Nagtataripnong dagiti Manangsalimetmet ti Kinatarnaw iti Maikaduapulo a Siglo!

TI PAGDADANGADANGAN ti namarkaanen a nakasapsapa iti natauan a historia. Bimtak ti iyaalsa agpadpada kadagiti naespirituan ken natauan a deppaarna, ket ti kinanainkalintegan ti kinasoberano ti Namarsua ti nakarit! Daytoy ti namataud ti maysa a moral nga isyu a nakairamanan ti saludsod a, Dagidiay kadi nasungdo pay laeng ken ni Jehova a Dios itandudoda ti kinaturayna babaen ti panangsalimetmetda ti kinatarnawda kenkuana?​—Genesis 3:1-24; Exodo 9:16; Lucas 22:31.

Siuulbod nga impeksa ni Satanas a Diablo a dagiti managdaydayaw ken ni Jehova ti agserserbi laeng Kenkuana gapu kadagiti inaagum a bentaha ket saan a gapu iti ayatda. (Job 1:1–2:10) Kaskasdi, nasungdoda iti Dios agpapan pay iti panagregget ni Satanas ken ti bumusbusor a lubongna a mangdadael ti kinatarnawda. (Hebreo 11:4-38; Apocalipsis 12:10-17) Tapno maparegta dagiti maika-20-siglo nga ad-adipen ni Jehova nga agmatalek, nangiyurnos ti Watch Tower Society ti agsasaruno a “Manangsalimetmet Kinatarnaw” a kumbension dagiti Saksi ni Jehova a maangay iti adu a pagpagilian, a nangrugi iti kalgaw ti 1985. Intampok ti kada aldaw ti maiyanatop a tema ti Biblia.

“Pannagna iti Kinatarnaw”

Daytoy a tema iti panglukat nga aldaw ti kumbension ti nangparayray iti naespirituan a gana. Ti palawag a “‘Denggenyo, O Tattaok,’ ti Sao ni Jehova” ti nangrugi babaen ti panangipalagipna kadagiti isuamin nga umimdengda koma a naimbag. Kas pammaneknek ti kinasirib dayta a rekomendasion isu ti palawag ti tsirman, “Bay-am a ti Kinatarnaw ti Mangsalwad Kadatayo.” Kasano ti panangaramid ti kinatarnaw iti dayta? Sapulen ti kinatarnaw a masapul a naan-anaytayo iti debosiontayo iti Dios, a salimetmetantayo ti kinadalus ti puspusotayo, dagiti motibotayo, ken dagiti panagayattayo. “No isu daytoy ti pangngeddengtayo,” kinuna ti tsirman, “ngarud ti kinatarnawtayo ti mangsalwadto kadatayo.”​—Salmo 25:5; 31:23.

Simmaruno datayo ti “Naparegta babaen iti Ulidan dagiti Nasuboken a Manangsalimetmet Kinatarnawna.” Kalpasan ti panangtukoyna kadagiti makaparegta nga ulidan manipud kadagiti naglabas, ti nagpalawag nagsaludsodanna dagiti mapagulidanan a manangsalimetmet kinatarnawna iti tiempotayo. Dagidiay a nangsalimetmet ti kinatarnawda ket “Dida Ibain ti Naimbag a Damag.” Daytoy a palawag, a naibatay iti Marcos 8:38, pinagbalinna a nalawag a ti di panangibain a mangipabigbig iti bagbagitayo iti ministeriotayo, kadagiti lugar a pagtrabahuantayo, ken iti dadduma pay ket maysa a salaknib. ‘Ket anian a nagsayaat a banag nga inton agsao ni Jesus iti imatang dagiti nailangitan nga anghel ken iti Amana, iwaragawagna a datayo dagiti adalanna a nagna iti kinatarnaw!’

“Dagiti Naipaltiing a Bambanag Biangtayo ken dagiti Annaktayo” ti paset ti programa a mangipakpakita a, kas naayat nga Ama, siraragsak nga impanayag ni Jehova iti ilina “dagiti nalimed a bambanag.” (Deuteronomio 29:29; Amos 3:7) Ti napasnek a panagadal kadagitoy naipaltiing a bambanag pabilgennatayo tapno masalimetmetantayo ti kinatarnawtayo. Ti sumaganad a tema, “Panagragsak iti Sao ni Jehova,” impaganetgetna a dagiti Saksi ni Jehova agbalinda nga estudiante ti Biblia. (Salmo 1:1, 2) Wen, “ti panagadal ket paset ti panagbiag ti Kristiano a magmagna iti kinatarnaw.”

“Panangilawlawag manipud Kasuratan” ti pamay-an nga us-usaren dagiti manangsalimetmet ti kinatarnawna iti panangsangoda kadagiti nadumaduma a tattao a pangaskasabaanda. Kas pangarigan, idiay sinagoga ti Tesalonica, ni apostol Pablo ‘impalawagna manipud Kasuratan, nga imparangna ken pinaneknekanna babaen kadagiti reperensia a masapul nga agsagaba ni Kristo.’ Naballigi aya ni Pablo? Wen, ta dadduma kadagiti nagimdeng kenkuana namatida. (Aramid 17:1-4) Apresiaren aya dagiti kumbensionista ti tulong iti panangsungbat kadagiti salsaludsod a masabsabetda iti ministerioda? Anian a ragsak iti panangawatda iti dayta idi a ti nagpalawag imparangna ti maysa a baro a katulongan a libro iti tay-ak ti ministerio, ti Reasoning From the Scriptures!

“Panangaramat nga Umiso iti Sao ti Kinapudno”

Iti maikadua nga aldaw, makaparagsak ti pannakakita kadagiti nagadu a payunir​—rinibribo kadagiti dadduma a kumbension​—ti nagtakder idi inyawis ti nagpalawag, a mangpaneknek nga umariwekwek dagiti makipaspaset iti amin-tiempo a ministerio. Iti paset a, “Pagreggetanyo a Sipipigsa ti Amin-Tiempo a Serbisio,” naipaganetget a ti panagpayunir maikari unay iti panagregget, numan pay kasapulan ti kinasaet iti daytoy a trabaho.​—Lucas 13:24.

Ti kangrunaan a palawag, “Paragsakenyo ti Puso ni Jehova Babaen ti Panangsalimetmet ti Kinatarnaw,” ti naibatay iti Proverbio 27:11. Kimmali daytoy a palawag kadagiti paggamengan ti Sao ti Dios ket rimmuar kadagitoy a batbato: “Ti pudpudno a kinatarnaw kaipapananna ti napampamaysa a debosion iti maysa a persona​—ken Jehova a Dios.” “Ni Satanas isu ti pangulo dagiti manangdadael ti kinatarnaw,” a ti iyaalsana ti nangpataud “ti salisal ti kinanainkalintegan ti kinasoberano ti Dios.” “Numan pay ti kinasoberano ni Jehova ket saan nga agpannuray iti panangsalimetmet iti kinatarnaw dagiti parparsuana, ti aramid nga iyaalsa ti Diablo pinagbalinna ti panagduadua maipapan iti kinatarnaw ti tao kas nasken a paset ti salisal ti sapasap a kinasoberano.” Insaludsod ti nagpalawag: “Kasano a posible ti intay panagballigi kas manangsalimetmet iti kinatarnaw?” “Mabalinantayo dayta agsipud ta agtultulnogtayo iti Sao ti Dios,” insungbatna.​—Roma 14:8.

Ti panangipangpangruna kadagiti naespirituan nga intereses iti biag naipaganetget iti sumaganad a palawag, “Ti Bendision ni Jehova​—Daytat’ Mangpabaknang.” Ad-adda a natulongantayo a nangbigbig a nupay nausar ti kuarta, ti panagayat iti kuarta maysa a dakkel a peggad. (Eclesiastes 7:12; 1 Timoteo 6:10) Ti kinamatalek mangyeg ti bendision ni Jehova, ti pudpudno a kinabaknang.​—Proverbio 10:22.

Ti drama a “Ti Masanguananyo​—Karit Dayta” indiligna ti manangsalimetmet kinatarnawna a kurso dagiti Nazareo kadagiti karit a naipasango kadagiti agtutubo a Saksi iti tarigagayda nga agbalin a payunir ken agtalinaed iti amin-tiempo a serbisio imbes a ti panangsursurotda kadagiti materialistiko a kalkalat. Ingunamgunamna kadagiti agtutubo nga awatenda dayta a karit ket agserbida a naan-anay iti Dios. Inyilustrar met ti drama no kasano a dagiti nagannak ken dadduma pay makatulongda.

Inlawlawag ti “Agmula a Nawadwad, Agapit a Nawadwad” a ti prinsipio nga ‘Apitentayo ti immulatayo’ ket nainsiriban, nainkalintegan, ken naayat. Iti panangtulad iti Dios, ni Kristo, ken iti ‘matalek nga adipen,’ agmulatayo koma a nawadwad kadagiti pannakigimong, panagkararag, panangaskasaba, ken iti amin a relasiontayo iti pamilia. (Mateo 24:45-47) Ti kasta a panagmula ipasiguronatayo iti panagapittayo kadagiti bendision ni Jehova.​—Hebreo 6:10.

Bayat iti palawag a “No Kasano ti Rebbeng nga Isusungbatyo iti Tunggal Maysa,” impaay dagiti agdengdengngeg ti di nabingay nga atensionda kadagiti suhestion ken demonstrasion no kasano nga usaren ti baro a libro a Reasoning From the Scriptures. Naipaganetget ti pannakasapul a mangparmek ti kinaaleng-aleng babaen iti panangusar kadagiti maiyanatop nga introduksion, ti nadayaw nga isusungbat uray pay no adda ti napasnek ngem negatibo a tignay, ken ti panangipakita iti Biblia kas gubuayan dagiti sungbattayo.​—Colosas 4:6.

Kalpasan ti maudi a palawag iti maikadua nga aldaw a, “Panangiwaragawag kadagiti Nakaskasdaaw nga Ar-aramid ni Jehova,” okupadotayo iti panangaramid iti dayta a mismo babaen iti pannakiraman iti tay-ak iti ministerio. Iti dayta met laeng a malem maysa a saksi a nagbalaybalay idiay Vancouver, Canada, ti naipasango iti suppiat a: “No ti Dios ket maysa a Dios ti ayat, apay a palpalubosanna ti kinadakes?” Ti sungbat a naipaay idiay baro a libro a Reasoning ti nangpennek iti agsalsaludsod, ket maysa a panagadal ti Biblia ti narugianan nga insigida.

“Awan Pakababalawanna iti Tengnga iti Nakillo a Kaputotan”

Daytoy ti makatukay panunot a tema iti maikatlo nga aldaw. Iti dayta nga agsapa, ti palawag a “Pagdayawmo ken Jehova dagiti Napapateg a Sanikuam” impaganetgetna a ti dedikado a biagtayo, ti nasinged a relasiontayo ken ni Jehova, ken dagiti pisikal, mental, naespirituan, ken namaterialan a kinabaknangtayo ket aminda napateg a rebbeng a pagdayawtayo iti nailangitan nga Amatayo.​—Proverbio 3:9, 10.

Ti palawag a “Panangpabaro ti Pigsa, a Di Mabannog” ti nangted iti naintiempuan a pannursuro a makatulong kadatayo a mangparukma kadagiti panagregget ni Satanas a mangdadael iti kinatarnawtayo babaen kadagiti panagduadua, pannakapukaw iti pammati, materialesmo, pannulisog, ken dagiti nagduduma pay a langa ti panangup-upay. Ti panagadal, panagmennamenna, panagkararag, pannakigimong, ken ti regular a pannakiraman iti panangikaskasaba iti Pagarian isut’ sigurado a pamay-an tapno malukatan ti di mabannog a Gubuayan ti pigsa, ni Jehova.​—Isaias 40:28-31.

Ti kangrunaan a punto iti palawag nga “Agbibiagen a Maipaay iti Pagayatan ti Dios Itatta ken iti Agnanayon” a ta no addaantayo iti kababalin kas adda ken Kristo, agbiagtayon “saanen a maipaay kadagiti tartarigagay ti tao, no di ket agpaay iti pagayatan ti Dios.” (1 Pedro 4:1, 2) Pulos a di impalubos ni Jesus ti aniaman a natauan a tartarigagay a mangikapis kenkuana manipud iti dayta a kurso. Dagiti kandidato a maipaay iti bautismo nangnangruna ti nagimdeng a naimbag iti sumaganad a palawag a “Pannakilinea a Kadua dagiti Manangsalimetmet Kinatarnawna ken Jehova.” Naibaga kadakuada a ti addang ti bautismo ket isu laeng ti pangrugian iti lumbada a mangsalimetmet iti kinatarnaw. Tapno makapagtarayda a naimbag, kasapulan a gundawayanda dagiti sagana kas iti panagkararag, ti Sao ti Dios, dagiti Nakristianuan a pagbasaan, ken ti aktibo a pannakitimpuyog a kadua ti kongregasion. Nagtakder dagiti kandidato a mangsungbat ti dua a salsaludsod a mangipampamatmat no natarusanda ti al-alaenda nga importante nga addang. Simmaruno iti bautismoda iti danum, a no maminsan buybuyaen dagiti dadduma a delegado ti kumbension.

Iti dayta a malem, ti palawag nga “Adda Aya ti Panagbuteng ken Jehova Kadatayo?” impaganetgetna ti panagraem iti dayta Sapasap a Soberano. (Proverbio 8:13) Iti nagtengngaan ti managbuteng-Dios nga Ari Josafat ti Juda ken ti naitrono-itan a Dakdakkel a Josafat, ni Jesu-Kristo, addada panagasping a kas kadagitoy: panangsalimetmet a nadalus iti panagdayaw (1 Ar-ari 22:16; Malakias 3:1-18); panangikalintegan ti wayawaya iti panagdayaw (2 Cronicas 17:1, 2, 12-19; Filipos 1:6, 7); panangorganisar tapno maisuro dagiti pudno a managdaydayaw (2 Cronicas 17:7-9; Mateo 28:19, 20); ken ti panangipasdek ti nateokratikuan a pangukoman tapno maipaalagad ti kinahustisia.​—2 Cronicas 19:6, 7; 1 Corinto 6:5, 6.

Ti paset a “Dagiti Kasuratan Naimbag a Pakababalawan” intudona no kasano a makatulong ti Biblia kadatayo nga agturong iti naurnos a panagbiag ken panangipakita iti panagraem iti organisasion, kadagiti nadutokan a manangaywan, ken kadagiti natataengan. Iti sumaganad a paset, “Determinado nga Agserbi ken Jehova a Buyogen ti Naan-anay a Puso,” naipasagepsep kadatayo ti pannakasapul a maaddaan iti nasalun-at a piguratibo a puso, daydiay mapagtalinaed a nagkaykaysa​—naan-anay​—a maipaay iti serbisio ni Jehova.​—1 Cronicas 28:9.

Ngem ti met ngay maipapan iti mata? Ti sumaganad a nagpalawag sinungbatanna ti saludsod a, “Kas Miembro ti Pamilia, Ti Aya Matam ‘Napamaysa’?” Yantangay nagadu dagiti bambanag nga us-usaren ni Satanas a manggulo iti naespirituan a matatayo, nasken a dagiti Kristiano nga amma, inna, ken annak salimetmetanda koma ti natimbeng a panangmatmat ken ipangpangrunada koma dagiti intereses ti Pagarian. (Mateo 6:33) Ti panangbigbig iti Naindaklan nga Organisador babaen iti panangipakita iti panagraem kadagiti nadutokan a panglakayen ken iti kongregasion ti naipaganetget iti sumaganad a palawag, “Siaannad a Panangsurot iti Bilbilin ti Ari.”​—Proverbio 8:32-36.

Ti tampok ti aldaw isu ti palawag a “Ti Kinatarnaw iti Kinapudno iti Nadangkes a Lubong.” Mainayon kadagiti dadduma a bambanag, masapul a taginayonen dagiti Kristiano ti kinatarnawda iti kinapudno babaen ti panangikalinteganda iti pannursuro ti Biblia maipapan iti panamarsua ken babaen iti panangparukmada kadagiti di nadiosan a teoria. Dagiti agdengdengngeg ti naragsakan iti pannakairuar ti 256-panid a libro a mangsungbat a naan-anay iti saludsod nga imbangon ti paulona, Life​—How Did It Get Here? By Evolution or by Creation? Kasano kaepektibo daytoy a pagbasaan? Maysa a dati nga ebolusionista, a maysa itan a Saksi idiay Sweden, nabasana ti intero a libro iti dayta a rabii ket kinunana: “No maysaak koma nga ebolusionista idi kalman, sigurado a binalbaliwak ti panunotko iti nagpatnag.”

“Pataknengenyo ti Panagbibiagyo iti Tengnga dagiti Nasnasion”

Isu daytoy ti tema iti maudi nga aldaw ti kumbension. Maysa kadagiti palawag a naited iti dayta nga agsapa sinungbatanna ti saludsod nga “Adda aya Aniaman a Mabalinto a Mangisina Kadatayo Manipud Ayat ti Dios?” Datayo laeng ti makaisina iti Bagbagitayo manipud ayat ti Dios ken ni Kristo. Ngem la ketdi no taginayonentayo ti pammatitayo, awan aniaman a rigat, wenno aniaman a kasasaad, awan aniaman a bumusbusor ti makapukaw ti ayat ti Dios kadatayo.​—Roma 8:35-39.

Ti palawag a “Dikayo Paalis a Sipapardas iti Panunotyo” impaganetgetna ti pannakasapul ti intay panangsalwad iti lugartayo iti naespirituan a paraiso. Kasano? Iti pasetna, babaen ti panangliklik iti espiritu ti panagreklamo ken babaen ti panananglaban iti apostasia, iti kasta al-alagadentay ti balakad ni Pablo a ‘dikay paalis a sipapardas manipud panunotyo’ babaen iti aniaman a berbal wenno insurat a mensahe a nairanta a mangpataud iti panagduadua ken mangdadael iti pammatitayo.​—2 Tesalonica 2:1, 2.

Ti maikadua a makapainteres a drama isu ti “Agbuteng iti Dios, Umadayo iti Kinadakes.” Sinalaysay dayta ti manangsalimetmet kinatarnawna a ni Job ket impakitana a dagiti pannakaidadanes ken panagsagsagaba dagiti agserserbi iti Dios ket saanen a baro. Agpapan pay dagiti panagregget a mangisisia kadatayo, kas ken Job rebbengna a determinadotayo a mangsalimetmet iti kinatarnawtayo nga agbuteng ken ni Jehova ket umadayo iti kinadakes.

Ti palawag publiko a, “Ti Tiempo ken Pampanawen ti Dios​—Aniat’ Pangitudtuduanda?” impalagipna kadakayo a ni Jehova ti “mangikkat ken mangisaad kadagiti ar-ari” a maitunos iti di mabalbaliwan a panggepna. Inton dumteng ti tiempona, ngarud, iti awan mintis pagpatinggaenna ti kinadakes ket isublina ti kinalinteg.​—Daniel 2:21, 44.

Dagiti dua a pangserra a palpalawag ti pudno a maiyanatopda unay. Ti “Liwliwa Agpaay kadagiti Tattao iti Kinatarnaw” ti nangparagsak kadatayo iti pammasiguro a babaen iti Saona, iti espirituna, ken kas sungbat dagiti karkararagtayo, awan mintis a ni Jehova ti mangsustiner kadatayo a makalasat kadagiti pakasusuotan. Ket kas impakita ti maudi a palawag, dagiti Saksi ni Jehova saanda nga agsansanud gapu ta agbibiagda iti daytoy bumusbusor a lubong. Imbes ketdi, isuda ti “Maysa a Manangsalimetmet-Kinatarnawna nga Organisasion nga Agab-abante”! Daytoy nga organisasion ti naisalsalumina iti panangsuportarna iti kinasoberano ni Jehova ken iti kinasigurado ti panagballigina ken iti ilalasatna.

Umabante kas Manangsalimetmet ti Kinatarnaw!

Mainayon iti ragsakda iti panangawatda kadagiti dadduma a nababaknang a taraon, agraman dagiti dua a nagpipintas a baro a libro, naparagsakan dagiti kumbensionista iti pannakairuar ti naranga ti pannakaiyilustrarna a 32-panid a broshur a The Government That Will Bring Paradise. Ket anian a ragsak ti panangawat met iti Kingdom Melodies No. 6, maysa a cassette tape dagiti napipintas a toktokar nga agpaay a pagragsakantayo!

Ket gapu iti aglaplapusanan a pannakarepresko ken pannakabendisionda, dagiti agsubsublin a delegado siyayamanda kadagitoy makagunggona unay a naespirituan a rambak. Napabaro manen ti kompiansatayo a Daydiay iti las-ud ti 6,000 a tawtawen supsuportaranna dagiti manangitandudo iti kinasoberanona ti makitananto dagiti saksina a makalasat kadagitoy napeggad a “maudi nga al-aldaw” ket sitatalged nga iturongnanto ida iti Baro nga Urnos, agpaay iti agnanayon a pakaalangonanna.​—2 Timoteo 3:1; Apocalipsis 7:9-12; 21:1-5.

Buyogen iti daytoy a panagtalek ken pammati iti Diostayo, a ni Jehova, ania ita ti panggeptayo? Apay, determinadotayo nga agtultuloy nga umabante a simamaingel kas ti maika-20 a siglo nga organisasion ni Jehova a manangsalimetmet iti kinatarnaw!

[Kahon iti panid 29]

No Ania ti Kuna dagiti Dadduma

Ti superintendente ti polisia, Leeds, Inglatera: “Kayatko ti mangipaay iti dayaw kadakayo kadagiti manangidauloyo, ken kadagiti amin a tattao a timmabuno . . . gapu iti nagsayaatan a pannakaiplanona ken pannakaaramidna. Daytat’ maysa a dayaw kadakayo. Sinarungkarak ti Stadium iti malem ti Sabado ken agsapa ti Domingo ket nakitak a ti atmospera ken dagiti programa ti makapabang-ar unay a kapadasan. Sumagmamano kadagiti kakaduak ti kasta met laeng ti komentoda.”

Maysa a hepe a mannurat ti editorial para iti maysa a pagiwarnakan ti Montreal, Canada, iti sidong ti paulo nga “Umisemtay met kadagiti tattao ni Jehova”: “Idi naminsan nga aldaw, iti kurang pay ngem dua oras, timmuktokda kadagiti 800,000 a ruruangan iti dayta a lugar. Maysa a langa ti reprep a naespirituan a panagproselita, a medio makapasuron bassit ngem saan met a talaga a makariribuk. . . . No umawatkay ti bisita iti pagtaenganyo, dikay pampanunoten ti bassit a pakariribukan tapno maiwayaanyo ida. . . . Gapuna, ania no dikay makiraman iti pammati dagiti Saksi ni Jehova; mabalintay ti makiraman, iti sumagmamano nga aldaw, iti uray bassit laeng iti kinatalinaayda, ket nasaysayaat ti panagriknatayo iti dayta. Dagitoy natalna a tattao pinilida ti agtataripnong ditoy Montreal; bay-anyo nga adu pay kadakuada ti umay, ti pinulpullo ribo kadakuada.”

Maysa nga opisial a polis sadi Durtmund, Pederal a Republika ti Alemania: ‘Kadagiti paay-ayam ditoy addaankam ti di agkurang 200 a polis nga agbambantay; iti panagtataripnongyo dua laeng ti kasapulanmi, agraman dua pay a mangiturong iti trapiko.’

Ti manedyer iti football stadium idiay Norwich, Inglatera: “Ti nagtalna nga atmospera iti uppat nga aldaw . . . ti makaallukoy. Mapasaran ti personal a kinakalmada a naigiddiat a naan-anay kadagiti aniaman a dadduma nga uppat nga aldaw iti makapanerbios a lubong ti negosio ken ti inaldaw-aldaw a panagbiag iti aglawlawtayo. Pudno adda maysa a banag kadagiti Saksi a naidumduma maipapan kadakuada ken narigat nga ilawlawag.”

[Kahon iti panid 30]

Kumbension idiay Montreal​—Banag nga Espesial!

No maipapan ti linaon ti programa, ti “Dagiti Manangsalimetmet ti Kinatarnawna” a Kumbension Distrito a naangay iti nalatak nga Olympic Stadium idiay Montreal, Quebec, Canada, ket kas met laeng kadagiti amin a dadduma iti daytoy a serie. Ngem iti dadduma a pamay-an dayta ti espesial. Kadagiti dadduma a bambanag, dayta pay laeng ti damdamo iti maysa a grupo kadagitoy a kumbension nga espesial ti kadakkelna wenno kadagiti dadduma pay a pamay-an.

Ti Kadakkelna: Adda dagupna a 78,804 a nagtataripnong manipud makindaya a Canada ken ti umamianan a daya ti Estados Unidos. Pudno a makapabileg ti pammati ti agbalin a paset iti kasta a kadakkel a bilang dagiti manangsalimetmet ti kinatarnawna nga agim-imdeng, agkankanta, ken sangsangkamaysa nga agkararag dayta. Daytat’ maysa a banag nga espesial!

Bautismo: Maysa a naisangsangayan a ragsak ti pannakakita ti 1,004 a kabbaro a dedikado a nagtakder a maipaay iti bautismo. Adtoy ti makitkita a pammaneknek iti panagdakkel a mapaspasamaken iti nagtetengngaantayo.

Dagiti Pagsasao: Addada programa iti 11 a pagsasao​—Arabiko, Insik, Ingles, Pranses, Griego, Hungariano, Italiano, Koreano, Portuguese, Español, ken Ukraniano. Iti nagbukbukel nga stadium, ti espesial a sound system ti naiyurnos tapno dagidiay adda iti seksion dagiti Pranses makangngegda iti pagsasaoda bayat a dagiti Ingles pagsasaona a delegado mangmangngeganda met dayta iti mismo a pagsasaoda.

Trailer City: Daytoy pay ti sabali kadagiti naisangsangayan a pasetna. Tapno mapadagos dagiti delegado a makasapul ti espasio para kadagiti trailers, dagiti recreational vehicles, ken dagiti tolda, nairugin ti panagregget idi Disiembre 1984 a magun-odan ti pannakausar ti arubayanna a Maisonneuve Park, iti laeng ballasiw ti lansangan manipud ti stadium. Idi damo a maasitgan dagiti opisiales maipapan iti panangabang iti parke, maawatan laeng ti panagkatawada. Total, ti panangabang iti intero a parke ti siudad ket di pay pulos naar-aramid idi. Idi agangay, nupay kasta, naited ti pammalubos. Nakatulong unay ti naimbag a pakasarsaritaan dagiti Saksi ni Jehova.

Iti kamaudiananna, 4,300 a yunit ti naibangon, ket ngangngani 20,000 a kumbensionista ti napadagos iti daytoy naberde ti karuotanna a tengnga ti aglaplapusanan a linong dagiti kakaykayuanna. Ket ania ti kasasaad ti parke kalpasan ti panangusar dagiti nagadu a tattao iti agarup maysa a lawas? Dagiti masdaawan nga opisiales nasarakanda nga awan ti aniaman a serioso a perdi iti uray sadino. Gapu iti dayta a rason ti intero a kantidad ti lima a numero a deposito para iti perdi ti naisubli!

Dagiti Timmabuno a Kameng ti Manarawidwid a Bagi: Daytoy a paset ti namagbalin met nga espesial iti kumbension idiay Montreal. Nupay likliklikan dagiti tattao ni Jehova amin a panagdaydayaw iti parsua, awan duadua adu ti nakiraman iti rikna ti maysa kadagiti kakabsat a nagkuna a buyogen ti panangipateg: “Ti kaadda dagiti pito a miembro dagiti ay-ayatentayo a Manarawidwid a Bagi, a dadduma kadakuada diak pay pulos nakitkita wenno nangnangngegan a nangted ti palawag idi, ti pudno a makaparegta unay.” Ti kasta a pannakilangenlangen ti pudno a nangibunga iti naespirituan a “panagpipinnaregta.”​—Roma 1:11, 12.

Maysa a Nagsayaat a Panangabrasa: Dagiti opisiales ken ti publiko nga en heneral ti nakilangen kadagiti saksi ni Jehova iti maysa a nagsayaat ken natimbeng a panagpampanunot. Daytoy ti banag nga espesial no malaglagip a di pay unay adu a tawen ti napalabas ti pasado a Quebec Premier a ni Maurice Duplesis ti nangideklara ti maysa a silulukat a “gubat nga awanan asi kadagiti Saksi ni Jehova” agingga nga isudat’ maikisap. Ngarud buyogen ti naimbag a rason, maysa a reporter ti maysa a pagiwarnakan ti nagkuna: “Panunotenyo laengen, idi kalman, [Biernes] adda eksakto a 74,846 a Saksi nga adda iti uneg daytoy nga stadium! Ni Maurice Duplesis, nga isut’ nangiparit iti daytoy a trabaho, ti nalabit agpuspusipos idiay tanemnan.”

Saan a daytoy laeng ti damona a panangbendision ni Jehova nga aglaplapusanan kadagiti manangsalimetmet iti kinatarnawna. Kadagiti adu a pamay-an, nupay kasta, ti kumbension idiay Montreal ket maysa a banag nga espesial.

[Tsart iti panid 28]

Sumagmamano kadagiti “Manangsalimetmet Kinatarnawna” a Kumbension

Pagilian Kumbension Timmabuno Nabautisaran

Austria 3 23,123 237

Brazil 25 389,387 4,825

Islas Britanicas 10 142,859 925

Canada 14 146,897 1,585

Ecuador 4 22,918 394

Francia 11 119,940 2,002

Grecia 3 37,367 368

Italia 25 184,078 4,153

Japan 25 202,221 3,512

Netherlands 1 40,694 151

Portugal 10 52,581 990

España 13 90,808 1,628

Sweden 8 27,194 315

Switzerland 3 20,601 213

Venezuela 4 69,843 1,063

[Dagiti ladawan iti panid 31]

Idiay Montreal, imparang ni W. L. Barry iti Manarawidwid a Bagi ti makapainteres a baro a libro a “Life​—How Did It Get Here? By Evolution or By Creation?”

Ti panangsalimetmet ni Job iti kinatarnawna ti naitampok iti daytoy a drama iti Biblia, a naipabuya iti kumbension idiay Atenas, Grecia