Ti Britania, ti Dara, ken ti AIDS

APAG-ISU a dua a tawenen ti napalabas, Ti Pagwanawanan impablaakna ti artikulo a “Tulongannatayo dagiti Pagalagadan ni Jehova.” (Salmo 20:4) Nangted ti maysa nga ulidan iti tulong a magun-odan manipud iti natalged ken sigurado a pagalagadan ti Dios, ti proteksion a dumteng kadagiti Kristiano a mangtungpal ti lintegna a maibusor iti pannangan iti dara. Iti dayta a tiempo idiay Estados Unidos mangrugrugi pay laeng a maisentro ti atension iti maysa a kabbaro a pagam-amkan iti salun-at​—ti AIDS. Addada suspetsa a daytoy a makapapatay a nakaad-adu a sintomas mabalin a maisaknap babaen iti panangyalison iti dara. Nupay kasta, dagiti managbasa idiay Europa ken iti dadduma pay a lugar mabalin a mariknada a daytoy a pagam-amkan iti pananglabsing ti linteg ti Dios ket agpatingga laeng kadagiti dadduma nga adayo a luglugar. Kas panangpabaro iti daytoy a pasamak dua a tawen laeng kalpasanna, usigenyo daytoy nabiit pay nga impormasion manipud Gran Britania.

“TI KABSATKO a babai kasapulanna ti operasion ngem maamak iti pannakaakarna iti AIDS. Saankami a Saksi ni Jehova, ngem mabalin kadi a makaipaaykayo iti tulong babaen iti panangirekomendaryo iti maysa a siruhano a mabalin a mangopera nga awan ti usarenna a dara?” Dayta ket maysa laeng kadagiti naimpusuan a dawat a naawat di pay nabayag dagiti Saksi ni Jehova idiay hedkuartersda idiay Londres, Inglatera. Ania ti adda iti likudan dagitoy a dawat?

Nanipud iti panangrugina, ti British Blood Transfusion Service nagpannakkelnan ti suplayna a dara manipud kadagiti boluntario a nagidonar. “Maysa a panaginana kalpasan ti donasion [a maysa a yunit a dara], maysa nga inumen ken biskuits, ket kalpasanna agsublin iti trabaho. Apay a dikay padasen?” iparegta ti mangipakaammo a polieto. Kas banagna, dua a milion a boluntario a donasion ti maaramid iti tinawen babaen iti 3 porsiento iti populasion.

“Ti dara a nakolekta manipud kadagiti saan a mabaybayadan a boluntario, kas ti adda idiay Britania, ti ad-adda a nasaysayaat ngem dagiti makolekta manipud kadagiti mabayadan a tattao iti dayta,” kuna ti The Guardian. Iti sabali a pannao, nabayagen a ti panangmatmat a ta ti Britania liniklikannan ti peggad iti impeksion manipud iti dara a ginatang manipud kadagiti alkoholiko wenno dadduma pay nga awanen ti mabalinda nga ilako. Ngem dagiti nabiit pay a paspasamak ipalgakna ti nakaro a biddut iti daytoy a ladawan, a nagbanag iti di napakpakadaan a pannakapukaw iti panagtalek ti publiko. Sumaganad iti ipapatay ti dua a haemophiliacs, maysa a pannakangiwat iti Haemophiliac Society ti nagkuna a ‘dagiti suplay a dara iti [National Health Service] saandan a maibilang a natalged.’ Ania ti napasamak?

Nupay no naammuanen bayat dagiti adun a tawtawen nga imposible ti panangsagat iti dara kadagiti amin a sakit ket dagiti serioso nga impeksion kas iti hepatitis wenno malaria, ti mabalin a maiyakar babaen iti panangyalison, dagiti kakasta a peggad saanda a nasaknap a naipablaak idiay Britania. Ti konklusion ket kanayon a ti naidonar a dara awan ipaayna a peggad. Ngem dua a makapakigtot a bambanag ti nagtipon, a namagbalin iti The Daily Telegraph nga agkonklusion: “Ti Britania napukawnan ti pannakidangadangna a manglapped iti virus ti Aids a mangrugrugit iti suplay iti dara.”

Ti umuna a pannakakigtot dimteng idi a dagiti padamag iti pagiwarnak ipalgakda a bayat dagiti adun a tawtawen kinapudnona ti Britania ti gumatgatang iti dara manipud ganggannaet a daga. “Ti dara ti magatgatang manipud kadagiti tattao kadagiti napapanglaw a pagpagilian a sadiay adda ti nangato nga irarang-ay dagiti saksakit a maiyakar babaen iti dara,” impudno ti maysa a pannakabagi ti union iti maysa a laboratorio dagiti produkto iti dara. Kasta met, agarup 70 milion a yunit iti napalet a Factor VIII ti magatang manipud Estados Unidos ket nausarda a mangagas kadagiti Briton a haemophiliacs. Tunggal grupo dagiti Factor VIII ti naaramid manipud plasma a naurnong manipud kadagiti 2,500 a nagidonar iti dara. Kasla babaen iti pananggatang iti daytoy a produkto iti dara a ti virus ti AIDS maiyakar iti suplay a Briton.

Ti kanayonan pay a pannakakigtot dimteng idi a napaneknekan a ti AIDS inapektarannan ti sistema manipud kadagiti agidonar a homoseksual iti uneg met laeng ti Islas Britanicas. Nupay no dagiti homoseksual mairamanda kadagidiay a mapagkedkedan nga agidonar iti dara gapu iti dakkel a peggad iti pannakagun-od iti AIDS, ti pakdaar saan a naibaga kadagiti nabileg a sasao a masapul koma a maaramid, inamin ti Departamento iti Salun-at. Ti pakdaar iti polietoda maipapan iti AIDS tinukoyna laeng dagiti “Homoseksual a lallaki nga addaan kadagiti adu a nagduduma a pareha.” Ti agdama a sobra a pannakaiyimprenta ti polieto nga A.I.D.S. and how it concerns blood donors espisipiko nga ibagana a “Dagiti aktibo a lallaki a homoseksual ken biseksual” ti “nangnangruna a maakaran” iti AIDS. Ngem ti pakdaar naladaw nga immay. Idi mangrugi ti 1985 nasurok a 40 nga indibidual, agraman ti maysa a kappasngay, ti naimpektaran. Kasta met, adda ti makariribuk a kinapudno a ti virus ti AIDS agparangto laeng kalpasan ti dua a tawen. Gapuna manonto pay ti maimpektaran? Adda ti “elemento ti naorasan a bomba,” kuna ti The Sunday Times. Ngarud, ti National Blood Transfusion Service nabiit pay a nangisagana ti maysa a kanayonan a polieto para kadagiti amin a mabalin a mangidonar iti dara idiay Britania, ti Some Reasons Why You Should Not Give Blood.

Addada agarup 50 nga ipapatay manipud AIDS idiay Britania, manipud iti nasurok a 100 a naipadamag a kaskaso. Ti bilang dagiti tattao nga agsagsagaba manipud iti sakit ket agdama a madobdoble iti tunggal walo a bulan. Maysa a medikal a koresponsal iti The Sunday Times pattapattaenna a mabalin nga adda nasurok a 12,000 a kaso iti uneg ti lima a tawtawen. Ti ad-adda pay a makapakigtot a pattapatta manipud iti United Kingdom’s Royal College of Nursing a ta maysa a milion a tattao idiay Islas Britanicas ti mabalin a maapektaran inton tawen 1991 no awan ti tignay a maala tapno manglapped ti panagsaknap iti AIDS.

Ti nagsaludsod a nadakamat iti ngato kunana: “Kasla maawatak a dakayo a Saksi ni Jehova ti mapampaneknekan nga umiso iti daytoy a banag maipapan iti panangyalison iti dara.” Ti ad-adda pay nga umiso, siempre, ni Jehova a Dios babaen iti Saona, ti Biblia, ti maitantan-ok. Adu a siglon ti napalabas imbilinna kadagiti Kristiano a ‘umadayoda iti dara.’ (Aramid 15:29; 21:25) Ti balakadna ken pagalagadanna ti pudno a napaneknekan a maysa a proteksion a maipaay iti ilina ket agtultuloyto a kasta.

[Kahon iti panid 30]

Ania ti AIDS?

Ti AIDS ket maysa nga acronym wenno sao a naporma manipud iti umuna a letra dagiti sasao nga Acquired Deficiency Syndrome. Ti AIDS a mismo saan a makapapatay. Ngem ti nagan ipamatmatna, a ti biktima ti mabaybay-an nga addaan ti nadadael a sistema iti pananglapped iti sakit. Gaput’ kinaawan daytoy a pannalaknib, ti tao nga addaan ti sakit ti gagangay a matay manipud iti impeksion, kas iti naisangsangayan a kita iti pneumonia wenno ti mammano a porma iti kanser iti kudil, Kaposi’s sarcoma. Ti panagsirarak ti pannakadlaw ken pannakaresita daytoy ti adda pay laeng iti nasapa a tukad, ket awan pay, ti naammuan nga agas a maipaay iti AIDS.