Iwaragawagyo ti Pagarian ti Dios
“Bay-am dagiti natay a mangipumpon kadagiti minatayda, ngem sika mapanka ket iwaragawagmo ti pagarian ti Dios.”—LUCAS 9:60.
1. Ania a nasken a salsaludsod ti pinataud dagiti sasao ni Jesus idiay Lucas 9:60?
TI Pagarian ti Dios—dayta ti kapapatgan unay nga interes iti biag ni Jesus! Kasta met laeng ita kadatay amin a pudpudno a paspasurot dagiti addangna. Kas Kristiano, pagregreggetantayo a suroten a sisisinged dagiti addang ni Jesus babaen iti panagbiag a maitunos iti Biblia. (1 Pedro 2:21) Ngem ita, bayat ti kaaddatayon iti tawen 1986, mabalin kadi a kasapulan ti intay panangsukimat manen kadagiti ipangpangrunatayo iti biag? Kas pangarigan, kasanot’ panangilawlawagyo ti panangibaga ni Jesus iti maysa a “bay-am dagiti natay a mangipumpon kadagiti minatayda”? Apay a kalpasan dayta panunotenyo nga impaganetget ni Jesus ti kinapateg ti panangiwaragawag ti mensahe ti Pagarian, a maisupadi kadagiti kasla maiyanatup a pakaseknan ti pamilia? Ania ti maikunayo?
2. Kaano ti panangrugi ti kinasoberano ni Jehova, ken kasano ti kapaut dayta?
2 Nabayagen sakbay nga inusar ni Jesus ti sasao a “ti pagarian ti Dios,” nagsuraten ni salmista David iti sidong ti nadiosan a pannakapaltiing: “Ni Jehova impasdekna ti tronona kadagiti langlangit; ket ti pagarianna pagturayanna amin.” (Salmo 103:19) Ti kinasoberano ni Jehova ti nangrugi idi rinugianna ti panamarsuana. Dagiti pamuon ti tronona nikaanoman didanto maisen. Ti kalinteganna iti sapasap a kinaturay nikaanoman dinto maagaw kenkuana. Ngarud saanen a pagsidsiddaawan ti panangpatigmaan ti salmista: “Ipalawagyo ti dayagna kadagiti nasnasion, . . . ta naindaklan ni Jehova ket rebbengna unay ti maidaydayaw”!—Salmo 96:3, 4; 109:21; Daniel 4:34, 35.
3. (a) Ania a paspasamak ti nangiturong iti pannakakarit ti kinaturay ni Jehova? (b) Kasano ti pinanggep ti Dios a pangibanag ti salisal ti sapasap a kinaturay?
3 Nupay kasta, saan nga amin nagtultuloy a mangidaydayaw ken Jehova. Ni Satanas, ti immun-una nga apostata, ti nangkarit iti pamay-an a panangiyebkas ken panangwatwat ni Jehova iti kinasoberanona kadagiti parparsuana ditoy daga. (Genesis 3:1-5; Job 1:6-12; 2:1-5) Kas resultana, ditoy daga ken iti kamaudiananna idiay langit, dadduma kadagiti parsua ti naakaran iti rebelioso a kababalin ni Satanas. Inimpluensiaan met ni Satanas dagiti tattao a mangibangon iti agsasaruno a natauan a pagpagarian. Inaramatna dagitoy a mangkarit ti kinalinteg ti panagturay iti Dios. (Apocalipsis 13:1-6) Tapno maibanag daytoy a salisal iti sapasap a kinasoberano, nangpanggep ni Jehova iti maysa a banag a karkarna, kas naipadto idiay Daniel 2:44: “Ket kadagiti al-aldaw dagita nga ar-ari ti Dios ti langit mamangonto ti maysa a pagarian a kaanoman dinto madadael. . . . Ngem burakennanto ken ibusennanto amin dagitoy a pagpagarian, ket isu ti agtalinaedto iti panawen a di nakedngan.”
Ni Jehova Nagbalin nga Ari ti Israel
4. Iti ania a kaipapanan a naikuna ni David nga “agari ni Jehova,” ket ania ti inawagan ti kasta a pasamak?
4 Ita agbalin ngarud a nalawagen a, numan pay ti kinasoberano ni Jehova ti nangrugi manipud iti panamarsuana, pinanggepna ti mangaramid ti maysa nga espesipiko a panangiyebkas ti kinaturay tapno maibanag nga agnanayonen ti salisal maipapan iti kinaumiso ti panagturayna. Daytoy nga ebkas ket isu ti nailangitan a Mesianiko a Pagarian. Ti naindagaan a pagarian nga impasdek ni Jehova iti nasion ti Israel ti nagserbi a kas maysa a bassit a representasion daytoy a Pagarian “a kaanoman dinto madadael.” Gapuna, idi inyeg ni Ari David ti lakasa ti tulag idiay siudad ti Jerusalem, nabalinanna ti sitatan-ok a nangikanta: “Agragsak koma dagiti langlangit, ket agrag-o koma ti daga, sawenda koma iti tengnga dagiti nasnasion, ‘agari ni Jehova!’” (1 Cronicas 16:31) Wen, iti naisangsangayan a kaipapananna ni Jehova ti “agari” para iti intero nga Israel. Daytat’ maysa a panawen ti dakkel a panagrag-o, ket tarigagayan ni David nga iwaragawag dayta nakaskasdaaw a pasamak!
5, 6. (a) Kadagiti ania a pamay-an a ni David naisalsalumina kadagiti ar-ari? (b) Asino ti inladawan ni David, ket kadagiti ania a banag?
5 Ti napalabas a kinapastor ni Ari David ti nangted iti pakaibatayan ti panagbalinna a naisalsalumina nga ari kadagiti ar-ari. Isu ti maysa a pastor-ari. Insalaysay ti salmista ti panangpili ti Dios ken David a maipaay iti daytoy a saad, a kunkunana: “[Ni Jehova] pinilina met ni David nga adipenna ken impanawna kadagiti pagapunan ti karnero . . . tapno isu ti pastor ni Jacob nga ilina ken iti Israel a pinatawidanna. Iti kasta isu idi ti pastorda kas maiyannurot iti kinalinteg ti pusona, ket impanguluanna ida babaen ti kinalaing ti imana.”—Salmo 78:70-72.
6 Ti naannad a panangipastor ni David iti ilina, ti kinatarnaw iti pusona iti Diosna, ken ti kinasigona kas lider ti nakakualipikar a naimbag kenkuana a mangiladawan iti um-umay a Mesias, nga isunto ti mausar iti naisangsangayan a pamay-an a panangiyebkas ni Jehova iti sapasap a kinaarina ken agtignay kas maysa a naayat a Pastor-Ari. Daytoy nakaskasdaaw a pasamak iti pangpanggep ni Jehova iti kamaudiananna impadto ni mammadto nga Ezequiel: “Ket bangonekto ti maysa a pastor kadakuada [Israel], ket pakanennanto ida, nga isu ni adipenko a David. . . . Ket siak, ni Jehova, siakto ti Diosda, ket ni adipenko a David prinsipe kadakuada. Siak, ni Jehova, sinaok.”—Ezequiel 34:22-24.
Agparang ti Naipadto a Pastor-Ari
7, 8. (a) Kasano a naipabigbig ti naipadto a Pastor-Ari, ket ti panagparangna maikari iti ania? (b) Agpaay iti ania a panggep a ni Jesus ket “inanamongan” ni Jehova?
7 Daydiay impadto ni Jehova isu ti mismo nga Anakna, ni Jesus. Maipapan kenkuana, kinuna ni anghel Gabriel ken birhen Maria: “Ket adtoy! agsikogkanto ken ipasngaymonto ti maysa nga anak a lalaki ket panaganamto ti Jesus. Isu natan-okto ket managanto Anak ti Kangatuan; ket ni Jehova a Dios itednanto kenkuana ti trono ni David nga amana, ket agarinto iti balay ni Jacob iti agnanayon, ket ti pagarianna awanto ti tungpalna.” (Lucas 1:31-33) Anian a nakaskasdaaw nga ebkas ti kinaari ni Jehova daytoy ti pagbalinannanto! Pudno unay, ti kasta a mapasungad a pasamak maikari iti naindaklan a sangalubongan a panangiwaragawag: “Ni Jehova nagari!”
8 Simmaruno iti namilagruan a pannakaiyanak ni Jesus ken ti panagdakkelna iti kinanataengan, impresentarna ti bagina a maipaay iti bautismo kadagiti dandanum ti karayan Jordan. Iti dayta binigbig ti Dios ni Jesus kas Anakna babaen iti panangiparukpokna ti espiritu kenkuana ken panagkunana: “Sika ti Anakko, a dungdungnguen; inanamonganka.” (Lucas 3:22) Agpaay iti ania a “naanamongan” ni Jesus? Ilawlawag ti salaysay ni Lucas: “Ket ni Jesus met laeng, idi nangrugi iti trabahona, agtawen ti kas tallopulo.” (Lucas 3:23; Ref. Bi. footnote: “Wenno, ‘nangrugi a [mangisuro].’”) Ti Revised Standard Version ken ti New International Version kunana, “Idi rinugianna ti ministeriona.” Ania ti “trabaho,” wenno “ministerio” ni Jesus? Ania ti “insurona”? Ni mannurat a Mateo ti mangted ti sungbat: “[Ni Jesus] linawlawna ti amin a Galilea, a nangisursuro kadagiti sinagogada ken nangikaskasaba ti naimbag a damag ti pagarian ket nangpapaimbag kadagiti amin a kita ti sakit ken amin a kita ti an-anayen kadagiti umili.”—Mateo 4:23.
9. Kadagiti ania a bambanag a ni Jesus umasping ken amana a David?
9 Impamaysa ni Jesus ti biagna iti ‘panangiwaragawag ti pagarian ti Dios.’ Kas ken David nga amana, indemostrana ti kinatarnaw ti pusona babaen ti di pulos panangikompromiso ti kinasungdona iti Pagarian ni Jehova. (Lucas 9:60; 4:3-13; Juan 16:33) Pinaneknekan ni Jesus ti bagina nga isu ti “maymaysa a pastor” nga inkari ni Jehova nga ibangonna. Isu ti maragsakan a mangtaraon iti naespirituan kadagidiay pinagbalin dagiti papangulo a relihioso a ‘naliday ken nawarawara a kasda la karkarnero nga awan ti pastorda.’ (Mateo 9:36) Maipapan iti nasigo a panagtrabaho a panangipastor kadagiti tattao ken no kasano ti agin-inut a panangsaknapna kadagiti umay a tawtawen, kinuna ni Jesus: “Siak ti naimbag ti pastor, ket ammok dagiti karnerok ket dagiti karnerok ammodak . . . Ket adda met sabsabali a karnerok, a saanda a naitipon itoy a pagtaraknan; dagidiay masapul nga iyegko, ket denggendanto ti timekko, ket addanto maymaysa nga arban, ken maymaysa a pastor.”—Juan 10:14, 16.
10. Kasanotay a makaadal manipud iti nadumaduma a panagtignay dagiti Judio iti panangawis ni Jesus iti isursurotda kenkuana?
10 Kasano ti panagtignay dagiti Judio iti awis ni Jesus iti panagbalinda kas dagiti kimmarnero a paspasurotna? Nagduduma ti panagtignayda. Bayat ti intay panangsukimat ti sumagmamano kadagitoy a panagriknada, usigenyo no ania ti panagtignayyo met manipud naiyam-ammokayo iti mensahe ti Pagarian ti Dios.
“Surutendak”—Kasano ti Isusungbatyo?
11. Isalaysayyo ti isusungbat da Simon, Andres, Santiago, Juan, ken ni Mateo iti awis ni Jesus a, “Surutendak.”
11 Bayat a magmagna ni Jesus iti denna ti Baybay ti Galilea, nakita ni Simon ken ni Andres a kabsatna nga agdakdaklisda. “Ket kinuna kadakuada ni Jesus: ‘Surutendak ket pagbalinenkayto a dumadaklis kadagiti tao.’ Ket dagus a pinanawanda dagiti iketda ket simmurotda kenkuana. Ket idi nagna pay bassit nakitana ni Santiago nga anak ni Zebedeo ken ni Juan a kabsatna . . . ket inayabanna ida a dagus. Ket pinanawanda ni amada a Zebedeo iti barangay agraman kadagidi mangmangged ket simmurotda kenkuana.” (Marcos 1:16-20) Ti isu met laeng a positibo nga isusungbat ti impakita ti agsingsingir ti buis a ni Levi, wenno Mateo. “[Ni Jesus] kinunana kenkuana: ‘Surutennak.’ Ket pinanawanna amin dagidi ket timmakder ket simmurot kenkuana.”—Lucas 5:27, 28.
12. Ania ti problema daydiay lalaki a nagkuna ken Jesus: “Surutenkanto uray no adino ti papanam”?
12 Nupay kasta, saan nga amin ket nagtignay a sipopositibo iti awis ni Jesus, a “Surutendak.” Panunotenyo daydiay lalaki a naisalaysay idiay Lucas kapitulo 9, a nasarakan ni Jesus bayat ti ipapanna kadagiti nagduduma a purok. Kinunana ket Jesus: “Surutenkanto uray adino ti papanam.” Ipamatmat ti salaysay ni Mateo a daytoy a lalaki ket maysa nga eskriba. Dagiti eskriba ket tangtangaden ida dagiti tattao ket maaw-awaganda “Rabbi.” Ita amadenyo ti sungbat ni Jesus: “Dagiti musang adda rukibda ket dagiti tumatayab ti tangatang adda umokda, ngem ti Anak ti tao awan ti pangisadaganna iti ulona.” (Lucas 9:57, 58) Ibagbaga ni Jesus iti daytoy a tao a masapul nga anusanna no isut’ agbalin a pasurotna. Ipaspasimudaagna a daytoy a tao ket natangsit unay a mangawat iti kastoy a modo ti panagbiag. Ti di kinasigurado ti saanna a pannakaammo no sadino ti pangbusbosanna iti sumaruno a rabii ket napalalo unay kenkuana nga awaten.
13. Apay a kasta ti panangsungbat ni Jesus iti sabali pay nga agbalin koma a pasurotna?
13 Kinuna ni Jesus iti sabali pay: “Surutennak.” Ngem, kas sungbat, kinunana ken Jesus: “Palubosannak pay a mapan ken mangipumpon ken amak.” Denggenyo ti sungbat ni Jesus: “Bay-am dagiti natay a mangipumpon kadagiti minatayda, ngem sika mapanka ket iwaragawagmo ti pagarian ti Dios.” (Lucas 9:59, 60) Ti pambar daytoy a lalaki ket saanna nga ipakpakita a natayen ni amana. No natay koman ni amana, nalabit a ti anak a lalaki ket awan koma idiay kalsada a dumdumngeg ken Jesus. Saan, agparang manipud iti kinuna ti lalaki nga isut’ umud-ud-od pay ti panawen tapno urayenna ti ipapatay ni amana. Isut’ saan a sisasagana a mangipangpangruna ti Pagarian ti Dios iti biagna a dagdagus.—Mateo 6:33.
14, 15. (a) Aniat’ ipamatmat ti kalikagum daydiay maikatlo a lalaki ken Jesus? (b) Ania a leksion ti intay maadal ita manipud sungbat ni Jesus iti daytoy a lalaki?
14 Ti rekord sawenna pay ti maikatlo a lalaki, a nagboluntario: “Surutenkanto, Apo; ngem palubosannak nga innak pay agpakada kadagiti kabbalayko.” Kaawatan a daytoy a lalaki ket dumawdawat kadagiti kondision a maikabit iti panagbalinna a pasurot ni Jesus. Iti epektona, kunkunana ken Jesus: ‘Adtoy! Agbalinak a maysa kadagiti paspasurotmo, no . . . ’ Aniat’ sungbat ni Jesus? “Awan ti tao nga idinto nga immigem iti arado ken tumaliaw pay iti likudan a maikari iti pagarian ti Dios.” (Lucas 9:61, 62) No ti maysa nga agar-arado kayatna ti agarado a nalinteg iti pagtalonanna, masapul a kumita a sililinteg iti sanguananna. No italiawna ti ulona, dayta nga ar-araduenna ti mabalin a kumillo. Mabalin nga isu pay ti maitibkol mismo! Kasta met kadagiti paspasurot ti addang ni Jesus; ti itatalliawda iti daytoy daan a sistema dagiti bambanag, uray pay iti apagkanito, ket maysa a panangaw-awis ti riribuk, nga isut’ mangitibkol ti sakada ket maisiasida manipud iti ‘nailet a dalan nga agturong iti biag.’—Mateo 7:14; kitaenyo met ti Lucas 17:31-35.
15 Nangngeganyo kadi metten ti awis ni Jesus: “Surutendak”? Ania ti sungbatyo? Impakitayo met laeng aya ti umas-asping a positibo nga isusungbat kas kada adalan a Simon, Andres, Santiago, Juan, ken ni Mateo? Kas kadagidiay a lallaki sisasaganakayo met laeng aya nga agaramid iti aniaman a sakripisio a kasapulan tapno masurotyo dagiti addang ti Apo? No ti sungbatyo ket wen, no kasta tagiragsakenyonto met ti di maartapan a pribilehio a makipaset iti panangiwaragawag ti naimbag a damag ti Pagarian ti Dios.
16. Kasanot’ panangisagana ni Jesus kadagiti adalanna a makipaset kenkuana iti panangikaskasaba ti naimbag a damag?
16 Sakbay nga imbaon ni Jesus dagiti adalanna a mangiwaragawag ti Pagarian, sinursuruanna a silalaing ida no kasano ti panangaramid iti dayta babaen ti bukodna a personal nga ulidan. Simmaruno iti daytoy, inikkan ni Jesus ida kadagiti detaliado nga instruksion no kasano ti panangsapul kadagiti tattao a kimmarnero iti sadinoman a teritoria. Dagiti instruksion ni Jesus ti kaskasdi nga agaplikar pay iti daytoy maika-20 a siglo. Sukimatentayo ti sumagmamano kadagitoy kas naikor-it iti kapitulo 10’s ti salaysay ni Mateo.
Dagiti Instruksion iti Panangikasaba ti Pagarian
17. Pagdiligenyo ti kababagas ti mensahe ti Pagarian a naikaskasaba idi umuna a siglo iti daydiay adda itatta.
17 Ti tema ti mensahe dagiti adalan ket kapareho daydiay inwaragawag ni Jesus: “Ket no mapankayo, mangaskasabakayo a kunkunayo, ‘Ti pagarian ti langit dimtengen.’” (Mateo 10:7) Nupay kasta, dayta a Pagarian naipasdeken kadagiti langlangit. Ti Pastor-Ari ni Jehova, a ni Kristo Jesus, agturturayen! Gapuna, dagiti sasao ni David ti addaan dakdakkel a kaipapanan ita: “Agragsak koma dagiti langlangit, ket agrag-o koma ti daga, sawenda koma ti tengnga dagiti nasnasion, ‘Agari ni Jehova!’” (1 Cronicas 16:31) Itatta, saan laeng nga addaantayo ti pribilehio a mangsuportar iti daytoy naisangsangayan nga ebkas ti sapasap a kinaari ni Jehova no di ket addaantay met ti ragsak nga agbibiag iti panawen inton ti isyu ti kinasoberano ni Jehova ket maibanagen nga agpaay iti amin a tiempo nga umay.
18. Ania ti impaganetget ni Jesus kadagiti pasurotna idiay Mateo 10:8-10, ken asino ti nangnangruna a makaapresiar iti daytoy itatta?
18 Salaysayen ti Mateo 10:8-10 ti kababalin dagidiay makiraman iti trabaho a panangasaba. Masapul a ti Pagarian ti Dios ti maipangpangruna iti panagbiagda, dagiti pisikal a kasapulan ti maikadua laeng. Apay? Kuna ni Jesus: “Ta ti mangmangged maikari iti taraonna.” Ti nailangitan nga Amatayo kanayon nga aywanannanto dagidiay agtalek kenkuana. Ket ginasgasut a ribo kadagiti amin-tiempo a ministro dagiti Saksi ni Jehova itatta ti makapaneknek iti daytoy a banag.—Numeros 18:30, 31; Deuteronomio 25:4.
19. Kasano ti panangbiruk kadagiti maikari itatta, ket iti sidong ti panangiturong ti siasino?
19 Sumaruno nga imbilin ni Jesus: “Ket uray sadino a siudad ken purok a serkanyonto, birukenyo a nalaing idiay no asino ti maikari, ket agdaguskayo idiay agingga iti pumanawkayo.” (Mateo 10:11) Maikari iti ania? Maikari iti pribilehio a mangpadagus iti daytoy nga adipen ni Jehova ken dumngeg iti mensahe ti Pagarian ti Dios. Siempre, dagiti adalan idi nalabit agtalinaedda iti pagtaengan dayta tao a maikari ket usaren dayta kas maysa a pagdagusan bayat a pendaenda ti intero a teritoria tapno agsapul pay kadagiti dadduma a maikari. Itatta, sursuroten dagiti Saksi ni Jehova iti umas-asping a pamay-an. Mangbusbusbosda ti minilmilion nga oras ken adu a pigsa iti panangbiruk kadagiti maikari kadagiti nadumaduma a teritoria. Kalpasanna, inton masarakan dagitoy, addaan dakkel a ragsak dagiti Saksi a mangsarungkar manen kadagitoy a bumalay ken ilawlawag kadakuada ti Sao ti Dios. Gapuna, itatta, silalaing nga ipaspastoran ni Jesus dagiti dadduma a kimmarnero iti makinkanawan a paborna.—Mateo 25:31-33.
20. Kasano a mapasaran wenno lak-amen ti maikari a sangakabbalayan ti talna nga ipaay dayta babaen iti manangaskasaba ti Pagarian?
20 “Ket no sumrekkayo iti balay, agkablaawkayo; ket no ti balay maikari, ipaayyo koma kenkuana ti talna.” (Mateo 10:12, 13) “Talna koma iti daytoy a balay” ti gagangay a kablaaw idi kaaldawan ni Jesus. (Lucas 10:5) Nagkanta dagiti anghel idi pannakaiyanak ni Jesus: “Dayaw iti Dios idiay kangatuan, talna iti rabaw ti daga kadagiti tattao nga addaan naimbag a nakemna.” (Lucas 2:14) Ti maikari a sangakabbalayan linak-amda daytoy naipadto a talna babaen ti panangawatda ti mensahe ti Pagarian dagiti ad-adalan. Itatta, ti naimbag a damag ti Pagarian ti addaan ti isu met laeng nga epekto. Iyegna dagiti tattao iti natalna a pannakirelasion iti Dios baeten ken Jesu-Kristo, ket dayta met ti mangyeg talna iti tengnga dagiti agkakapammatian.—2 Corinto 5:20, 21; Filipos 4:7; Efeso 4:3.
21. Apay a ti teksto iti tawen para iti 1986 maiyanatup unay?
21 Bayat ti 1986 a tawen kalendario, dagiti Kingdom Halls dagiti Saksi ni Jehova ti intero a daga ti mangiparangto iti teksto iti tawen a naadaw manipud Lucas 9:60: “Inkayo . . . , iwaragawagyo ti pagarian ti Dios.” Anian a nagsayaat a panangipalagip ken pammaregta daytoy para kadagiti amin a pudno a ministro ti Dios a makiraman a regular iti panangikaskasaba ti Pagarian ti Dios! Wen, dayta a Pagarian adda ditoyen nanipud pay 1914! Dayta ti instrumento ti Dios nga adda kadagiti im-ima ti Mesianiko nga Arina a pangrumek iti amin a nailubongan a pagpagarian ni Satanas. Awan duadua, ngarud, a dayta a Pagarian ti Dios rebbeng nga umun-una ti pategna iti biag ti tunggal maysa kadagiti Saksi ni Jehova. Ammotayo a daytoy ti pamuspusan a pakaisalakanan ti biagtayo!—1 Timoteo 4:16.
Kasano ti Panangsungbatyo?
◻ Kasano kabayagen ken katalged ti kinaari ni Jehova?
◻ Ania a sapasap a salisal ti makasapul itan ti pannakaibanagna?
◻ Aniat’ masapul a sisasagana nga aramiden amin a paspasurot ni Jesus?
◻ Apay a ti balikas nga “agari ni Jehova” ti dakdakkel kaipapananna itatta?
◻ Ania a panggep ti serbian ti 1986 a teksto ti tawen?