Dagiti Saludsod Manipud Kadagiti Managbasa

◼ Naikeddeng kadi nga antimano a matay da Adan ken Eva, yantangay kuna ti Hebreo 9:27 a “naituding kadagiti tattao a matayda iti maminpinsan a maipaay ti agnanayonen, ket inton malpas daytoy ti pannakaukom”?

Saan, daytoy a sao ket saan a maipapan kada Adan ken Eva, a naparsua nga addaan panangnamnama iti awan inggana a biag ditoy daga. No koma nagtulnogda iti Dios, nagbiagda koma iti agnanayon. Imbes a naikeddeng nga antimano ti ipapatayda, daytat’ resulta ti sipapakinakem a panagbasolda. (Genesis 2:15-17) Ipakita ti konteksto a ti kangrunaan a pannakaiyaplikar ti Hebreo 9:27 ket iti nangatao a padi iti kadaanan nga Israel, nga iti Aldaw ti Panangabbong inladawanna ni Jesu-Kristo.​—Hebreo 4:14, 15.

Idi 1915 ni Charles T. Russell, nga isut’ presidente idi ti Watch Tower Society, ti napagsaludsodan maipapan iti Hebreo 9:27. Tinukoyna ti naipablaak a nasapsapa, kas ti adda idiay Studies in the Scriptures ken Tabernacle Shadows of the Better Sacrifices (1899). Ti Hebreo 9:27 nailawlawag sigun iti konteksto.

Idiay Hebreo kapitulo 8 ken 9, impakita ni Pablo nga adu kadagiti detalye ti Mosaiko a Linteg nga “agserbi a kasla pakakitaan ken anniniwan dagiti bambanag a nailangitan.” (Hebreo 8:5) Pudno daytoy nangnangruna maipapan kadagiti pamusposan ti panagdaton iti tinawen nga Aldaw ti Panangabbong. Iti dayta naisangsangayan laeng nga aldaw a mabalin ti nangato a padi a sumrek iti kaungan a paset ti tabernakulo. Daytoy a siled, ti Kasasantuan Unay, ti naserraan babaen ti maysa a kurtina, ket ti nangato a padi masapul nga isaganana ti dalanna babaen ti panangiserrek iti naisangsangayan nga insenso. Kalpasanna mabalinna ti sumrek a kadua ti maidaton a dara ti toro ken ti kalding. Ngem uray pay no siaannad a sinurot ti padi amin dagiti apagpag-isu a pagalagadan, ti ibungana a pannakaabbong ti basbasol dagiti Israelita ket limitado iti panawen; dagiti datdaton masapul a maidatonda iti tinawen.

Iti panangitultuloyna ti argumentona, kuna ni Pablo a “ni Kristo immay kas nangato a padi,” ngem kalpasan ti ipapatay ken panagungarna, isu saan a “simrek, iti maysa a nasantuan a disso nga inaramid ti ima, . . . no di ket idiay langit met laeng, tapno agparang ita iti sanguanan ti Dios gapu kadatayo.” (Hebreo 9:11, 12, 24) Kasapulan kadi a maulit dayta a daton? Saan. Ni Kristo “naiparangarang a naminsan a maipaay iti agnanayonen.” (Hebreo 9:25, 26; Roma 6:9) Kalpasanna kinuna ni Pablo: “Ket gapu ta naituding kadagiti tattao a matayda iti maminpinsan, ket inton malpas daytoy ti pannakaukom, kasta met ni Kristo idinto a naidaton iti naminsan tapno awitenna dagiti basbasol dagiti adu.”​—Hebreo 9:27, 28.

Babaen iti daytoy a panangrepaso ti konteksto maapresiartay dagiti komento iti Hebreo 9:27 idiay Tabernacle Shadows: “Tunggal sumrek ti Padi idiay Kasasantuan Unay iti Aldaw ti Panangabbong irisrisgona ti biagna; ta no koma ti datonna ket imperpekto isut’ matay bayat ti ilalasatna iti maikadua nga abbong [ti kurtina]. Isu komat’ saan a maawat nga umuneg iti Kasasantuan Unay a mismo iti santuario, wenno maakseptar met dagiti imperpekto a datdatonna kas pangabbong iti basbasol dagiti tattao. Gapuna aniaman a panagbiddut kaipapananna ti ipapatayna ken ti pannakailunod amin dagidiay ti basbasolda pinadpadasna nga abbongan koma. Isu daytoy ti pannakaukom a nadakamat iti daytoy a teksto, nga isut’ tinawen a linasat dagiti makailadawan a papadi.”

Kalpasanna pinaggiddiat dayta ti Tabernacle Shadows ken Kristo Jesus, a natay iti ipapatay kas daton: “No koma iti datonna iti aniaman a langa wenno kasasaad ket imperpekto isu komat’ saan a napagungar manipud ken patay, ti ‘pannakaukom’ ti hustisia ti naipaay koma a maibusor kenkuana. Ngem ti panagungarna, iti maikatlo nga aldaw, ti nangpaneknek a ti aramidna ket naaramid a naan-anay, a naitakderan dayta ti suot iti nasantuan a pannakaukom.”

Gapuna, no matmatan sigun iti konteksto, ti Hebreo 9:27 ket maysa a kapaliiwan iti kinatan-ok ti kinapadi a serbisio ni Kristo.

Posible met, nupay kasta, a tukoyen ti Hebreo 9:27 iti panangaramid iti pangkaaduan a panangiyebkas iti kapadasan ti sangatauan. Numan pay addaan posibilidad ti biag nga awan inggana da Adan ken Eva, saan a pudno dayta kadagiti kaputotanda. Naaddaan da Adan ken Eva ti annak kalpasan laeng a nagbasolda. Gapuna, amin dagiti imperpekto a kaputotanda a naiyanak matmatayda. (Roma 5:12; 6:23) Ngarud, ti natawid a basol, immay iti sangatauan a namnaminsan laeng. Pudno met dayta iti masanguanan. No, kalpasan iti pannakaiyaplikar dagiti gunggona ti daton ni Kristo nga agpaay iti sangatauan, ket no bayat ti aldaw ti panangukom ti Dios iti sangaribo a tawen, ti tao a napagungar ket mapaneknekan a maikari iti agnanayon a pannakadadael, ti ipapatayna ti bunganto ti bukodna a kinadakes, saan a manipud iti basol a natawid ken Adan.​—Apocalipsis 20:13-15.

Maisupadi iti dayta, dagidiay immuna a natay manipud iti natawid a basol, ngem kalpasan ti panagungar paneknekanda a matalekda, umawatdanto iti makaay-ayo a pannakaukom iti biag nga agnanayon.​—Apocalipsis 21:3-6.

Gapuna, ti Hebreo 9:27 tuktukoyenna idiay konteksto ti serbisio ni Jesus kas nangato a padi a maigiddiat kadagiti nangato a papadi iti Israel. Nausar met dayta a mangiladawan iti pangkaaduan a kapadasan dagiti tattao a nakatawid iti ipapatay ni Adan. Ngem saanna a suportaran ti di nainkasuratan a panangmatmat a pannakaikeddengen ti gasat a sakbay a naparsua da Adan ken Eva naikeddengen a matayda.