Naibilang a Nalinteg kas Maysa a Gayyem ti Dios
“‘Ni Abraham pinatina ni Jehova, ket naibilang kenkuana a kinalinteg,’ ket napaganan ‘gayyem ni Jehova.’”—SANTIAGO 2:23.
1, 2. Apay a dagiti “bambanag nga adda sadi langit” ken dagiti “bambanag nga adda iti rabaw ti daga” maikappiada iti Dios?
“TA MAKAAY-AYO iti Dios a ti isuamin a pannakapunno agtaeng kenkuana [Kristo], ket gapu kenkuana maikappia kenkuana met laeng dagiti isuamin a bambanag idinto nga inaramidna ti kappia gapu iti darana iti kayo a pagtutuokan, gapu kenkuana uray dagiti adda iti rabaw ti daga ken uray dagiti adda sadi langit.” (Colosas 1:19, 20) Daytoy nadiosan a panggep a panangikappia ti agturturongen iti kangitingitanna.
2 “Dagiti adda sadi langit” ket saan a dagiti espiritu a parparsua, ta dagiti anghel saanda a nasubbot babaen iti dara ni Kristo. Imbes ketdi, isuda dagiti tattao a nagatang babaen iti dara ti Kordero nga agbalin a “maysa a pagarian ken papadi” a kadua ni Kristo kadagiti “baro a langlangit.” Dagitoy ti naibilangen a nalinteg a naan-anay babaen iti dara ni Kristo. Mainayon pay, iti agarup 50 a tawtawenen, makikapkappia ni Jehova “kadagiti adda iti rabaw ti daga,” dagidiay tattao nga agbalin a paset ti nalinteg a “baro a daga.” (Apocalipsis 5:9, 10; 2 Pedro 3:13) Daytoy a panangurnong “kadagiti amin a bambanag,” agpadpada dagiti bambanag a naindagaan ken bambanag a nailangitan, “mayanatup iti pagayatanna [ni Jehova] a pinanggepna kenkuana.”—Efeso 1:9, 10.
Ti Panggep ti Dios Agpaay ken Anakna nga Adan
3, 4. Ania idi ti takder ni Adan iti imatang ti Dios, ngem iti ania a pamay-an a kasapulanna pay a maibilang a nalinteg?
3 Naparsua ni Adan a perpekto, nalinteg, a natauan nga anak ti Dios. (Lucas 3:38) Ti kinalintegna ket saan a naigatad wenno naibilang kenkuana. Dayta ti naisigud kenkuana. Manipud iti punto a kinaawan-basolna iti saklang ni Jehova, di kasapulan ni Adan a “maibilang” a nalinteg. La ketdi no isu ti agpasakup iti nainkalintegan a kinaturay ti Dios, mataginayonna ti nasayaat a takderna iti imatang ti Namarsua.
4 Nupay kasta, saanna pay a napaneknekan ti bagina a manangsalimetmet iti kinatarnaw ket saan pay a naikeddeng a maikari iti kalintegan a maipaay iti biag nga agnanayon ditoy daga. Agpaay iti dayta, masapul nga ipakitana, iti nawadwad a panawen, ti kinamatalekna ken Jehova ken iti kinasingedna iti kinalinteg. No napaneknekanna koma ti kinatarnawna iti sidong ti pannakasuot, inawatna koma ti kalintegan nga agbiag nga agnanayon ditoy daga. Naiyarig koma a kasla ti Dios ti nangibilang, wenno nairekord a mangikunkuna, a maikari ni Adan iti biag nga awan inggana. Kas simbolo iti daytoy, awan duadua nga isu koma ti inturong ni Jehova “iti kayo ti biag” ket pinalubosanna a nangan kadagiti bungana.—Genesis 2:9, 16, 17; 3:22.
5. (a) Aniat’ napukaw ni Adan nga agpaay kenkuana ken kadagiti putotna? (b) Ania a namnama ti pannakaisalakan manipud basol ken ipapatay ti inted ni Jehova iti natauan a sangaparsuaan?
5 Ngem napaay ni Adan idi nasuot ket gapu itoy napukawna ti kinaperpekto, kinalinteg, ken ti pannakaibilangna ken dagiti putotna kas annak. (Roma 5:12) Gapu itoy, dagiti kapuonan ni Adan naiyanakda amin a naisina iti Dios, a naikasigudanen ti kinakilloda. (Efeso 2:3; Roma 3:10) Gapuna, ti natauan a sangaparsuaan “ti naiturayan iti kinaubbaw” ngem “siiinanama,” a dayta a namnama ti pannakaispal manipud basol ken ipapatay ti naited nga insigida kalpasan ti iyaalsa idiay Eden.—Roma 8:20, 21; Genesis 3:15.
Naibilang a Nalinteg Sakbay ni Kristo—Kasano?
6, 7. (a) Agingga iti ania a sumagmamano a tattao naibilangda a nalinteg sakbay iti pannakatay ni Kristo kas daton? (b) Ania dagiti sumagmamano a pangarigan dagiti ad-adipen ni Jehova sakbay ti Kinakristiano nga immawat ti nalinteg a takderda?
6 Ti namnama ti sangatauan a maipaay ti pannakaispal manipud basol ken ipapatay agpannuray iti iyaay ti naikari a “bin-i,” ti bugbugtong nga Anak ti Dios. (Juan 3:16) Sakbay ti ipapatay ni Kristo kas daton, awan ti aniaman a pamay-an a pakagun-odan ti tao ti “pannakapakawan ken iti biag,” wenno “agpaay kadagiti amin a tattao a pakapalintegan ti biag.” (Roma 5:18, Revised Standard Version; New World Translation) Nupay kasta, uray pay sakbay a binayadan ni Kristo ti subbot a maipaay ti pakaisalakanan ti tao, sumagmamano a lallaki ken babbai ti namatin iti kari ti Dios ket pinaneknekanda dayta a pammati babaen iti ar-aramid. Gapu itoy, siaasi a pinakawan ni Jehova ti basolda ket inawatna ida kas ad-adipenna. Siaayat nga imbilangna kadakuada ti nakedngan a kinaawan-basolda, no iyar-arig iti kaaduan iti sangatauan a naisina iti Dios. (Salmo 32:1, 2; Efeso 2:12) Inikkanna ida ti nalinteg a takder, nga imbilangna ida a nalinteg agingga iti daydiay maiyanatup iti daydiay a tiempo.
7 Gapuna, gapu iti pammati ni Abel “naited kenkuana ti pannakapaneknek nga isu nalinteg.” (Hebreo 11:4) Ni Noe “naaramid a nagtawid iti kinalinteg a maiyannurot iti pammati.” (Hebreo 11:7) Agpapan pay kadagiti pagkapuyanna, naikuna a ni Job a “napalongdo ken nalinteg,” (Job 1:1, 22; 7:21) Ni Finees nangipakita ti regtana iti nadalus a panagdayaw, “ket dayta naibilang kenkuana a kinalinteg.” (Salmo 106:30, 31; Numeros 25:1-13) “Gapu iti pammati” ken babaen kadagiti ar-aramidna ti kinamanangaasi a naipaay iti ili ti Dios, ti di Israelita a balangkantis a ni Rahab immawat iti nalinteg a kasasaad, wenno naibilang a nalinteg.—Hebreo 11:31; Santiago 2:25.
No Kasano a Naibilang ni Abraham a Nalinteg
8, 9. (a) Makinkinalinteg ti kangrunaan a topiko ti surat ni Pablo kadagiti Taga Roma? (b) Iti ania a punto a ti pannakaibilang iti kinalinteg dagiti “sasanto” ket nalablabes ngem ti kinalinteg ni Abraham?
8 Ti kaso ni Abraham maikari iti naisangsangayan nga atension. Ti pannakaibilangna a nalinteg ti nadakawat dagiti dua a mannurat iti Kristiano a Griego a Kasuratan, nga agpadpada a nagsurat kadagiti Kristiano idi umuna a siglo a naawis nga agbalin a paset ti 144,000 a kamkameng iti naespirituan nga Israel.—Roma 2:28, 29; 9:6; Santiago 1:1; Apocalipsis 7:4.
9 Iti suratna kadagiti Taga Roma, inkalintegan ni Pablo a dagidiay “naawis nga agsanto” (Ro 1:7), agpadpada dagiti Judio ken Gentil (Ro 1:16, 17), naibilangda a nalinteg “gapu iti pammati uray awan dagiti ar-aramid ti linteg.” (Ro 3:28) Tapno mapapigsa ti argumentona, linuktanna iti atiddog a panangilawlawag (Ro 4:1-22) ket inadawna ti Genesis 15:6 a kunkunana: “Ket pinatina ni Jehova ket daytoy imbilangna kenkuana a kinalinteg.” Kalpasanna, kadagiti pangserra a Ro bersikulo ti kapitulo 4:25, kuna ni Pablo a ni Jesus “naiyawat gapu kadagiti babaktayo ket napagungar tapno pakaibilangantayo [kayatna a sawen, “dagiti sasanto” (Ro Roma 1:7)] a nalinteg.” Daydiay “tayo” ket saanna nga iraman ni Abraham, yantangay isut’ natayen a nabayag sakbay ti ipapatay ken panagungar ni Kristo. Gapuna, idi, kadagiti sumaganad a kapitulo, nagsao ni Pablo kadagidiay “agturay kas ar-ari” ken dagidiay naibilang a nalinteg “maipaay iti biag” a manginanama nga agbalin nga “annak ti Dios” ken “makipagtawid ken Kristo,” nalawag nga isu ti agsasao iti maysa a naiduma a banag manipud iti panangipabiang iti Dios ti kinalinteg ken Abraham.—Roma 5:17, 18; 8:14, 17, 28-33.
10. Kasano a mangted ti kanayonan a lawag ni Santiago maipapan ti saklawen ti pannakaibilang ni Abraham a nalinteg?
10 Ni Santiago dinakamatna met ni Abraham kas pangarigan a mangpaneknek a ti pammati ti masapul a paneknekan dagiti nadiosan nga ar-aramid. Kalpasan iti panangikunana a ni Abraham ket naibilang a nalinteg, nga inadawna ti Genesis 15:6, nanginayon ni Santiago ti maysa a komento a makatulong kadatayo a makakita ti saklawen ti pannakapalinteg ni Abraham. Isu ti nagsurat: “Ket natungpal ti surat a kunana: ‘Ni Abraham pinatina ni Jehova ket naibilang kenkuana a kinalinteg,’ ket napanaganan ‘gayyem ni Jehova.’” (Santiago 2:20-23) Wen, gapu iti pammatina, ni Abraham naibilang a nalinteg kas gayyem ni Jehova, saan a kas maysa nga anak nga addaan iti kalintegan iti perpekto a natauan a biag wenno iti pannakipagari a kadua ni Kristo. Makapainteres, ta idiay librona a Synonyms of the Old Testament, insurat ni Robert Girdlestone maipapan iti kinalinteg ni Abraham: “Daytoy a kinalinteg ket saan a naan-anay, kas pangarigan daydiay koma kasla mangidatag ken Abraham iti Dios kas maysa a nainkalintegan nga umawat iti tawid kas anak.”
Ti Libro a Pakalaglagipan ni Jehova
11. Nagnagan dagiti siasino ti naisurat iti libro a pakalaglagipan ni Jehova, ken apay?
11 Ti pannakaibilang a nalinteg iti limitado a pamay-an kadagiti matalek a lallaki ken babbai sakbay ni Kristo ket mangiladawan iti pudpudno, wenno ti aktual, a kinalinteg ken kinaperpekto a nainaig iti biag nga agnanayon a magun-odandanto idiay baro a daga ti Dios. Gapu iti namnamada iti biag, mabalin a mamatmatanda a ti nagnaganda naisurat iti maysa a libro a pakalaglagipan. (Idiligyo iti Malakias 3:16; Exodo 32:32, 33.) Daytat’ naglaon iti nagnagan dagidiay matmatmatan ni Jehova kas “nalinteg” a nangipamatmat ti pammatida babaen kadagiti nalinteg nga ar-aramid, ken nakaliniada nga umawat ti biag nga awan inggana ditoy daga.—Salmo 69:28; Habacuc 2:4.
12. Ania ti aramiden dagiti “nalinteg” a mapagungar tapno ti nagnaganda agtalinaed iti libro a pakalaglagipan ni Jehova?
12 Nupay kasta, dagita a nagnagan saanda pay a naisurat idiay “libro ti biag” ni Jehova. (Apocalipsis 20:15) Inton dagita a matalek a lallaki ken babbai idi ugma agsublidanton ditoy daga iti ‘panagungar dagiti nalinteg,’ awan duadua awatendanto a buyogen pammati dagiti sagana ni Jehova a maipaay ti biag babaen iti daton a subbot ni Kristo. (Aramid 24:15) Iti kasta agbalindanto a paset dagiti “sabsabali a karnero” ni Jesus, agraman iti “dakkel a bunggoy” a makalasatto iti “dakkel a rigat.” (Juan 10:16; Apocalipsis 7:9, 14) Iti panangaramidda iti dayta, masalimetmetandanto ti nagnaganda iti libro a pakalaglagipan ni Jehova.
Naibilang a Nalinteg kas Gagayyem Maipaay ti Pannakailasat
13. Asinoda itan dagiti inyeg ti Naimbag a Pastor, ket kasano a maisuratda iti libro a pakalaglagipan ni Jehova?
13 Ti Naimbag a Pastor, ni Jesu-Kristo, iyegna itan dagiti “sabsabali a karnero” a di nairaman iti “bassit nga ipastoran” dagiti 144,000 a “sasanto” nga isut’ nakaitedan ti nailangitan a Pagarian. (Lucas 12:32; Daniel 7:18) Dagitoy a “sabsabali a karnero” denggenda iti timek ti Naimbag Pastor. (Juan 10:16) Mamatida ken Jehova ken iti Anakna. Idedikarda ti biagda ken Jehova babaen iti daton a subbot ni Kristo. Mabautisaranda iti nagan ti Ama ken ti Anak ken ti nasantuan nga espiritu” ket bigbigenda ti pannakasapul a sukayan “ti bunga ti espiritu.” (Mateo 28:19, 20; Galacia 5:22, 23) Ti nagnaganda naisurat iti libro a pakalaglagipan ni Jehova.
14. Aniat’ mangted iti nadalus a takder dagiti “sabsabali a karnero” iti imatang ni Jehova, ngem iti ania ti kasapulan nga idawatda pay iti Dios?
14 Dagitoy a “sabsabali a karnero” a naurnongen iti daytoy panawen ti panungpalan buklenda ti “dakkel a bunggoy” a nakita ni apostol Juan iti sirmata, kalpasan ti pannakakitana kadagiti 144,000 a kamkameng ti naespirituan nga Israel. (Apocalipsis 7:4, 9) Inladawanna ti “dakkel a bunggoy” kas “binuggoanda dagiti pagan-anayda ket pinapudawda ida iti dara ti Kordero.” (Apo 7 Bersikulo 14) Gapu iti pammatida iti naiparukpok a dara ti Kordero, maysa a rukod ti kinalinteg ti naigatad kadakuada. Nailadawanda babaen kadagiti simboliko a puraw a pagan-anayda. Addaanda iti nadalus a takder iti imatang ni Jehova, ket “gapu itoy” pinalubosanna ida nga ‘mangipaay ti sagrado a serbisio iti aldaw ken rabii idiay templona.’ (Apo 7 Bersikulo 15) Kaskasdi, tunggal aldaw masapul nga ipudnoda dagiti basbasolda ken Jehova ket dawatenda ti pammakawan baeten ken Jesu-Kristo.—1 Juan 1:9–2:2.
15. (a) Kasano a ti pangngarig dagiti karnero ken kalding ipakitana a dagiti “sabsabali a karnero” addaanda iti nalinteg a takder iti Dios? (b) Agingga iti ania a maibilangda a nalinteg iti agdama?
15 A dagiti “sabsabali a karnero” ket gagayyem ida ti Dios ken uray pay itan addaandan ti limitado a nalinteg a takder iti imatangna ti pinagbalin met a nalawag ti padto ni Jesus iti ‘pagilasinan ti kaaddana,’ nga inramanna iti pangngarig dagiti karnero ken dagiti kalding. Agsipud ta dagiti “karnero” nagaramidda iti naimbag iti natda kadagiti 144,000 a “kakabsat” ni Kristo nga adda pay ditoy daga, isuda ti binendisionan ti Ama ni Jesus ket naawaganda a “nalinteg.” Kas ken Abraham, naikuentada wenno naibilangda, a nalinteg kas gagayyem ti Dios. Ti nalinteg a takderda kaipapanannanto met ti panakailasatda inton dagiti “kalding” suminadan iti “agnanayon a pannakagessat.” (Mateo 24:3–25:46) Isuda “dagiti naggapu iti dakkel a rigat” nga isu iti mangtanda ti panungpalan ti agdama a dakes a sistema dagiti bambanag.—Apocalipsis 7:14.
Naiyegda iti Kinaperpekto
16. Kasanotayo nga ammo a ti dakkel a bunggoy saanda pay a naibilang a nalinteg maipaay ti biag sakbay ti “dakkel a rigat”?
16 Ti “dakkel a bunggoy,” a makalasat ti “dakkel a rigat,” saanda pay a nalinteg a maipaay ti biag. Makitkitatay daytoy manipud iti kinapudno a ti kapitulo a nangdakawat kadakuada ituloyna a kunaen: “Ta ti Kordero nga adda iti tengnga ti trono, ipastorannanto ida, ket iturongnanto ida kadagiti ubbog ti danum ti biag.” (Apocalipsis 7:17) Gapuna, numan pay iti napalabas imbilang ti Dios kas nalinteg no iyar-arig ti sangatauan nga en heneral ken kas kadagiti gagayyemna, kasapulanda ti kanayonan pay a tulong, wenno mangala kadagiti kanayonan nga addang, tapno maibilangda a nalinteg a maipaay ti biag.
17. (a) Aniat’ kaipapanan “ti pannakaagas dagiti nasnasion”? (b) Asino dagiti makasapul a maisurat ti nagnaganda idiay “libro ti biag”?
17 Bayat ti Milenio, ti naitronon a Kordero, a ni Kristo Jesus, agraman dagiti 144,000 a kakaduana nga ar-ari ken papadi, iyaplikardanto ti programa iti naespirituan ken nailasagan a “pannakaagas dagiti nasnasion.” (Apocalipsis 22:1, 2) Dagita a “nasnasion” ket buklento dagiti nakalasat ti dakkel a rigat, iti aniaman nga annak a maipasngayto kadakuada kalpasan ti Har–Magedon, ken dagidiay agsublinto iti “panagungar agpadpada dagiti nalinteg ken nakillo.” (Aramid 24:15) Amin a namati iti dara ni Kristo ken agaramid kadagiti maiyanatup nga “ar-aramid” ti agangay maisuratto dagiti nagnaganda “idiay libro ti biag.”—Apocalipsis 20:11-15.
18 Iti ania a kasasaad ti nakaiyeganton dagiti agnaed iti daga inton panungpalan ti Milenio?
18 Inton panagpatingga ti Milenio a Panagturay ni Kristo, dagidiay agnanaed iti daga a nangipakita nga inakseptarda ti subbot ni Kristo ket nagbiagda kadagiti pagalagadan ni Jehova maiyegdanto iti kinaperpekto. (Apo 20 Bersikulo 5) Agbalindanto a kas ken Adan sakbay ti panagbasolna. Kas kenkuana, masuotdanto iti kinatulnogda.
Ti “Nadayag a Wayawaya” kas “Annak ti Dios”
19. (a) Anianto ti mapasamak a dagdagus kalpasan ti Milenio? (b) Anianto ti mapasamak kadagidiay ti nagnaganda di nakasurat “iti libro ti biag”?
19 Dagdagus kalpasan ti Milenio, iyawatton ni Kristo ken Amana, ti perpekto a natauan a rasa. (1 Corinto 15:28) Ni “Satanas maluk-atanto” a maipaay iti makaikeddeng a pakasuotan ti sangatauan. (Apocalipsis 20:7, 8) Ti nagnagan ti asinoman a napaay iti suot saanto a masarakan a naisurat iti libro ti biag.” Isudanto ti simboliko a “maitapuak idiay danaw nga apuy,” nga isu “ti ipapatay a maikadua.”—Apocalipsis 20:15; 21:8.
20 Dagidiay a nagbalin a nasungdo ken Jehova maisuratton a di mapunas dagiti nagnaganda idiay “libro ti biag,” kas dagidiay perpekto iti kinatarnaw ken maikari iti kalintegan iti biag nga agnanayon ditoy daga. Ni Jehova a mismo ti mangiwaragawagton ti kinalinteg iti naan-anay a kaipapananna. (Roma 8:33) Isudanton ti napalinteg a maipaay ti biag nga awan inggana. (Apocalipsis 20:5) Ti Dios ti mangibilang kadakuadan kas dagiti naindagaan nga annakna, ket sumrekdanto iti naikari a “nadayag a wayawaya dagiti annak ti Dios.” (Roma 8:20, 21) Maisublinton ti talna ken panagkaykaysa iti sapasap. Ti pannakikappia iti Dios naan-anayton kadagiti “bambanag nga adda iti rabaw ti daga” ken kadagiti “bambanag nga adda sadi langit.” (Colosas 1:20) Ti naasi nga urnos ni Jehova ti pannakapalinteg ket naserbiannanton ti panggepna. Iti saludsod a, “Nalintegkayo aya iti Dios?” tunggal parsua idiay langit ken ditoy daga mabalindanton ti sumungbat ti wen ken mainayon pay: “Bendision ken dayaw ken dayag ken pannakabalin ti adda koma iti Daydiay agtutugaw iti trono ken iti Kordero iti awan inggana.”—Apocalipsis 5:13.
Maipapan ti panagtakder dagiti “sabsabali a karnero” iti imatang ti Dios—
◻ Apay a ni Adan ket saan a naibilang a nalinteg?
◻ Agingga iti ania a ni Abraham ken dagiti dadduma a lallaki ken babbai sakbay ni Kristo naibilangda a nalinteg?
◻ Makin-nagan dagiti naisurat iti libro a pakalaglagipan ni Jehova?
◻ Agingga iti ania a dagiti “sabsabali a karnero” addaanda ti nalinteg a panagtakder iti agdama a tiempo, ket kaanonto a maiyegda iti kinaperpekto?
20. (a) Asino dagiti ibilang ni Jehova a nalinteg maipaay iti biag, ken apay? (b) Kasanonto a ti naasi nga urnos ni Jehova a pannakapalinteg ket naserbiannanton ti panggepna?
[Blurb iti panid 28]
Babaen iti pammati “iti dara ti Kordero,” ti “sabsabali a karnero” naaddaanda iti naanamongan a takder iti imatang ni Jehova ket naibilangda a nalinteg a maipaay iti pannakipagayam kenkuana ken maipaay iti pannakailasat bayat ti “dakkel a rigat.” Magun-odandanto ti kinaperpekto inton agngudo ti Milenio. Kalpasan ti maudi a pannakasuot maibilangdanto a nalinteg a maipaay iti biag.