Sigaganat a Kasapulan​—Ad-adu Pay nga Agani!

“Ti anien, kinapudnona, ti adu, ngem dagiti agani bassitda. Gapuna dawatenyo iti Apo ti paganian ta mangibaon kadagiti agani iti paganianna.”​—LUCAS 10:2.

1. Kasano ti mabalin a panagrasonyo maipapan iti sasao ni Jesus idiay Lucas 10:2, ngem ania ti naimbag a maibalakad nga aramidenyo?

BAYAT ti panangbasbasayo kadagitoy a sasao ni Jesus, mariknayo aya a nairamankayo? Yantangay dagitoy naisaoda nasurok a 19 siglo ti napalabasen, mabalin a mairasonyo a saandan a napateg. Ti kasta a darasudos a konklusion agbalinto a pudno a maysa a biddut. Tapno makita ti naan-anay a pateg dagiti sasao ni Jesus, tumaliawtayo no ania ti napasamak idi a damo a naiyebkas dagita a sasao, ket kalpasanna sukimatentayo dagiti bukodtayo a kasasaad itatta.​—Idiligyo iti 1 Corinto 10:11.

2. Ania a kasasaad ti agkasapulan ti naganat a panagtignay a naipasango ken Jesus idi 32 K.P., ket kasanona a tinaming dayta?

² Idi 32 K.P., kalpasanen ti Piesta dagiti Tabernakulo, innem a bulan laengen ti nabatbati sakbay a sanguen ni Jesus ti ipapatay iti maysa a kayo a pagtutuokan. Tapno makatulong a mangpapartak ti trabaho a panangaskasaba, nangibaon ni Jesus ti 70 nga ad-adalan “a sagdudua iti masanguananna iti isuamin a siudad ken disso a dandani a papananna.” Napanda a dagiti sasao ni Jesus umaw-aweng iti laplapayagda: “Ti anien, kinapudnuanna, nga adu, ngem dagiti agani bassitda. Gapuna dawatenyo iti Apo ti paganian ta mangibaon kadagiti agani iti paganianna.”​—Lucas 10:1, 2.

Napasamak ti Dakkel a Panagani

3. Salaysayenyo ti sumagmamano kadagiti bunga iti limmanlan a panangasaba bayat dagiti maudi a sumagmamano a bulan iti ministerio ni Jesus.

³ Ania ti imbunga daytoy limmanlan a regget ti panangasaba? Mabasatayo: “Ket nagsublida dagiti pitopulo a siraragsak, a kunkunada: ‘Apo, uray pay dagiti sairo pinaiturayanda kadakami iti naganmo.’” Anian a nakaskasdaaw a panangiparangarang daytoy iti pannakabalin ti Dios kadagiti sairo! Ti kasta a nagsayaat a report ti serbisio ti pudno a nangparagsak ken Jesus, ta kunana: “Nakitak ni Satanas a natnag nanipud langit a kasla sal-it.” (Lucas 10:17, 18) Ammo ni Jesus a ni Satanas ken dagiti demoniona ti kamaudiananna maitapuakdanto manipud langit kalpasan ti pannakaipasngay ti Mesianiko a Pagarian kadagiti langlangit. Ngem bayat nga adda pay ditoy daga ni Jesus, daytoy a panangparuarna kadagiti di makita a demonio babaen laeng kadagiti tattao ket nagserbi kas kanayonan a pammasiguro kenkuana iti dayta um-umay a naragsak a pasamak. Ngarud agsasao ni Jesus iti daytoy masanguanan a pannakaitapuak ni Satanas manipud langit kas maysa a sigurado a banag.​—Apocalipsis 12:5, 7-10.

4. Ania ti panggep iti trabaho a panagani nga inaramid ni Jesus ken dagiti adalanna sakbay ti Nisan 14, 33 K.P.?

⁴ Ti ani a sasawen ni Jesus ket saan a panagani ti binukel wenno bungbunga no di ket kadagiti tattao, dagiti kimmarnero a tattao a sisasagana a mangipangag iti mensahe ti Pagarian. Dagiti bungbunga ti kasta a panagani maiparparangarangdan. Nupay kasta, ti panagani a nagapuanan ni Jesus ken dagiti paspasurotna kadagidiay sumagmamano a mabatbati a bulan sakbay ti Nisan 14, 33 K.P., ket isu laeng ti panangisaad ti pamuon a maipaay iti dakdakkel pay a panagani a sumaruno iti ipapatay ken panagungar ni Jesus.​—Idiligyo iti Salmo 126:1, 2, 5, 6

5. Ania a nakaragragsak a bambanag ti napasamak idi Pentecostes, 33 K.P., ket kasano nga inapektaran dagitoy ti trabaho a panagani a sumaruno?

⁵ Ti tiempo itan ket isut’ aldaw ti Pentecostes, 33 K.P. Agarup 120 kadagiti paspasurot ni Jesus ti nagtataripnong idiay Jerusalem. “Ket iti apagdarikmat immay manipud langit iti maysa a daranudor a kasla panagpuyupoy ti napigsa unay nga angin, ket pinunnona ti amin a balay nga yanda nga agtutugaw. . . . Ket napnoda amin iti nasantuan nga espiritu ket rinugianda ti nagsasao kadagiti sabsabali a pagsasao, a kasla inted ti espiritu kadakuada a pagsasao.” Daytoyen ti nangrugian ti nakaskasdaaw a panagani! “Ket nainayon kadakuada iti daydi nga aldaw ti agtallo ribo a kararua.” (Aramid 1:15; 2:1-4, 41) “Ket inaldaw-aldaw a nagtitimpuyogda iti templo, . . . nga intantan-okda ti Dios ket pinadayawan ida dagiti amin nga umili. Ket ni Jehova innayonna idi kadakuada nga inaldaw dagiti naisalsalakan.” (Aramid 2:46, 47) Iti kamaudiananna makitatayo: “Ket dagidi mammati iti Apo umadu nga umadu, adu unay a lallaki ken kasta met dagiti babbai.” Kaskasdi iti kamaudiananna pay: “Ket rimmangrang-ay ti sao ti Dios, ket ti bilang dagiti agsursuro umadu unay sadi Jerusalem; ket adu unay dagiti papadi simmurotda iti pammati.”​—Aramid 5:14; 6:7.

6. Aniat’ epekto ti ibubusor iti panangaskasaba kadagiti bunga ti Pagarian?

⁶ Itan bimmara ti ibubusor iti mensahe ti Pagarian. Isu kadi daytoy iti nangpabannayat iti trabaho a panagani? Saan, ta “dagidi ngarud naiwarawara napanda kadagiti amin a luglugar nga inkaskasabada ti naimbag ti damag ti sao.” Napan ni Felipe idiay siudad ti Samaria; ket sigagagar a dimngeg dagiti adu a tattao kenkuana; dagiti naluganan ti demonio, dagiti saan a makagunay, ken dagiti pilay naagasanda amin. Isu met laeng nga “adda idi ti dakkel a ragsak iti daydi a siudad.”​—Aramid 8:1-8.

7. Kasano kasaknap ti pannakaitungpal ti bilin ni Jesus kadagiti adalanna idiay Aramid 1:8 iti kamaudiananna?

⁷ Imbaga daydiay napagungar a Jesus kadagiti adalanna: “Dakayto dagiti saksik sadi Jerusalem ken iti isuamin a Judea ken Samaria ken agingga iti ungto ti daga.” (Aramid 1:8) Ti kalawa ti tay-ak a pagtrabahuan ti kasapulanna ti ad-adu nga agani​—a sigaganat! Anian a panagani ti ad-adalan ti mainanama itan! Ket dayta mapaspasamaken​—amin iti sidong ti panangiwanwan ti nasantuan nga espiritu ti Dios. Kalpasan ti pannakakumberte ti managpapatay ti pampanunotenna a ni Saulo, adda a naibaga kadatayo: “Ti kasta, ti kongregasion naaddaan ti talna idi iti isuamin a Judea ken Galilea ken Samaria, ket napabilegda; ket magmagnada iti buteng ken Jehova ken babaen ti panangliwliwa ti nasantuan nga espiritu immaduda.” (Aramid 9:31) Bayat a pumarpartak ti panagani kadagiti kimmarnero a tattao, awan duadua a dagidiay immuna nga ad-adalan kanayon a malaglagipda dagiti sasao ni Jesus: “Dawatenyo iti Apo ti paganian ta mangibaon kadagiti agani iti paganianna.” Ni kadi Jehova, “ti Apo ti paganian,” sinungbatanna dayta a kararag? Pudno a sinungbatanna! Ta no saan, kasano koma a nailanad: “Ti pananginanama iti naimbag a damag . . . naikaskasaba iti amin a parsua iti babaen ti langit.”?​—Colosas 1:23.

Dakdakkel a Kinaganat Itatta

8. Apay a kadagiti 1980’s ti pannakasapul dakdakkel ngem idi maipaay kadagiti katulongan iti Pagarian?

⁸ Itatta, kadagiti 1980’s, ti pannakasapul ti ad-adu pay nga agani dakdakkel ngem idi. Apay? Gapu ta ti kalawa ti tay-ak a lubong dakdakkel nga amang itatta. Kas resultana, dagiti apiten ken urnongen ti adayo met a dakdakkel ti bilangna. Maitunos daytoy iti impadto ni Jesus. Kunana a dagiti paspasurotna dakdakkelto pay nga aramid ti maaramidanda ngem ti nagapuananna ditoy daga, no maipapan iti panangikaskasaba ti naimbag a damag ti pagsasaritaan.​—Juan 14:12.

9. (a) Kasano a ti kinaganat iti trabaho a panangaskasaba ita ti naipaganetget iti maysa a sirmata ni Juan, a naisalaysay idiay Apocalipsis 7:1-3? (b) Ania a nagpateg a konklusion ti maadaw manipud iti sasao nga “umuna a bungbunga a maipaay iti Dios ken iti Kordero” idiay Apocalipsis 14:4?

⁹ Ti kinaganat iti trabaho a panangaskasaba itatta ti naipaganetget iti dramatiko a kasasaad a naisalaysay iti sirmata a naited ken Juan, kas nailanad idiay Apo 7:1-3. Sadiay, “uppat nga anghel nga agtatakder kadagiti uppat a suli ti daga” ti makitkita a “laplappedanda dagiti uppat nga angin ditoy daga.” Kasano ngata kabayag iti pananglappedda kadagiti “uppat nga angin”? ‘Agingga laeng kalpasan ti pannakaselio dagiti ad-adipen ti Diostayo iti mugmugingda.’ Kasano ti kabayag dayta? Naited iti panangipamatmat babaen iti kinapudnona nga idi panangrambak ti Memorial idi Abril 4, 1985, adda laeng 9,051 nga agkunkuna a kamkameng ti 144,000. Dagiti napulotan itatta isuda dagiti maudi a kamkameng dagidiay naisalaysay iti Apocalipsis 14:4 kas “nasubbotda kadagiti tattao a kasda umuna a bungbunga a maipaay iti Dios ken iti Kordero.” Gapuna agparang a kaaduan kadagiti “umuna a bunga” naurnongdan. Ngem ti kadi sasao nga “umuna a bunga” kaipapananna nga addada pay dadduma a bunga a sumaruno? Siempre! Naisimbolo a naimbag daytoy babaen iti aglaplapusanan nga apit dagiti dadduma a bunga a naurnong iti panagpatingga ti tawen a panagtalon dagiti Judio iti tiempo ti Piesta dagiti Tabernakulo.​—Deuteronomio 16:13-15.

10. Ania a dua a panagani ti agdama a maar-aramid iti moderno a panawen, ket kasano a daytoy a kinapudno ipaganetgetna ti naganat a pannakasapul dagiti ad-adu nga agani?

¹⁰ Ngarud agparang a nalawag a, bayat nga agserran ti panagani iti natda kadagiti napulotan, adda manen sabali a panagani a manglukat. Saan kadi a naiparangarang daytoy iti sumaruno a sirmata a nakita ni Juan? “Kalpasan dagitoy, kimmitaak, ket adtoy! ti maysa a dakkel a bunggoy, nga awan ti nakabalin a bumilang, a naggapuda kadagiti isuamin a nasnasion ken tribo ken il-ili ken pagsasao.” Naibaga ken ni Juan: “Dagitoy isuda dagiti naggapu iti dakkel a rigat.” (Apocalipsis 7:9, 14) Adda laengen iti limitado a panawen a natda a panangkompleto ti panangurnong iti “dakkel a bunggoy.” Apaman a mapalubosanen dagidiay “uppat nga angin ditoy daga,” a mangisinias iti panangrugi ti “dakkel a rigat,” naladawto unayen! Dikay kadi makita ti naganat a pannakasapul ti ad-adu pay nga agani a mangiyeg kadagiti umariwekwek a kasapulan a biruken pay?

Rinibribo ti Sumungsungbaten

11. (a) Iti ania kawadwad ti pannakiramraman dagiti “sabsabali a karnero” ni Jesus iti panagani? (b) Aniat’ ipamatmat dagiti timmabuno iti 1985 a Memorial?

¹¹ Impadto ni Jesus daytoy a pannakapalawa ti panagani kadagiti kimmarnero a tattao idi a kinunana: “Adda met sabsabali a karnerok, a saanda a naitipon itoy a pagtaraknan; dagidiay masapul nga iyegko, ket denggendanto ti timekko, ket addanto maymaysa nga arban ken maymaysa a pastor.” (Juan 10:14, 16) Adda itan nasurok a 3,000,000 kadagitoy a “sabsabali a karnero” a siaktibo nga impabigbigda ti bagbagida a timmipon iti dayta “maymaysa nga arban.” Iti dayta a bilang, adda idi 189,800 a nabautisaran iti tawen serbisio a 1985! Kaskasdi, ti bilang ti timmabuno iti panangrambak ti Memorial ket 7,792,109. Aniat’ ibagbaga daytoy kadatayo? Nga adu pay dagiti sabsabali a nakangngegen iti timek ti Pastor, ngem gapu iti maysa wenno dadduma pay a rason, saanda pay a simmungbat iti nabara nga awis ni Jesus: “Surutendak.”​—Lucas 5:27.

12. Ania a nasken a salsaludsod ti rebbeng nga isaludsodtayo iti bagbagitayo ita?

¹² Sadino ti pagtaktakderanyo iti daytoy nasken a trabaho a panagani iti ‘panungpalan daytoy sistema dagiti bambanag’? (Mateo 13:39) Nairamankayon aya kadagiti naragsak nga umariwekwek a makiramramanen iti rag-o iti panagani? Wenno kaskasdi a maysakay laeng nga agbuybuya, a ti pagannayasan ti panunotyo ket agsanud manipud iti silulukat a panangakseptar iti awis ti Naimbag a Pastor: “Surutendak”? Pudno unay nga awan koma kadagitoy nga al-aldaw ti agaramid kadagiti pambar kas ti inaramid dagiti tallo a lallaki idiay Lucas kapitulo 9, a naisalaysay iti napalabas nga artikulotayo. Panunotenyo ti naikapis kadagiti tallo a lallaki​—ti rag-o iti serbisio ti Pagarian, nalabit agraman iti pannakipaset ti panangwayawaya ti dadduma kadagidiay naluganan ti sairo!​—Lucas 9:57-62; 10:17.

13. Kasano a dakkel ti paset ti pammati iti panagbalinyo a situtulok a makipagani?

¹³ Kuna ni apostol Pablo: “Ngem no awan ti pammati saan a mabalin nga ay-ayuen ti [Dios].” (Hebreo 11:6) Ay, wen, kasapulanna ti pammati iti biang ti tunggal maysa a mangiwaksi iti kabukbukodanna nga interes ket situtulok nga idedikarna ti biagna iti Dios kas maysa a makipagani. Kas pangarigan, mabalin nga addaankay ti nadagsen a parikut iti salun-at; nalabit dadduma a miembro ti pamiliayo ti sirurungsot a bumusbusor kadagiti Saksi ni Jehova; nalabit pagarupenyo a lakaykayo wenno baketkayo unayen a mangaramid kadagiti kasapulan a panagbalbaliw iti biagyo; iti kasumbabangirna, mabalin nga ibilangyo ti bagiyo a dikay kabaelan a sanguen ti panangparigat dagiti kapatadanyo nga inkay mapaspasaran idiay eskuelaan. Aniaman dagiti kasasaadyo, dikay koma liplipatan a matarusan ni Jehova dagiti parparikutyo a nasaysayaat ngem ti siasinoman. Kasta met, isut’ sisasagana nga umadani kadakayo ken mangpapigsa iti pangngeddengyo nga agserbi kenkuana no la ketdi no alaenyo a mismo dagiti kasapulan ngaa addang.​—Salmo 103:13, 14; Santiago 4:8.

Ti Pammati Mangpaalis ‘ti Bambantay’

14. Ilawlawagyo no aniat’ kayat a sawen dagiti sasao ni Jesus kas nailanad idiay Mateo 17:20?

¹⁴ Kuna ni Jesus: “Ta pudno kunak kadakayo a no adda ti pammatiyo a kas iti bukel ti mostasa, kunaenyonto itoy a bantay, ‘Umaliska manipud ditoy agingga idiay a disso,’ ket umalisto, ket awanto ti di mabalin kadakayo.” Isu daytoy ti personal a kapadasan ti adu kadagidiay ginasgasut a ribo a simmungbaten iti awis a maipaay iti ad-adu a managani bayat ti 1980’s. Dagiti personal a parikut ken rigrigat a nagparang a kasla bambantay kadakuada iti naminsan ket naparmekda gapu iti tulong ni Jehova. (Mateo 17:20; 19:26) Usigenyo dagiti sumaganad a kapadasan:

15, 16. Isalaysayyo no kasano a ti maysa nga agtutubo a lalaki idiay Estados Unidos ken ti maysa a Katoliko nga asawa a lalaki idiay Brazil naparmekda dagiti dadakkel a problemada a manglaplapped iti pannakabautismoda.

¹⁵ Maysa nga agtutubo a lalaki idiay California, E.U.A., ket maysa a biktima ti polio, a nakaro unay iti rigatna ken nakalkaldaang a liniwayan ti pamiliana. Kalpasanna maysa kadagiti Saksi ni Jehova nga agbalaybalay ti nakasarak kenkuana. Maysa a panagadal ti Biblia ti narugian. Ngem isu ti mababain unay a no dumtengen ti Saksi a mangikondukta iti dayta, ipatulidna ti tugawna iti maysa a suli ti siled ket sumango iti diding tapno saanda a makita ti rupana. Inabutna ti adu a bulan para iti daytoy agtutubo a lalaki a mangparmek iti parikut. Ket naparmekna dayta, nupay kasta, ket itan isut’ maysa a naragsak, nabautisaranen a Saksi.

¹⁶ Maysa a pagassawaan a Katoliko idiay Brazil ti saan met a mapmapnek iti relihionda ket idi agangay narugian ti panagadal ti Biblia a kaduada dagiti Saksi ni Jehova. Mariknada a ti naespirituan a kasapulanda ti adda a mapmapneken itatta, ngem adda pay ti maysa a dakkel, kasla bantay, a parikut: Ti asawa a lalaki, ni Antonio, ket maysa a nakaro a mannigarilio. Isut’ agsigsigarilion iti 48 años, nanipud pay agtawen ti pito! Kadagiti adu a tawtawen, pinadpadasna a parmeken dayta a bisio ngem awan ti nagtungtungpalanna. Itatta, nupay kasta, dayta ti naiduman, kas salaysayen ni Antonio: “Itan naadalko a no kayatko a paragsaken ti Dios ken idedikar ti bagik a mangaramid ti pagayatanna, masapul ti innak panangisardeng iti daytoy. Kalpasan ti adu a panagkarkararag, nabalinak met laeng dayta.” Anian a ragsakna ta nabalinannan nga insimbolo ti dedikasionna ken Jehova babaen iti bautismo iti danum!​—Salmo 66:19; Marcos 11:24.

17. (a) Ania dagiti dakes nga impluensia a naipasango ken Jesus ken dagiti adalanna nga isut’ napigpigsa itatta? (b) Kasano a tinaming ni Jesus ken dagiti adalanna ti pananglugan dagiti sairo idi umuna a siglo, ket kasano met ti pannakataming dayta itatta?

¹⁷ Ti pananglugan ti demonio kadagiti Judio ket maysa a parikut a masansan a sangsanguen ni Jesus ken dagiti adalanna. Ti isu met laeng a dakes nga impluensia ti agtigtignay itatta, nangnangruna itan ta ni Satanas ken dagiti demonio a puersa naitapuakdan manipud langit a nagturong ditoy daga. (Apocalipsis 12:7-9, 12, 17) No maiyar-arig iti Kinakristiano idi kinaubingna pay, saan nga inikkan ni Jehova ti ilina itatta kadagiti namilagruan a pannakabalin a mangparuar kadagiti sairo. Nupay kasta, ti naespirituan a kabal nga impaayna kadagiti Kristiano ti agtignay kas maysa a salaknib a maibusor kadagiti impluensia dagiti sairo, ket dayta met ti maus-usar kas pamay-an a mangwayawaya kadagiti dadduma manipud panangkontrol dagiti demonio. (Efeso 6:10-18) Manipud Ghana immay daytoy a report: “Babaen iti napinget a panagregget dagiti kakabsat, adu dagiti nawayawayaanen manipud iti panangpetpet dagiti demonio.” Maysa a Saksi ti nakasarak iti maysa a babai iti ministeriona, ket apaman a nairugi ti panagsasarita maipapan ti Biblia, “nangrugin nga agsangsangit ti babai.” Ania ti problema? Insalaysay ti Saksi: ‘Maysa nga espiritu ti nanglugan kenkuana, ket tunggal aramidenna dayta, isu ti agsangsangit, ket aniaman a kuarta a naiparna nga adda kenkuana ti mapukaw.’ Ti regular a panagadal ti Biblia ti nangtulong itoy a babai a nailapsut manipud idi panangparparigat daytoy a demonio, nga isu metten ti nakatulong kenkuana a nangidedikar ti bagina ken Jehova.​—Juan 8:32.

18. Ania a kapadasan ti mangiparangarang a dagiti anghel aktiboda iti panangiturong ti trabaho a panangasaba?

¹⁸ Dagiti parikut kas kadagiti naisalaysay iti ngato ti mabalin a nakadakdakkel iti panunot ti maysa a tao a mabalin a rantaenda ti agbekkel. Alaenyo ti kaso ti maysa nga agtutubo a babai idiay New Zealand. Ti Saksi nga immuna a simmarungkar kenkuana nadlawna nga isu ti “aburido unay ken agnerbios.” Iti kamaudiananna inadmitir daytoy a babai nga “isu ti agbekkel koma ngem naikeddengna nga agkararag pay umuna iti Dios tapno dawaten ti tulongna.” Iti daytoy a punto ti Saksi ti timmuktok iti ruanganda, gapuna isu ti pudpudno nga “agyamyaman iti Dios gaput’ panangsungbatna iti kararagna.” Naiparparna aya daytoy? Ngarud, apay a dagiti umas-asping a bambanag ti masansan a mapaspasamak? Aniat’ kuna ni Jesus? “Ngem inton ti Anak ti tao umayto agraman iti dayagna, ken amin dagiti anghel maikuyog kenkuana, . . . paglalasinennanto dagiti maysa ken maysa kadagiti tao, a kas iti pastor ilasinna dagiti karnero kadagiti kalding.” (Mateo 25:31, 32; kitaenyo met ti Apocalipsis 14:6.) Dagiti anghel ti mangtultulong ken Jesus iti trabaho a panangipastor, ket iturturongda dagiti “katulongan” ti Apo kadagidiay umaw-awag Kenkuana a maipaay iti tulong.​—1 Corinto 3:6, 9; kitaenyo ti Aramid 8:26-39; 16:9, 10.

19. Ania a sangalubongan a kasasaad ti adda itatta, nga umaw-awag ti ania a panagtignay iti biangtayo?

¹⁹ Itatta, sadinoman ti pagnanaedantayo, rinibribo dagiti tattao a madagdagsenan ken malmaldaangan kadagiti isu met laeng a problema a naparmeken ti adu kadagiti tattao ni Jehova. Mabalin a dadduma kadakuada ti agnanaed laeng iti asidegyo! Sigaganat a kasapulanda ti tulong. Pudno unay, kas kinuna ni Jesus: “Ti anien, kinapudnona, ti adu,” Dawdawatentayo itan iti Apo ti panagani a mangibaon pay ti ad-adu nga agani iti paganianna bayat ti 1986. Sapay koma ta ti pusoyo tignayennakayo iti awis a: Sigaganat a Kasapulan​—Ad-adu Pay nga Agani!

Salsaludsod a Pagrepaso

◻ Asino ti Apo ti paganian?

◻ Ania a dua a panagani ti agdama a maar-aramid?

◻ Ania dagiti dakdakkel nga aramid a kinuna ni Jesus nga aramiden dagiti paspasurotna?

◻ Apay a kasapulan ti pammati amin dagiti agani?