Panagbangon a Maipaay iti Awan Inggana a Masanguanan
“Tunggal balay adda nagibangon, ti Nagibangon kadagiti isuamin a bambanag isu ti Dios.”—HEBREO 3:4, Weymouth.
1, 2. (a) Asino ti nangdisenio ti daong, ken kasano kadetaliado dagiti naited a bilbilin? (b) Apay a nasken nga agtultuloytayo kas ken ni Noe?
AGANGAY 4,400 a tawtawen manipud binilin ni Jehova ni Noe a mangibangon iti daong a pakaispalan ti biag. Ngem saan a binaybay-an ti Dios ni Noe a basta mangibangon lattan iti uray ania a kita ti banag a tumpaw. Imbes ketdi, isut’ inikkanna kadagiti espisipiko a bilin maipapan kadagiti materiales, plano, kaatiddog, kaakaba, kangato, ti bentilasion, ken dagiti makin-uneg ken makinruar a pannakaileppasna. “Kasta ti inaramid ni Noe kas maiyanatop iti amin nga imbilin ti Dios kenkuana. Kasta ti inaramidna.”—Genesis 6:3-16, 22.
2 Anian a nagsayaat nga ulidan kadagiti moderno-aldaw a saksi ni Jehova! Kas ken Noe, naitalek met kadatayo ti makaispal-biag a trabaho ngem itatta ket kumitkita ti pannakaisalakan ti ‘minilmilion a sibibiag itan a mabalin a nikaanoman dinto matayen.’ Anian ti kinapateg ti intayo panagtulnog kas ken Noe! Anian a nagganat ti intay panangsurot ti padron Daydiay dakdakkel ngem ni Noe, ni Jesu-Kristo, iti panagserbi kas ”dagiti manangaskasaba iti kinalinteg’!—2 Pedro 2:5.
Maysa a Naespirituan a Trabaho ti Panagbangon
3. (a) Aniat’ resulta manipud panangyaplikar kadagiti sasao ni Jesus? (b) Apay a ti panangaskasaba ni Jesus makapabileg-pammati?
3 Adda itan 1,956 a tawtawen nanipud kinellaat ni Jesus ti aglawlaw ti Galilea iti panangiwaragawagna: “Agbabawikayo, ta ti pagarian ti langit asidegen.” Inyaspingna ti tunggal maysa nga agtulnog kadagiti sasaona ken iyaplikarda ida iti “tao a manakem, a binangonna ti balayna iti rabaw ti bato.” Ti pammati dayta a tao ket natibker, di magunggon, di maisin. Dayta ti saanto a margaay iti sidong dagiti pannakaparigat. Ti panangaskasaba ni Jesus ti makapabileg-pammati. Daytat’ dumanon iti puspuso dagiti tattao, agsipud ta daytat’ naiduma kadagiti aginsasanto a panagar-ariwawa dagiti narelihiusuan a papangulo a Judio. Nagsiddaaw dagiti gagangay a tattao iti panangisursuro ni Jesus. Uray pay dagiti soldado a naibaon a mangtiliw kenkuana ti nagsubli nga ima-ima a kunkunada: “Uray kaano awan ti tao a nagsao ti kastoy.”—Mateo 4:17; 7:24, 25, 28; Juan 7:46.
4. (a) Kasano a ni Jesus nagibangon a maipaay iti masanguanan? (b) Ania a naindaklan a panagbangon ti napasamak idi Pentecostes 33 K.P.?
4 Ni Jesus ti agibangbangon a maipaay iti masanguanan. Inurnongna dagiti katrabahuanna, kas kada Pedro, a maaw-awagan met Cefas, a kayatna a sawen “maysa a bato.” Iti daytoy nga adalanna, kuna ni Jesus: “Sika Pedroka, ket iti daytoy a bato bangonekto ti kongregasionko.” Idi agangay ni Pedro nagbalin a maysa kadagiti adu a “sibibiag a bato” a naibangon ken Jesus, ti “pamuon a bato” ti kongregasion. Dayta a kongregasion ti naipasdek idi Pentecostes ti 33 K.P. idi a ti napagungar a Jesus, idiay makanawan ti Dios sadi langit, imparukpokna ti nasantuan nga espiritu kadagiti agur-uray nga adalanna.—Mateo 16:18; 1 Pedro 2:4-6; Aramid 2:2-4, 32, 33.
5. Ania a moderno-aldaw a paspasamak ti nakairamanan unay ti kongregasion Kristiano?
5 Itatta, ti kongregasion Kristiano nairaman a naimbag iti pannakaitungpal dagiti pangpanggep ni Jehova. Dayta ti panawen ti “apocalipsis,” wenno “panangipanayag,” inton “dagiti bambanag isuda a maaramidto iti mabiit” ket maipanayagda kadagiti “ad-adipen” ti Dios ditoy daga. (Apocalipsis 1:1-3, Ref. Bi. footnote) Daytoy ti tiempo a dagitoy nga ad-adipen masapul nga ‘ikasabada ti naimbag a damag ti pagarian ti Dios iti amin a daga a maipaay a pammaneknek,’ sakbay nga ibanagna ti panangdusa iti nadangkes a sistema ni Satanas. Daytoy ti tiempo a ti Ari, ni Jesu-Kristo, a naitronon kadagiti langlangit, ket paglalasinenna dagiti naemma, kimmarnero a tattao manipud kadagiti natangken ti lengngesna, kimmalding a tattao a di mangayat iti dayta a Pagarian, ken tapno urnongen dagitoy a “karnero” iti kongregasion dagiti naespirituan a “kakabsatna” sakbay ti “dakkel a rigat.”—Mateo 24:14, 21; 25:31-40.
6. Ania ita ti “daong,” ken kasanotay a makalasat?
6 Ania ti moderno-aldaw a daong ti pakaisalakanan? Dayta ti naespirituan a kasasaad a pakasarsarakan dagiti Saksi ni Jehova kadagiti bagbagida nanipud 1919, maysa a naespirituan a paraiso. Kas kadagiti kamkameng ti pamilia ni Noe, ti natda dagiti napulotan a Kristiano ken dagiti kakaduada ti masapul nga agtalinaed iti unegna, nga agtartrabaho a situtulnog, iti amin a pusoda, iti panangiringpas iti naindaklan a naespirituan a proyekto a pinanggep ni Jehova. Daytoy a proyekto ket “tapno mapagkaykaysa dagiti amin a bambanag manen ken Kristo, dagiti bambanag nga adda sadi langit [nangrugi idi 33 K.P. babaen kadagiti napulotan nga agturong-langit] ken dagiti bambanag ditoy daga [nangrugi nangnangruna idi 1935 iti internasional a “dakkel a bunggoy” a naikeddeng a maipaay iti biag nga agnanayon ditoy daga].”—Efeso 1:10; Apocalipsis 7:9, 14.
‘Ti Panagbangon ken Panagmula’
7. Ania a nagkadua a paset a trabaho ti agdama a maar-aramid itan, ken kasanotayo ti makiraman iti kinaragsak kas inaramid da Noe ken ni Jeremias?
7 Binilin ni Jehova dagiti natda a napulotan a Kristiano ditoy daga, kas ti panangbilinna ken mammadto a Jeremias, “a mapan kadagiti nasnasion ken pagpagarian, a mangparut ken mangrebba ken mangdadael ken mangparmek, a mangbangon ken mangimula.” Gapuna maysa a nagkadua a paset a trabaho ti agdama a maar-aramid: (1) ti panangiwaragawag ti panangdusa ni Jehova a maibusor iti nadangkes a sangalubongan a sistema ni Satanas, ken (2) ti panagbangon ken panangipasdek ti maysa a kagimongan ti mismo nga ili ti Dios a maipaay iti pannakaisalakan. (Jeremias 1:10; 24:6, 7; Isaias 26:20, 21) Anian a ragsak ti natda dagiti napulotan ken ti dumakdakkel a bunggoy dagiti kakaduada bayat a makipaspasetda iti daytoy a trabaho itatta! Dayta a kita ti ragsak ti awan duadua a linak-am ni nagaget a Noe ken ti pamiliana idi kaaldawanda.
8. (a) Ania a panagrang-ay dagiti agibumbunannag iti napalabas a 22 años ti laglagipen? (b) Babaen iti panangtukoy iti pinanid 20-3, ania dagiti sumagmamano a pagilian a nangtagiragsak kadagiti naisalsalumina a panagrang-ay bayat ti 1985?
8 Minilmilionto aya dagiti makalasat iti aldaw ti pungtot ni Jehova? Adda nagsayaat a panginanamaan iti dayta, kas ipamatmat ti 1985 a Report ti Tawen Serbisio dagiti Saksi ni Jehova. Dagiti detalye daytoy a report ti agparang ditoy kadagiti pinanid 20-3. Makaparagsak unay a makita ti nakaskasdaaw nga irarang-ay ti kangatuan a bilang dagiti trabahador iti tay-ak. Daytoy ti dimmanonen iti dagupna a 3,024,131 a manangaskasaba ti Pagarian. Ti umuna a 1,000,000 ti damo a nagtengan idi 1963, ti 2,000,000 idi 1974, ket itan adda nasuroken a 3,000,000 iti 1985. Kadagitoy 22 a tawtawen, adda ti 200-porsiento nga irarang-ay. Anian ti panagyamantayo ken Jehova a, babaen iti espirituna, pinadakkelna dagiti bambanag!—Zacarias 4:6; 1 Corinto 3:6.
9. (a) Apay a ti irarang-ay dagiti payunir ti ad-adda pay a nakaskasdaaw? (b) Ania ti nairekomendar kadagiti amin a makaipaay iti tiempo iti dayta, ken apay?
9 Ti ad-adda pay a nakaskasdaaw bayat dagidiay a tawtawen isut’ irarang-ay dagiti amin-tiempo a manangibunannag ti Pagarian. Agpapan pay dagiti dumakdakes a kasasaad ti panagbiag iti intero a lubong, ti bilang dagitoy maingel a grupo dagiti “payunir” ti ngimmato manipud iti binulan a promedio a 38,573 idi 1963 agingga iti 322,821 idi 1985—maysa a 737-porsiento nga irarang-ay! Aniat’ ipamatmat daytoy? Ipakpakitana a maysa a nakaskasdaaw nga espiritu ti panagsakripisio ti adda iti ili ti Dios, a maitunos kadagiti sasao ni Jesus idiay Lucas 9:23. Masansan, ti naannad a panagplano ken ti panangilibak iti bagi ti kasapulan tapno makapagballigi iti panagserbi kas payunir. Ngem dagiti gunggona dakkelda.—Roma 12:1, 2; Malakias 3:10.
10. (a) Dagiti agibumbunannag ti kongregasion makomendaranda a maipaay iti ania? (b) Ania a tallo a baro a kangatuan a bilang ti trabaho ti adda a napaliiw ditoy, ket ania ti ipamatmatda?
10 Ti minilmilion kadagiti manangibunannag iti kongregasion makidangadangda met a maibusor kadagiti pammarparigat nga ipapaay kadakuada ni Satanas ken ti lubongna. Ngem uray isuda met, agidatdatonda iti Dios iti “daton ti panagdaydayaw.” (Hebreo 13:15; Roma 10:9, 10) Dagidiay nga or-oras, adu man wenno bassit, nga irepreportyo kas matalek nga agibumbunannag iti kada bulan ti nagbalin a paset ti baro a kangatuan a bilang ti 590,540,205 nga oras iti tay-ak ti serbisio para iti 1985. Daytoy ket maysa a 16.8 porsiento nga irarang-ay no idilig iti 1984! Dagiti baro a kangatuan a bilang a 224,725,918 a panagsarungkar ken 2,379,146 a panangiyadal ti Biblia kadagiti pagtaengan dagiti tattao nga interesado ipamatmatna a dagiti manangibunannag ti Pagarian iti uray sadinoman pagregreggetanda ti agbalin a naimbag a mannursuro ken kasta met nareregta a manangaskasaba.—Mateo 28:19, 20.
Panagbangon a Maipaay iti Pudno a Talna ken Talged
11. Kasano a maipabpablaak ti pudpudno a namnama a maipaay iti talna ken talged, ken kasano kasaknap dayta?
11 Iti maud-udi a paset ti 1985, inwaragawag ti Naciones Unidas ti 1986 kas ti Internasional a Tawen ti Talna. Kadagiti nabiit pay, adut’ masasao ti NU maipapan iti talna ken talged. Ngem ti maysa a napatpateg pay a panangiwaragawag, a dayta ti addaan Nainkasuratan a namnama a maipaay ti talged, ti ad-adda a pimmartak bayat ti 1985 bayat nga impapaima dagiti Saksi ni Jehova iti nailubongan a tay-ak dagiti 38,805,561 a Biblia, liblibro, ken polieto, agraman dagiti 300,545,609 a magasin ken nakagun-odda iti 1,719,930 a baro a suskripsion iti Ti Pagwanawanan ken Agriingkayo! Babaen kadagiti naimaldit a panid ken babaen iti panagsao, ti naipasdeken a Pagarian ti pudpudno a “Prinsipe ti Kappia” ti immawaten iti naindaklan a pammaneknek agingga ita. Pudno unay, “ti idadakkel ti panangiturayna ken ti kappia awanto ti inggana.”—Isaias 9:6, 7, King James Version.
12. Ti panagsaknap ti nangibunga iti ania a dakdakkel a pakasapulan, ket kasano a sangsangkamaysa a pinadpadas ti ili ni Jehova a sanguen dayta a pakasapulan?
12 Ti nakaskasdaaw a panagrang-ay iti tay-ak ti makasapul met iti irarang-ay ti panangsuportar ti organisasion. Bayat ti 1985, ti bilang dagiti kongregasion dagiti Saksi ni Jehova iti intero a lubong ti immadu manipud 47,869 agingga iti 49,716. Kasapulan dagitoy ti ginasgasut pay a baro a lugar a paggigimongan. Anian a nagsayaat ta iti adu a dagdaga, nabendisionan dagiti Saksi iti panagreggetda nga agibangon kadagiti Kingdom Halls! Sadiay addaan ti pakasapulan, dagiti indibidual ken dagiti kongregasion ti awan-agumna a nangsuportar iti programa ti panagbangon ti maysa ken maysa, tapno adda ti “panagpapada” iti tengnga ti sangalubongan a panagkakabsat.—2 Corinto 8: 14, 15.
13. Kasano ti itutulong dagiti indibidual iti proyekto a panagbangon ti Kingdom Hall?
13 Kadagiti pagpagilian a dagiti kasasaad nasayaatda, dagiti sanga nga opisina iti Watch Tower Society nangted met iti tulong kadagiti proyekto ti Kingdom Hall. Idiay Estados Unidos ken Canada, adu ti tumultulong iti espesial a Kingdom Hall Fund, nga isut’ namagbalin a posible iti panagutang a maipaay iti immadu a panagibangon ti Kingdom Hall. Dadduma ti nangipaay kadagiti pigsa ken laingda, a gapu itoy uray pay dagiti nadaras pannakaibangonna a Kingdom Halls ti maibangbangon bayat ti maysa laeng a ngudo ti lawas. Babaen iti panagtrabaho kadagiti kakasta a proyekto “iti amin-kararua kas maipaay ken Jehova,” dagiti Saksina ti makaaramid ti ipato dagiti tattao iti lubong nga imposible.—Colosas 3:23.
14. Kasano met ti pannakasango kadagiti kasapulan kadagiti Assembly Hall?
14 Iti sumagmamano a pagilian, ti kinakurang dagiti lugar a maibagay para kadagiti maminsan ti innem a bulan nga asamblea dagiti Saksi ni Jehova ti mangiparang iti dakkel a parikut. Ditoy manen, siraragsak a sinango dagiti Saksi ti karit babaen kadagiti programa ti panangibangon, iti isu met laeng nga espiritu nga impamatmat dagiti ad-adipen ni Jehova idi ugma. Kas pangarigan, idi kasapulan ti panagsapul kadagiti materiales a maipaay ti panangibangon ti tabernakulo, ti gimong ti Israel sangsangkamaysa nga impangagna ti bilin ti Dios: “Mangalakay met la kadakayo ti maysa nga isagut ken Jehova. Siasinoman a siaannugot ti pusona, iyegna koma ti sagsagut ken Jehova.” Dayta a gimong ti nangipaay ti ad-adu ngem ti adda a kasapulan, ket ti trabaho ti nairingpas a sidadaras.—Exodo 35:5-19; 36:7.
15. (a) Ania a panagsaknap ti maar-aramid kadagiti sangsanga ti Watch Tower? (b) Kasano ti pannakaar-aramid ti trabaho?
15 Bayat nga umad-adu ti pannakasapul kadagiti Biblia ken kadagiti publikasion a naibatay ti Biblia, adu kadagiti 94 a sangsanga ti Watch Tower ti intero a lubong ti nangpadakkel kadagiti patpatakderda. Ti pagimalditan ti Brooklyn ken Watch Tower Farms ti kaskasdi nga isu pay met laeng ti kadadakkelan, ngem 36 a sangsanga ti Sosiedad ti mangay-aywanen ti bukodda a pangimprenta ti magasin, ken 6 a sangsanga ti nakabalandan nga agimprenta ken agaramid kadagiti libro. Kadagitoy, ti Alemania, Italia, ken Japan ti agpabpabrikan kadagiti Biblia. Ti baro a paktoria idiay Selters, Alemania, ti agtartrabahon agingga iti pagpatinggaanna. Idiay Ebina, Japan, adda manen ti panagbangbangon a maipaay iti innem a grado a kanayonan a paktoria ken ti walo a grado a Bethel Home annex nga isu ti pagnaedanto pay ti kanayonan a 280 a trabahador. No kasano ti panangsuportar ti ili ni Jehova iti panangibangon ti templo ni Salomon “iti amin a puso,” kasta met ita ti ili ti Dios kadagiti nadumaduma a dagdaga “nagidatonda a sibubulos ken Jehova,” ket innayonna ti pammendisionna tapno mairingpas ti trabaho.—1 Cronicas 22:14, 15; 29:7, 9, Kitaenyo ti Ref. Bi. footnotes.
16. Apay a nesisita dagitoy a kanayonan a patakder ken panangorganisar?
16 Pudno kadi a nasesita amin daytoy a panagbangon ken panangorganisar? Wen, no agtultuloy “ti matalek ken naannad nga adipen” a mangipaay iti naespirituan a “taraon iti umiso a tiempona.” Ti kasta a taraon ti nasken unay a maipaay iti panagdakkel “ti sangakabbalayan ti Dios” ken agpaay iti sangalubongan a panangaskasaba iti nasursurok ngem 200 a pagsasao. (Mateo 24:45; Efeso 2:19; 4:15, 16) Intulong met ti ili ni Jehova ti laingda iti panangpatanor iti multilanguage electronic phototypesetting system (MEPS), a naipaay itan kadagiti 26 a sangsanga ti Watch Tower. Pinagbalin a posible daytoy ti sangsangkamaysa a sangalubongan a panagimprenta babaen iti offset ket nakatulong iti panangipablaak ti mensahe iti Pagarian nga aggigiddan iti adu a paset ti daga.—Idiligyo ti Isaias 52:7-9.
17. Ania a pakasapulan ti adda idiay hedkuarter ti Brooklyn, ket kasano ti pannakatamtamingda?
17 Agparang nga awan ti panagpatpatingga ti moderno-aldaw a panagsaknap ti organisasion ni Jehova. Uray pay itan, ti pamilia ti Bethel idiay BrookLyn, Nueva York, a hedkuarter ti Sosiedad ti dimmakkel agingga ti pannakapunno aminen dagiti adda a mapagdagusan. No pagayatan ni Jehova, maysa a nangato a patakder a makaibalay ti 1,000 a kanayonan nga agtrabaho idiay Bethel ti maibangonto iti sanikua ti Sosiedad idiay Columbia Heights. Ngem no daytoy saanto a mapasamak, kumitatayo ken ni Jehova a maipaay iti kanayonan a panangiturongna kadagiti bambanag. Ti karkararag ken nasungdo a panangsuportar ti sangalubongan a panagkakabsat maipaay amin iti daytoy a panagsaknap ti pudno a maapresiar.—Idiligyo iti Aramid 21:14; 2 Tesalonica 3:1.
18. Apay a nakaad-adu ita dagiti proyekto iti panagbangon, agpapan pay ti kinaasideg ti Armagedon?
18 ‘Ngem apay,’ mabalin a maisaludsod ti maysa, ‘a nagadu dagiti proyekto ti panagsaknap idinto a sangsanguentayon ti Armagedon?’ Ti sungbat a ta ti organisasion ni Jehova ket saanto nga ‘agserra’ gapu iti iyaadani ti Armagedon. Dayta ti ‘panawen ti panagserra’ a maipaay laeng iti organisasion ni Satanas. Ti organisasion ni Jehova ket agibangbangon a maipaay iti awan inggana a masanguanan. Makalasat man wenno saan dagiti patpatakder nga inaramid-tao iti bagyo ti Armagedon ammotayo a ti organisasion ni Jehova ti makalasatto kas banag nga agtultuloy ket usaren dayta ni Jehova ken dagidiay sisusungdo a mangsupsuportar iti dayta, a mangipasdek iti awan inggana a talna ken kinatalged iti nadayag a naindagaan a Paraiso nga inkari ti Dios—Apocalipsis 7:9, 14-17; 21:1, 4, 5.
Panagbangon nga Addaan Panggep
19. Ania a karit ti makitkita iti report iti Memorial para iti 1985?
19 Nagibangon ni Noe nga addaan panggep, ket kasta met kadatayo. Maysa a paset ti 1985 a Report iti Tawen Serbisio ti mangted ti adu a pagpampanunotan. Isu dayta ti nakaskasdaaw unay a bilang dagiti timmabuno a 7,792,109 iti Memorial ti ipapatay ni Jesus idi Abril 4, 1985—maysa a panagrang-ay a 375,135 a nasursurok ngem ti dagupda idi 1984. Pudno a nakaskasdaaw! Ngem dayta a bilang ti naglaon ti maysa a karit. Babaen iti kangatuan a bilang a 3,024,131 nga agibumbunannag a nakipaset iti serbisio iti Pagarian, adda agangay 4,000,000 a dadduma pay a makitimtimpuyogen kadatayo, uray laeng iti apagbiit, a masapul nga agbangon met a maipaay iti masanguanan babaen ti pannakiramanda iti Nakristianuan a ministerio. Kasanotay a tulongan ida?
20. Ania a naganat a pakasapulan ti adda tapno masango dayta a karit, ket kasano ti intay panangaramid iti dayta iti praktikal a pamay-an?
20 Kaaduan kadagitoy nga interesado a tattao ti pagaammotayo a personal. Mabalin nga isuda dagiti kamkameng ti pamilia, tattao a pangidadauluantayo kadagiti panagadal ti Biblia, dagiti suskritor kadagiti magasintayo, wenno dadduma pay. Mabalin a dadduma nagbalinda nga interesado nanipud laeng iti naudi a Memorial. Mabalintay kadi ita ti mangaramid iti naisangsangayan met a panagregget a mangtaraon kadagitoy, nga ibangon ida ken pabilgen babaen iti panagadal ti Biblia, tapno masarakanda met ti panagkamangda iti urnos ni Jehova “agingga ti mapalabas dagitoy a pakarigatan”? (Salmo 57:1) Ti “dakkel a rigat” ket isunto ti aramid a panangalangon ni Jehova, a dakdakkel pay ti kaipapananna ken ad-adda a nakapappapati ngem ti Layus ni Noe. Kayattayo a pabilgen dagitoy nga interesado babaen kadagiti makaited-biag a kinapudno, tapno mabalinda met ti “umawag iti nagan ni Jehova” ket saanda a maiyayus. (Mateo 24:21, 22, 39; Sofonias 2:3; 3:8, 9) Iyadaltayo ti Sao ti Dios kadakuada, nga usarentayo ti libro a Mabalinyo ti Agbiag nga Agnanayon iti Paraiso a Daga wenno dadduma pay kadagiti makapabileg-pammati a pagbasaan ti Biblia.
21. Kasano ti panangbangontayo iti pammati a kas ti pammati ni Noe iti bagbagitayo ken kadagiti dadduma?
21 Ni Jehova a Dios isu ti Naindaklan a Managbangon ken Naindaklan a Manangipaay iti sangatauan. (Salmo 127:1; 145:16; Eclesiastes 3:10-13) Isu idi ti nangiwanwan ken Noe maipapan iti disenio ken ti panangibangon ti daong. Babaen iti situtulok a pannakitunos iti Dakdakkel a Noe, ni Jesu-Kristo, inyurnosna ti pannakasubbot dagiti natulnog a tattao manipud basol ken ipapatay. Babaen ti Anakna isu met ti nangibangon iti maysa a moderno-aldaw a “daong,” ti rumangrang-ay a naespirituan a paraiso a sadiay ti pakasarakan dagiti lallaki ken babbai iti pammati ti pakaispalanda, a simamatmat ti biag nga agnanayon. (Mateo 20:26-28; Juan 3:16; 17:3) Sapay koma ta makatulongtayo ti ad-adu pay a sabsabali a mapabileg ti pammatida ket iti kasta makaaramidda iti singgalut ti kinasinged ken ni Jehova ken ti Anakna. Sapay koma ta tulongantay ida nga agayat iti kinalinteg ken guraen ti kinadakes. (Hebreo 1:9) Iti kasta, babaen iti pammati kas ken Noe, makapagtultuloytayo nga agibangon a sangsangkamaysa a maipaay iti awan inggana a masanguanan.—1 Timoteo 4:15, 16.
SALSALUDSOD A MAIPAAY ITI PANAGREPASO—
◻ Kasano a nagibangon ni Jesus a maipaay iti masanguanan?
◻ Aniat’ masarakanyo a naisalsalumina iti report ti 1985?
◻ Apay a dagiti teokratiko a programa ti panagbangon kasapulan?
◻ Kasano a datay amin mabalin a makapagbangon nga addaan panggep?
[Kahon iti panid 24]
Maysa a kongregasion iti maysa a pagilian idiay Africa a sadiay maiparparit ti trabaho ni Jehova ti addaan 95 nga agibumbunannag, nga aminda ti makiramraman iti serbisio iti kada bulan. Addaanda ti promedio a 130 iti panaggigimongda ngem 160 kadagiti palawag publiko. Addaanda ti tallo a regular a payunir ket iti nabiit pay walo nga auxiliary a payunir. Iti uneg ti innem a bulan laeng, 21 a baro nga agibumbunannag ti nangrugi ti panagserbida iti tay-ak.
[Kahon/Dagiti ladawan iti panid 16, 17]
SANGALUBONGAN A PANAGBANGON BABAEN KADAGITI SAKSI NI JEHOVA
Iti intero a lubong 322,821 a payunirs ti agrepreport kada bulan (24.7 porsiento nga irarang-ay)
Dagiti agibumbunannag iti intero a lubong rimmang-ay agingga iti 3,024,131 (rimmang-ay iti 6.4 porsiento)
Dagiti panagsarungkar kadagiti interesado nagupgop a 224,725,918 maipaay iti tawen (rimmang-ay iti 14.8 porsiento)
Dagiti maidadaulo a panagadal ti Biblia kadagiti pagtaengan iti binulan ket 2,379,146 (rimmang-ay iti 16.2 porsiento)
[Dagiti ladawan]
Rumrummuar dagiti payunir a maipaay iti ministerio a panagbalaybalay, Brooklyn, Nueva York
Sangapulo ket uppat-pagsasao a kumbension, Montreal, Quebec, Canada
Ti panangaskasaba, Castle Comb, Wiltshire, Inglatera
Grupo a panagadal ti Biblia idiay Yap, Micronesia
Sumagmamano kadagiti pasdek a maus-usar iti panangsuportar iti sangalubongan a trabaho ti naespirituan a panagbangon.
Idiay Brooklyn, ti panagipatulod kadagiti Biblia ken literatura ti Biblia ti maas-asikaso manipud iti daytoy 1,000,000-pie-kuadrado a patakder idiay 360 Furman Street
Daytoy a Kingdom Hall (Downpatrick, Northern Ireland) nabangon iti 31 nga oras
Daytoy nga Assembly Hall idiay Roma ti maysa kadagiti pinulpullo kadagiti kakasta a patakder a maus-usar iti intero a daga
Daytoy a kanayonan ti pagtaengan a Bethel idiay Japan ti maibangbangonen
[Tsart iti panid 20-23]
REPORT TI 1985 A TAWEN SERBISIO DAGITI SAKSI NI JEHOVA ITI SANGALUBONGAN
(Kitaem ti bound volume)
[Tsart iti panid 25]
Walo a pagilian ti nangireport iti kangatuan a bilang a nasursurok ngem 100,000 nga agibumbunannag idi 1985
E.U.A. 723,220
Brazil 177,904
Mexico 173,037
Italia 127,526
Nigeria 121,729
Alemania 115,604
Britania 103,522
Japan 103,117