Ti Biag ken Ministerio ni Jesus

Naitantan-ok Sakbay Pannakaipasngayna

KAIBAGBAGA pay laeng ni anghel Gabriel iti balasang a ni Maria nga isuntot’ agpasngay iti maysa a lalaki nga ubing nga isuntot’ agbalin nga ari iti agnanayon. Ngem insaludsod ni Maria, ‘Kasanonto daytoy, ta siak awan am-ammok a lalaki?’

‘Ti nasantuan nga espiritu ti Dios umayto kenka,’ inlawlawag ni Gabriel, ‘ket gapu itoy ti ubing managananto Anak ti Dios.’ Tapno matulongan ni Maria, intuloy ni Gabriel: ‘Ni Elizabeth a kabagiam, a kuna dagiti tattao a di maaddaanen ti annak, ket innem a bulan a masikog itan.’ Namati ni Maria ken Gabriel ket kunana: ‘Maaramid koma kaniak a kas ti saom.’

Di nagbayag kalpasan a pimmanawen ni Gabriel, nagsagana ni Maria a simmarungkar ken Elizabeth a nakipagtaeng a kadua ni Zacarias a lakayna kadagiti kabambantayan a paset ti Judea. Manipud pagtaengan ni Maria idiay Nasaret, maysa a nawatiwat a panagdaliasat daytoy a nalabit tallo wenno uppat nga aldaw.

Idi nakagteng met laengen ni Maria iti balay ni Zacarias, simrek ket nangkablaaw. Iti dayta napunno ni Elizabeth ti nasantuan nga espiritu, ket kunana ken Maria: ‘Nainggasatanka kadagiti babbai, ket nagasat ti ubing a maadanto kenka. Anian a pribilehio a ti ina ti Apok isut’ umay kaniak! Ta, adtoy! apaman a nangngegko ti kablaawmo, limmagto ti ubing iti tianko nga addaan dakkel a panagragsak.’

Maragsakan unay, kuna ni Maria: ‘Manipud ita amin dagiti tattao naganendakto a naragsak, gapu kadagiti dadakkel a bambanag nga inaramid ti Dios nga agpaay kaniak.’ Nakipagtaeng ni Maria ken Elizabeth iti agarup tallo a bulan, ket awan duadua a ni Maria ti nagbalin a tulongna bayat kadagitoy maudi a lawlawas a panagsikog ni Elizabeth. Anian a pudno a nagsayaatan a dagiti dua a matalek a babbai, nga agpadpada nga aw-awitenda ti maysa nga ubing babaen tulong ti Dios, ket makapagkaduada kadagitoy nabendituan a panawen ti panagbiagda!

Nadlawyo kadi ti dayaw a naipaay ken Jesus uray pay sakbay pay pannakaipasngayna? Isut’ inawagan ni Elizabeth kas “Apok,” ket ti di pay naipasngay nga anakna ti limmagto iti ragsak idi umuna nga agparang ni Maria. Iti kasumbangirna, dadduma trinatoda ni Maria ken ti maipasngayto pay nga anakna a buyogen ti bassit a panagraem, kas makitatayto. Iti sumaganad nga artikulotayo, nupay kasta, maadaltayo ti ad-adu pay maipapan ti anak ni Elizabeth, ni Juan. Lucas 1:26-56.

◆ Aniat’ kuna ni Gabriel a nakatulong ken Maria a nangtarus no kasanot’ panagbalinna a masikog?

◆ Kasano a napadayawan ni Jesu-Krsito sakbay pay ti pannakaipasngayna?

◆ Kasano kabayag ti pannakipagtaeng ni Maria ken ni Elizabeth ket apay a maiyanatup nga agtaeng ni Maria a kadua ni Elizabeth bayat dayta a tiempo?