Dagiti Propesional a Nakasarak ti Pudpudno a Napaut a Trabaho
TI ANGIN ti rabii ti nakalamlam-ek ket ti danum nakalamlamiis unay. Dua gasut nga agtutubo a lallaki ken babbai, a sikakawes kadagiti puraw a pagan-anay ken siigem kadagiti kandila iti ngato dagiti ul-uloda ti timmapug iti danum agingga iti barukongda. Maysa kadi dayta a seremonia a pangawat kadagiti baro a miembro ti maysa a mistiko a kulto? Wenno nalabit maysa a pananglukluko ti maysa nga agtutubo?
Dagitoy nga agtutubo a nagturpos iti high school ken universidad ti timmipon kadagiti rinibribo a kataebanda iti mabalin a maibilang a maysa a seremonia iti dalan nga agturong iti propesional a karera a kadua ti maysa a dakkel a kompania idiay Japan. Ti nakalamlamiis rineprep a bautismo ti nairanta tapno dalusanna dagiti mainanama nga empleado iti aniaman nga agimbubukodan a pagannayasan a mabalin a nagungun-odanda idiay eskuelaan ken tapno patibkeren ti siggalut iti kinasungdoda iti kompania.
Propesianalismo ken Dedikasion
“Idiay Japan ti trabaho isu ti kagimongan. Ti kagimongan isu ti trabaho,” insurat ni Frank Gibney iti librona a Japan: The Fragile Superpower. Ti kaipapanan daytoy a ta apaman a simrek ti maysa a tao iti kompania, ti intero a panagbiagna ti aglawlaw iti dayta. “No isut’ agtartrabaho a maipaay iti Mitsubishi, isu ti tao a Mitsubishi. Kaaduan kadagiti gagayyemna ti aggapu iti Mitsubishi. Isut’ makipaginum kadakuada, makiay-ayam iti golf wenno bowling a kaduada, ken iranudna dagiti parparikutna kadakuada. Isu sigurado a makisalip kadakuada, ngem kas kadagiti annak a makisalip iti uneg ti pamilia nga awan a pulos ti panunot a pumanaw. Malaksid kadagiti kakabagianna, ken nalabit sumagmamano dagiti gagayyemna iti eskuelaan, kaaduan iti pannakitimtimpuyogna—ken masansan dagidiay adda iti pamiliana—ti adda amin iti uneg ti sangal ti kompania.”
Kas kasukat iti kasta a dedikasion ken panagsakripisio, maikkan dagiti trabahador iti siguridad iti langa a kapaut ti panagbiagda a panggedan. Daytoy ramanenna ti awan inggana a panagsanay, panagad-adal, pannakaiyakar, ken, siempre, dagiti promosion.
Kaaduan kadagiti agtutubo idiay Japan ti sisasagana a mangawat iti daytoy a pormula ti panagballigi ket agbalinda a paset ti sistema. Dagiti dadduma, nupay saanda nga umul-uli iti agdan ti korporasion, makirupirda met a rumang-ay kadagiti dadduma a propesional a tay-ak. Ngem ti kadi kasta a sistema mangyeg ti ragsak ken pannakapnek? Ti kadi kapaut ti panagbiag a panggedan kaipapananna ti kapaut ti panagbiag a ragsak? Umadu nga umadu dagiti makakitkita nga adda ti banag a nasaysayaat ken makagunggona ngem ti iyuuli iti agdan ti korporasion wenno pannakirupir a manggun-od iti personal a kinabaknang ken pannakaitan-ok.
Ti Trabahona Isu ti Biagna
Nagturpos ni Junichi manipud Keio University School of Commerce idi 1961. Iti panangsurotna iti addang dagiti nakaisigudan a nagturpos iti unibersidad, isut’ timmipon iti nalatak a korporasion. Iti kasona, daytoy ti kadadakkelan a managlako iti kotse idiay Japan, nga addaan iti agarup 4,700 nga empleado. Ti iyuulina iti agdan ti korporasion ti nagtultuloy. Idi agangay, nagbalin a hepe ti maysa a paset ti departamentona. Nupay ti trabahona ket masansan a manipud agsapa aginggat’ tengnga ti rabii, a ngangngani awan payen ti tiempona nga agpaay ken baketna ken dagiti lima nga annakna, inawatna daytoy kas maysa a nasken a panagsakripisio a maipaay iti natalged a masanguanan.
Ngem adda banag a napasamak idi Oktubre 1974. Naduktalan ni Junichi a ti asawana ken dagiti annakna ti makipagad-adal iti Biblia a kadua dagiti Saksi ni Jehova ken tumabtabunodan iti Nakristianuan a panaggigimong. Inaramidna amin a kabaelanna a mangpasardeng kadakuada, agraman ti panangpanawna kadakuada, ngem awan naaramidanna.
Maysa nga aldaw idi simmangpet manipud pagtrabahuanna, napan nakigimong ti pamiliana. “Nakitak ti lamisaan a naidasaren a maipaay iti pangrabii, ket adda maysa a surat nga agpaay kaniak,” kuna ni Junichi. “Iti surat, imbaga ti pamiliak kaniak a dida pulos maisuko ti kinapudno, a dayta ti pudno a makagunggona met kaniak, ket maysa nga aldaw maawatakto met laeng dayta.” Daytoy ti nakaaramid ti kalalainganna nga impresion ken Junichi. “Napanunotko a nalabit daytoy nga agpayso ti kinapudno, ket insardengko ti panangbusbusorko kadakuada.”
“Bayat ti panaglabas ti panawen, umay ken sarungkarandak dagiti Saksi ket paregtaendak nga agadal ti Biblia. Ditoy metten a mangrugi a suminga ti propesional a panagbiagko. Okupadoak unay iti trabaho ta mariknak a diak pulos makaipaay iti panawen a maipaay iti panagadal ti Biblia ken kadagiti panaggigimong. Sa naammuak a no siak ti agadal masapul nga isardengko dagiti di maitunos iti prinsipio nga ar-aramid ken ti masansan a panaglinglingay agingga iti nakarabrabiin a naitimpuyog iti dayta a trabaho. Gapu ta dayta ti mangpakapuy iti negosio, nagkedkedak a makipagadal.”
Ngem babaen ti pammaregta dagiti Saksi, rinugian ni Junichi ti makipagadal ket di nagbayag rimmang-ay agingga iti punto nga indedikarna ti biagna iti Dios ket nabautisaran. Nupay kaskasdi nga addaan pay met laeng iti amin-tiempo a trabaho, nasarakan ni Junichi ti ibilbilangna a pudpudno a kapaut ti panagbiagna a trabahona. Nanipud Marso 1978, isu ti nagtultuloyen nga agserserbi kas maysa nga auxiliary a payunir, a mangbusbusbos ti 60 oras iti kada bulan iti trabaho a panangasaba.
Nagunggonaan kadi ni Junichi manipud iti baro a wagas ti panagbiagna? “Wen, nagunggonaanak. Nakitak nga ad-adu ti maaramidak iti trabaho kabayatan iti aldaw tapno siwayawaya dagiti rabii a maipaay iti panangsurot kadagiti intereses ti Pagarian a kadua ti pamiliak. Naaddaanak ti nagadu a gundaway a mangasaba kadagiti katrabahuak ken ti makipagadal ti Biblia kadagiti dadduma a lallaki nga addaan iti okupado a sekular a panggedan kas kaniak idi. Dua kadakuadan ti nabautisaran, ket makipagad-adalak kadagiti tallo a dadduma pay. Pagyamanak ni Jehova gapu iti anusna kaniak.”
Kayatna ti Bumaknang a Dagus
Kas maysa kadagiti innem nga annak iti pamilia, nakalasat ni Takafu iti air raids idi Gubat Sangalubongan II idiay Nagoya City a ti laeng nabati isu ti bado nga adda iti bagina ken ti maysa a pilosopia a “bumaknang a dagus.”Iti panangidagdagadag ti ulitegna, simrek iti maysa nga eskuelaan ti propesional a pannakilumba iti bisekleta idi agtawen ti 15. Idi madanonna ti 22, ‘naragpatna’ ti A-class a mannakilumba ti bisekleta, nga addaan panagparang kadagiti isuamin a lumba iti intero a pagilian. Malaglagipna pay ti pannakakitana iti inana a mangidatdaton kadagiti nangabakanna iti sanguanan ti altar ti pamilia kas tanda ti panagyaman. Nagparang a naragpaten ni Takafu ti kalatna iti panagbiag ket ti isuaminen agturongen nga agpangato.
Kalpasanna maysa a misionero dagiti Saksi ni Jehova ti simmarungkar iti pagtaenganna ket inikkanna ni Takafu ti pagpampanunotanna. Dagita a sasao kas kadagitoy, inyebkas ni Jesus, ti naimula iti panunotna: “Ta ania ti magunggona ti tao no maalananto ti amin a lubong ket mapukawnanto ti kararuana?” (Mateo 16:26) Idi agangay, rimmang-ay ni Takafu iti pannakaammona iti Biblia ket nabigbigna a kasapulan ti panagaramid iti sumagmamano a panagbalbaliw.
“Kas maysa a propesional a siklista, ammok a ti pannakilumba iti bisekleta ken ti panagsugal ket agkuykuyog,” kuna ni Takafu. “Kaskasdi ti panagdesision ti saan a nalaka. Naipaaykon ti pito a tawen iti panagbiagko iti daytoy nga ay-ayam, ket amin dagiti masapsapulak ti kasla nasken nga agpaay iti pagimbagan ti pamiliami. Ngem naammuak manipud iti Biblia, a naipasango ni Moises ken Pablo kadagiti umas-asping a panagdesision ket pinilida ti nasaysayaat a kurso. Kasta met kaniak.” Innala ni Takafu ti maysa a baro a pannakilumba—ti lumba a maipaay iti biag—ket isu ti agtultuloy iti dayta agingga iti daytoy nga aldaw, iti adun a tawtawen a mangtultulong kadagiti kongregasion kas maysa nga agdaldaliasat a manangaywan.
Ti Negosiona ti Nangala ti Amin a Panawenna
Ni Satoshi ti adda iti negosio nga aglaklako ti kawes dagiti babbai. Kas ti naballigi a makinkukua kadagiti uppat a paglakuan, isut’ natalged iti pinansial. Ngem ti pannakilangenlangenna iti lubong ti negosio ti nangiturong met kenkuana iti konklusion a ti sangalubongan a polusion, ti kinakirang ti taraon, ken ti gubgubat kaipapanannanto ti panagpatingga ti panagbiag ti tao. Gapuna, idi simmarungkar ti maysa a Saksi nga addaan polieto a mangipapaay iti pammatalged a di ipalubos ti Dios daytoy, natignay ti interes ni Satoshi.
Ngem ti negosiona ti nakalapped iti dalanna. “Gapu iti nakaro a kompetision, ti panagkapuy ti negosio kaipapananna ti pannakapukaw ti negosio ti maysa,” kuna ni Satoshi. “Dayta ti maysa a kaso ti ‘kumagat wenno sika ti makagat.’ Ti pagsasao iti negosio a ta no saanka a talaga nga okupado mabalin a sika ti bangkaruta.” Gapuna inabutna ti dua a tawen agraman ti dakkel a panagregget, sakbay a ti kamaudiananna naikeddeng met laeng ni Satoshi ti maaddaan iti panagadal ti Biblia.
Kalpasan ti panagbalinna a maysa kadagiti Saksi ni Jehova, inlakona ti dua kadagiti paglakuanna ket isu ti addaan kadagiti ‘manangipangulo ti paglakuan’ a mangaywan kadagiti dua pay. Nupay agtartrabaho ni Satoshi iti dua wenno tallo nga aldaw laeng iti makabulan kas maysa nga accountant ken konsultant, kunana: “Kaskasdi nga addaanak pay met laeng ti supisiente a pamastrekan. Kayatko nga iyununa ti panagserbik ken Jehova a Dios.” Itan isun ti mangsursurot iti pudpudno a propesion iti amin tiempo a ministerio, nga agserserbi kas maysa a payunir. Isu ken ti pamiliana ti addaan iti nasayaat nga irarang-ay iti naespirituan.
Ti Propesionna ti Nangtulong Kenkuana a Nakasarak iti Dios
Ni Hiroshi agtartrabaho idiay pagpandayan ti pamiliana. Ngem ti pudpudno nga interesna isu ti panagretrato kadagiti panamarsua. Isut’ nagbalin a nakalalaing iti dayta ta dadduma kadagiti retratona kadagiti insekto ti naipabpablaak. Idi agtawenen ti 29, isut’ addan iti propesional a panagretrato kadagiti panamarsua.
“Manipud iti panagad-adalko kadagiti insekto,” malagip ni Hiroshi, “Napanunotko a no talaga nga adda Dios, nalabit nga isu addaan nasayaat a rikna a mamagpakatawa. Dayta ti nangiturong iti panagduaduak iti teoria ti ebolusion, ket nagbalinak nga interesado bassit iti Biblia.”
Iti maysa nga aldaw iti panawen ti kalam-ekna, dua a Saksi ti simmarungkar ken Hiroshi. “Idi immawatak ti dua a magasin kadakuada a naglaon kadagiti artikulo maipapan kadagiti an-animal, tinukonandak ti panagadal ti Biblia iti pagtaengak,” kuna ni Hiroshi. “Impatok a yantangay diak met mapan iti maysa a simbaan tapno agadal, saanakto nga agbalin a maysa a miembro. Gapuna immanamongak.” Nupay isut’ nakellaat iti naad-adalna maipapan iti kuna ti Biblia maipapan iti Namarsua, dagdagus nga inawatna dayta. Ti ayatna iti panamarsua nagbalin a maikadua laeng iti panagayatna ken Jehova.
Itan supsuportaran ni Hiroshi ti pamiliana kas maysa a free-lance a potograpo. Ngem ti pudpudno a propesionna isu ti panagbalinna nga amin-tiempo a ministro.
Nasarakanda ti Banag a Nasaysayaat
Ti listaan kadagiti propesional agtultuloy nga umatiddog idiay Japan isu a nangbalbaliw ti panagbiagda—ket, no maminsan, ti panggedanda—idi a naammuanda ni Jehova ken ti pangpanggepna. Ti ranggoda ramanenna dagiti doktor, dentista, arketekto, computer programmers ken dagiti system designers, mannursuro, beterenario, barbero, ehekutibo, ken dadduma pay.
Iti naminsan, amin dagitoy a propesional ti dedikado a naan-anay iti trabahoda. Apaman a naammuanda a daytoy a sistema dagiti bambanag ket dandanin ti panagpatinggana, nangaramidda iti maysa a propesional a pangngeddeng. Inkabilda dagiti panggedanda iti umiso a luglugarda ket rinugianda a suroten ti banag a nasaysayaat—ti Pagarian ti Dios ken dagiti karkarina a pangbendision. (Mateo 6:33) Babaen ti panangibbatda iti dati nga impagarupda a kas ti kapaut ti panagbiag a panggedanda, nagbalindan a propesional iti baro a tay-ak. Innaladan ti kapaut ti panagbaiag a panggedan kas dagiti payunir nga ad-adipen ti Kangatuan, ni Jehova a Dios.
[Ladawan iti panid 23]
Ti kampeon a siklista a ni Takafu Yamaguchi