“Tungpalem a Naan-anay ti Ministeriom”
“Tarigagayak unay iti imatang ti Dios ken ni Kristo Jesus, isu a mangukomto kadagiti nabiag ken natay, . . . tungpalem a naan-anay ti ministeriom.”—2 TIMOTEO 4:1, 5.
1. Ania idi ti relasion ni Pablo ken Timoteo?
IDI nga insurat ni apostol Pablo ti maikadua a suratna ken ni Timoteo, sursurotenen ni Pablo ti kalatna kas ministro ti Dios ti agarup 30 a tawtawenen. Isut’ immawat kadagiti adun a bembendision manipud ken Jehova. (2 Timoteo 1:2) Pinili idi ni Pablo ni Timoteo a makipagtrabaho a sisisinged kenkuana iti trabahona a panagdaliasat, nga agserserbi kadagiti kongregasion. Tinagiragsakda a dua dagiti adu a tawtawen ti nabunga a kapkapadasan.—Aramid 16:1-5.
2. Aniat’ pateg dagiti sasao ni Pablo idiay 2 Timoteo 4:6-8?
2 Itan umadanin ti tiempo nga agpatingga ti ministerio ni Pablo. Insuratna: “Ta addaakon a maidatdaton, ket ti aldaw ti ipapanawko dimtengen. Nakirupakak ti nasayaat a pannakidangadang, naturposko ti tarayek, inaywanak ti pammati. Manipud ita naisagana a maipaay kaniak ti balangat ti kinalinteg, nga itedto kaniak ti Apo, ti nalinteg nga ukom, iti daydiay nga aldaw, ket saan laeng a kaniak, no di kadagiti isuamin nga agayat iti panagparangna.” (2 Timoteo 4:6-8) Insingasing daytoy a ti ipapatay ni Pablo ket asidegen. Kaawatanen a ni Pablo nagsagaba ti ipapatay iti sidong ti panangidadanes ni Nero idi 66 K.P. Idi naipasango ken patay, ania a pampanunot ti nagtaray iti is-isip ni Pablo? Nalabit dagitoy: Naaramidak aya a naimbag ti serbisiok? Naan-anayko aya a sibaballigi ti ministeriok? Wen, inyebkas ni Pablo ti nauneg a riknana a naaramidanna dayta! Ti pammatina ti nakapigpigsa, ket isut’ sitatalek a magun-odanna ti gunggona iti pannakaawisna sadi ngato. Ania a pannakapnek ti naadda kenkuana agsipud ta pulos saan a simmiasi manipud nakaitudinganna!
3. Sakbay ti ipapatayna ania a naimbag a banag ti maaramidan pay ni Pablo ken Timoteo?
3 Adda pay bassit a tiempo a nabati para ken Pablo nga agaramid ti naimbag. Sakbay pannaturogna ken patay, ania a naimbag a banag ti maaramidan pay ni Pablo nga agpaay ken Timoteo? Iti sidong ti pannakapaltiing nangted kadagiti nasken a balakad. Mabasatayo dagiti pampanunot ken sasaona iti libro ti Maikadua a Timoteo. Dagitoy dagiti maudi a sursuratna iti Kasuratan nga agpaay met a pagimbagantayo.
4. Ania a pammagbaga ti inted ni Pablo ken Timoteo?
4 Saan pay a naturpos ni Timoteo ti ministerio a nakaitudinganna, gapuna nagsurat ni Pablo: “Tarigagayak unay iti imatang ti Dios ken ni Kristo Jesus, isu a mangukomto kadagiti nabiag ken natay, ken gapu iti panagparangna ken ti pagarianna, nga ikaskasabam ti sao, umagawaka iti tiempona man ken saanna a tiempo, tumubngarka, agbabalawka, mamagbagaka, a buyogen ti amin a panaganus, ken ti panangisursuro. Ta umayto ti aldaw a didanto maanusan ti nasayaat a sursuro, no di ket, idinto nga adda gagatel kadagiti lapayagda, mangurnongdanto kadagiti mannursuro kas mainugot iti kinagaramugamda met laeng; ket iyadayodanto dagiti pagdengngegda iti pudno, ket sumiasida a mapan kadagiti parparbo a sarita. Ngem, sika, agtaknengka iti isuamin a bambanag, aganuska kadagiti rigrigat, aramidem ti trabaho ti manang-ebanghelio, tungpalem a naan-anay ti ministeriom.”—2 Timoteo 4:1-5.
5. Apay a ti balakad ni Pablo ti makapainteres a nangnangruna kadatayo?
5 Awan duadua a nakatulong iti dakkel unay dayta a nagsayaat a balakad ken Timoteo, ngem datayo met ngay, magunggonaantay aya manipud iti dayta? Agbibiagtayon kadagiti “maudi nga al-aldaw” nga insurat ni Pablo. Adu a tattao itattan ti ‘addaan langa ti nadiosan a debosion ngem libakenda met ti pannakabalin dayta.’ (2 Timoteo 3:1-5) Dagiti kakasta dumngegda laeng kadagiti “mannursuro” a manggagatel ti lapayagda. Kaskasdi, mainayon iti panangikasaba ti sao iti uneg ti kongregasion, dagiti pudno a Kristiano addaanda met ti obligasion a mangaskasaba kadagiti isuamin iti publiko, a sapsapulenda dagidiay dumngeg “ti sao.” Gapuna daytoy a balakad ti maiyannatup met itatta kadagiti Kristiano a saksi ni Jehova.
No Kasano a Tungpalen a Naan-anay ti Ministerio
6. (a) Apay a rebbeng nga “ikaskasaba ti sao”? (b) Ania dagiti gunggona manipud panangsaluadtayo ti panangitungpaltay ti ministeriotayo?
6 Ti ministerio ti addaan kadagiti nadumaduma a pasetna; nagadu dagiti bambanag nga aramiden ti ministro. Umuna, kuna ni Pablo, “ikaskasabam ti sao.” Isu daytoy ti sao a pinili ni Jehova nga iparangarang kadagiti ad-adipenna. Isut’ sao ti kinapudno a sinao ni Jesus. Impakaammo ni Jehova no ania iti mensahe nga agpaay iti sangatauan iti maysa a tiempo, a pinalubosanna dagiti saksina ditoy daga a mangidatag iti dasigna iti isyu. Ti pamay-an isut’ panangted ti mensahe ti pammakdaar sakbay nga isut’ agtignay. (2 Cronicas 36:15, 16; Isaias 42:9; 43:12; Jonas 3:2-4) Ti mensahena ti mangibunga ti pagimbagan dagidiay dumngeg iti dayta; maaddaandanto iti lugar ti kinatalged. Dagidiay madi mangipangag pagbayadanto dayta iti ibungana inton agtignay ni Jehova a mangibanag iti panangukomna. Ibaklaydanto ti kabukbukodanda a responsabilidad. (Aramid 20:20, 21, 26, 27) Kaskasdi, ti kurso ti kinasirib nga agpaay ti ministro ti Dios ket: “Saluadam ti bagim ken ti isursurom. Agtalinaedka kadagitoy a banag, ta no aramidem daytoy, isalakanmonto ti bagim met laeng ken dagiti met dumngeg kenka.”—1 Timoteo 4:16.
7. Apay a naganat a trabaho dayta uray no dagiti kasasaad ti di nasayaat?
7 Ti panangaskasaba ti maaramidan iti sidong ti nadumaduma a kasasaad, ngem daytat’ masapul nga umabante. “Umagawaka iti tiempona man ken saanna a tiempo,” insurat ni Pablo. Ti mensahe mabalin a kaipapananna ti biag nga agpaay kadagiti tattao. Gapuna, iti aniaman a kasasaad a pakasarakan ti matalek a Kristiano iti bagina, matmatanna ti mensahe a naganat ken sumapul kadagiti pamay-an tapno maipangngeg ti sao, uray no tumaud iti ibubusor iti trabaho a panangasaba. Makitatayo a silalawag daytoy iti ulidan ni Jesus ken ti rekord idiay libro ti Biblia a Dagiti Aramid.
8. (a) Aniat’ makatulong iti ministro a mangikaskasaba iti sao? (b) Apay a ti panangtubngar ket paset ti ministerio?
8 Tapno maikasaba iti sao, iti uneg man wenno ti ruar ti kongregasion, masapul a ti ministro pamiliar iti Sao ti Dios, nga isut’ maysa nga estudiante iti dayta. Masapul nga iwayaanna ti tiempo iti panagadal, panagpampanunot ken panangmennamenna, a biruken ti pannakatarusna a naimbag iti dayta. Ti panangaskasaba ket masapul a maibatay iti kinasanay kadagiti sursuro ti kinapudno. Kuna ni Pablo ken Timoteo a ti manangaywan masapul a “salimetmetanna a sititibker ti sao a napudno, isu a maiyanugot iti sursuro, tapno iti kasta mabalinna ti mamalbalakad babaen iti nadalus a sursuro ken tapno mauyotanna dagiti sumuppiat.” (Tito 1:9) Ti Sao ti Dios agserbi kas mangtubngar kadagidiay sumiasi iti linea kadagiti kalkalikaguman ni Jehova, a korihirenna dagiti nakabiddut agpaay iti mismo a pagimbaganda. Paset amin daytoy iti panangitungpal a naan-anay iti ministerio.
Kasapulan ti Pammagbaga
9. Apay a ti Nakristianuan a panangbagbaga ti kasapulan?
9 No maminsan kasapulan ti palagip kadagidiay di mangipapaay a naan-anay ti rebbengda nga aramiden wenno agkurangda ti panangapresiar ken regta iti panagdayaw ken Jehova. Ti Nakristianuan a pammagbaga apresiaren unay dagidiay addaan ayat ken Jehova. Maragsakanda a makangngeg no aniat’ kuna ni Jehova ken matmatanda dayta kas nabaknang a naespirituan a taraon. (Isaias 55:3; Hebreo 12:5, 6) Gapuna daytat’ naimbag a serbisio kadagiti katrabahuantayo—ken kasta met kadagiti tattao nga addaan panagannayas nga agdayaw ken Jehova—a bagbagaan ida babaen iti Sao ti Dios. Ni Pablo mismo nangted ti adu a pammagbaga.—Roma 15:30; 16:17; 1 Corinto 1:10, 11; 1 Timoteo 4:13; 6:11, 12; Hebreo 10:24.
10. Apay a ti mabayag a panagitured kasapulan maipapan iti panangted ti pammagbaga?
10 Ti dedikado a ministro masapul nga ammona met no kasanot’ panangsukay ti bunga ti espiritu ti Dios. Sapulen dayta ti adu nga anus ken panagibtur a mamagbaga kadagidiay saan nga agtignay a sisasagana iti dayta. Mabalin a ti dadduma ti mangipakita ti kinakurang ti panangipateg iti panagregget a mangted kadakuada ti pammagbaga ken pammaregta. Nupay kasta, masapul a maaramidan dayta, nangnangruna babaen kadagiti amin a Kristiano a panglakayen. Ti arte ti panangisuro ti masapul a maipakat. Iti ad-adda a panangusar ti maysa a tao ti Sao ni Jehova, ad-adda met a nalalaingto iti panangusarna iti dayta. Inton maam-ammo a naimbag ti mannursuro ti estudiantena, mabalinannanto ti mangiyallatiw ti impormasion iti daytoy. Inladawan a naimbag ni Pablo ti umiso a metodo idiay 1 Tesalonica 5:14: “Ngem ibalakadmi kadakayo, kakabsat, a bagbagaanyo koma dagiti naringgor, a pabilgenyo dagiti maupay ti nakemda, a patalgedanyo dagiti nakapuy, ket naanuskayo koma kadagiti isuamin.”
Umadayokayo kadagiti Apostata
11. Aniat’ aramidentayo kadagiti apostata?
11 Ni Pablo tinarigagayanna ni Timoteo a mataginayonna koma ti kinatimbengna, wenno masalimetmetanna ti pannakaawatna kadagiti isuamin a bambanag. Dina koma palpalubosan ti bagina nga agbalin kas kadagidiay di makaan-anus kadagiti nasalun-at a pannursuro, ket iyadayoda ti laplapayagda manipud kinapudno. Ti pudno a ministro ti Dios itatta ti saan koma nga agbalin a madanagan unay ken mariribukan iti trabahona no makitana a dagiti dadduma ket bumaw-ingda manipud Sao ti Dios ken kadagiti nasalun-at a pannursurona. Napakdaarantayo nga immuna nga addadanto dagiti agapostata ken tattao a kaykayatda a magagatel laeng ti laplapayagda. Dagiti balakad kas ti adda idiay 2 Juan 9-11; 1 Corinto 5:11-13 ken 2 Timoteo 3:5 dina pulos iwayaan ti pannakitimtimpuyog kadagidiay simiasi iti kinapudno. Ket ditayo met gatangen wenno basaen dagiti sursuratda. Nagadu dagiti dadduma nga agayat a dumngeg iti kinapudno, ket kadagitoy a maaddaantayo koma ti Nakristianuan a pannakitimpuyog.—1 Timoteo 6:20, 21.
12. Apay a masapul nga alaen ti Kristiano a ministro daytoy a natibker a takder?
12 Imbalakad ni Pablo: “Ngem dagiti tattao a dakes ken dagiti mangul-ulbod dumakesdanto la a dumakes, a mangallilawda ket maallilawda met laeng.” (2 Timoteo 3:13) Iti lawag dayta pakpakauna a pakdaar, ti Kristiano a ministro ket saan a makitimtimpuyog kadagiti kakasta. Ipangagna ti nasayaat a pammagbaga ti apostol: “Ngem sika, agtalinaedka kadagiti bambanag a sinursurom ken pinatalgedam, nga ammom no siasino ti nangadalam kadakuada ket nanipud idi kinaubingmo naammuam dagiti nasantuan a sursurat, a makabalina mamagsirib kenka a maipaay iti pannakaisalakan gapu iti pammati ken Kristo Jesus. Isuamin a Surat nga impaltiing ti Dios isu met ti naimbag a pakasursuruan, pakatinggaran, pakababalawan ken pakaadalan iti kinalinteg, tapno ti tao ti Dios naan-anay koma ket nasursuruan a naimbag iti isuamin nga aramid a nasayaat.” (2 Timoteo 3:14-17) Ti regular a panagadal iti Sao ti Dios ket maysa a bendision kadagidiay sapsapulenda a maitungpal ti ministerioda.
Dagiti Bendision Manipud Nakristianuan a Pannakitimpuyog
13. Apay a ti pannakipagtrabaho iti ministerio ken Pablo maysa a gunggona ken Timoteo ken kasanotayo met a magunggonaan?
13 Maysa a pudno a bendision ken Timoteo ti naaddaan ti adu a tawtawen a pannakilangenlangen ken Pablo, a napaliiwna no kasano ti panagtigtignay ti maysa a matalek, nataengan a ministro ti Dios. Inusar ni Pablo dagiti kapadasanna kas nasayaat a palagip ken Timoteo: “Ngem sika naammuam a naimbag ti sursuro, ti panagbiagko, ti panagemko, ti pammatik, ti nabayag a panagituredko, ti ayatko, ti anusko, dagiti pannakaidadanesko, dagiti sinagabak, dagiti bambanag a napasamak kaniak idiay Antioquia, idiay Iconio, idiay Listra, no aniada dagiti pannakaidadanes a linak-amko; ket kadakuada amin linuk-atannak ti Apo. Wen, ket isuamin dagiti mayat nga agbiag a nasantuan ken Kristo Jesus, aglak-amdanto ti pannakaidadanes.” (2 Timoteo 3:10-12) Nupay no saantayo a naiyasideg a direkta ken Pablo itatta, ti nawadwad a rekord dagiti ar-aramidna a masarakan idiay Biblia ti makatulong met kadatayo.
14. Apay a masapul a sisasaganatayo nga agsagaba ti kinadakes?
14 Nadakamat ni Pablo dagiti pannakaidadanes ken panagsagsagabana, ket ti pammagbagana iti Kristiano a ministro ket situtulokda koma nga agsagaba ti kinadakes. (2 Timoteo 4:5) Masansan a nesesita ti ilalasat iti maysa a kita ti pannakaidandanes iti panangitungpal a naan-anay iti ministeriotayo. Maysa a pribilehio a masalimetmetan ti kinatarnawtayo iti sidong dagiti suot ket maparagsak ti puso ni Jehova. (Proverbio 27:11) Maysa a pammaneknek ti ibunga dayta a pakaidayawan ni Jehova!
Ti Trabaho ti Manag-ebanghelio
15. Apay a ti panag-ebanghelio pakiramanan bayat ti intay panangitungpal a naan-anay ti ministeriotayo?
15 Ti panag-ebanghelio ti mangala ti kalalainganna a paset iti panawen ti maysa a matalek a Kristiano a ministro. Kuna ni Jesus: “Ket masapul a ti naimbag a damag maikaskasaba nga umuna kadagiti amin a nasion.” (Marcos 13:10) Pinagbalinna a nalawag a ti panungpalan dinto umay agingga a maikaskasaba a supisiente ti naimbag a damag. Naikkan pribilehio ni Pablo a mangiranud ti naimbag a damag kadagiti adu a manamati iti intero nga Imperio ti Roma. Nangibunga daytoy kadagiti baro a kongregasion a nabuangay ken ti pannakadutok dagiti manangaywan. Ket isuda met, nakipasetda a kadua dagiti Kristiano a kakabsatda a lallaki ken babbai iti trabaho a panag-ebanghelio ken pinasaknapda a naimbag ti trabaho a panangasaba. Kaaduan iti trabaho ti naaramidan kas panangilawlawag ni Pablo iti dayta, ‘a panangisuro iti publiko ken kadagiti balbalay.’ (Aramid 20:20) Addada naimbag a resulta idi, ket addada met dagiti ekselente a resulta itatta idi a ti Nakristianuan a panangaskasaba ti maar-aramidanen iti intero a lubong.—Juan 14:12.
16. Ania a pammaneknek ti mangipakita nga adu ti mangiyap-aplikar iti balakad ni Pablo iti 2 Timoteo 4:5?
16 Buyogen pammati, adu dagiti mangpetpetpeten kadagiti gundaway a mangpalawa kadagiti ar-aramidda iti trabaho a panag-ebanghelio. Rinibon dagiti simrek iti tay-ak ti kinamisionero, ken ginasgasut a ribo met dagiti makiramraman iti payunir a serbisio. Kadagiti 205 a dagdaga adda itan nasurok a 2,650,000 nga agserserbi kas dagiti manag-ebanghelio iti nasurok a 46,000 a kongregasion, ket ti bilangda ti umad-adu pay. Dagitoy nakaskasdaaw a bambanag ti pammaneknek a dagiti dedikado nga ad-adipen ni Jehova ipappapusoda iti nadiosan a bilin kadakuada ken “tungtungpalenda a naan-anay” ti ministerioda.
Panangitungpal iti Trabaho
17. Aniat’ tarigagayan ni Jehova a makita nga ar-aramiden dagiti adipenna maipapan iti trabaho a naituding kadakuada itatta?
17 Tinudingan ni Jehova dagiti napulotan iti maysa a ministerio, ket ti “dakkel a bunggoy” ti makipagtartrabaho iti sibayda. Babaen iti padto, idiay Ezequiel kapitulo 9, ti trabaho ti naiyarig iti panangmarka iti mugmuging dagidiay agsasaibbek ken agsangsangit. Ammotayo manipud iti dayta a padto a dumtengto ti tiempo inton ti lalaki nga addaan ti pagtinteruan ti mannurat ti mangikuna: “Inaramidko a kas imbilinmo kaniak.” Maay-ayo ni Jehova kadagiti ad-adipenna no aramidenda kas ti imbilinna kadakuada.—Ezequiel 9:4, 11; Genesis 6:22; 1 Corinto 4:2.
18, 19. Ania dagiti sumagmamano a pamay-an a panangiyaplikar itan ti pammagbaga ni Pablo idiay 2 Timoteo 4:1-5?
18 Bayat a sipsiputantayo dagiti kasasaad ti lubong a matungtungpalda a maitunos kadagiti padto maiyanatup kadagitoy maudi nga al-aldaw, ditay matngelan a di marikna ti kinaganat ti trabaho a panangasaba a naituding kadatayo. Biag dagiti nairaman. Ti panangurnong ti maar-aramiden ket ni Jehova pappapartakenna dayta iti tiempona. (Isaias 60:22) Gapuna, aniaman ti responsabilidadyo kas dedikado nga adipen ni Jehova, aramidenyo dayta a mangay-ayo a naan-anay kenkuana. (Colosas 1:10; 3:23, 24) Laglagipenyo koma ti trabaho a naited kadakayo nga aramiden ket padpadasenyo nga aramiden a naan-anay dayta. No adda tamtamingenyo nga annongenyo iti uneg ti Kingdom Hall, aramidenyo a naan-anay dayta. No natudingankayo kadagiti trabaho a kadua iti grupo ti Panagadal ti Libro ti Kongregasion, makipagtrabahokayo a sisisinged iti dayta ken mamagbaga ken mangparegta iti maysa ken maysa. No maysakayo a payunir wenno misionero, siguruenyo nga agtrabaho a naimbag tapno maragpatyo dagiti kalatyo iti serbisio.—Roma 12:6-9.
19 Mabalinyo met a saludsoden ti bagiyo, Adda kadi maaramidak pay nga ad-adda a mangtulong kadagiti dadduma a Kristiano, nangnangruna kadagiti kabbaro ti kongregasion, tapno mapabileg ida? No paset iti ministerioyo ti maysa a kinapanglakayen iti kongregasion, ammuenyo koma ti langa “ti arban” ket aywananyo a naimbag amin dagidiay naitimpuyog. Aluadanyo nga awan koma ti agbalin nga inaktibo wenno awan bungana maipapan iti umiso a pannakammo ni Apotayo a Jesu-Kristo. (2 Pedro 1:5-8) Kangrunaanna, agbalinkayo nga alerto iti ar-aramidenyo iti panag-ebanghelio tapno iti kasta “tungpalenyo a naan-anay ti ministerioyo.”
Malagipyo Aya?
◻ Aniat’ kasasaad idi ni Pablo idi insuratna ti Maikadua a Timoteo?
◻ Apay a nasken iti panangikasaba ti sao?
◻ Apay a nasken ti pammagbaga?
◻ Kasano a pakilangenan dagiti ulbod a mannursuro?
◻ Apay a ti panag-ebanghelio ti nakapatpateg itatta?
[Ladawan iti panid 16]
Ti maikadua a surat ni Pablo ken Timoteo ti nangtulong kenkuana a ‘nangitungpal a naan-anay ti ministerio’