Mangisuro nga Addaan Kinasigo ken Kinaregta

“Inkayo ngarud ket pagbalinenyo nga ad-adalan dagiti amin a nasion, . . . nga isursuroyo kadakuada nga aywananda dagiti isuamin a banag nga imbilinko kadakayo.”​—MATEO 28:19, 20.

1. Aniat’ iparparegta ti Proverbio 22:29, ken kasano a kasta?

TI SAO NI JEHOVA iparparegtana ti kinasigo ken kinagaget. Kas pangarigan, kuna dayta: “Makita ti maysa a tao a sireregta iti pagsapulanna? Agtakderto iti saklang dagiti ar-ari; dinto agtakder iti saklang dagiti nanumo a tattao.” (Proverbio 22:29) Siempre, awan ti aniaman a makaipababa maipapan iti panagtrabaho iti saklang dagiti “nanumo a tattao.” Ngem ti nagsayaat a trabaho ti maysa a nasigo a trabahador ket dinto agtalinaed a sekreto. Ta, dagiti damag ti kinasigona ti makadanon iti lapayag ti maysa nga ari, a mabalin isuntot’ mangbirok wenno mangsapul kadagiti serbisiona!

2. (a) Tapno mapatanor ti kinasigo iti aniaman a propesion, aniat’ kasapulan? (b) Apay a ti kinaepektibo ti maysa a ministro a Kristiano kas mannursuro ti nagpateg unay?

² Ti pannakaammo ken kinasigo ti kasapulan iti aniaman a propesion. Ti maysa a tao mabalin nga agadal iti karpenteria ket mabalin a makasursuro met iti adu babaen iti panagpaliiwna kadagiti nasigo iti dayta a trabaho. Ngem tapno makapatanor a mismo iti kinasigo, masapul nga ipakatna met ti nagun-odanna a pannakaammo iti dayta a trabaho. Ti maysa a siruhano kasapulan a masursuruan. Ngem tapno agbalin a nalaing, masapul nga ipakatna ti pannakaammona idiay siled ti operasion. Ket iti dayta a propesion nasken, ti kinasigo ta ti pannakabaelna ti masansan mangaramid iti pagdumaan ti panagbiag wenno ipapatay para iti pasiente. Kaskasdi, ti adayo a dakdakkel kinapategna isu ti kinalaing kas maysa a ministro. Apay? Agsipud ta ti kinaepektibo ti maysa a ministro kas mannursuro, ti makaapektar iti wagas nga isusungbat wenno panangabrasa dagiti tattao iti naimbag a damag. Kasta met, ti panangabrasada ti mangaramid iti pagdumaan iti pannakaadda kadakuada ti biag nga agnanayon ken ti agnanayon nga ipapatay.​—Deuteronomio 30:19, 20; Juan 17:3.

3. Ti panagaramid kadagiti ad-adalan kasapulanna ti ania?

³ Ti bilin nga inted ni Jesu-Kristo kadagiti pasurotna ramanenna ti panangisuro. Kunana: “Inkayo ngarud ket pagbalinenyo nga ad-adalan dagiti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isursuroyo kadakuada nga aywananda ti isuamin a banag nga imbilinko kadakayo. Ket, adtoy! addaak kadakayo nga agnanayon agingga iti panungpalan ti sistema dagiti bambanag.” (Mateo 28:19, 20) Siempre, ti kinasigo ti kasapulan iti panangisuro kadagiti nasingpet-panagpuspusona kadagiti amin a bambanag nga imbilin ni Jesus.

4. (a) Ti nalaing a panangisuro rebbeng a maaramid a buyogen iti ania a kababalin? (b) Kasano a nagunggonaan ni Apolos iti pannakikuykuyogna kada Aquila ken Priscilla?

⁴ Ti kasta a nalaing a panangisuro ti rebbeng a maaramid a buyogen ti kinaregta. Wen, rebbengna a dagiti Kristiano ti “naregta kadagiti naimbag nga ar-aramid,” ket siempre dagitoy ramanenna ti panangiyallatiw iti naespirituan a pannursuro iti ministerio kadagiti kongregasion. (Tito 2:14) Kas nasisigo a mannursuro, da Aquila ken Priscilla “innalada ni [Apolos] a kaduada [idiay Efeso] ket impalawagda kenkuana a naan-anay pay ti dalan ti Dios.” Daytoy ti nakagunggona iti dakkel unay ken Apolos, ta iti kamaudiananna idiay Acaya “iti publiko sibibileg a pinaneknekanna a nagbiddut dagidi Judio, nga impakitana gapu kadagiti Kasuratan a ni Jesus isu daydi Kristo.” (Aramid 18:24-28) Nalawag, ni Apolos ti nangisuro agpadpada nga addaan iti kinasigo ken kinaregta.

‘Salwadanyo ti Sursuroyo’

5. Sigun iti 1 Timoteo 4:16, apay a rebbeng a mangisurotayo a silalaing ken sireregta?

⁵ Imbaga ni apostol Pablo ken Kristiano a katulonganna a ni Timoteo: “Salwadam ti bagim ken ti sursurom. Agtalinaedka kadagitoy a banag, ta no aramidem daytoy isalakanmonto ti bagim met laeng ken dagiti met dumngeg kenka.” (1 Timoteo 4:16) Yantangay ti pannakaisalakan agpadpada ti mannursuro ken ti estudiante ti adda a nakataya, nalawag unay a ti kasta a pannursuro ti rebbeng a maiyallatiw a silalaing ken sireregta.

6. Kasanot’ panagbalinyo a nalaing a mangtaming kadagiti Kasuratan, ket ania a maiyanatup a salsaludsod ti mabalin nga usigenyo?

⁶ Dagiti karpentero ken siruhano ti nalawag a masapul a salwadanda ti bagbagida. Masapul a kabaelanda nga usaren dagiti remienta wenno instrumentoda a silalaing. Kasta met koma ti Kristiano a ministro, a ti kangrunaan nga alikamenna isu ‘ti kampilan iti espiritu, ti sao ti Dios.’ (Efeso 6:17) Kasanot’ panagbalinyo a nalaing a mangusar iti Kasuratan? Babaen iti regular a panagadal ken panangusar, siempre. Gapuna, nabasayo kadin ti Biblia manipud pangrugianna aginggat’ ungtona, nga inwayaanyo met ti panawen a mangmennamenna kadagiti nakasaysayaat a balakadna? Basbasaenyo aya dayta iti inaldaw? Us-usarenyo aya dayta a regular iti ministerioyo iti tay-ak? Ken gunggundawayanyo aya a naan-anay ti nabaknang a naespirituan a taraon nga ipapaay ni Jehova babaen iti “matalek ken naannad nga adipen”?​—Mateo 24:45-47.

7. Ania dagiti maisingasing maipapan iti oras ti panagadal, ken kasano a naipakita ti pannakasapul ti panagadal babaen ti Kasuratan?

⁷ Siguruenyo koma ti mangilasin iti panawen a maipaay iti panagadal iti Sao ti Dios ken kadagiti publikasion dagiti pudno a Kristiano. Daytoy ti mangpunno iti isipyo kadagiti nasasayaat nga impormasion a makagunggona kadakayo ken mabalinyonto nga usaren a pangsungbat kadagiti napasnek a managsaludsod. (1 Pedro 3:15; Colosas 4:6) Ti oras ti panagadal ken panagmennamenna ti nagduduma kadagiti pampamilia ken indibidual. No dadduma masarakanda a makagunggona ti panagadal iti panagpatingga ti aldaw. Dadduma mabalin nga ad-adda nga alerto ti isipda no kabangbangonda. Kaskasdi dadduma mabalin a masarakanda ti oras ti tengnga ti aldaw a kaimbagan para kadakuada. Iti aniaman a kaso, ti kinaregular ken kinaanep ti kapatgan unay. Ni Josue ken dagiti ar-ari ti Israel binasada nga inaldaw ti Sao ti Dios.​—Josue 1:7, 8; Deuteronomio 17:18-20.

Pagreggetan ti Agbalin a Nasaysayaat a Mannursuro

8. Kasano a ti panangusar ti pananginaig ti panunot parang-ayenna ti laingyo a mangisuro?

⁸ Ti panangparang-ay iti kinalaing ti panangisuro sapulenna ti nagaget a panagtrabaho. Maysa a pamay-an a panangparang-ay iti abilidadyo kas mannursuro isu ti panangusar ti pannakilangen babaen iti isip wenno pananginaig ti kapanunotan no agad-adal iti Biblia wenno kadagiti Nakristianuan a publikasion. Inaigyo dagiti baro a kapanunotan kadagidiay dati nga ammoyon. Daytoy ti makatulong kadakayo a mangbalabala iti impormasion iti isipyo tapno mailawlawagyo a silalawag dagiti bambanag no mangisursurokayo kadagiti dadduma. Awan duadua, naus-usaryon ti pananginanaig idi nagad-adalkayo kadagiti napalabas. Kas pangarigan, nalabit naminsan saanyo a nabigbig a dagiti Kristiano rebbeng nga agpasakopda kadagiti “nangangato a turturay” ti gobierno nga addaan pagbeddenganna. Ngem itan ammoyon a ti panagtulnogyo iti Dios ti masapul nga umun-una. (Roma 13:1-8; Marcos 12:17; Aramid 5:29) Natarusanyo daytoyen agsipud ta intiponyo dagiti baro a punto kadagidiay dati nga ammoyon.

9. Iyilustrar no kasanoyo a mailadawan iti isipyo ti maysa a pasamak a nailanad iti Biblia.

⁹ Ti sabali pay a pamay-an a panangparang-ay ti abilidadyo a mangisuro ket babaen ti panangiladawanyo iti kapanunotanyo kadagiti paspasamak a nailanad idiay Biblia. Apay a dikay aramiden daytoy itan iti Oc-ocom 7:19-22? Iti sidong ti kasta unay a kinasipnget, ni Gedeon ken dagiti 300 a buyotna linakubda ti kampamento dagiti Madianitas a sadiay kaikabkabil pay laeng dagiti agbantay. Pagammuan mangngeganyo dagiti 100 kadagiti buyot ni Gedeon a mangpuyot kadagiti tangguyobda, ket makitkitayo ida a nangbuong kadagiti dadakkel a gurgurita nga aw-awitenda. Dagiti 200 a dadduma nga Israelitas ti mangaramid met iti kasta. Bayat ti panangitag-ayda amin kadagiti umap-apuy nga alutenda, mangngegyo ida a mangipukpukkaw: “Ti kampilan ni Jehova ken ni Gedeon!” Ket bayat a mangrugin nga agtaray dagiti napabutngan a Madianitas, dagiti tallo a kompania ni Gedeon ti agtultuloy met a mangpaguni kadagiti tangguyobda, ket makitayo a ni Jehova inkabilna ti kampilan ti tunggal tao a maibusor iti kaduana. Agsipud ta nailadawanyo daytoy a pasamak iti is-isipyo, awan duadua a daytanto ti malaglagipyo a naimbag ket mabalinanyonto nga usaren dayta inton mangisurokayo kadagiti sabsabali. Pudno unay, maysa a leksion nga isursuro dayta a ta ni Jehova maispalna ti ilina uray awanan iti napigsa a natauan a puersa militar.​—Salmo 94:14.

10. Iti panangisuro, kasanoyo nga aramaten ti ilustrasion a masarakan idiay Oc-ocom 9:8-15?

¹⁰ Dagiti nasasayaat nga ilustrasion agraman dagidiay adda kadagiti Kasuratan, ti mangparang-ay met iti kinasigoyo kas mannursuro. Kas pangarigan, usigenyo ti Oc-ocom 9:8-15. Sinalaysay ni Jotam nga anak ni Gedeon ti tiempo idi dagiti kaykayo napanda a mangpulot ti maysa nga agari kadakuada. Numan pay ti kayo nga olibo, higos, ken ti ubas dida inawat ti saad ti kinaari, ti nanumo a kalunay ti sigagagar a nangawat iti dayta. Dagiti napapateg a mulmula inladawanda dagiti maikari a tattao a di nangsapsapul iti kinaari kadagiti padada nga Israelitas. Nupay kasta, ti kalunay, a nausar laeng kas pagsungrod, inladawanna ti kinaari ti maysa a natangsit, mammapatay nga Abimelec, a kayatna a dominaran dagiti dadduma ngem naaddaan iti dakes a panungpalan kas kaitungpalan ti padto ni Jotam. (Oc-ocom 9:50-57) Daytoy nga ilustrasion ti mabalin nga usaren a mangipaganetget iti pannakasapul ti panagaramid ti naimbag ken panagpakumbaba, saan a natangsit.​—Salmo 18:26, 27; 1 Pedro 5:5.

11. (a) Ania dagiti punto nga impaganetget dagiti ilustrasion ni Jesus a nailanad iti Mateo 13:45, 46? (b) Ti kasasaad dayta nga ilustrasion isingasingna ti ania maipapan kadagiti ilustrasion nga aramaten dagiti Kristiano a mannursuro?

¹¹ Ti Naindaklan a Mannursuro, ni Jesu-Kristo, ti nagdindinnamag gapu kadagiti nagsayaatan unay a pangngarigna. Kas pangarigan, usigenyo dagiti sasaona: “Ti pagarian ti langit maipadis ti maysa a tao nga agtagtagilako nga agsapsapul kadagiti nasayaat a perlas. Isu nga idi nakasarak iti maysa a napateg unay a perlas, napan ket inlakona ti amin nga adda kenkuana ket isu ti ginatangna.” (Mateo 13:45, 46) Iti kasta inyilustrar ni Jesus ti kinasudi ti Pagarian ken impakitana a ti maysa a tao a mangapresiar iti pudpudno a pateg ti pananggun-od iti dayta ket situtulok a mangisina iti aniaman nga adda kenkuana tapno maaramidanna dayta. Awan ti aniaman a komplikado maipapan iti dayta nga ilustrasion, ket dayta ti nasayaat a laglagipen dagiti Kristiano a mannursuro a pagalagadanda no agus-usarda ti ilustrasion kas katulongan ti panangisuro.

Dagiti Pannakigimong Pagbalinendatayo a Nalalaing

12. Kasano a ti itatabuno kadagiti palawag publiko tulongandakayo a mangparang-ay iti abilidadyo a mangisuro?

¹² Dagiti Nakristianuan a panaggigimong addaanda ti nagpateg a paset iti panamagbalin kadagiti ad-adipen ni Jehova a nalalaing ken nareregta a mannursuro. Kas ipakita ti Sermon ni Jesus idiay Bantay, dagiti palawag publiko ti nagsayaat a pamay-an a panangipaay kadagiti naespirituan a pannursuro. (Mateo 5:1–7:29) Gapuna, dagiti palawag publiko ti maysa kadagiti gimong dagiti Saksi ni Jehova itatta. Makigimgimongkayo aya a regular? Maysakayo aya nga atentibo a managdengngeg? Uk-ukagenyo aya dagiti Bibliayo no basaen ti agpalpalawag dagiti teksto? Ugaliyo aya ti agala kadagiti notas? Dagitoy dagiti pamay-an a mangparang-ay ti abilidadyo kas mannursuro, ket ti nagsayaat a Nainkasuratan a pannursuro ti mangparang-ay agpadpada iti kinalaing ken regtayo kas managaramid iti adalan.

13, 14. (a) Kaano a naaddaan iti partikular a pateg ti trabaho a panagaramid adalan kadagiti ad-adipen ni Jehova? (b) Ania a salsaludsod ti naimbag a maiyimtuod maipapan iti panagadal iti Pagwanawanan ken ti Panagadal ti Libro iti Kongregasion?

¹³ Ti trabaho a panagaramid-adalan ti naaddaan partikular a pateg kadagiti ad-adipen ni Jehova idi maiyawis ti ‘Ipablaak ti Ari ken ti Pagarian,’ bayat ti kumbension idiay Cedar Point, Ohio, idi 1922. Iti dayta met laeng a tawen, ti grupo a panagadal iti The Watch Tower damo a naorganisar. Daytoy a pagiwarnak ti nangipangpangruna iti pannursuro iti Biblia ken ti panangikasaba iti Pagarian, ta ti mismo a naganna ket Ti Pagwanawanan Mangibumbunannag ti Pagarian ni Jehova. Maysakayo aya a nagagar a managbasa iti Sao ti Dios a kadua Ti Pagwanawanan kas maysa a katulongan? Siaaktibokayo aya a makiramraman iti linawas a Panagadal iti Pagwanawanan?

¹⁴ Ti linawas a Panagadal ti Libro ti kongregasion ti mangipapaay met kadagiti gundaway a mangparang-ay iti abilidadyo kas mannursuro ti naimbag a damag. No sumungsungbat kadagiti saludsod kadagitoy babassit a panagtataripnong, kasta met ti panagadal iti Pagwanawanan, iyeb-ekkasyo aya dagiti bambanag kadagiti bukodyo a sasao? Iparparangarang kadi dagiti komentoyo no ania ti patpatienyo iti pusoyo?

15. Ania ti panggep ti Gimong ti Serbisio, ken kasano a maipapaay ti pannakaiwanwan iti dayta?

¹⁵ Sakbay ti 1922, nakaiyugalianen dagiti ad-adipen ni Jehova ti agtataripnong iti tengnga ti lawas a Panagkararag, Dayaw, ken Gimong ti Pammaneknek. Daytat’ maysa nga okasion a maipaay iti panagkanta, panangted pammaneknek, ken pannakiraman iti panagkararag. Ngem idi a maipagpaganetget unay ti panangiwaragawag ti Pagarian iti binalaybalay, daytoy a panagtataripnong ti nagbalinen a Gimong ti Serbisio, a mangipagpaganetget iti trabaho a panangaskasaba. Nangnangruna a makatulong isu ti Bulletin, a naglaon kadagiti instruksion iti tay-ak ti serbisio ken “canvasses,” wenno pammaneknek, a mabalin a mausar iti ministerio. Itatta, Ti Ministeriotayo iti Pagarian mangipapaayda met iti umas-asping a tulong, agraman pannakaiwanwan ti linawas a “Gimong a Mangtulong Kadatayo nga Agaramid Adalan.” Regular kadi a makiramramankayo kadagita a panaggigimong? Iyap-aplikaryo met laeng aya ti balakad a nairanta a mangtulong kadakayo a buyogen iti kinasigo ken kinaregta?

16. Kas naiyebkas iti pannakayuswatna, ania ti panggep ti Teokratiko nga Eskuelaan ti Ministerio?

¹⁶ Tapno maparang-ay ti kinasigo a mangisuro, narugianan ti Teokratiko nga Eskuelaan ti Panagministro kadagiti kongregasion dagiti Saksi ni Jehova idi 1943. No maipapan iti kangrunaan a panggep ti eskuelaan, ti umuna a libro a giya ti nagkuna: “Daytoy a kurso saan a naipaay tapno ikkaten ti panawen a busbusbosenyo iti tay-ak ti serbisio, no di ket naiyurnos tapno pagbalinennakayo nga ad-adda a nalalaing iti dayta. Kadagiti ad-adda nga espisipiko a termino, ti panggep daytoy a ‘Kurso iti Teokratiko a Ministerio, isu ti panangisagana kadagiti amin a ‘matalek a lallaki’, dagidiay nakangngegen iti Sao ti Dios ken nangpanekneken ti pammatida iti dayta, tapno ‘makaisuroda kadagiti dadduma’ babaen iti panagbalaybalayda, babaen ti panagsarungkarda, babaen ti panangidaulo kadagiti modelo a panagadal ken dagiti panagadal iti libro ken, iti ababa, babaen iti pannakiraman iti amin a paset ti serbisio ti Pagarian. Maysa a pamay-an a panamagbalin iti tunggal maysa nga ad-adda a nalalaing a Teokratiko a ministro a mangidayaw iti nagan ti Apo; tapno isut’ ad-adda a nakabalan a mangidatag iti publiko ti namnama nga adda kenkuana; tapno isu ti agbalin a ‘nalaing a mangisuro, nateppel, a mamatigmaan a sieemma’. (2 Tim. 2:24, 25) Awan koma ti makalipat iti daytoy kangrunaan a panggep ti kurso.” (Course in Theocratic Ministry, panid 4) Daytoy ti nagtalinaed a kangrunaan a panggep ti Teokratiko nga Eskuelaan ti Panagministro. Iyap-aplikaryo met laeng aya dagiti nagsayaat nga impormasion iti panangisuro, panagbasa, panagpalawag iti publiko, ken dagiti umas-asping kadagita, nga agparparang kadagiti libro daytoy a pagadalan?a Maysakayo aya kadagiti nagpalista? Siyayaman met aya nga aw-awatenyo ken tungtungpalenyo dagiti naituding kadakayo iti programa ti pagadalan? Daytoy a sagana ni Jehova babaen iti organisasionna ti makatulong a mamagbalin kadakayo a nasigo ken naregta a ministro.

Panagsanay a Maipaay iti Naregta a Panangisuro

17. Ania dagiti naespirituan a sagana nga inaramid ni Jehova nga agpaay kadagidiay a mangisuro kadagiti dadduma iti sagrado a kinapudnona?

¹⁷ Agar-aramid ni Jehova ti aglaplapusanan a naespitiruan a sagana a maipaay kadagidiay addaan pribilehio a mangisuro kadagiti dadduma iti sagrado a kinapudnona. Mairaman kadagitoy, nangisagana kadagiti literatura ti Biblia, dagiti linawas a panaggigimong, ken dadakkel nga asamblea. Dagita a nagsasayaat a sagana ti mamagbalin kadagiti dedikado a Saksina nga agbalin a nasigo ken naregta a mannursuro.

18. Ti panangsurot iti ulidan da Jesus ken Pablo, ania nga urnos ti mabalin nga aramiden dagiti panglakayen a pangparang-ay iti ministerio iti tay-ak itatta?

¹⁸ Ngem kasano no maysatayo a nadutokan a panglakayen wenno ad-adut’ kapadasanna a Saksi ni Jehova? No kasta ti ayat kadagiti dadduma ti rebbeng a mangtignay kadatayo a mangtulong kadagiti baro ken basbassit kapadasanna a Kristiano nga agbalin a nasigo ken naregta a mannursuro. Pudno a daytoy ti maiyanatup laeng, ta ni Jesus nangibaon kadagiti 70 nga ad-adalan kalpasan laeng ti panangtedna kadakuada iti instruksion maipaay iti ministerioda. (Lucas 10:1-24) Sinursuruan met ni Pablo dagiti manangaywan iti Efeso “iti publiko ken iti binalaybalay,” ket daytoy ramanenna ti panangsanay kadakuada a mangaskasaba kadagiti di manamati bayat nga isu ti mapmapan iti binalaybalay iti tay-ak ti ministerio. (Aramid 20:20, 21) Umas-asping iti dayta, dagiti panglakayen, payunirs, ken dadduma pay maragsakanda laeng a mangsanay kadagiti padada a Saksi iti tay-ak ti ministerio itatta. Marikriknayo aya ti pannakasapul ti kasta a panagsanay? Ngarud dayta koma ti biruken ken awatenyo. Maysakay kadi a panglakayen? No kasta iyurnosyo met ti panangsanay kadagiti dadduma iti ministerio bayat a dakayo ti mangipakpakita ti naregta met a panangidaulo iti serbisio iti tay-ak.

Itultuloyyo ti Panangparang-ay ti Kinalaing

19. Apay a rebbeng nga ikararagtayo ti ministeriotayo?

¹⁹ Dagiti siruhano, karpentero, ken dadduma pay agbalinda a nasigo babaen ti agtultuloy a panagadal ken panangiyaplikar kadagiti pannakaammo a nagun-odanda. Daytat’ pudno met kadagiti Kristiano a ministro. Gapuna, anian a nagpateg a tunggal dedikado a saksi ni Jehova pagreggetanna a parang-ayen ti kinasigona kas mannursuro iti naimbag a damag! Ket yantangay daytoy ti trabaho ni Jehova, rebbeng a daytat’ maysa a tema ti napasnek a karkararagtayo. No sapulentay ti tulong ken panangiwanwan ti Dios, makapagtalektayo a bendisionanna ti naregta a ministeriotayo. Kas kinuna ni apostol Juan: “Ket isuamin a dawatentayo awatentayo manipud ken [Jehova a Dios], ta salimetmetantayo dagiti bilbilinna ket aramidentayo dagiti bambanag a makaay-ayo kadagiti matana.”​—1 Juan 3:22.

20. Kas dagiti Saksi ni Jehova, aniat’ rebbeng a determinasiontayo bayat nga agpatingga daytoy a sistema?

²⁰ Bayat nga umadani ti panungpalan daytoy dakes a sistema dagiti bambanag, ngarud, sapay koma ta igaedtay dagiti bagbagitayo a sireregta iti ministerio. Sapay koma ta ‘salwadantayo ti bagitayo ken ti sursurotayo,’ nga agpaay iti pakaisalakanantayo ken kadagidiay met agimdeng ti mensahe ti Pagarian. Wen, aramidentayo koma amin a kabaelantayo a mangisuro a buyogen ti kinasigo ken kinaregta.

[Dagiti Footnote]

Aniat’ Maikunayo?

◻ Malaksid ti panangaskasaba, ti trabaho a panagaramid-adalan sapulenna ti ania?

◻ Apay a nagpateg a ‘salwadantayo ti sursurotayo’?

◻ Ania dagiti sumagmamano a pamay-an a pangparang-ay ti kinasigotayo a mangisuro?

◻ Kasano a makatulong kadatayo dagiti Nakristianuan a panaggigimong nga agbalin a nalaing ken naregta a mannursuro iti Sao ti Dios?

◻ Aniat’ rebbeng nga aramiden dagiti panglakayen ken dadduma pay nga aduan ti kapadasan a Saksi maipapan iti tay-ak ti ministerio?