Agwatwat a Maipaay iti Nadiosan a Debosion kas Kalatyo

“Agwatwatka a maipaay iti nadiosan a debosion kas ti kalatmo.”​—1 TIMOTEO 4:7.

1. Apay a napaay a mangabak ti maysa a nalaing a lumulumba?

DAYTOY a babai isu ti kalalaingan a lumulumba iti team wenno grupoda. Dagiti napalabas a panagbiktoriana ti namagbalin kenkuana a kampeon nasional. Gapuna ninamnamada a daytoy a babai ti mangabak manen iti daytoy naisangsangayan a panaglulumba. Nupay kasta, nakapaayan iti manangsanayna, dagiti kakaduana iti team, ken kasta met kenkuana a mismo isut’ nagtaray iti kadadaksan a lumba iti karerana. Apay? “Kimmapuyak iti panagpraktis ket sinardengak ti panagsanay a naimbag,” inamin ti agtutubo a babai, a napalalo ti pannakaibabainna. “Pinadpadasnak nga induron ti manangsanayko tapno agsanayak a naimbag ken pinakdaarannak pay, ngem diak impangag.” Ti pannakapaayna a nagsanay iti umiso ti nakapukawanna ti panagbiktoria nga isu ti kalatna.

2. Iti ania a pamay-an a masapul nga agsanay wenno agwatwat dagiti Kristiano, ket apay rebbeng nga amin tarigagayanda a maammuan koma no kasano?

² Kas maysa a Kristiano, nangnangruna no maysakay nga agtutubo, addaantay met ti nasken a panagwatwat. “Agwatwatka a maipaay iti nadiosan a debosion kas ti kalatmo.” (1 Timoteo 4:7) Ti Griego a sao a maipaay iti “agwatwat” (gy·mnaʹzo) iladladawanna ti nadagsen ken masansan nasakit a panagwatwat nga aramiden dagiti atleta idiay gymnasium. Gapuna, no maipapan iti nadiosan a debosion ken dagiti gunggonana, innayon ni apostol Pablo: “Ta maipuon itoy met laeng agbannog ket agsagabakami.” (1 Timoteo 4:10) Daytoy nasken a kualidad ket saan a maysa a banag a basta umay a natural wenno maiyakar manipud kadagiti nadiosan a nagannak. Ngem ania dagiti adda a masapul nga alaen? Dagiti Kristiano iti amin nga edad rebbeng a kayatda a maammuan.

Ti Naimbag a Komunikasion iti Dios

3. (a) Apay a ti personal a panagadal ti napateg? (b) Ania dagiti kualidad ti Dios a nangguyugoy kadakayo kenkuana?

³ Yantangay ti nadiosan a debosion ramanenna ti naimpusuan a panangipateg kadagiti kualidad ni Jehova, kasapulan a maammuanyo no ania a talaga ti kinasiasinona. Ni Jehova ti mangipakpakaammo iti daytoy idiay Biblia. Ngem masapul nga adalen a siaannad ti saona ken dagiti publikasion a naibatay iti Biblia, iti kasta “mataraonan kadagiti sao ti pammati ken ti naimbag a sursuro.” (1 Timoteo 4:6) Ti kasta a panagadal ti makatulong kadakayo a makakita “iti sayaat ni Jehova.”​—Salmo 27:4.

4. Ania dagiti kapadasan a mangipakpakita iti pateg ti personal a panagadal, ken ania a salsaludsod ti siinget koma nga usigenyo?

⁴ “Pagbalinennakayo a nasingsinged ken ni Jehova bayat nga ad-adu met ti maammuanyo maipapan kenkuana,” kuna ti maysa a 22-años, nga amin-tiempo a managebanghelio (payunir). “No makabasaak kadagiti padto ken makita no kasano ti pannakatungpalda, dayta ti mamagsiddaaw kaniak maipapan kenkuana. Ti personal panagadal ti pudno a makatulong kaniak.” Maysa a 16-años, a napalalo ti panagleddaangna, ti nagsurat maipapan iti maysa kadagiti artikulo iti serie nga “Agimtuod dagiti Agtutubo” nga agparparang a kanayon iti magasin nga Agriingkayo!: “Idi ngangngani a mapukawkon amin a namnama, rimmuar daytoy nga artikulo. Maragsakanak unay ta diakon maidisso dayta! Dayta ti nangted ti rikna nga ad-adda a nasingsingedak ken Jehova, ket nabigbigko nga isut’ mannakaawat ken managayat unay. Itan mariknakon a mabalinko ti agballigi.”a Ikagkagumaanyo met laeng aya a basaen ti tunggal ruar ti pagbasaantayo? Numan pay kasapulanna dayta ti panagregget, adda aya ipapaayyo a panawen a mangtaraon ti isip ken pusoyo babaen ti personal a panagadal iti Biblia? Babaen iti panagaramidyo ti mismo a panagsirarak, pudno a mapaneknekanyo ti bagiyo met laeng nga addaankay ti kinapudno. No dumanon ti kasta a pannakaammo iti puso, dayta ti sigurado a mangtignay kadakayo, ta dayta ti “sursuro a mayannurot iti nadiosan a debosion.”​—1 Timoteo 6:3; Roma 12:2.

5, 6. Ania a kita ti karkararag ti ad-adda a mangiyasideg kadakayo iti Dios? Iyilustrar.

⁵ Ti naimbag a komunikasion iti Dios ramanenna met dagiti naimpusuan ken espesipiko a karkararag. Dagitoy ti makatulong a mangibangon iti personal a pannakigayyem ken Jehova. No agbiddutkayo, situtulokkay koma nga agpakpakaasi a kas ken David: “Dika lagipen dagiti basbasol ti kinaagtutubok.” (Salmo 25:7, 11) Ket ammuenyo a pakawanennakayo no agbabawikayo. Adalenyo met nga ibaybayag ti panagkararagyo, nga ibuksilanyo. Maysa nga agtutubo, nupay dimmakkel iti maysa a nadiosan a pagtaengan, pinalubosanna ti parikutna iti panagsao a manglapped iti pannakiramanna iti pudno a relihion. “Kalpasanna iti maysa a rabii,” impudno daytoy a 22-años, “nagpakpakaasiak ken Jehova, ‘Tulongannak nga agtarigagay nga agserbi kenka, ket saan a gapu ta dayta ti kayat dagiti panglakayen wenno dagiti nagannak kaniak.’” Anian a nangrugi a nagbalbaliw ti panagbiagna! Agpapan pay iti panagbeddalna, isu nagbalinen a nairaman a naan-anay iti ministerio. Siraragsak kunana, “Ad-adda ti panagtalekkon ken Jehova ita agsipud ta ammokon nga isu ti kanayon a mangipangpangag.”​—Salmo 62:8.

⁶ Maysa nga agtutubo a Kristiano ti nagkararag iti espesipiko maipapan iti planona nga agpayunir. Idi a nasungbatan dagiti kararagna, indirina: “Ammok a ni Jehova ti pudpudno ken pudno nga inayatnatayo! Sakbay daytoy impagarupko nga addaanakon ti pannakirelasion kenkuana, ngem itan isut’ ad-adda a maysa a gayyem​—ti kasasayaatan a gayyemko.” Ni Jehova ti di kanayon a sumungbat iti nakaskasdaaw a pamay-an, ngem no napasnekkayo ken agtignaykayo a maitunos kadagiti karkararagyo, maapresiaryonto ti naayat a panangiwanwanna.​—Salmo 145:18.

Taginayonenyo ti Naimbag a Konsiensia

7. Ania ti konsiensia, ket apay a masapul a salimetmetanyo ti maysa a nadalus a konsiensia?

⁷ Idi ni Pablo ingunamgunamna ken Timoteo nga itultuloyna a “taginayonen . . . ti naimbag a konsiensia,” ammo ti apostol a kasapulan dayta ti kinapinget. (1 Timoteo 1:19) Apay a kasta? Ti konsiensiatayo isu ti inted ti Dios a kapasidad a mangsukimat ti bagbagitayo ken mangukom wenno mangeddeng kadagiti naaramidantayo wenno planotayo nga aramiden. Daytat’ mabalin a ‘mangakusar’ kadatayo, a sisasaem a mangkondenar ti kursotayo, wenno ‘mangpakawan’ kadatayo, nga anamonganna ti aramidentayo a nasayaat. (Roma 2:15) Ngem no dayta ti bumakkog, daytat’ makaipatulod kadagiti mensahe nga addaan depekto. Dadduma nga addaanen kadagiti adda depektona a konsiensia ti makapagtignay a kas narungsot nga an-animal, kaskasdi ti ‘makin-uneg a timek’ ti saan a ‘mangakusar’ kadakuada. Mabalin pay ketdi nga “ipaduyakyakda nga ammoda ti Dios” ngem “gapu kadagiti ar-aramidda tallikudanda.” Kasano a masalwadankayo a maibusor iti pannakapatanor iti konsiensia nga adda depektona?​—Tito 1:10-16.

8. Kasano a dadduma idi umuna a siglo “tinallikudanda” ti nadalus a konsiensia?

⁸ Imbaga ni Pablo ken Timoteo a dadduma kadagiti Kristiano “tinallikudanda” ti naimbag a konsiensiada babaen ti ‘panangsangoda kadagiti sarsarita a paspasaw’ ken “kadagiti palpalawag nga ubbaw a mangsalungasing iti nasantuan.” (1 Timoteo 1:4, 19, 20; 6:20; 2 Timoteo 2:16-18) Agsipud ta dinengngegda dagitoy a bambanag, nadadael ti pammatida, ket daytoy ti nagbanag iti naespirituan a pannakarbada. Ni Pablo, nupay kasta, nangipakita pay kadagiti dadduma a bambanag malaksid kadagiti pannursuro nga apostata a “maibusor kadagiti nasalun-at a pannursuro.” Idiay 1 Timoteo 1:9, 10 inlistana dagita a bambanag kas ti pammapatay, pannakiabig, ken homoseksualidad.

9, 10. (a) Aniat’ maadal manipud pangarigan ti maysa a pagassawaan a Kristiano a saan a nangsalimetmet iti nadalus a konsiensia? (b) Kasanotay a malapdan ti pannakabibineg ti konsiensiatayo?

⁹ Itatta ti kinaranggas ken seksual nga imoralidad ti aglaplapusanan kadagiti pabuya iti pelikula ken TV kasta met kadagiti pagiwarnakan. No taraonantay ti isiptayo kadagita a bambanag, ti konsiensiatayo ti agin-inot a mabibineg. Napasamak daytoy iti agtutubo a pagassawaan a Kristiano a nakaaramidda ti pannakiabig kasakbayan la unay ti aldaw ti kasarda. “Ti kunak ket daytat’ adda pakainaiganna iti panagbuybuya iti TV,” inamin ti agtutubo a babai. “Kanayon a makitkitayo dagiti tattao nga agung-ungngo ken agin-innarikap, gapuna daytat’ nagbalinen a kasla saan a serioso. Mairuamka iti dayta. Gapuna rinugianmi met nga aramiden dayta. No la koma no pinampanunotko pay nga ad-adda no kasano ti kinaserioso dayta!” Sakbay a mabigbigna, daytoy a babai napukawna ti naimbag a konsiensiana. Innayon met ti agtutubo a lalaki: “Adda met ti parikutko maipapan iti masturbasion, ket daytoy ti mangbibineg iti konsiensiam gapuna saanen a narigat ti panagaramid iti panagbimbinnisito ken panagin-innarakop ken kamaudiananna ti pannakiabig.” Numan pay agparang a kasla mangipakpakitada iti naimbag nga ulidan iti imatang dagiti dadduma, ti buybuyaenda a maipaay iti paglinglingayan, agraman ti nalimed a narugit nga aramidda, ti nangbibineg iti konsiensiada kas iti lasag a kanayon a masinsinit manipud iti bumegbeggang a pagbinta wenno pagmarka.​—1 Timoteo 4:2.

¹⁰ Mabalin met aya a ti konsiensiayo ti mabibineg babaen kadagiti buybuyaen wenno basbasaenyo a maipaay a paglinglingayan? Pagregreggetanyo met laeng aya a naimbag a panunoten ti aniaman a dakes a kababalin a mabalin a mangtulaw iti konsiensiayo? Agpaay a pakasalaknibanyo, mabalinyo ti mangala ti positibo a panagtignay babaen ti panangbasbasa​—ken panangulit a panangbasa​—kadagiti naibatay iti Biblia a literatura a nangnangruna a mangsalsalaysay maipapan iti parikutyo wenno manglawlawag iti parikutyo a kadua ti maysa a panglakayen. Ti maysa a naimbag, nadalus a konsiensia ket maysa a nagsudi a sagut manipud iti Dios a makatulong kadakayo a mangpatanor iti nadiosan a debosion. Dikay koma palubosan ti aniaman a mangpukaw iti dayta kadakayo!

Pilienyo dagiti Umiso a Kakuykuyog

11, 12. (a) Ania a pakdaar ti naited idiay 2 Timoteo 2:20, 21? (b) Kasanoyo a maipangag dayta a pakdaar?

¹¹ Insurat ni apostol Pablo: “Ngem iti maysa a balay [ti kongregasion] saan laeng nga addaan kadagiti basbaso a balitok ken pirak no di pay dagiti naaramid ti kayo ken dinamili, ket dagiti dadduma maipaayda iti nadayaw ken dagiti sabsabali maipaayda iti nanumo. No, ngarud, adda aggugorto kadagidiay a banag, isunto ti maysa a baso a maipaay iti dayaw, napagsanto, naserbi iti akinkua, naisagana iti isuamin nga aramid a naimbag.” (2 Timoteo 2:20, 21) Dagiti rikrikna ken kababalintayo ti apektado unay babaen kadagidiay pilientayo a gagayyem. Kaawatan, dagiti di manamati ket saanda nga isu ti kasayaatan a kakkakuyog. Ngem ipakita a silalawag ni Pablo ditoy nga uray pay iti uneg ti kongregasion mabalin met nga adda dagiti tattao a dida makaay-ayo a kakuykuyog. Pudno, mabalin a masarakanyo dagita a naragsakda met nga adda iti aglawlaw, ngem ti impluensiada ket dinto pulos makatulong kadakayo nga “umadayo kadagiti tarigagay nga inuubingan” wenno tapno makapataud iti nadiosan a debosion. Pagreggetanyo ti maaddaan kadagiti makapabileg a kakkakuyog iti uneg ti kongregasion. Intuloy ni Pablo iti 2Ti 2 bersikulo 22: “Ket sumurotka iti kinalinteg, iti pammati, iti ayat, iti talna, a makikadkaduaka kadagiti umawag iti Apo a sidadalus iti puso.”​—Idiligyo ti Filipos 4:8, 9.

¹² Alaenyo ti kaso ti maysa a Kristiano nga agtutubo nga, agpapan pay nadiosan a pannakasanayna, ket kanayon a mairubrubo iti kinadakes. “Daytat’ nangnangruna gapu kadagiti tattao a pakikuykuyogak,” kinuna daytoy a babai. Idi makitana a ti biagna ti mapapaay, binalbaliwanna dagiti gagayyemna. Kinunana: “No addaanka kadagiti gagayyem iti aglawlawmo nga addaan panagayat ken Jehova, daytat’ makatulong kenka a mangsalimetmet iti sensitibo a konsiensia ket maadaywam dagiti riribuk. No iyebkasda ti panagsimronda iti kinadakes, daytat’ mamagbalin met kenka nga agrikna iti kasta.” Babaen ti iyaadayuna kadagiti mapagduaduaan a kakkakuyog, isut’ nagbalin a kas maysa a basehas a “naserbi iti akinkua [kenkuana], a maisagana iti isuamin nga aramid a naimbag.” Agsipud ta nakapagserbin iti sangapulo a tawtawen kas maysa a payunir, innayonna: “Itan makitakon a ni Jehova ti nangusar kaniak a mangtulong kadagiti dadduma.”​—2 Timoteo 2:21; Proverbio 15:31.

13. Kasanoyo a maikeddeng no siasino dagiti naimbag a kakkakuyog, ket kasanoda a makaimpluensia kadakayo?

¹³ Gapuna, usigenyo a pudpudno dagiti kakkakuyogyo. Sursurotenda aya ti kinalinteg, pammati, naprinsipiuan nga ayat, ken talna? Napunnoda aya iti Nakristianuan a kinaregta? Babaen ti panamagbalinyo kadagiti kakasta a nasinged a kakaduayo, dakayo met a mismo agbalin a nasayaat nga ulidan ti panagsao, iti kababalin, iti ayat, iti pammati, iti kinadalus, kas met ken Timoteo, ti nasinged a kakkakuyog ni Pablo. Di kayat a sawen daytoy nga agbalinkayo met a nakalamlamiis wenno di nainggayyeman kadagidiay saan unay a mapagulidanan. Ti naragsak nga ulidanyo ti mabalin a mangtignay kadagitoy, met, a mangpalinteg iti danada.​—1 Timoteo 4:12; Hebreo 12:12-15.

Agsakripisiokayo Maipaay iti Dios

14, 15. (a) Aniat’ maikalikagum kadagiti atleta idi ugma bayat nga agwatwatwatda? (b) Ania a trabaho ti agkasapulan ti panagsakripisio, ket ania dagiti adda kadatayo a nasayaat nga ulidan?

¹⁴ Kabayatan dagiti al-aldaw ni Timoteo, bayat nga agsansanay dagiti atleta watwatenda ti “agparbeng kadagiti isuamin a bambanag,” a pagliblibakanda dagiti bagbagida kadagiti adu a nainkalintegan a pagraragsakan. (1 Corinto 9:25) Sinursurotda ti nainget a pannangan. Sigun ken Horace, a bumiberso idi umuna a siglo K.K.P., “umadayuda manipud babbai ken arak” tapno “magtenganda ti il-iliwenda a kalat.” Umas-asping met, ti panagsanay iti nadiosan a debosion kas kalatyo sapulenna ti panagsakripisio. Ni Pablo naikunana maipapan ken Timoteo: “Ta awan kaniak ti sabali a kanaknakemna . . . ta isuda amin sapsapulenda ti kabukbukodanda nga interes, saan ket a ken Kristo Jesus. Ngem . . . ti pannakipagserbina kaniak ti maipaay iti naimbag a damag.”​—Filipos 2:19-22.

¹⁵ Naibilin ken Timoteo: “Aramidem ti aramid ti managebanghelio, tungpalem ti ministeriom.” (2 Timoteo 4:5) Numan pay kasano a makaay-ayo unay ti aniaman kadagiti personal nga interesesna, insakripisiona dagitoy tapno mairingpasna ti aramid ti Dios. Situtulokkayo met aya a mangaramid iti kasta? Itatta sumagmamano kadagiti agtutubo a Kristiano a siwayawaya manipud kadagiti nadagsen a Nainkasuratan a responsabilidad ti mangsursurot kadagiti nangatngato nga edukasion wenno kadagiti nangato-ti-pagsuelduanna nga amin-tiempo a trabaho imbes ketdi a pagbalinen ti Nakristianuan a ministerio a karerada. Maysa kadagitoy ti sigagagar a mangur-uray ti kasta a trabaho. Nupay kasta, sakbay a makairugi nga agtrabaho, inawatna ti awis a makipagtrabaho a kadua dagiti pagassawaan a payunir iti tay-ak ti serbisio iti intero a kalgaw. Daytat’ inayatna unay. Kas nagbanaganna, insakripisiona dayta ap-apalan unay nga amin-tiempo a trabaho ket nangala ketdi iti di unay makapainteres a paset-tiempo a trabaho tapno isu ti makapagpayunir. Babaen iti daytoy kas ken Timoteo nga espiritu, isu itan ti agserserbi iti sangalubongan a hedkuarters dagiti Saksi ni Jehova. Ti sibubulos-nakemna a panagsakripisio ket pammaneknek iti pudpudno nga ayatna, ket dagiti sakripisio ti nangpauneg iti dayta nga ayat, kas ti inna nakita.

16. Ania ti sumagmamano a sakripisio a mabalin nga aramiden dagiti agtutubo?

¹⁶ Kas “maysa a manangaskasaba ken apostol,” impaganetget ni Pablo ti panangtarigagay ti kinatakneng iti panagkawkawes. Situtulokkay met laeng aya a mangisakripisio iti dadduma nga estilo ti panagkawkawes wenno panagbubuok a makariribuk kadagiti dadduma wenno manglapped iti kinaepektiboyo kas maysa a mangaskasaba? (1 Timoteo 2:7-10) Iti panangitultuloyna, nagsurat ni Pablo: “Isuamin dagiti mayat nga agbiag iti nadiosan a debosion . . . aglak-amdanto iti pannakaidadanes.” (2 Timoteo 3:12) Situtulokkayo met laeng aya nga agtakder a maipaay iti kinapudno nupay kaipapanan dayta ti pannakalalais, nga isakripisio ti maysa a naanamongan a pannakikadua kadagiti kaeskuelaanyo? Amin dagita a panagsakripisio a naaramid a buyogen ti umiso a motibo ti mangtulong kadakayo a mangparang-ay iti nadiosan a debosion ket maigiddato iti dayta sursuruannakayo nga agpannuray ken ni Jehova panunoten dagiti rikriknana a nangnangruna ngem kadagiti dadduma pay a bambanag.

Itultuloyyo ti Rumang-ay

17. Iti irarang-ay, kasano a maysa nga ulidan ni Timoteo agpaay kadagiti agtutubo a ministro ita?

¹⁷ Ti panangparang-ay ti nadiosan a debosion ket maysa a di agsarsardeng a pamay-an. Kuna ni Pablo ken Timoteo: “Pampanunotem dagitoy a bambanag; paggagetam ida, tapno ti irarang-aymo maiparangarang koma kadagiti isuamin.” (1 Timoteo 4:15) Dadduma, agsipud ta nakaub-ubingda pay met laeng nga agbalin a ministerial nga adipen wenno maysa a panglakayen, ti mabalin pagarupenda a saanda a rumang-ay, a pampanunotenda a ti irarang-ayda ket marukod laeng babaen kadagiti responsabilidad ken pribilehio iti kongregasion. Pudno, nakakualipikar ni Timoteo saan laeng nga iti naespirituan nga irarang-ayna no di ket kasta met kadagiti tawtawen tapno makapagserbi kas panglakayen. Ngem masapul nga itultuloy ni Timoteo ti kinapasnekna, ket iti daytoy nangted iti nakaskasdaaw a pagulidanan nga agpaay kadagiti agtutubo a ministro tapno surotenda ti aniaman a tay-ak a silulukat kadakuada.​—1 Timoteo 4:12, 13.

18. Kadagiti ania a pamay-an a makaipakita ti panagrang-ay dagiti agtutubo a Kristiano?

¹⁸ Gapuna, kas ken Timoteo, dakayo nga agmatmataengan nga adipen ni Jehova ti agbalin a “pagulidanan kadagiti matalek” babaen ti panangipalubosyo iti kinapudno a mangimpluensia unay iti wagas ti panagbiagyo ken panangparang-ay iti ministerioyo. Ita a mismo mabalinyo a pagreggetan ti rumang-ay babaen ti panangadal a mangsukay kadagiti kualidad a kas ti kinatimbeng iti ug-ugali, kinaurnos, kinamanagpadagos, ken panagbalin a serioso. Babaen ti panagbalinyo a sisasagana a mausar dagiti panglakayen ken babaen ti panangtamingyo a siinget iti aniaman a trabaho a naikalikagum nga aramidenyo, mabalinanyo itan ti agtrabaho nga agturong iti panangpaneknekyo a ‘maikari iti pannakasuot.’ (1 Timoteo 3:1, 2, 8-10) Uray pay no ti irarang-ayyo ket saan a daras a mabigbig wenno mailasin dagiti dadduma, nakasigurokayo a daytat’ makitkita ni Jehova. Iti agangay, makitanto met dayta dagiti dadduma.​—1 Timoteo 5:25.

19. Agpapan pay panagregget, apay a masapul nga agwatwatkayo a ti nadiosan a debosion ti kalatyo?

¹⁹ Dikay koma liplipatan a babaen ti panangparang-ayyo ti nadiosan a debosion a magun-odanyonto ti naanamongan a personal a pannakirelasion ken Jehova. Ti kinakurang ti naespirituan a panagwatwat ti mangibunganto ti pukaw a dakdakkel ngem ti naawan iti daydiay nabainan a lumulumba a nadakamat iti pangrugian daytoy nga artikulo. Ti panangpatanor iti nadiosan a debosion ket nadagsen a trabaho. Ngem iti intero a lubong, umariwekwek dagiti naragsak a timtimek dagiti agtutubo nga agkallungogan a kunana: MAIKARI AMIN DAYTA ITI PANAGBANNOG! Ti pananggun-od iti daytoy a kualidad mangiturong iti maysa a makapnek a wagas ti panagbiag itan, nga awan dagiti pagbabbabawyan, ket luktan dayta ti namnama ti awan inggana a kinaragsak. Gapuna itultuloyyo ti agsanay. Itultuloyyo nga aramiden ti kasayaatan a kabaelanyo, uray pay no daytat’ narigat. Maliwliwakayo koma a “ti Dios ti amin a di kaikarian a kinamanangngaasi . . . isu met laeng palaingennakayto, patibkerennakayto, papigsaennakayto. Maited koma kenkuana ti panagturay iti agnanayon nga awan inggana. Amen.”​—1 Pedro 5:10, 11.

[Dagiti Footnote]

Masungbatanyo Aya?

◻ Ania a panagregget ti kasapulan tapno mataginayon ti nasayaat a komunikasion iti Dios?

◻ Aniat’ ramanen ti panangsalimetmet ti nadalus a konsiensia?

◻ Kasano a maiyaplikar ti 2 Timoteo 2:20-22 iti panangpatanor ti nadiosan a debosion?

◻ Kasano a maipakita dagiti agtutubo a Kristiano ti irarang-ayda?

[Kahon iti panid 23]

Dagiti Dadduma a Kualidad ti Naayat a Dios

◼ Addaan rikna. Ngarud, dagiti tigtignaytayo mabalin a “mangpaladingit” wenno mangparagsak kenkuana.​—Salmo 78:40; Proverbio 27:11.

◼ Nupay dagiti tattao ti basta mangmatmat iti langa, isu “kitaenna no ania ti adda iti puso.”​—1 Samuel 16:7.

◼ Isut’ mangipatpateg kadatayo ket awisennatayo a mangisaad iti pakadanagantayo kenkuana, ken isu ti sarikedked iti aldaw ti rigat.”​—Nahum 1:7; 1 Pedro 5:7.

◼ Isut’ maawagan “ti naragsak a Dios,” ket “maay-ayo” kadagiti ad-adipenna.​—1 Timoteo 1:11; Salmo 35:27.

◼ Pulos a saanto nga agtignay a di nainkalintegan wenno mangidumduma.​—Job 34:10; Aramid 10:34, 35.

◼ Nupay dina anamongan ti kinadakes, no agbabawitayo iti bidduttayo wenno pagkapuyantayo, “sisasagana a mangpakawan,” a saan a “mangibales sigun iti basoltayo” wenno “mangipaay iti maiparbeng kadatayo.”​—Salmo 86:5; 103:8-14.

◼ Isut’ nalaka nga asitgan, ken paregtaenna dagiti nasungdo a parparsuana a mangusar kadagiti abilidadda. Nupay awan patingga ti kinasiribna, isut’ umimdeng kadagiti suhestion. “Ta kinatan-okmo pinatan-oknak,” insurat ni Ari David.​—Salmo 18:35; 1 Ar-ari 22:19-22.