‘Intulnogda ti Bagida a Siaayat’
TI Suriname ket maysa a tropikal a pagilian, maysa kadagiti nasurok a 200 a dagdaga a sadiay aktibo dagiti Saksi ni Jehova. Iti nabiit pay, maysa a pagassawaan a misionero idiay Suriname ti nagdaliasat babaen iti jeep iti 200-milia (320-km) a mangbisita iti sumagmamano kadagiti mina ti bauxite ken makisarita kadagiti trabahador sadiay maipapan kadagiti pangpanggep ti Dios. Adu nga interes ti nasarakanda.
Iti umuna a nagsardenganda, kuna ti manedyer ti kampo: “Pudno a maragsakanak ti kaaddayo ditoy. Talaga a kasapulanmi ti banag a kas iti daytoy.” Kalpasanna impaskilna idiay kapeteria ti maysa nga anunsio ti palawag ti Biblia ken pabuya ti slide a maangay iti dayta a rabii iti alas 7:30. Idi dimtengen ti oras, 70 a tattao ti nagparang ken nagdengngeg a sipapasnek iti palawag no kasano a maam-ammoda ti Dios babaen ti panamarsuana ken babaen ti Biblia, ket sada nagbuya iti sumagmamano a napili nga slides a mangipakpakita iti sangalubongan a trabaho a panangasaba.
Kalpasanna, imparang dagiti misionero dagiti nadumaduma a publikasion a makatulong kadagiti nagdengngeg a maaddaan pay ti ad-adu nga impormasion. “Kayatko ti maysa a libro,” kuna ti maysa a lakay, a nagna a napan idiay sango. Daytan iti sinias nga agpaay kadagiti dadduma. Di nagbayag ti abasto dagiti misionero ti naibus, ket ti asawa a lalaki ti masapul nga agsubli manen a sidadaras idiay jeep tapno mangala ti baro a suplay, bayat a ni baketna ti kupado nga agisursurat kadagiti direksion dagidiay mayat a masarungkaran manen.
Umuna a rabii la dayta iti panagdaliasatda. Daytoy a pagassawaan a misionero ti nangbusbos iti maysa a lawas iti dayta a disso, a nakakitada ti umas-asping a balligi sadinoman a papananda. Ti kapadasanda ket maysa a demostrasion ti dakkel a tarigagay nga adda pay laeng iti puspuso dagiti adu a dumngeg iti kinapudno ken mangammo maipapan ti pagayatan ni Jehova. Ti panangpennek iti dayta a tarigagay a rinibo kadagiti Saksi ni Jehova kadagitoy maudi nga al-aldaw ti impaayda dagiti bagbagida tapno maibaon kadagiti pagilian kas ti Suriname tapno tulongan dagiti lokal a Saksi a mangtaming kadagitoy amin nga interes. Gapuna tungtungpalenda ti kari ti salmista: “Ti ilim itulnogna ti bagina a siaayat iti aldaw ti pannakabalinmo.” (Salmo 110:3) Ket sibabaknang a bembendisionan ida ni Jehova gapu iti dayta.
Kayatyo met aya a maaddaan ti paset kadagiti bendision a tagtagiragsakenda? Nalabit maisungbatyo: ‘Ngem pulos diakto agbalin a maysa a misionero!’ Ket mabalin a pudno dayta. Nupay kasta, mabalin a maysakayo kadagiti adu nga addaanen ti nasken a paset kadagiti nakaskasdaaw a kapadasan a tagtagiragsaken dagiti misionero iti intero a lubong. Iti ania a pamay-an?
‘Itdenyo Dayta kadagiti Misionero’
Iti isu met laeng a pamay-an kas inaramid iti maysa nga agtutubo a babai nga agnagan April. Saan, ni April ket saan a maysa a misionera, numan pay mabalin a kayatnanto met ti agbalin a misionera inton dumteng ti aldaw. Ngem iti dayta a kanito isut’ nakaub-ubing pay laeng tapno agdaliasat iti maysa a ganggannaet a daga ken maaddaan kadagita a nakaragragsak a kapadasan. Nupay kasta, kayatna ti maaddaan iti paset iti amin dayta, gapuna nagsurat iti headquarters ti Watchtower Society idiay Brooklyn: “Adda nangted kaniak ti maysa a doliar iti asamblea sirkito. Kayatko nga ited dayta kadakayo tapno itedyo kadagiti misionero a mangtulong kadakuada a mangisuro kadagiti tattao maipapan ken Jehova.” Gapuna, iti nakapatpateg a pamay-an, naaddaan iti paset ni bassit nga April iti sangalubongan a trabaho a misionero. Isut’ nangitulong ti kuartana tapno makatulong iti pananggastos kadakuada.
Sabali pay a surat ti naggapu iti maysa a natataengan bassit ngem ni April. Isut’ nagsurat: “Mangilukonak iti maysa a cheque a $100 a mausar iti trabaho ti Pagarian. Maysa daytoy a regalo a naiyawat kaniak, gapuna ipaspasak dayta kadakayo . . . Ti panagpayunir ket isut’ wagas ti panagbiagkon iti 46 años. Nupay kasta, dandani a magtengkon ti 90 ket siak ti medio uminayad bassit.” Daytoy a napasnek, nabayagen nga adipen ni Jehova ket saannan a maaramidan ti serbisio ti kinamisionero. Ngem kayatna ti maaddaan ti paset, ket inaramidna dayta babaen ti panangtulongna a pinansial.
Dagitoy dua a sursurat itampokda iti sabali a pamay-an a ‘panangitulnog ti [ili ti Dios] ti bagbagida a siaayat iti aldaw iti puersa militar ni Jehova.’ Tungtungpalenda ti pammagbaga ti proverbio ti Biblia: “Pagdayawmo ti kukuam ken Jehova ken dagiti umuna a bungbunga ti amin a maapitmo.” (Proverbio 3:9) Gapu iti maysa wenno dadduma a rason, saanda a maitulnog a siaayat ti bagbagida iti pisikal iti kas ar-aramiden dagiti dadduma. Nupay kasta, intulongda dagiti “kukuada” ket iti kasta timmulong a namagbalin a posible para kadagiti dadduma a mangaramid iti dayta. Kadagiti napalabas, ti kasta a naayat a panangted ti nangidemostra ti sumagmamano a napapateg a prinsipio. Kitaentayo no ania dagidiay a prinsipio, ken no dagita ti balido pay met laeng itatta.
Ti “Pusoda Tinignayna Ida”
Idi tiempo ni Moises adda idi trabaho a mairingpas. Masapul a maibangon ti maysa a tabernakulo nga agbalin a sentro ti pudno a panagdayaw iti nasion ti Israel. Naawis dagiti kualipikado nga Israelita a mangipaay ti tiempo ken talentoda iti trabaho a panagbangon. (Exodo 35:10) Ket tunggal maysa naawis a mangitulong manipud material a sansanikuada tapno maipatakder dayta. Ti resultana: maysa nga aglaplapusanan a kontribusion, nga ad-adu ngem iti kinasapulan. Ket nakaskasdaaw a dagiti kontribusion naaramidda babaen kadagidiay nabulos ti pusoda. Kuna ti rekord a ti “puspusoda ti nangtignay kadakuada,” ti “puspusoda ti nangiduron kadakuada.” Wen, ti itutulongda ket ebkas ti pammatida ken Jehova ken demonstrasion ti panangsuportarda a maipaay ti panggep ti tabernakulo—ti pudno a panagdayaw.—Exodo 35:20-29; 36:4-7.
Idi kaaldawan ni Ezequias, maysa a trabaho ti rebbeng a maaramidan. Kalpasan ti adu a tawtawen a panangliway, masapul a ti templo ti madalusan ken masursuruan dagiti tattao a pagraeman ti linteg ni Jehova. Napakaammuan dagiti Israelita maipapan ti pannakasapul ti material a kontribusion “tapno [dagiti papadi ken Levitas] ipamaysada koma dagiti bagida met laeng iti linteg ni Jehova.” (2 Cronicas 31:4) Ti sungbat dagiti tattao ti entusiastiko unay a kuna ni Azarias a nangato a padi: “Ni Jehova binendisionanna ti ilina.”—2 Cronicas 31:10.
Gapuna, ti kinatulnog dagiti Israelitas a mangted ket demonstrasion ti nasayaat a kasasaad ti pusoda ken ti panangsuportarda iti pudno a panagdayaw, agraman ti panangbendision ni Jehova kadakuada. Kasano met ngay itatta?
Binendisionan ni Jehova ti Ilina
Adda met ita iti sabali a naisangsangayan a trabaho a maaramidan. Impadto ni Jesus: “Ket daytoy naimbag a damag ti pagarian maikaskasabanto iti amin a mapagnaedan a daga kas pammaneknek kadagiti isuamin a nasion; ket iti kasta umayton ti panungpalan.” (Mateo 24:14) Impadto met ti Biblia a daytoy a trabaho a panangasaba ti mapakuyogan iti trabaho a panangisuro ken panangurnong kadagiti pudno a managdayaw. (Isaias 2:3, 4; 54:13; Zacarias 8:23; Mateo 28:19, 20; Apocalipsis 7:9) Adda met aya paset dagiti kontribusion iti daytoy a trabaho?
Pudno nga adda. Kas pangarigan, tapno mangiyeg ti maysa a misionero idiay Watchtower Bible School of Gilead ken ti panangtaraon kenkuana bayat ti kurso, kalpasanna maibaon iti maysa a pagilian kas ti Suriname ken mangsalimetmet kenkuana sadiay iti sumagmamano a tawen, ti umabut ti rinibo a doliar. Kaskasdi ti Watchtower Society ti nakaibaonen ti nasurok a 6,000 kadagita a misionero nanipud umuna a pananglukat iti Gilead School.
Siempre, bassit a paset laeng daytoy dagiti gastos a nainaig iti panangikasaba ti naimbag a damag. Addada met dagiti manangaywan ti sirkito ken distrito ken dagiti assawada, ken dagiti agtartrabaho kadagiti pagtaengan a Bethel ti Sosiedad, a dagiti pribilehioda ti serbisio ti manglapped ti panangsuportarda ti bagbagida babaen iti panggedan. Addada met dagiti espesial payunir nga umaw-awat iti pinansial a tulong tapno makapagserbida kadagiti narigat a teritoria. Ngem suportar laeng dayta nga agpaay kadagiti trabahador!
Inayonyo iti dayta ti ngina dagiti baro a makina a pagimprenta ken pagaramid ti libro, agraman gastos kadagiti baro a pasilidades ti Bethel a maipatpatakder iti intero a lubong, agraman kadagiti Assembly Hall ken ginasgasut a baro a Kingdom Hall. Laglagipenyo, met, dagiti “nakalemmeng” a gastos kas ti regular a panagipatulod ti sursurat a maipatulod kadagiti nasurok a 46,000 a kongregasion, ken ti panangimaldit kadagiti adu a pormas ken dokumento a kasapulan iti teokratiko nga organisasion. Itan mangrugin a mabigbigyo ti nagdakkelan a kantidad ti kuarta a magasgasto ti kada tawen iti panangiaksaba ti “naimbag a damag” ken panangisiguro a “dagiti karnero” addaanda kadagiti lugar a pagtataripnongan ken tagiragsakenda ti naespirituan a taraon.
Ti nakaskasdaaw a banag a ta pinagbalin ni Jehova daytoy a posible. Kasano? Iti kadakkelanna babaen ti panangtignayna ti puspuso dagiti tattao a mangaramid kadagiti boluntario a kontribusion. Gapuna, dagiti indibidual a Kristiano mangtedda kadagiti donasion a kuarta—agraman panangidonarda ti panawen ken pigsada—a mangsuportar kadagiti lokal a proyekto kas kadagiti Kingdom Hall ken Assembly Hall. Adu a kongregasion ti mangipatpatulod ti regular a kontribusion iti Watchtower Society wenno, iti ruar ti Estados Unidos, kadagiti sanga nga opisina nga adda kadagiti pagilianda. Dagiti indibidual ti agar-aramid met ti kontribusion iti nadumaduma a pamay-an a direkta iti Sosiedad. (Kitaenyo ti kahon.) Ti resulta? Uray pay kadagitoy a panawen ti karigatna iti ekonomia, ni Jehova tigtignayenna ti puspuso ti ilina a mangipaay ti kasapulan a mangiringpas ti trabaho nga intudingna.
Ania a konklusion ti maadaltayo manipud iti daytoy? Nga, kas idi kaaldawan ni Ezequias, “ni Jehova binendisionanna ti ilina.” Impakitana ti panangsuportarna iti nakaskasdaaw a pamay-an iti trabaho nga ar-aramidenda. Kasta met, kas panangsuportar ti ili ni Jehova iti urnosna idi kaaldawan ni Moises, makitatayo nga itatta ti ili ni Jehova ti 100 porsiento nga adda iti likudan iti trabaho a panangikaskasaba ti naimbag a damag ti Pagarian ti Dios ken ti panagurnong kadagiti interesado. Nangipaayda kadagiti kontribusionda, saan a gapu ta isuda ti sibabara a palpalawagan dagiti propesional a manangpaadda kadagiti pundo, no di ket gapu ta ti puspusoda ti “nangtignay kadakuada,” wen, “nangiduron kadakuada.”
Ni Jehova ‘An-anayennanto’
Idi umuna a siglo nakipaset ni apostol Pablo iti trabaho a kinamisionero ken naaddaan kadagiti adu a nakaskasdaaw a kapadasan—umas-asping ti kapadasan ti pagassawaan a misionero idiay Suriname. Uray isu met ket masansan sinuportaran dagiti kapammatianna babaen kadagiti kontribusion. Maysa a kongregasion a nangnangruna a nangtulong isu daydiay adda idiay Filipos. Gapuna, idi nagsurat kadakuada, natignay a nangiyebkas ni Pablo kadagitoy a sasao: “Agyamanak iti Diosko tunggal pannakalagipko kadakayo, kankanayon a kadagiti amin a kararagko, agdawdawatak a siraragsak gapu kadakay amin, gapu iti pannakikadkaduayo iti pannakaiwarwaragawag ti naimbag a damag nanipud idi immuna nga aldaw aginga ita. Ket sitatalgedak itoy met laeng, a daydiay nangirugi kadakayo ti nasayaat nga aramid, an-anayennanto agingga iti aldaw ni Jesu-Kristo.”—Filipos 1:3-6; 4:16.
Uray dagiti Kristiano met itatta, umas-asping a mariknada ti pannakaparegtada. Pudno iti kari ni Jehova, tinignayna ti ilina nga “itulnogda ti bagbagida a siaayat” iti adu a nagduduma a pamay-an iti serbisiona. Gapuna dagiti Saksi ni Jehova ‘agyamanda a kankanayon iti Diosda’ ken sitatalekda a ni Jehova, a nangpatanor iti kasta a nagsayaat nga espiritu iti moderno-aldaw nga ilina, ket an-anayennanto met ti trabahona.
No Kasano ti Itutulong ti Dadduma iti Trabaho ti Pagarian
Sagsagut: Dadduma nga indibidual mangaramidda ti direkta a sagut ken donasion iti Watch Tower Bible and Tract Society of Pennsylvania, wenno iti sanga nga opisina iti pagilian a pagtataenganda. Dagita a sagsagut ti masapul a mapakuyogan a kanayon ti ababa a surat a mangibagbaga a ti kuarta ket nairanta kas boluntario a donasion.
Sagut nga Addaan Espesial a Probision: Iti sidong daytoy nga urnos, dagiti indibidual ti mangidonar ti kuarta nga addaan ti espesial nga urnos a no kasapulanda ti dadduma wenno amin dayta bayat ti panagbiagda, daytat’ maisubli kadakuada. Wenno, tapno maliklikan ti gastos ken di kinasierto ti panangsubok, dadduma a tattao intedda iti Sosiedad dagiti stocks, bonds, wenno dagdaga a sanikuada. Dadduma mangaramidda kadagita a regalo, nga ireserba dagiti kalintegan ti panagbiag iti bagbagida.
Insurance: Adu ti namagbalin iti Watch Tower Society kas beneficiary dagiti seguro ti biagda.
Testamento: Dadduma babaen ti tulong ken balakad dagiti abogadoda, pinagbalinda ti Sosiedad a beneficiary ti testamentoda.
Adu pay nga impormasion wenno balakad maipapan kadagita a magun-odan babaen panagsurat iti lokal a sanga nga opisina ti sosiedad, wenno iti sumaganad nga address: Watch Tower Bible and Tract Society of Pennsylvania, Office of the Secretary and Treasurer, 25 Columbia Heights, Brooklyn, New York 11201.
Siaayat a supsuportaran ti ili ni Jehova ti irarang-ay ti Pagarian