Ti Biag ken Ministerio ni Jesus

Ti Pannakaiyanak ni Jesus​—Sadino ken Kaano?

GAPU ta ti panawen umasidegen a maipaay iti panagpasngay ni Maria, apay a ni Jose ti mapan pay laeng agdaliasat iti adayo? Bueno, ti imperador ti Imperio a Romano, ni Caesar Augustus, ti nangaramid ti linteg a tunggal maysa masapul nga agsublida iti ili a nakaiyanakanda tapno agparehistro. Gapuna ni Jose ti mapan idiay nakayanakanna, ti siudad ti Bethlehem.

Adu a tattao idiay Bethlehem ti napan nagparehistro, ket ti kakaisuna a lugar a masarakan ni Jose ken ni Maria a pagyanan ket idiay maysa a kuadra. Ditoy, a pakaiyap-apunan dagiti asno ken dadduma nga animal, ti nakaiyanakan ni Jesus. Ni Maria ti nangbungon kenkuana kadagiti lampin ket impaiddana iti maysa a kulluong, daydiay pakaikabkabilan ti taraon nga agpaay kadagiti an-animal.

Pudno unay a babaen ti panangiturong ti Dios nga inaramid ni Caesar Augustus ti lintegna iti panagparehistro. Pinagbalinna a posible ti pannakaiyanak ni Jesus idiay Bethlehem, ti siudad a nabayagen nga impadto dagiti Kasuratan a pakaiyanakan ti naikari nga agturay.

Anian a nagpateg a rabii daydi! Idiay tay-ak maysa a naglawag a silaw ti nagparang kadagiti papastor. Daytat’ dayag ni Jehova! Ket kuna ti anghel ni Jehova kadakuada: ‘Ita nga aldaw naiyanak kadakayo idiay Bethlehem ti maysa a Manangisalakan, isu ni Kristo nga Apo. Isut’ masarakanyo a nakaidda iti maysa a kulluong.’ Apaman latta ta adu pay nga anghel ti nagparang ket nagkanta: “Dayaw iti Dios idiay kangatuan, ken talna iti rabaw ti daga kadagiti tattao a naimbag ti nakemda.”

Idi pimmanawen dagiti anghel, kuna dagiti papastor iti maysa ken maysa: ‘Intayo ngarud idiay Bethlehem ket kitaentay daytoy a naaramid nga impakaammo kadatayo ni Jehova.’ Napanda a sidadaras ket nakitada ni Jesus idiay kuna dagiti anghel nga ayanna. Idi imbaga dagiti pastor ti kinuna dagiti anghel kadakuada, amin dagiti nakangngeg iti dayta ti nagsiddaaw. Ngem ni Maria sinalimetmetanna amin dagitoy a bambanag a pinampanunot iti pusona.

Adu kadagiti tattao itatta ti mamati a ni Jesus naiyanak iti Disiembre 25. Ngem ti Disiembre ket maysa a natutudo, nalamiis a panawen idiay Bethlehem. Dagiti papastor saanda a mabalin ti adda idiay tay-ak iti agpatnag a kadua dagiti arbanda iti daydiay a tiempo iti tawen. Kasta met, ti Romano a Caesar saanna a kalikaguman dagiti tattao nga adda pagannayasandan nga umalsa a maibusor kenkuana nga agbiaheda iti kalam-ekan a paset ti panawen tapno agparehistro. Kaawatan ni Jesus naiyanak mabalin nga iti nasapa a paset ti otonio iti tawen. Lucas 2:1-20; Mikias 5:2.

◆ Apay a nagbiahe ni Jose ken ni Maria a napan idiay Bethlehem?

◆ Ania a nakaskasdaaw a banag ti napasamak iti rabii a pannakaiyanak ni Jesus?

◆ Kasanotay nga ammo a ni Jesus di naiyanak iti Disiembre 25?

[Ladawan iti panid 9]