“Sipipinget nga Agturong iti Kalat”
“Lipatak dagiti nalikudan ken kamakamek dagiti masanguanan, agtarayak a sipipinget nga agturong iti kalat.”—FILIPOS 3:13, 14.
1, 2. (a) Kasano nga inawat ni Saulo ni Tarso ti akemna iti ministerio, ket ania dayta? (b) Ania ti reaksionna iti daytoy a naituding kenkuana?
IDI ni Saulo ti Tarso adda iti dalan nga agturong Damasco tapno idadanesna dagiti Kristiano, maysa a lawag manipud langit ti gimmilap iti aglawlawna, ket nakangngeg ti timek a nagkuna: “‘Saulo, Saulo, apayapay idadanesnak?’ Ket kinunana: ‘Asinoka, Apo?’ Ket kinunana: ‘Siak ni Jesus, nga idadanesmo. Ngem tumakderka ket sumrekka iti siudad, ket maibaganto kenka ti rebbengmo nga aramiden.’”—Aramid 9:3-6.
2 Apay a ni Jesus inikkanna ni Saulo ti Tarso ti kasta a kapadasan? Inlawlawag dayta ni Jesus ken adalanna nga Ananias: “Ta daytoy [ni Saulo] ti baso a napili a maipaay kaniak a mangipan iti naganko iti sanguanan dagiti nasnasion ken dagiti ar-ari ken dagiti annak ti Israel.” Situtulnog a napan ni Ananias, ket impatayna dagiti im-imana ken Saulo ket kinunana: “Ni Jesus a nagparang kenka iti dalan nga inayam, imbaonnak tapno makakitaka ken tapno mapnoka ti nasantuan nga espiritu.” (Aramid 9:15, 17) Apaman nga isut’ makakitan, isut’ nabautisaran, ket rinugianna iti makitimpuyog iti kongregasion Kristiano idiay Damasco. Itan kas nabautisaranen a Kristiano a ministro, dagdagus nagbalin nga ukopado a sireregta a nangikaskasaba ti naimbag a damag maipapan ken Jesus, ti Anak ti Dios, kadagiti Judio.—Aramid 9:20-22.
3, 4. (a) Kasano ti panangtimbeng ni Pablo ti ministeriona? (b) Iti ania a pamay-an a naiduma ti kababalin ni Pablo manipud iti imparangarang ti kongregasion ti Efeso?
3 Daytoy naregta a ministro ti pagaammo a nasaysayat kas ti apostol Pablo. Kanayon nga isut’ agsasao a sitatan-ok iti ministeriona ken ti di kaikarian a kinamanangaasi naipakita kenkuana. “Agyamanak iti daydiay namapigsa kaniak a ni Kristo Jesus nga Apotayo, a gapu ta imbilangnak a matalek a dinutokannak iti panangaywan, idinto nga idi punganay, managtabbaaw ken manangidadanes ken manamarparigatak. Nupay kasta nakagun-odak ti asi, agsipud ta inaramidko a diak am-ammo idi diak pay namati.” (1 Timoteo 1:12-14) Wen, intan-okna unay ti ministeriona.—Roma 11:13; 2 Corinto 4:7.
4 Dagita a sasao iti biang ni Pablo iyilustrarna ti panangipateg ti ministerio a tinaginayonna iti intero a karerana. Isut’ di natnag iti kasasaad a naminsan napasamak iti kongregasion idiay Efeso, a nagkunaan ni Jesus: “Ngem adda bassit busorek kenka, ta pinanawam daydi immuna nga ayatmo.” (Apocalipsis 2:4) Imbes ketdi, sinalimetmetan ni Pablo ti kalatna iti sanguananna ken tinaginayonna ti isu met laeng a regta ken rayray iti ministerio nga adda kenkuana idi immuna nga al-aldaw idiay Damasco.
5. Kalpasan pannakapagserbitay ken Jehova iti adu a tawtawen, kasanotay a paregtaen dagiti dadduma?
5 Kalpasanna ti panagbalinna a matalek a Kristiano a ministro iti pinulpullo a tawen, inusar ni Pablo mismo a nalikudan ken kapadasanna a mangparegta kadagiti padana a ministro iti kongregasion ti Filipos tapno saanda koma a kumapuy. Dikayo aya naammuan a masansan makapainteres ti pannakangngeg no kasano a ti maysa naammuanna ti kinapudno ket nagbalin a maysa a ministro? Maitunos iti dayta, parparegtaenyo met aya dagiti dadduma babaen kadagiti personal a historiayo ken tawtawenyo iti matalek a serbisio kas dedikado a Kristiano a ministro?
6. Aniat’ nalikudan ni Pablo kas maysa a Judio?
6 Ni Pablo iti suratna kadagiti taga Filipos, mabalinna a tukoyen ti biagna kas maysa a managtungpal Judio: “No adda siasinoman nga agpanunot nga agtalek iti lasag, nangnangronaak pay: a nakugit iti maikawalo nga aldaw, iti kapuonan ti Israel, iti kaputotan ni Benjamin, Hebreo dagiti Hebreo; iti maipapan iti linteg, Pariseo; ket no maipapan iti regta, nangidandanes iti kongregasion; ket no maipapan iti kinalinteg nga adda iti linteg, awan pakapilawak.”—Filipos 3:4-6.
7. Apay a linikudan ni Pablo dagidiay a bambanag, ken aniat’ nagun-odanna babaen panangaramidna ti kasta?
7 Babaen iti kasta a nalikudan naaddaan koma ni Pablo kadagiti adu a namaterialan a gunggona iti pannakitimtimpuyogna kadagiti Judio. Nupay kasta, intuloyna a kinuna: “Ngem dagidiay bambanag a gunggona kaniak idi, imbilangko ida a pannakadadael gapu ken Kristo. Nangnangruna pay, isuamin dagiti banag ibilangko ida a pannakadadael, gapu iti napateg unay a pannakaammo ken Kristo Jesus nga Apok. A gapu kenkuana pinukawko amin ket ibilangko ida a rugit, . . . tapno maammuak ni Kristo ken ti pannakabalin ti panagungarna ken ti pannakaikadua kadagiti sinagabana, a maiyaspingak iti ipapatayna, bareng iti aniaman a pamay-an magun-odak koma ti nasapsapa a panagungar kadagiti natay.” (Filipos 3:7-11) Dagidiay a sasao indemostrana ti naan-anay a pammati ken Kristo Jesus ken dagiti sagana nga inaramid ni Jehova a Dios. Kaskay met laeng aya ken Pablo a dikay pinalubosan ti tarigagay iti kinatan-ok wenno material a gunggona a mangdominar iti biagyo?
Ti Umiso a Mental a Kababalin
8. (a) Kalpasan panagserbin a nabayag iti ministerio, aniat’ kuna ni Pablo maipapan ti kalatna? (b) Kasano a dagiti sasao ni Pablo idiay 1 Corinto 9:24-27 pumudno iti kasotayo?
8 Kalpasan ti panagserbi ni Pablo iti Dios iti pinulpullon a tawen, mabalinna kadi a pakapuyen iti panangsursurotna iti kalat? Nagsurat kadagiti taga Filipos: “Kakabsat, diak pagarupen a nagun-odakon; ngem maysa ti aramidek: Idinto a lipatak dagiti malikudan, kamakamek dagiti masanguanan, agtarayak a sipipinget nga agturong iti kalat maipuon iti gunggona ti natan-ok a panangawis ti Dios gapu ken Kristo Jesus.” (Filipos 3:13, 14) Isut’ nakaaramiden ti nagsayaat a rekord iti Nakristianuan a ministerio ken nangibtur kadagiti adu a bambanag, ket bayat nga isut’ sibabalud idiay Roma nga insuratna dagitoy a sasao kadagiti taga Filipos, kaskasdi ti ministeriona saan pay a nagpatingga. Tapno maragpatna ti gunggona nga agpaay kadagidiay nagserbi iti umuna siglo a kongregasion Kristiano, awan sabali “ti natan-ok a panangawis ti Dios gapu ken Kristo Jesus,” ngarud masapul nga itultuloyna a suroten a sipipinget daytoy a kalat. Daytoy ti umiso a panangmatmat a rebbeng a salimetmetan amin dagiti nataengan a Kristiano, uray no ti namnamada iti biag a masanguanan idiay langit wenno ditoy daga. Nasayaat no tunggal maysa kadatayo sukimatentayo ti mismo a sasaadentayo ken iti panagpampanunottayo tapno makita no pudpudno met laeng nga ipatpategtayo ti ministerio a naitalek kadatayo iti sidong ti urnos ti Dios.
9. Mabalin a maaddaantayo ti ania a nataengan a mental a kababalin?
9 Ipabigbig ni Pablo ti nataengan a panangmatmat Kristiano, a kunkunana: “Datayo ngarud amin, a nataenganen, addaantayo koma ti kastoy a kababalin ti kapanunotan; ket no mariknayo iti maisupadi daytoy lawlawagento met ti Dios.” (Filipos 3:15) Ti kababalin ti nataengan a Kristiano ti agturong iti balligi. Ramanen daytoy ti panangsurot kadagiti addang ni Kristo Jesus, a sibaballigi a nangiringpas ti naituding ti naindagaan a ministeriona. Nabalinan ni Jesus ti nagkararag ken Amana: “Siak indaydayawka ditoy daga, naturposko iti aramid nga intedmo nga aramidek. Ket ita, Ama, padayawanak kenka met laeng ti dayag nga adda kaniak idi, iti dinnam, idi awan pay ti lubong.”—Juan 17:4, 5.
10. Ania pay ti mabalin a maikuna maipapan iti mapagulidanan a mental a kababalin ni Kristo maipapan iti serbisio ni Jehova?
10 Tapno makaay-ayotayo ken Jehova a Dios, ken iti daytoy a pamay-an awatentayo ti gunggona ti biag nga agnanayon, masapultayo ti isu met laeng a mental a kababalin nga impakita ni Kristo Jesus. Ti pannakammona iti daytoy, nagapelar ni Pablo: “Adda koma daytoy a nakem nga adda met ken Kristo Jesus, isu, nga idinto nga addaan galad a Dios, saanna nga inkankano ti pannakipada iti Dios, banag a rebbengna idi a salimetmetan. No di ket binaybay-anna ket innalana ti galad nga adipen, a naaramid a kapadpada dagiti tao. Ket idinto a nagparang iti kasasaad ti tao, nagpakumbaba a naknakemna, a nagtulnog agingga ken patay, wen, patay iti kayo a pagtutuokan. Gapuna met a ti Dios intan-okna iti kangatuan unay ket inikkanna iti nagan a natantan-ok ngem iti amin a nagan.” (Filipos 2:5-9) Anian a nakaskasdaaw a kababalin ti adda ken Jesus! Mabalintayo aya a tuladen? Ti sipapakumbaba a panangsapul a panagaramid iti pagayatan ti Dios ti kanayon a mangiturong kadagiti bendision. No mairingpas ti aniaman a naituding a trabaho, daytat’ agbunga iti naimbag.
11. Aniat’ rebbeng a maaramidan dagidiay napipigsa ken nataengan iti naespirituan?
11 Gapu iti insurat ni Pablo, dadduma iti kongregasion ti Filipos ti kaawatan kasapulan pay a pagreggetanda a magun-odan ti nataengan a Nakristianuan a kababalin. Nagreggetan ni Pablo a paregtaen ken tulongan ida. Kadagiti kaaduan a kongregasion itatta, addada dagidiay napigsa iti pammati ken dagidiay addaan met ti pagkapuyan. Dagidiay napigpigsa rebbengna, kas ken Pablo, paregtaenda koma dagiti dadduma. Dakkel ti naaramidan ni Kristo Jesus a nangparegta kadagidiay addaan ti naespirituan a pagkasapulan, a nangted ulidan kadagiti Kristiano a suroten. “Datayo, ngarud, a napigsa, rebbengtayo nga anusan dagiti kinakapuy dagiti nakapuy, ken ditayo ay-ayuen ti bagitay met laeng. Tunggal maysa kadatayo ay-ayuenna koma ti padana a tao, a maipaay iti naimbag nga ulidan. Ita ti Dios ti anus ken liwliwa, ipaayna koma kadakayo nga agmaymaysakayo koma iti nakem a maiyannurot ken Kristo Jesus, tapno iti maymaysa a timpuyog ken maymaysa a timek, daydayawenyo ti Dios ken Ama ni Apotayo a Jesu-Kristo.”—Roma 15:1, 2, 5, 6.
12. Rebbeng a maaddaantayo ti ania a panangmatmat iti gunggona nga impaay ti Dios?
12 Ni Pablo, iti panangpapigsana ti pammati dagiti taga Roma, intudona a “ti naparabur a sagut ti Dios isu ti biag nga agnanayon ken Kristo Jesus nga Apotayo.” (Roma 6:23) Kabayatan ti ministeriona, uray met ni Jesus, adut’ masaona maipapan iti biag nga agnanayon. Daytat’ maysa a nakaskasdaaw a gunggona nga intukon ti Dios kadagiti ad-adipenna. Ti Dios kayatna a salimetmetan dagiti ad-adipenna daytoy a gunggona iti matmatada, ta daytoy ti mangparegta kadakuada iti kinamatalek. No aramidentay dayta ipakpakitatay ti napigsa a pammati kadagiti karkarina. Kadagiti Nakristianuan a panaggigimongtayo addaantayo ti okasion nga agsao a masansan iti gunggona nga inted ni Jehova kadagiti matalekna.
Ti Ministeriotayo Agpapan Pay Adu a Rigat
13. Aniat’ paset dagiti Kasuratan iti intay pannakaadda ti umiso a mental a kababalin?
13 Ti panangsalimetmetay ti umiso a panangmatmat, wenno mental a kababalin, ti mapaneknekan a nakapatpateg bayat nga itultuloytayo ti ministeriotayo kadagitoy maudi nga al-aldaw. Numan pay dadduma mapukawda ti ayatda nga immuna, sapay koma ta maikeddengtayo a daytoy ti nikaanoman dinto mapasamak kadatayo. Ti Kasuratan mismo ket katulongan iti daytoy a pamay-an. (Roma 15:4) Babaen iti panagad-adaltayo kadakuada magun-odantay ti namnama. Siyayamankay met laeng aya ken Jehova maipaay kadagiti Kasuratan, agraman dagiti nagadu a bambanag a nailanad kadakuada maipapan kadagiti matalek nga ad-adipen ni Jehova a kas ken apostol Pablo?
14. Kasano a sinalimetmetan ni Pablo ti positibo a kababalinna iti sanguanan dagiti narigat a kapadasanna?
14 Ania komat’ aramidentayo no addaantay kadagiti personal a kapadasan a dinakawat ni Pablo idiay 2 Corinto 11:23-28? Apay saan a simmuko ni Pablo? Agsipud ta isut’ sipapanunot iti kalatna. Mabalin a mapasarantayto met dagiti umas-asping a bambanag. Kaskasdi masapul nga agturongtayo a sipipinget iti kalattayo iti gunggona nga indiaya ti Dios kadatayo. Idi nagsurat ni Pablo kadagiti taga Filipos, impakitana ti nasayaat a panagpampanunotna babaen ti panangdakawatna nga isut’ naibalud a maipaay iti panangikanawa wenno panangidepensa ti naimbag a damag. (Filipos 1:7, 16) Naawatanna no apay nga isut’ adda sadiay. Importante dayta no dumtengtayo iti kasta a pannakasuot. Mainayon pay, ammotayo a mabalinnatay nga usaren ni Jehova a mangted pammaneknek a maipaay iti dayawna.
15. (a) Apay a kasapulan ti kongregasion idiay Filipos ti pammaregta, ket aniat’ imbaga ni Pablo kadakuada a nangpabileg kadakuada? (b) Kasanot’ panagrikna ti kongregasion idiay Roma iti pannakaibalud ni Pablo?
15 Dagiti taga Filipos naaddaanda kadagiti suot nga umas-asping iti linak-am ni Pablo idiay Roma. Nagsurat: “Nga adda kadakayo daydi met la pannakidangadang a nakitayo kaniak ken nadamagyo ita nga adda kaniak.” (Filipos 1:30) Kadagitoy a sirkumstansia makapagsurat ni Pablo a makaparegta kadakuada. Kunana a ti naimbag a damag ti naammuan dagiti Guardia Praetoriano. Kaawatan a ti Nakristianuan a mensahe ti simmalput agingga kadagiti pagtaengan a mismo ti emperador, a dadduma nagbalinda a dedikado a Kristiano. Ti kongregasion idiay Roma ti nagsayaat panagriknada iti dayta a situasion, a saanda a napaladingitan, wenno naupay wenno nagbuteng gapu iti banag a ni Pablo ket adda a sibabalud. Imbes ketdi nagbalinda a naregta iti trabaho a kayat a pairingpas ni Jehova, ad-adda a nangipakitada iti ad-adu a tured a mangisao ti Sao ti Dios nga awan butengna.—Filipos 1:12-14; 4:22.
16. Ania nangnangruna ti kasapulan nga aramidentayo no rumsua dagiti ibubusor?
16 No rumsua ti ibubusor, addada dadakkel a gunggona iti panangsalimetmet ti panagkaykaysa iti kongregasion Kristiano. Impaganetget ni Pablo iti panagkaykaysa ken panagtutunos. (Filipos 1:27–2:4) Kadagita a tiempo kasapulanda ti panangiyebkas ti sasao ti pammati iti maysa ken maysa, tapno saantayo a kumapuy iti panagturong a sipipinget iti kalat. Daytat’ panawen a panangsalimetmet iti naayat, napakumbaba a kababalin ken panagaramid iti naimbag iti maysa ken maysa, a matmatan ti intereses ti maysa ken maysa.—Idiligyo iti Filipos 2:19-21.
Panangparmek kadagiti Lapped
17. Apay a ditay koma kumapuy a mangitultuloy ti kalattayo no rumsua dagiti parikut ti salun-at?
17 Maysa kadagiti nasinged a kadkadua ni apostol Pablo isu ni Epafroditus. Gapu iti aramid ti Apo isut’ ngangngani natay, ngem awan ebidensia a ti problemana iti salun-at ti nangpataud kenkuana a napukawna iti panangmatmatna iti kalat nga adda iti sanguananna. (Filipos 2:25-30) Idiay 2 Corinto 12:7, nadakamat ni Pablo ti bukod a kapadasanna iti “siit iti lasag,” a nalabit tuktukoyenna ti pakarigatanna kadagiti matana. Nagkararag a daytat’ maikkat koma kenkuana, ngem ti kiddawna ket saan a napatgan. Nupay kasta, gapu ta silalagip iti kalatna daytat’ nangtulong ken Pablo a nangsalimetmet a nangsurot iti dayta agpapan pay ti aniaman a sagubanit a nailasagan. Nupay addaan kadagiti pagkapuyan, isut’ nakasarak iti pamay-an babaen ti tulong ni Kristo Jesus.—2 Corinto 12:9.
18. Kasanot’ panangipakita ni Pablo ti kinatimbeng maipapan kadagiti material a bambanag?
18 Ti surat kadagiti taga Filipos (4:11-13) ti nangdakamat met kadagiti kasapulan ti panagbiag. Ti panagpasar kadagiti kinakirang ti agbalin a suot iti maysa a Kristiano nga isut’ kumapuy a mangitultuloy iti kalatna. Wenno alaennanto aya iti nataengan a kababalin babaen iti panangtamingna iti problema ken kaskasdi maaddaan paset iti ministerio? (Idiligyo iti Aramid 18:1-4.) Agpapan pay ni Pablo ti agkurang kadagiti kasapulanna wenno aglaplapusanan, ti ministeriona ti immun-una. No isut’ addaan kinawadwad saanna nga inusar dayta nga okasion a mangbusbos ti ad-adu a tiempo a mangsapul iti ragragsak, no di ket sinalimetmetanna ti panangitultuloyna iti kalat agturong iti gunggona.
19. Aniat’ ibalakad ti Filipos 4:6, 7 kadatay nga aramiden no kasapulantay ti tulong? Ania dagiti ibungana?
19 Saan a nadakamat ni Pablo ti amin a kita ti kapadasan a mabalin a maadda iti maysa a Kristiano iti panagbiag. Kaskasdi no dumteng dagiti bambanag a makasinga iti ministerio, kas natataengan a Kristiano agturongtayo koma ken Jehova iti kararag, ti kurso a nairekomendar idiay Filipos 4:6, 7. Kalpasanna itden kadatayo ni Jehova ti talna ti panunot, a mangtulong kadatayo nga agpanunot a silalawag ken mangtulong kadatayo a mangparmek kadagiti parikut bayat nga agtultuloytayo kas dagiti matalek a ministro. Ti kararag tulongannatayo met a mangtaginayon ti pammatitayo ken ti pannakapagtultuloy agingga iti kalattayo.
20. (a) Kasano a ti ulidan dagiti matalek a natataengan iti kinapudno makaparegta kadatayo? (b) Aniat’ rebbeng nga aramidentayo? Apay?
20 Adu dagidiay naitimpuyogen kadagiti kongregasion itattan a nakapagserbin ken Jehova iti pinulpullo a tawtawen. Aminda limmasatda kadagiti suot bayat ti panangitultuloyda ti ministerioda. Ngem tinulongan ni Jehova ida, gapuna nakapagtultuloyda agingga iti kalat a maipaay iti gunggona. Agyamantayo ken Jehova nga addada kadagitoy moderno a panawen, kas met laeng idi umuna a siglo, dagiti kakabsat a lallaki ken babbai a mapagulidanan iti kinaibtur, kinamatalek iti serbisio ti Pagarian ken simamatmatda iti gunggona. Dagidiay agtutubo wenno kabbaro iti “Dalan” magunggonaanda babaen ti panangsukimatda ti rekord ni apostol Pablo wenno kadagiti matalek nga ad-adipen iti moderno-aldaw a kongregasion, a kitkitaen no kasanot’ panangtaming dagitoy kadagiti parparikutda. (Aramid 9:2; Hebreo 13:7) Sapay koma ta tunggal maysa kadatayo usarenna ti tunggal okasion a mangparegta iti maysa ken maysa tapno makapagibturtay a simamatalek iti serbisio nga inawattayo ken sangsangkamaysa nga agturong a sipipinget iti kalat nga inkabil ni Jehova iti sanguanantayo. Babaen ti panangaramid iti kasta, addaantay ti namnama a makapagserbi ken Jehova a Dios iti agnanayon iti siraragsak a pannakitimpuyog kadagiti matalek.—Filipos 3:13-16.
Dagiti Punto a Laglagipen
◻ Aniat’ personal a nalikudan ni Pablo, ket kasano nga inusarna daytoy a nangparegta kadagiti kakabsatna?
◻ Kasano a dagiti ulidan ni Kristo Jesus ken ni Pablo ipakitana kadatayo no ania ti kababalin ti nataengan a Kristiano?
◻ Kasano a maiparangarangtayo ti panagkaykaysa no rumsua dagiti ibubusor?
◻ Apay a masapul nga agtultuloytayo a mangsurot ti kalattayo?
[Ladawan iti panid 12]
Dakkel naaramidan ni Kristo Jesus a nangpapigsa kadagidiay addaan naespirituan a pakasapulan