Report dagiti Manangiwaragawag ti Pagarian
Panangaskasaba idiay Eskuelaan
“AGAWAAM a sireregta ti agparang iti sanguanan ti Dios a kas mangmangged a naanamongan nga awan ti ibainna, nga aramatem iti umiso ti sao ti kinapudno,” insurat ni apostol Pablo ken agtutubo a Timoteo. (2 Timoteo 2:15) Adu nga annak dagiti Saksi ni Jehova ti naaddaan gundaway a nangted pammaneknek maipapan ti naimbag a damag ti Pagarian ti Dios idiay eskuelaan. Saanda a mabain a mangar-aramid iti dayta ket isuda ti apresiaren dagiti adu kadagiti dadduma nga estudiante.
◻ Maysa a pangarigan iti daytoy ti naggapu idiay Martinique. Maysa nga agtutubo a babai a pagaammo idiay eskuelaan a kas maysa kadagiti Saksi ni Jehova ti masansan mapagsalsaludsodan maipapan iti kapanunotanna kadagiti narelihiusuan a tema babaen iti mannursurona. Isu ti naaddaan iti sumagmamano a pannakipatpatangen iti daytoy a mannursuro, ket ti mannursuro ti nangawat ti sumagmamano kadagiti pagbasaan ti Watch Tower.
Maysa nga aldaw rimsua ti diskusion idiay klase maipapan iti aglablabesen a pupolasion ditoy daga. Iti panangsalaysayda no kasano a mapasardeng ti pannakapunno unayen ti daga, dagiti panangtiped ti sikog ken ti aborsion nadakamat. Dadduma kadagiti estudiante anamonganda ti aborsion ket dadduma suppiatenda daytoy. Sinaludsodan ti mannursuro ti agtutubo a kabsat a babai maipaay iti kapanunotanna. Kinunana nga isut’ maragsakan a mangipaayto iti naan-anay a panangilawlawag iti sumaganad nga aldaw. Iti dayta a rabii isut’ nagsagana, ket iti sumaganad nga aldaw intugotna idiay eskuelaan ti sumagmamano a magasin nga Agriingkayo! a mangsalaysay manipud Kasuratan iti tema ti aborsion. Kalpasan panangbasana iti material, nagsaludsodanna ti intero a klase, ket iti panungpalan ti diskusion “amin nga adda iti klase inyebkasda dagiti bagbagida a maibusor iti aborsion,” kunana. Dadduma kadagiti estudiante nagsuskribirda iti magasin nga Agriingkayo!
◻ Maysa pay a kapadasan ti naggapu idiay Sweden a sadiay dagiti kakabsat a lallaki masansan maaw-awisda a mangted kadagiti palawag kadagiti eskuelaan. Maysa nga espesial-payunir a ministro dagiti Saksi ni Jehova ti naawis a mangted ti sumagmamano a palawag iti maysa a klase. Kuna ti mannursuro: “Naaddaankamin kadagiti dadduma a pastor ditoy, ngem umayda laeng agtokar iti guitara ken ibaga kadagiti estudiante nga agsingsingpetda. Nasayaat dayta,” kuna ti mannursuro, “ngem kayatko met a makaadal koma dagiti estudiante.” Kalpasanna nagaramid ti urnos a ti Saksi umay ken mangidaulo ti regular a panagadal ti Biblia iti klasena.
Dagiti estudiante iti pagadalanda, agraman dagiti tattao iti sadinoman a lugar ti lubong itatta, aduanda ti salsaludsod maipapan kadagiti kasasaad ti lubong wenno ti pamilia ken dagiti parikut ti kagimongan a kayatda a masungbatan. Anian a pribilehio a maipaay kadagiti Saksi ni Jehova nga ages-eskuela pay laeng nga iyaplikarda dagiti bagbagida a siaanep iti personal a panagadal ken pannakigimong iti kongregasion, tapno maaddaandat’ pannakaawat iti Biblia ket matulonganda dagiti kakasta a makaammo kadagiti sungbat ti Biblia! Ti proverbio ti Biblia ti mangbalakad: “Dika medmedan ti imbag kadagiti karbenganna, no adda ita imam ti pannakabalin a mangaramid.”—Proverbio 3:27.