Ti Biagyo, Ti Kinatarnawyo ken ti Kard
“NO UMADANI ti dakes, ti manakem a tao ket aglemmeng: ngem ti nanengneng aglayon laeng nga agturong ti ladingitda.”—Proverbio 27:12, Septuagint, ni Charles Thomson.
Dayta a naipaltiing a proverbio paneknekanna ti kinapateg iti umuna a panagpanunot. Ti maysa a ‘dakes,’ wenno kalamidad, a kayat a liklikan dagiti ad-adipen ti Dios isut’ panagsalungasing iti kinatarnawda. Iti sumagmamano a tawenen dagiti Saksi ni Jehova ti siaanep a mangar-aramid iti dayta maipapan iti bilin ti Dios a dagiti Kristiano ‘adaywanda ti dara.’—Aramid 15:28, 29.
Pagaammo dagiti Kristiano a kalpasan ti maysa nga aksidente mabalin nga awan puotda wenno saanda a makaited iti detaliado a panangilawlawag no apay saanda mabalin nga akseptaren ti pannakaiyalison ti dara. Uray pay no iti nadangran a Saksi ket makapagsao ken maikunana a—maitunos iti prinsipio ti napakaammuan a pammalubos—dina kayat a maiyalisonan ti dara, mabalin nga agaburido dagiti doktor wenno dagiti personnel ti ospital a maysa a darum ti ibungana no saanda a suroten dagiti estandarte a pannakaagas. Gapuna iti sumagmamano a tawenen dagiti Saksi ni Jehova ti agaw-awit ti Medical Alert Card. Daytoy ti maysa a napirmaan, natestiguan a dokumento nga isut’ mangwayawaya kadagiti mangngagas ken opisiales ti ospital iti aniaman a susungbatan manipud iti aniaman a komplikasion a mabalin a tumaud manipud pannakaammoda iti panagkitakit nga umawat iti dara. Maysa a baro a kard ti mapirmaan ken mapetsaan ti kada tawen; gapuna, ti dokumento ti kanayon a baro ken balido.
No kayatyo ti agtulnog iti linteg ti Dios maipapan iti dara, regular kadi nga itugtugotyo ti maysa kadagitoy a dokumento? Sigsiguruenyo kadi a dayta ket baro ken, no mabalin ket pinirmaan iti kaasitgan a kabagianyo? Kitaenyo manipud iti sumaganad a surat no apay a rebbeng a kastat’ aramidenyo:
“Siak ken ni lakayko kayatmi ti agyaman kadakayo ti dakkel unay gaput’ panangipaayyo kadakami kadagiti naespirituan a taraon iti umiso a tiempo ken dagiti material a panangisuro a makatulong kadakami. Kayatko nga isalaysay no kasano a daytoy a material ti nakaispal ti biagmi.
“Hunio 6, 1983 idi, ket matutudo idi ti rabii idi nga agawidkamin manipud trabahomi. Agtartrabahokami kas kontraktor iti maysa a baro a lugar a pagpatpatakderan kadagiti balbalay 30 milias manipud pagtaenganmi ket masapul a pidutenmi dagiti tallo a babassit nga annakmi manipud eskuelaan. Ket bayat nga agmammaneho ni John, a lakayko, nga agpaamianan nga agturong iti high way iti maysa a bassit a trakmi, pagsarsaritaanmi ti umad-adanin a kumbension distrito. Nakitak ti agpaabagatan a traktor-trailer trak a nagsikko kas balisong, daytat’ nagpusipos ket natirruanna iti semiento a mamagsina iti dalan ti kasta unay kapigsa a nagipalladaw kadagiti pitak ken ruruot nga agpangato. Iti kapegges ti panagkidem ti mata ti trak ti bimmallasiw iti mamagsina iti dalan a simiento ket nagsardeng a mismo iti sanguanan iti luganmi a kasla nagdakkelan a pader a ladrillo.
“Masansan a pampanunotenmi no aniat’ mapasamak no mairamankami iti maysa nga aksidente. Sinurotmi ti bilin maipapan ti pannakisarita iti doktor ti pamiliami ken iti lokal nga ospital maipapan ti panangusar kadagiti panangiyalison ti dara. Ngem kasanon ngay no awan puotmi, nga adda kami iti sabali nga ili ket dikam mabaelan nga agkitakit maipapan iti pannakaiyalison ti dara? Ditoy ti siayat a pagpaayan ti maysa kadagidiay a katulongan a siayat nga impaayyo [ti Watchtower Society]: ti Medical Alert Card. Aw-awitenmi a kanayon ti kardsmi. Umiso ti pannakaisuratda, napetsaan ken napirmaan.
“Bayat nga awan puotko idiay natirtiritir a gabsuon, maysa a babai a rehistrado a nars ti nagsardeng. Kayatna idi nga alaen dagiti dua nga ubbing a mabalinna a magaw-at ta maysa kadakuada ti agpadpadara unay manipud sugat iti ulona, ket inted ni John ti palubosna. Daydiay bassit a babai a maysa ti nalipit idiay trak a kaduak agingga a di naluktan ti ridawna.
“Idi simmangpeten ti Emergency Medical Service, dinawat ni John iti attendant a pakaammuanna nga umun-una ti ospital babaen iti radio ket ibagana kadakuada nga iti aniaman a sirkumstansia saanda a mangmangted kadagiti ubbing ti dara. Nagmadi ti attendant, agingga nga impabasa ni John kenkuana ti Medical Alert card. Daytat’ nangkumbinsir kenkuana a mangiradio ti mensahe idiay ospital.
“Dakes idi ti kasasaad ni John, gapu kadagiti nakaro a pannakasugat iti ulona, ti natukkol a punngua-pungnguan iti kannigidna ken nagadu a sugsugatna. Ngem intultuloyna ti nagkararag nga isu komat’ agtalinaed a sipupuot agingga a makitana nga amin dagiti kasapulan ken tarigagay ti pamiliana ket naaywanan.
“Napilayanak iti dua a patongko, maysa ti naburak ken natukkol met iti makannigid a tulang iti luppok, nga isut’ nangpataud ti nakaro a panagpadara iti uneg. Idi makagtengkami idiay ospital kaskasdi nga awan pay puotko. Imbaga ti doktor ken ni John nga iti las-ud iti sumagmamano nga oras mapukawkon ti kagudua ti darak ket mabalin a matayak no saanak a maiyalisonan ti dara. Agpapan pay kasta ti kasasaad ni John, intultuloyna nga imbaga kenkuana, ‘Awan dara.’ Kaskadi nga isu ti pilitenda, nga ibagbaga kenkuana a di agbayag mapukawnan ti baketna, ken kunada, ‘Asinonto ngarud ti mangaywan kadagiti annakyo?’ Kamaudiananna nasarakanda ti Medical Alert card ko. Ti doktor ti nangpaaramid ti sumagmamano a kopia iti dayta ket inrekordna dayta. Kas legal a dokumento, daytat’ pagraraemanda ken nangpasardeng kadakuada a mangipapilit iti panangiyalison ti dara. Innem nga oras ti kamaudiananna nakapuotak met laengen ket mabalinkon ti makapagsao a maipaay iti bagik. Ngem ti nakaskasdaaw—numan pay mabalin a panunoten dagiti dadduma, nga awan mamaayna—ti bassit a kard ti nangisalakan kaniak manipud iti pannakaipapilit iti pannakaiyalison ti dara bayat nga awan puotko.
“Addaak idiay ospital iti ngangngani pito a lawas, ngem nadlawko a ti panagpaimbagko ti naparpartak, gapu, ti saan a pannakaiyalison ti ganggannaet a dara, nga addaan kadagiti komplikasion, a naited kaniak. Nakapagtitipon kamin kas maysa a pamilia ken agpapaimbagkami a sisasayaat. Pagyamanan ken Jehova gaput’ panangipaayna kadakami kadagiti nakaskasdaaw a katulongan kas ti Medical Alert card. Pudno a nagkurri dayta!”
Al-alaen dagiti Saksi ni Jehova dagitoy napapateg a dokumento manipud kadagiti panglakayen ti kongregasionda. Ti makingngato a kapadasan iyilustrarna no apay a dakayo ken ti pamiliayo rebbeng nga agbalinkayo koma a “manakem” ket regular nga itugtugotyo ti nakompleto ken baro a Medical Alert card yo.—Proverbio 22:3.