Ti Sao ti Dios Nabiag
Impateg ni Ruth ti Ili ti Dios
TI NAPINTAS a balasang ditoy isu ni Ruth, a nagtaeng idiay Moab, daya ti Natay a Baybay. Numan pay isut’ dimmakkel a kadua dagiti Moabita a nagdaydayaw kadagiti ulbod a didiosen, isut’ sigagagar nga agserbi iti pudno a Dios, ni Jehova, a kadua ti ilina nga Israel. (Numeros 25:1-5) Idi naaddaan iti daytoy a gundaway, daytan pinetpetanna sipapasnek nga isut’ nangayatan kenkuana dagiti dadduma a managdaydayaw ken Jehova a makaammo kenkuana kas “maysa a maikari a babai.”—Ruth 3:11.
Ti maysa a panagbisin idiay Israel ti nangted ken Ruth iti daytoy a gundaway nga agserbi ken Jehova. Kas resulta ti bisin, maysa a pamilia ti uppat manipud ili ti Betlehem ti immakar ti daga ti Moab. Isuda ti pamilia a makitkita ditoy—ni Elimelec, ti asawana a ni Noemi ken dagiti annakda a lallaki a da Mahalon ken Quelion. Ngem di nagbayag kalpasanna natay ni Elimelec. Kamaudiananna ni Mahalon inasawana ni Ruth ket ni Quelion nakaasawa met iti sabali a babai a Moabita nga agnagan Orfa. Gapuna kadua agpadpada ti lakayna ken katuganganna a babai a managdaydayaw ken Jehova, naammuan ni Ruth ti pudno a Dios.
Di nagbayag kalpasanna, nupay kasta, agpadpada a ni Mahalon ken Quelion natayda, a pinanawanda dagiti tallo a babbai nga awanan assawa ken annak. Mailadawanyo siguro ti ladingitda. Ania itan ti aramidenda? Naammuan ni Noemi a ti bisin idiay Israel ti napalabasen. Gapuna naikeddengna ti agsubli kadagiti kailianna idiay Betlehem. Ni Ruth ken ni Orfa inayatda la unay ti katuganganda a babai ket kimmuyogda kenkuana. Kalpasan ti panagdaliasatda iti di nagbayag idiay kalsada, ni Noemi, kas makitkitayo, kunana kadagiti babbai: ‘Agsublikayo ken mapankayo kadagiti innayo.’
Inagepan ni Noemi dagiti babbai iti panagpakada, ket nangrugida nga agsangit. “Saan, no di ket dakami makipagsublikaminto kenka iti ilim,” insangitda. Indagadag ni Noemi: ‘Agsublikayo annakko.’ Gapuna nangrugi ni Orfa nga agsublin iti ilina. Nupay kasta, kimpet ni Ruth kenkuana.
Simmango ni Noemi ken Ruth ket kinunana: “Agsublika a kadua iti nabalon nga abiratmo.” Ngem simmungbat ni Ruth a buyogen iti makaallukoy a kinapasnek: “Dika koma tarigagayan kaniak a baybay-anka ken agsubliak manipud iti isusurot kenka; ta sadinoman a papanam umayakto; sadinoman a pagnaedam, agnaedakto, ti ilim isunto ti ilik, ket ti Diosmo isunto ti Diosko.” (Ruth 1:1-17) Gapuna nagsubli ni Ruth a kadua ni Noemi ket nagbalin a paset ti Israel nga ili ti Dios.
Kas ken Ruth, naammuanyo metten aya ti pudno a Dios, a ni Jehova, ken ti ili nga agdaydayaw kenkuana? No kasta, sapay koma ta maaddaankayo ti isu met laeng a determinasion a mangted ti nasungdo a panangsuportar kadagiti ad-adipen ni Jehova itatta kas inaramid ni Ruth iti nabayagen!
[Mapa iti panid 8]
(Para iti aktual a pannakaurnosna, kitaem ti publikasion)
NATAY A BAYBAY
MOAB