Jehova—Nakaam-amak Ngem Naayat
“SIASINO ngarud ti panaigpadisanyo kaniak”? insaludsod ni Jehova a Dios. Uray pay ti katatan-okan a pagsasao ket nikaanoman dinanto pay mailadawan a naan-anay ti di maartapan a pannakabalin ken kinadayag ti Dios. Isu a mismo awisennatayo a mangusig iti langlangit, a kunkunana: “Itangadyo dagiti matayo idiay ngato ket kitaenyo. Asino ti namarsua kadagitoy? Isu Daydiay babaen iti panangbilang isu iruarna dagiti buybuyotda, isu inagananna ida amin. Gapu iti kinadakkel unay ti kinamaingelna, ken agsipud ta napigsa iti pannakabalin, awan ti agkurang uray no maysa.”—Isaias 40:25, 26.
Dagiti rinibribo a bitbituen a makitkita ti mata ket apagbassit laeng iti agangay 100 a bilion a bitbituen a mangbukel iti galaksitayo laeng! Kaskasdi binilang ken ninaganan ni Jehova amin a bitbituen iti intero nga uniberso! Usigenyo met, ti dadakkel nga enerhia a nasullatan iti amin iti daytoy a banag. Ti inittayo addaan iti makintengnga a temperatura a 27 milion degrees Fahrenheit (15 milion degrees Celsius). Anian a “dinamiko nga enerhia” ti adda ken Jehova a nangparsua kadagiti binilion kadagitoy a nuklear nga urnos!
Ti panangtarus a naan-anay ngarud ken Jehova iti adda labes iti limitado a kabaelantayo. Kuna ni Eliu: “Maipanggep iti Mannakabalin-amin, isu ditay masukimat; isu ti mangnibinibi iti pannakabalin . . . Dagiti tattao agbutengda ngarud kenkuana.” (Job 37:23, 24) Ni Jehova, nupay kasta, tarigagayanna ti ad-adda pay ngem basta panagamak wenno panagbuteng. “Ket sika ayatemto ni Jehova a Diosmo iti isuamin a pusom ken iti isuamin a kabaelam.” imbilin ti Biblia. (Deuteronomio 6:5) Ngem mabalintay kadi nga ayaten ti asinoman a ditay met naan-anay a naawatan? Wen, ta numan pay ti pagtaengan ni Jehova ket adda iti ngato kadagiti langlangit, isut’ makilangen a siaayat kadagiti imperpekto a tattao ket palubosanna a maadda ti uray sangkabassit laeng a pannakaawat kenkuana.—Idiligyo iti Salmo 113:5-9.
Dagiti “Matana,” “Lapayagna,” ken “Rupana”
Maysa a pamay-an a pangtulongan ni Jehova kadatayo a mangtarus kenkuana isut’ panangipalubos iti bagina a mailadawan kadagiti natauan a termino. Kuna ni apostol Pablo: “Dagiti mata ni Jehova sikikitada kadagiti nalinteg, ket dagiti pagdengngegna sititimudda kadagiti ar-ararawda; ngem ti rupa ni Jehova maibusor kadagidiay agaramid iti dakes.”—1 Pedro 3:12; idiligyo iti Exodo 15:6; Ezequiel 20:33; Lucas 11:20.
Siempre, dagitoy met ket metaphors, saanda a literal, a kas met laeng daydiay no dagiti Kasuratan awaganda ti Dios a “maysa nga init,” “maysa a kalasag,” wenno “ti Bato.” (Salmo 84:11; Deuteronomio 32:4, 31) ‘Ngem di met aya kuna ti Biblia a naaramidtayo a “kaladladawanna”?’ irason ti dadduma. (Genesis 1:26, 27) Wen, babaen ti panangikuna a ti Dios addaan iti literal a ngiwat, agong, ken dagiti lapayag mangpatanor kadagiti serioso a problema. Tinto aya panagdengngeg ti Dios a mannakabalin-amin, kas pangarigan, ket pudnonto a limitado babaen iti maawit dagiti allon ti aweng nga agturong kadagiti literal a lapayag? Saan, ta ipamatmat ti Biblia a ti Dios ket “mangngegna” uray pay dagiti awan timtimekna a balikas a maaramid iti natauan a puso. (Genesis 24:42-45) Wenno ti abilidadna a “makakita” ket agpannuray kadagiti allon ti lawag.—Salmo 139:1, 7-12; Hebreo 4:13.
Ti tao a perpekto ngarud ket isarmingna saan a dagiti pisikal a langlangana, no di ket dagiti kualidad ti Dios kas ti ayat ken kinahustisia. Nangnangruna a dagiti Kristiano ipampamatmatda dagita a kualidad bayat nga ipangpangagda ti pammalakad ni apostol Pablo a mangigunamgunam: “Ket ikawesyo ti baro a personalidad, isu a mapabpabaro iti umiso a pannakaammo a ‘umasping iti ladawan Daydiay namarsua kenkuana.”—Colosas 3:10.
Dagiti Sirmata ti Kinadayag
Idi immuna a tiempo, dadduma kadagiti ad-adipen ti Dios naaddaan ti pribilehio nga immawat iti napaltiingan a sirmata iti nailangitan a kinadayag. Ni Ezequiel ti maysa kadagitoy. (Ezequiel 1:1) Ti nakitana iti sirmata pulos a di mailadawan! Ni Ezequiel ti nagtungpal kadagiti metaphors ken similes, a masansan ibagbagana a ti nakitana ket kaasping dagiti gagangayen a namaterialan a bambanag. Kas pangarigan, kuna ti mammadto:
“Adda idi ti kaasping ti maysa a trono, a kasla kita ti bato a sapiro, ket iti rabaw daydi kaasping ti trono adda ti langa ti maysa a tao. Ket nakitak ti kasla bumarbara a metal, a kasla apuy ti unegna iti aglikmut manipud iti kaasping dagiti lomona nga agpangato; ken manipud kadagiti lomona nga agpababa, nakitak a kasla apuy, ket adda raniagna iti aglikmut kenkuana. A kas iti kita ti bullalayaw nga adda iti ulep iti aldaw ti panagtudo. Kasta idi ti kita ti raniag iti aglikmut. Daytoy idi ti kita ti kaasping ti dayag ni Jehova.”—Ezequiel 1:26-28.
Anian a kinadayag ti inladawan ni Ezequiel! Ni apostol Juan ti naaddaan met ti umas-asping a sirmata ken Jehova ket isut’ nagsurat: “Adtoy! ti maysa a trono a naisaad kadagiti langit, ket iti trono adda maysa a situtugaw. Ket daydi agtugtugaw, kasla umasping iti maysa a bato a jaspe ken maysa a bato a sardio, ket adda idi ti maysa a bullalayaw a nanglawlaw iti trono.” (Apocalipsis 4:1-3) Nupay nairepresentar ni Jehova iti kasta a kinadaeg, isut’ saan a nailadawan kas narungsot a Dios. Imbes ketdi, ti nakaisaadanna ti nakalma, natalna kas iti bullalayaw.—Idiligyo iti Genesis 9:12-16.
Ti banag nga impalubos ti Dios ti kasta a kasla limitado a panangmatmat iti nailangitan a kinadaeg ipamatmatna a dagiti panggepna nga agpaay iti sangatauan ket natalna. Nalawag, ngarud, dagidiay nga agayat iti Dios mabalinda ti sitatalek nga umadani kenkuana kas ti managparabur a “Managdengngeg ti kararag.”—Salmo 65:2.
Ti lalaki a ni Job kunana maipapan iti Dios: “Adtoy! Dagitoy isuda laeng dagiti paspaset a naruar dagiti daldalanna, ket anian a nagbassit a maysa a dayamudom a mangngegtayo kenkuana!” (Job 26:14) Ngarud, pudno, adu ti rebbeng a maadal maipapan ken Jehova a Dios, a nangparabur kadagiti ad-adipenna iti namnama nga agbiag nga awan inggana. (Juan 17:3) Ngem uray pay ti “panawen a di nakedngan” dinto pay umdas nga agpaay kadatayo a “matuntunan ti aramid nga inaramid ti Dios nanipud idi punganay agingga iti panungpalan.”—Eclesiastes 3:11.
Ti pagaammo wenno naadalen ti nasingpet-panagpuspusona a tao, nupay kasta, ti mangtignay kadakuada nga agayat ken agtulnog ken Jehova. (1 Juan 5:3) Maysakayo aya kadagiti kakasta nga indibidual? Ti panagtulnog iti Dios ket saan a kanayon a nalaka. Ngem no pudno nga immaykayon a mangammo ken Jehova a Dios ken kadagiti naayat a daldalanna, awan panagregget ti kasla dakkel unay. Ngarud, determinadokayo aya, a mangammo nga ad-adda pay iti daytoy nakaam-amak ngem naayat a Dios?
[Ladawan iti panid 6]
Dagiti lallaki kas kada Ezequiel ken Juan naaddaanda ti sirmata a mangted kadatayo iti idea iti nakaam-amak a kinadayag ni Jehova
[Ladawan iti panid 7]
Ti panangparsua ken panangnagan ti Dios kadagiti bitbituen itdenna kadatayo ti sumagmamano nga idea iti awan-inggana a pannakabalinna