Ti Biag ken Ministerio ni Jesus

Panangisuro iti Babai a Samaritano

IDIAY dalanda manipud Judea nga agturong idiay Galilea, limmasat ni Jesus ken dagiti adalanna idiay distrito ti Samaria. Nabannog manipud iti panagdaliasatda, idi agarup agmatuon nagsardengda nga aginana iti sibay ti maysa a bubon iti asideg ti siudad ti Sicar. Daytoy a bubon ti kinalin adu a siglo sakbayna ni Jacob, ket dayta ti nagtalinaed idiay agingga itatta nga aldaw, idiay asideg ti moderno-aldaw a siudad ti Nablus.

Bayat nga agin-inana ni Jesus ditoy, napan dagiti adalanna idiay siudad a gumatang iti taraon. Idi umay ti maysa a babai a Samaritano a sumakdo iti danum, inkalikagum ni Jesus: “Ikkannak ti inumen.”

Iti kaaduanna dagiti Judio ken dagiti Samaritano ket awan ti pannakilangenlangenda iti maysa ken maysa gapu kadagiti nauneg unay a panagil-ilemda. Gapuna, iti panagsiddaawna, nagsaludsod ti babai: “Kasano a sika, idinto a Judioka, dumawatka kaniak iti inumen, idinto a babaiak a taga Samaria?”

Insungbat ni Jesus a no daytoy a babai ket ammona koma no siasino ti makisasao kenkuana, indawatna koma nga isut’ maikkan iti “danum a nabiag.” Daytoy a danum, kunana, ket agbalinto nga “ubbog ti danum nga agburayok a maipaay iti biag nga agnanayon.”

“Apo, itedmo kaniak daytoy a danum,” insungbat ti babai.

Ita kuna ni Jesus: “Inka, ayabam ni asawam.”

“Awan ti asawak,” kunana nga insungbat.

Pinaneknekan ni Jesus ti saona. “Naimbag ti panagkunam, ‘Awan asawak.’ Ta naaddaanka ti lima nga asawa ket ti adda ita kenka, saanmo nga asawa.”

“Apo, makitak a sika mammadtoka,” kuna ti babai a sisisiddaaw. Gaput’ panangipanayagna iti naespirituan nga interesna, kinunana a dagiti taga Samaria nagdaydayawda idiay Bantay Gerizim, ngem dagiti Judio idiay Jerusalem.

Kaskasdi ti lugar a pagdaydayawan ket saan nga isu ti napateg a banag, intudo ni Jesus. “Ti Dios maysa nga Espiritu,” inlawlawagna, “ket dagiti agdaydayaw kenkuana masapul nga agdaydayawda iti espiritu ken kinapudno.”

Nagsiddaaw unay daydi a babai. “Ammok a ti Mesias umay, isu a managan ti Kristo,” kunana. “Inton isu umay, ipalawagnanto kadatayo dagiti amin a banag.”

“Siak met laeng a makisasao kenka isu dayta,” kuna ni Jesus. Agaasenyo dayta! Daytoy a babai nga immay nga agsakdo iti danum iti tengngat’ aldaw, nalabit tapno maliklikanna ti pannakaidennana kadagiti babbai iti ili a manglalais kenkuana gapu iti wagas ti panagbiagna, ti naparaburan iti nakaskasdaaw a pamay-an babaen ken ni Jesus. Imbagana a diretsa iti babai ti banag a saanna nga impudno a silalatak iti asinoman. Ania dagiti ibungana? Ti Artikulo iti sumaganad a ruarmi ti mangilawlawagto iti dayta. Juan 4:3-26.

◆ Apay a ti babai a taga Samaria nakellaat a ni Jesus nakisao kenkuana?

◆ Ania ti insuro ni Jesus kenkuana maipapan iti nabiag a danum ken no sadino ti pagdaydayawan?

◆ Kasano nga impanayag ni Jesus ti bagina kenkuana, ket apay a daytoy a panangipudno ti nakaskasdaaw unay?

[Ladawan iti panid 9]