN nagianna a tanem! Simimilagro, a nagpukaw ti bagi ni Jesus! Ti panguluen dagiti papadi nangipaay iti kuarta kadagiti soldado a mangbambantay iti tanem tapno siuulbod nga ibagada a dagiti ad-adalan ni Jesus immayda ket tinakawda ti bagina. (Mateo 28:11-15) Kinapudnona, napagungaren ni Kristo, nga ti immuna a napagungar kas naespirituan a persona.—Aramid 26:22, 23; 1 Pedro 3:18.
Dagiti dadduma pay malaksid ken Jesus tagiragsakenda ti maysa a panagungar iti naespirituan a biag, kas kunaen ti Biblia: “Ngem tunggal maysa iti batangna: ni Kristo ti umuna a bunga, sumaruno dagiti tao ni Kristo iti kaaddana.” (1 Corinto 15:20-23) Siasino “dagidiay a tao ni Kristo”? Isuda dagiti 144,000 a matalek nga ad-adalan a napili a mangituray kas ar-ari iti isuamin a daga a kadua ni Kristo iti Pagarian ti Dios.—Apocalipsis 5:10; 14:1, 3; 2 Timoteo 2:11, 12.
Ti panagungar iti biag kas espiritu a parsua idiay langit, siempre, saan a makita ti natauan a mata. Deskribiren ti Biblia ti panagbalbaliw nga agturong iti naespirituan a biag iti kastoy a pamay-an: “Maimula nga agrupsa, mapagungarto a di agrupsa. Maimula iti pannakabalin, mapagungarto iti pannakaidayaw. . . . Maimula a bagi a linalasag, mapagungarto a bagi a naespirituan.”—1 Corinto 15:42-44.
Daytoy a panagungar iti biag idiay langit maawagan iti umuna a panagungar. Kunaen ti Biblia, “nagasat ken santo ti mairaman iti panagungar nga umuna; kadakuada awan pannakabalin ti maikadua nga ipapatay, no di ket isudanto . . . makipagaridanto kenkuana bayat ti sangaribo a tawen.” (Apocalipsis 20:6) Ti panagungar iti nailangitan a biag maawagan met “ti nasapsapa a panagungar.” (Filipos 3:11) Kas naibaga sakbayna, daytat’ napasamak ‘bayat ti kaadda ni Kristo,’ isu a nangrugi idi 1914, idi a nagsubli ni Jesu-Kristo tapno rugianna iti panagturayna kas Ari iti tengnga dagiti kabkabusorna.—Hebreo 10:12, 13.
Ti ebkas a “panagungar nga umuna” ken “nasapsapa a panagungar” ipakitana nga adda sabali a sumaruno. Kalpasan a mapagungar dagidiay nga agbalin a kakadua ni Kristo nga agturay ken nadalusanen ti daga kadagiti amin a bumusbusor iti Pagarian ti Dios, ngarud, tiempon ti panangrugi ti panagungar dagiti natay nga agbiag ditoy daga. Gapuna addada dua a panagungar. Umuna, adda panagungar iti nailangitan a biag. Maikadua, adda ti panagungar “dagiti nalinteg ken dagiti nakillo” nga addan iti gundaway a manggun-od iti biag nga agnanayon ditoy daga.—Aramid 24:15.
Panunotenyo nga anian a nakaskasdaaw a milagro ti panagungar—a pudno a mangisubli iti biag dagiti tattao a natayen! Ket panunotenyo no kasano a nagpateg daytoy iti pannakatungpal dagiti pangpanggep ti Dios! Pudno a daytoy a nakaskasdaaw a probision iti Dios ti mangtignay koma kadatayo a mangaramid iti amin a kabaelantayo a mangipakita iti ayattayo ken debosiontayo kenkuana.